អាមេរិកដាក់ទណ្ឌកម្មលើប្រទេសតួគីព្រោះទិញមីស៊ីលរុស្ស៊ីs៤០០
02-November-2023 / ព័ត៌មានអន្តរជាតិ
អាមេរិក៖ កាលពីថ្ងៃចន្ទទី១៤ធ្នូរដ្ឋបាលអាមេរិករបស់លោកដូណាល់ ត្រាំបានសម្រេចដាក់ទណ្ឌកម្មតួកគីដោយសាប្រទេសតួកគីដែលជាសមាជិកអង្គការអូតង់ នៅតែ ចចេស ទិញ និងប្រើប្រាស់ប្រព័ន្ធខែលមីស៊ីលរុស្ស៊ី S-400 ដែលមានតម្លៃ ជាង ២,៥ ពាន់លានដុល្លារ ។ អាមេរិកធ្លាប់បានព្រមានតាំងពីដំបូងទីម្ល៉េះ ថា កុំឲ្យតួកគី ទិញប្រព័ន្ធខែលមីស៊ីលរុស្ស៊ី ព្រោះវា មិន សមស្របនឹងគោលនយោបាយ ប្រព័ន្ធការពាររបស់អូតង់ ដែលតួកគីជាសមាជិកនោះទេ។
អាមេរិកយល់ថា នៅពេលតួកគី អនុញ្ញាតឲ្យមានប្រព័ន្ធខែលមីស៊ីលរបស់រុស្ស៊ី នៅក្នុងកងទ័ពតួកគី នោះ រុស្ស៊ីនឹងអាចមានឱកាសខ្ពស់ ក្នុងការស្វែងយល់ពីអាថ៌កំបាំងបច្ចេកវិទ្យាដ៏ទំនើបរបស់យន្តហោះចម្បាំងអាមេរិក F-35 ដែលតួកគី កំពុងកុម្ម៉ង់ទិញ។ ម្យ៉ាងទៀត ប្រព័ន្ធខែលមីស៊ីលរុស្ស៊ី ក្នុងទឹកដីតួកគី នឹងអាចធ្វើឲ្យរុស្ស៊ី ចូលលួច យកទិន្នន័យ សម្ងាត់ និងយុទ្ធសាស្ត្រកងទ័ពរបស់អាមេរិក និងរបស់សម្ព័ន្ធមិត្តអូតង់។កន្លងមក លោកដូណាល់ ត្រាំ គ្រាន់តែបានសម្រេចផ្អាក លែងឲ្យតួកគី ចូលរួម នៅក្នុងកម្មវិធីផលិតយន្តហោះចម្បាំងរបស់អាមេរិកF35ដ៏ទំនើបចុងក្រោយ ដែលតួកគី បានកុម្ម៉ង់ទិញ តែប៉ុណ្ណោះ។
ប្រមុខការបរទេសអាមេរិក Mike Pompeo បាននិយាយថា វា ជាសញ្ញាបញ្ជាក់ យ៉ាងច្បាស់ថា អាមេរិក មិនអត់ឱន មិនយោគយល់ ឲ្យមានទំនាក់ទំនង ការដោះដូរទាំងឡាយណាដែលផ្តល់ប្រយោជន៍ដល់ក្រសួងការពារជាតិរុស្ស៊ី និងក្រុមស៊ើបការណ៍សម្ងាត់រុស្ស៊ីនោះទេ។ការដាក់ទណ្ឌកម្មលើតួកគី ផ្អែកតាមច្បាប់ ដែលសភាអាមរិក បានបោះឆ្នោត កាលពីឆ្នាំ២០១៧ ដែលនិយាយពីយុទ្ធសាស្ត្រប្រឆាំងគូសត្រូវ តាមរយៈ ការដាក់ទណ្ឌកម្ម។ លើកនេះ អាមេរិកបានដាក់ទណ្ឌកម្មសេដ្ឋកិច្ចលើទីភ្នាក់ងាររដ្ឋាភិបាលតួកគី ដែលទទួលបន្ទុកទិញ លក់អាវុធ ហៅកាត់ថា