ទិវាគ្រូបង្រៀន៥តុលារដ្ឋាភិបាលដាក់ចេញការពង្រឹងការងារខាងគ្រូក្រៅរដ្ឋាភិបាលសុំឲ្យគិតពីជីវភាពគ្រូនិងប្តឹងអន្តរជាតិរៀងទឹកដី!

ភ្នំពេញ៖ទិវាគ្រូបង្រៀន ៥ តុលា ឆ្នាំ២០២៦ ត្រូវបានប្រារព្ធឡើងយ៉ាងឱឡារិក ព្រឹកថ្ងៃទី៥ ខែតុលា ឆ្នាំ២០២៦ នៅវិទ្យាស្ថានជាតិអប់រំ ក្រោមអធិបតីភាព លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ព្រមទាំងមានការចូលរួមពីតំណាងអង្គការ UNESCO ថ្នាក់ដឹកនាំ និងលោកគ្រូ-អ្នកគ្រូទូទាំងប្រទេស។ក្រោមប្រធានបទ «គ្រូបង្រៀន ជាសសរស្តម្ភនៃគរុកោសល្យទំនើប ដើម្បីកសាងធនធានមនុស្សសតវត្សរ៍ទី២១» ។ 

លោករដ្ឋមន្ត្រី បានសង្កត់ធ្ងន់ថា ក្នុងបរិបទដែលបញ្ញាសិប្បនិម្មិត (AI) កំពុងវិវត្តយ៉ាងលឿន គ្រូបង្រៀនត្រូវប្រើប្រាស់គរុកោសល្យទំនើប ដើម្បីបណ្តុះបំណិនសតវត្សរ៍ទី២១ ដល់សិស្សានុសិស្ស រួមមាន៖ ការគិតស៊ីជម្រៅ ការដោះស្រាយបញ្ហា ភាពច្នៃប្រឌិត និងការធ្វើការជាក្រុម ដែលជាបំណិនស្នូលមិនអាចជំនួសបានដោយ AI ឡើយ។ ភាពជោគជ័យនៃការបញ្ចប់ឆ្នាំសិក្សា ២០២៥-២០២៦ កន្លងទៅនេះ បានស្តែងឡើងយ៉ាងច្បាស់តាមរយៈលទ្ធផលល្អប្រសើរនៃការប្រឡងបាក់ឌុប និងលទ្ធផលតេស្តអន្តរជាតិ PISA 2025 ព្រមទាំង SEA-PLM 2024។

ដើម្បីធានានិរន្តរភាពនៃការអភិវឌ្ឍប្រព័ន្ធអប់រំ លោកហង់ជួនណារ៉ុនបានដាក់ចេញនូវទិសដៅអាទិភាពចំនួន ៥ រួមមាន៖ ១. រក្សានិរន្តរភាពនៃកំណែទម្រង់ (មិនមានដំណោះស្រាយផ្លូវកាត់) ២. ពង្រីកកំណែទម្រង់សាលារៀនទាំងមូល ដែលជួយឱ្យពិន្ទុ PISA ខ្ពស់ ៣. លើកកម្ពស់ស្តង់ដាវិជ្ជាជីវៈគ្រូ និងការប្រើប្រាស់បច្ចេកវិទ្យាក្នុងការបង្រៀន ៤. ដោះស្រាយគម្លាតសិក្សារវាងសាលាក្រុង និងជនបទ ៥. ពង្រឹងភាពជាអ្នកដឹកនាំ និងការចូលរួមពីគ្រប់ភាគីពាក់ព័ន្ធ។

