មីយ៉ាន់ម៉ា ចាប់ផ្តើមការបោះឆ្នោតដំណាក់កាលទី២ ក្រោយដំណាក់កាលដំបូង មានចំនួនអ្នកចូលរួមទាប

មីយ៉ានម៉ា៖ នាថ្ងៃអាទិត្យទី១១មករា ប្រជាជននៅប្រទេសមីយ៉ាន់ម៉ាដែលកំពុងមានសង្គ្រាមស៊ីវិលនិងការបំបែកខ្លួន បាននាំគ្នាទៅតម្រង់ជួរ ដើម្បីទម្លាក់សន្លឹកឆ្នោតក្នុងដំណាក់កាលទី២ ។ដំណើរការបោះឆ្នោតសកលរៀបចំដោយរដ្ឋាភិបាលយោធា បន្ទាប់ពីដំណាក់កាលដំបូង បានមើលឃើញចំនួនអ្នកចូលរួមបោះឆ្នោតដ៏ទាបក្នុងពេលការបោះឆ្នោតសកលនេះ ត្រូវបានរិះគន់យ៉ាងទូលំទូលាយថា គឺគ្រាន់តែជាឧបករណ៍ ដើម្បីផ្តល់ភាពស្របច្បាប់ដល់របបសឹកប៉ុណ្ណោះ។ 

 ទីភ្នាក់ងារព័ត៌មាន Reuters នាថ្ងៃអាទិត្យ ទី១១ ខែមករា ឆ្នាំ២០២៦បានឲ្យដឹងថា៖ប្រទេសមីយ៉ាន់ម៉ា បានធ្លាក់ក្នុងជម្លោះរ៉ាំរ៉ៃ ចាប់តាំងពីយោធាបានផ្តួលរំលំរដ្ឋាភិបាលស៊ីវិល បន្ទាប់ពីរដ្ឋប្រហារកាលពីឆ្នាំ២០២១ ហើយបានចាប់ឃុំខ្លួនមេដឹកនាំរដ្ឋាភិបាលនោះ គឺលោកស្រី អោងសាន ស៊ូជី ។

គណបក្ស NLD របស់លោកស្រី ស៊ូជី ដែលទទួលបានជ័យជម្នះភ្លូកទឹកភ្លូកដី ក្នុងការបោះឆ្នោតឆ្នាំ២០២០ ត្រូវបានរំលាយចោល រួមជាមួយគណបក្សជាច្រើនផ្សេងទៀត ដែលប្រឆាំងរបបយោធា។ មិនតែប៉ុណ្ណោះ ក្រុមឧទ្ទាមប្រដាប់អាវុធ ដែលកំពុងប្រយុទ្ធជាមួយយោធា ក៏បានបដិសេធចូលរួមដំណើរការបោះឆ្នោតផងដែរ។ អង្គការសហប្រជាជាតិ រួមជាមួយក្រុមប្រទេសលោកខាងលិច និងក្រុមឃ្លាំមើលសិទ្ធិមនុស្សជាច្រើន យល់ឃើញថា ការបោះឆ្នោតនេះគឺជាការបោះឆ្នោតក្លែងក្លាយមួយ ដែលមិនប្រព្រឹត្តទៅដោយសេរី យុត្តិធម៌ ឬជឿជាក់បានឡើយ។

គណបក្ស Union Solidarity and Development Party ដែលគាំទ្រដោយយោធា កំពុងទទួលសំឡេងគាំទ្រនាំមុខគេ ក្នុងគម្លាតដ៏ធំមួយ ក្រោយឈ្នះបានអាសនៈចំនួន៩០ ក្នុងចំណោម១០២ ដែលត្រូវបានដាក់ឱ្យប្រកួតប្រជែងយក ក្នុងដំណាក់កាលដំបូងនៃការបោះឆ្នោតកាលពីថ្ងៃទី២៨ ខែធ្នូ ឆ្នាំ២០២៥ ដែលបានមើលឃើញ អ្នកទៅចូលរួមបោះឆ្នោតត្រឹម ៥២.១៣ភាគរយប៉ុណ្ណោះ ដែលជាអត្រាដ៏ទាបមួយ ធៀបនឹងការបោះឆ្នោតកាលពីឆ្នាំ២០២០ និងឆ្នាំ២០១៥។

គួរបញ្ជាក់ថា ការបោះឆ្នោតជុំចុងក្រោយ នឹងប្រព្រឹត្តទៅនៅថ្ងៃទី២៥ ខែមករា។ សរុបទាំង៣ដំណាក់កាល ការបោះឆ្នោតនឹងធ្វើឡើងនៅតាមក្រុងចំនួន២៦៥ ក្នុងចំណោម៣៣០ក្រុង ក្នុងនោះរួមមានទាំងតំបន់ដែលរបបសឹក មិនមានការគ្រប់គ្រងពេញលេញទាំងស្រុងឡើយ។ ម៉្យាងវិញ កាលបរិច្ឆេទសម្រាប់ប្រកាសលទ្ធផលបោះឆ្នោត ក៏មិនទាន់ត្រូវបានប្រកាសឱ្យដឹង ជាផ្លូវការទេ។