SSB។ ទៅតាមទណ្ឌកម្មរបស់អាមេរិក ស្ថាប័នរបស់រដ្ឋាភិបាលតួកគីមួយនេះ នឹងត្រូវហាមឃាត់មិនឲ្យមានសិទ្ធិនាំចេញសព្វាវុធទៅបរទេស ចំណែក ប្រធាន និងមន្ត្រីប៉ុន្មាននាក់ផ្សេងទៀត របស់ទីភ្នាក់ងាររដ្ឋាភិបាលតួកគី ក៏ត្រូវជាប់ទណ្ឌកម្មសេដ្ឋកិច្ច ហើយនិងត្រូវហាមឃាត់ មិនឲ្យចូលទឹកដីអាមេរិក។
សូមបញ្ជាក់ថានៅក្រោយ ទិញ ទទួលបានខែលមីស៊ីលរុស្ស៊ី លោកប្រធានាធិបតី តួកគី រេសេប តាយីប អ៊ែរដូហ្កាន បានថ្លែងនៅ មុខសភាតួកគីថា វាមិនមែនជាខុសទាស់នោះទេ ដែលប្រទេសមួយ ត្រូវរកមធ្យោបាយដ៏សមរម្យមួយដើម្បី សន្តិសុខជាតិ។ កន្លងមក ប្រធានាធិបតី តួកគី នៅអះអាងថា លោកមិនជឿថា អាមេរិកហ៊ានដាក់ទណ្ឌកម្មលើតួកគីនោះទេ ព្រោះថាតួកគី ជាសម្ព័ន្ធមិត្តសំខាន់របស់អាមេរិក ក្នុងអង្គការអូតង់ និងនៅក្នុងតំបន់ដើមបូព៌ា ដែលអាមេរិក ត្រូវការចាំបាច់ដើម្បី ទប់ទល់នឹងឥទ្ធិពលរបស់អ៊ីរ៉ង់។
ដើម្បី ហេតុផលសន្តិសុខជាតិ តួកគីត្រូវការប្រព័ន្ធខែលមីស៊ីលរុស្ស៊ី ដែលមានសមត្ថភាព ខ្ពស់ និងមានតម្លៃថោក បើប្រៀបធៀបនឹងប្រព័ន្ធខែលមីស៊ីលរបស់អាមេរិក Patriot។ តួកគីបានឃើញ ប្រសិទ្ធិភាពរបស់ប្រព័ន្ធខែលមីស៊ីល រុស្ស៊ី នៅក្នុងសង្គ្រាមប្រទេសស៊ីរី ជាទីដែលប្រព័ន្ធខែលមីស៊ីលរុស្ស៊ី បានជួយការពារទីតាំងរបស់រដ្ឋាភិបាលក្រុងដាម៉ាស ពីការវាយប្រហារផ្លូវអាកាសរបស់សម្ព័ន្ធអន្តរជាតិ ដឹកនាំដោយអាមេរិក។ ប្រព័ន្ធខែលមីស៊ីល របស់រុស្ស៊ី ប្រភេទ S-400ឆ្លើ យតបគ្រប់លក្ខណៈចង់បានរបស់តួកគី ព្រោះវាគ្របដណ្តប់ការពារទាំងស្រុង ដែនអាកាសតួកគី ពីការវាយប្រហារពីខាងក្រៅ។
គេជឿដែរថា រដ្ឋាភិបាលតួកគី បានប្រញាប់ទិញ ខែលមីស៊ីលរុស្ស៊ី ឲ្យបាននៅឆ្នាំ ២០២០ ដើម្បី បំពាក់ឲ្យកងទ័ពជើងអាកាស តួកគី ដែលបានចុះខ្សោយ ដោយសារតែ យុទ្ធនាការបោសសម្អាតទាហានក្បត់ នៅក្រោយរដ្ឋប្រហារមិនបានសម្រេច កាលពីឆ្នាំ ២០១៦។ការទិញប្រព័ន្ធខែលមីស៊ីលរុស្ស៊ី លើកនេះ តួកគី