រថយន្តដឹកអ្នកទោស បុករថយន្ត Ford បណ្ដាលឲ្យរបួសមន្រ្តី ៣នាក់ នៅកំណាត់ផ្លូវជាតិលេខ៦

កំពង់ធំ៖ករណីគ្រោះថ្នាក់ចរាចរណ៍រវាងរថយន្តដឹកអ្នកទោស របស់ពន្ធនាគារខេត្តសៀមរាប បុកជាមួយរថយន្ត Ford បណ្ដាលឲ្យរបួសធ្ងន់មន្រ្តីម្នាក់ និង២នាក់ទៀតស្រាលនៅវេលាម៉ោង១២៖២០នាទីរសៀល ថ្ងៃទី១៩ ខែតុលា ឆ្នាំ២០២៦ នៅលើកំណាត់ផ្លូវជាតិលេខ៦អា ស្ថិតក្នុងភូមិត្រាច ឃុំកំពង់ចិនជើង ស្រុកស្ទោង ខេត្តកំពង់ធំ ។ 

សមត្ថកិច្ច បានប្រាប់ឲ្យដឹងថា រថយន្តសាំយ៉ុង ពណ៌ទឹកប្រាក់ ពាក់ផ្លាកលេខ ភ្នំពេញ 2AL-2117 ជារបស់ពន្ធនាគារខេត្តសៀមរាប បានធ្វើដំណើរ ក្នុងទិសដៅពីទិសខាងកើតទៅទិសខាងលិច បើកបរដោយលោក ខេង កាន់ អាយុ៣៨ឆ្នាំ រងរបួសស្រាល។ ចំណែកអ្នករួមដំណើរពីរនាក់ទៀត ជាមន្ត្រីនគរបាល គឺលោក ប៉ុល វិទ្ធី អាយុ៥៣ឆ្នាំ រងរបួសធ្ងន់ និងលោក ចាន់ ខាវី អាយុ២៨ឆ្នាំ រងរបួសស្រាល។ រីឯអ្នកទោសដែលស្ថិតនៅលើរថយន្តនេះ មិនបានរងរបួសនោះទេ ។

ដោយឡែក រថយន្តម៉ាក Ford ពណ៌ស ពាក់ផ្លាកលេខភ្នំពេញ 2BS-7879 បើកបរដោយលោក ខូង ទីន អាយុ៦៥ឆ្នាំ បានធ្វើដំណើរពីទិសខាងលិចទៅទិសខាងកើត ហើយអ្នកបើកបរមិនបានរងរបួសឡើយ ។

តាមការសន្និដ្ឋានបឋមរបស់សមត្ថកិច្ច គ្រោះថ្នាក់នេះបណ្តាលមកពីអ្នកបើកបររថយន្តទាំងពីរគ្រឿង មិនប្រកាន់ស្តាំរៀងៗខ្លួន ទើបបណ្តាលឱ្យបុកគ្នាបែបនេះ ។បច្ចុប្បន្ន អ្នករងរបួសទាំង៣នាក់ ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្ទោង រីឯសមត្ថកិច្ចកំពុងរៀបចំយករថយន្តដែលពាក់ព័ន្ធទៅរក្សាទុក និងបន្តនីតិវិធីតាមច្បាប់ ៕