ក្នុងពិធីក្រសួងអប់រុំក៏បានរៀបចំពិធីបំពាក់គ្រឿងឥស្សរិយយសមុនីសារភ័ណ្ឌ ថ្នាក់ ធិបឌិន ជូនបុគ្គលិកអប់រំឆ្នើម ១១រូប ដែលបង្រៀនសិស្សទទួលបានពិន្ទុខ្ពស់ជាងគេទាំង ១១មុខវិជ្ជាក្នុងការប្រឡងបាក់ឌុប ប្រគល់ពានរង្វាន់ «វិទ្យាល័យសិស្សពូកែ» ព្រមទាំងប័ណ្ណសរសើរជូនដល់សាលារៀនគំរូដែលអនុវត្តតេស្តអន្តរជាតិ PISA-2025 បានយ៉ាងល្អប្រសើផងដែរ។

ដោយឡែកសម្រាប់សមាគមគ្រូបង្រៀនកម្ពុជាឯករាជ្យដែលជាអង្គការនៅក្រៅរដ្ឋាភិបាលវិញបានប្រមូលផ្ដុំគ្នានៅខាងមុខទីសា្នក់ការ ដើម្បីប្រារព្ធ«ទិវាគ្រូបង្រៀនពិភពលោក» ក្នុងរាជធានីភ្នំពេញ ហើយពួកគេក៏បាននាំញត្តិផ្ញើជូនរដ្ឋសភា រាជរដ្ឋាភិបាល និងក្រសួងអប់រំ ដើម្បីឱ្យជួយពិនិត្យ និងដោះស្រាយ បញ្ហាចំនួន៨ចំណុចសំខាន់ៗ ក្នុងនោះមាន៖

១ដំឡើងប្រាក់បៀវត្សមូលដ្ឋានឱ្យបាន១/៤នៃប្រាក់ខែតំណាង សូមផ្តល់ប្រាក់សោធននិវត្តន៍ដល់គ្រូបង្រៀនចូលនិវត្តន៍គឺត្រូវគិតប្រាក់ខែគោលនិងបូកប្រាក់បំណាច់មុខ ងារ រួមជាមួយប្រាក់បន្ទាប់បន្សំ។

២សូមបញ្ចុះតម្លៃប្រេងឥន្ធនៈមកត្រឹមតម្លៃ៤០០០រៀលក្នុងមួយលីត្រ និងបញ្ចុះតម្លៃទំនិញលើទីផ្សារ មកត្រឹមតម្លៃមួយសមរម្យ។៣ លុបបំបាត់អំពើពុករលួយក្នុងវិស័យអប់រំ។

៤ បញ្ឈប់ការរើសអើងជាមួយសមាគម និងផ្តល់សិទ្ធិសេរីភាពឲ្យគ្រូបង្រៀនបង្កើតសហជីព។៥ សូមពន្យារពេលឲ្យពលរដ្ឋក្នុងការសងប្រាក់ធនាគាររយៈពេល២ឆ្នាំ។៦ សូមផ្តល់សិទ្ធិសេរីភាពជូនលោកគ្រូ រ៉ុង ឈុន និងដោះលែង អ្នកនយោបាយ កញ្ញា សេង ច័ន្ទធាវី រួមទាំង អ្នកជាប់ឃុំមនសិការ ទាំងអស់ឲ្យមានសេរីភាពឡើងវិញ និង

៧ សូមរាជរដ្ឋាភិបាលកម្ពុជាលើកយកបញ្ហាសៀមឈ្លានពានកម្ពុជា ប្តឹងទៅតុលាការអន្តរជាតិ និងសុំកិច្ច អន្តរាគមន៍ពីសហប្រធាននៃកិច្ចព្រមព្រៀងសន្តិភាពទីក្រុងប៉ារីស ស្តីពីដំណោះស្រាយកម្ពុជា។ញត្តិទាំងនោះត្រូវបានអភិបាលរងរាជធានីភ្នំពេញ លោក សុខ ពេញវុធ បានទៅទទួលនៅមុខទីស្នាក់ការកណ្តាលសមាគមគ្រូបង្រៀនកម្ពុជាឯករាជ្យ តែម្តង នៅថ្ងៃទី៥ ខែតុលា ឆ្នាំ២០២៦។