ក៏ចង់បញ្ជាក់ពីឯករាជ្យភាព ក្នុងការការពារទឹកដីរបស់ខ្លួន ប្រឈមនឹងការវាយប្រហារពីខាងក្រៅ។ ថ្មីៗនេះ តួកគីបានប្រឈមមុខជាមួយសម្ព័ន្ធមិត្តអឺរ៉ុបផ្សេងទៀតពិសេសប្រទេសក្រិក នៅក្នុងជម្លោះ ដណ្តើម តំបន់ ជីករកប្រេង នៅសមុទ្រមេឌីទែរ៉ាណេជាដើម។
នៅពេលសម្ព័ន្ធមិត្ត ២ឈ្លោះគ្នា អ្នកដែលខាត គឺតួកគី និងសហរដ្ឋអាមេរិក ចំណែកអ្នកដែលចំណេញពីរឿងនេះ គ្មានអ្នកណាក្រៅតែពីរុស្ស៊ីនោះទេ។
អាមេរិកខាត ព្រោះដោយសារតែទណ្ឌកម្មលើកនេះ ក្រុមហ៊ុនអាមេរិកខកខាន មិនអាចបន្តកម្មវិធីផលិតយន្តហោះចម្បាំង F35 បានលឿន ព្រោះថា គ្រឿងបរិក្ខា មួយចំនួនធំ សម្រាប់ដំឡើងយន្តហោះចម្បាំងអាមេរិក ត្រូវផលិត ឡើងក្នុងទឹកដី តួកគី។ ម្យ៉ាងទៀត ដោយសារទណ្ឌកម្មលើកនេះ អាមេរិក និងតួកគី ដែលជាសម្ព័ន្ធមិត្តដែលត្រូវសហការគ្នា នៅក្នុងបេសកកម្មរបស់អង្គការអូតង់ នឹងមិនអាចមើលមុខគ្នា ចំនោះទេ។តួកគីឯណោះវិញ នឹងខាតបង់ខ្លាំង ព្រោះទណ្ឌកម្ម របស់អាមេរិក នឹងហាម មិនឲ្យទីភ្នាក់ងាររដ្ឋាភិបាលតួកគី លក់ នាំចេញអាវុធទៅបរទេស។ ការនេះនឹងធ្វើឲ្យប៉ះពាល់ខ្លាំង ដល់វិស័យនាំចេញ អាវុធរបស់តួកគីទៅបរទេស ដូចជាទៅ ប្រទេសលីប៊ី ស៊ីរី ឬទៅអាស៊ែបៃហ្សង់ ជាដើម ជាទីតួកគីចូលរួមលូកដៃជួយ ភាគីជម្លោះ ក្នុងសង្គ្រាមស៊ីវិល។
មកមើលរុស្ស៊ីវិញ ដឹងតែចំណេញច្រើន ព្រោះថា បើសិនអាមេរិកដាក់ទណ្ឌកម្ម សូម្បីតែតួកគី ដែលជាសម្ព័ន្ធមិត្តរបស់ខ្លួន នោះ រុស្ស៊ីនឹងប្រមូល ទាក់ទាញ បានមិត្តមួយម្នាក់ទៀត របស់សត្រូវឲ្យ មកធ្វើជាមិត្តរបស់ខ្លួន។ រុស្ស៊ីដឹងថា តួកគី ឥលូវកំពុងត្រូវចោមរោម ដាក់ទណ្ឌកម្មពីគ្រប់ទិស ពីអាមេរិក និងពីអឺរ៉ុប។ នេះជាឱកាសល្អមួយទៀត សម្រាប់រុស្ស៊ី បើសិនរុស្ស៊ី អូសទាញបានតួកគី ដែលជាសមាជិករបស់អូតង់ ឲ្យមកនៅខាងខ្លួន ដើម្បី ទប់ទល់នឹងប្រទេសលោកខាងលិច។ទោះជាយ៉ាងណារដ្ឋមន្ត្រីការបរតេសអាមេរិកមិនបានអើពើឡើយនូវសំណើសុំជួបចរចារពីភាគីតួគី៕
