វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 6211 នាក់
ម្សិលមិញ 5544 នាក់
សរុប 13947308 នាក់
ប្រទេសអ៊ីស្រាអែល៖ លោក បេនចាមីននេតាន់ យ៉ាហ៊ូ នាយករដ្ឋមន្ត្រីចាំផ្ទះរបស់ប្រទេសអ៊ីស្រាអែលកាលពីថ្ងៃពុធ ទី១ ខែមករា បានស្នើសុំសភាផ្តល់នូវអភ័យឯកសិទ្ធិសភាក្នុងពេលដែលរងការចោទប្រកាន់ពីបទ ពុករលួយជាច្រើនហើយកំពុងត្រូវបានតុលាការចាត់ការ។
គិតចាប់ពីឆ្នាំ១៩៩៦មកលោក នេតាន់ យ៉ាហ៊ូ ត្រូវបានគេចាត់ទុកជានាយករដ្ឋមន្ត្រីដែលកាន់អំណាចយូរជាងគេបំផុតរបស់អ៊ីស្រាអែលដែលបច្ចុប្បន្ននេះជានាយករដ្ឋមន្ត្រីចាំផ្ទះដែល កំពុងប្រយុទ្ធតស៊ូ ដើម្បីការរស់រានផ្នែកនយោបាយលើរណសិរ្សពីរ គឺការចោទប្រកាន់ពីបទពុករលួយដោយតុលាការ និងការប្រឆាំងចេញពីគណបក្សកណ្តាលថ្មីមួយជាគូប្រឆាំងក្នុងសភាដែលមិនទាន់ពេញសិទ្ធ។
ការស្នើសុំអភ័យឯកសិទ្ធិនេះ ត្រូវបានគេគិតថាលោកនេតាន់ យ៉ាហ៊ូដែលមិនអាចរកសម្លេងគាំទ្រដើម្បីក្លាយជានាយរដ្ឋមន្ត្រីអាណត្តិថ្មីបានមានបំណង ពន្យាពេលនៃការចាប់ផ្តើមនីតិវិធីរបស់តុលាការ ព្រោះថាសមាជិកសភា មិនត្រូវបោះឆ្នោតលើបញ្ហានេះទេ រហូតក្រោយការបោះឆ្នោតថ្ងៃទី២ ខែមីនា។
លោក នេតាន់ យ៉ាហ៊ូ បានប្រាប់អ្នកយកព័ត៌មាន នៅក្រុងយេរូសាឡិមថា ការស្នើសុំនេះគឺ “ស្របតាមច្បាប់ និងមានគោលដៅសម្រាប់អនាគតរបស់អ៊ីស្រាអែល” ។ លោក នេតាន់ យ៉ាហ៊ូដែលកាន់ជានាយករដ្ឋមន្ត្រីផងនិងជារដ្ឋមន្ត្រី៣ក្រសួងផ្សេងទៀតផងនោះ ត្រូវបានចោទប្រកាន់កាលពីខែវិច្ឆិកា ពីបទស៊ីសំណូក ការលួចបន្លំ និងការបំពានសេចក្តីទុកចិត្តនៅក្នុងករណីពុករលួយ ចំនួន ៣ ដាច់ដោយឡែកពីគ្នា។
មេដឹកនាំនៃគណបក្សស្តាំនិយម លីគុដរូបនេះដែលមិនអាចរកសម្លេងគាំទ្រក្នុងសភាលើសពី៥០+១ដើម្បីបង្កើតរដ្ឋាភិបាលបាននោះបាន បដិសេធការចោទប្រកាន់ និងបានចោទប្រកាន់ព្រះរាជអាជ្ញា និងប្រព័ន្ធផ្សព្វផ្សាយថាជា«ពួកប្រម៉ាញ់ធ្មប់អាប» ។ ប្រតិកម្មទៅនឹងការប្រកាសរបស់ គូប្រជែងលោកបែនីហ្កាន់( Benny Gantz) ដែលជាមេដឹកនាំនៃគណបក្សកណ្តាលខៀវ និងសបាននិយាយថា “លោក នេតាន់ យ៉ាហ៊ូ ដឹងថាគាត់មានកំហុស” ។ លោកបញ្ជាក់ថា “នៅអ៊ីស្រាអែលគ្មាននរណាម្នាក់ នៅពីលើច្បាប់ទេ” ។គេមិនដឹងថាតើលោកនេតាន់យ៉ាហ៊ូរកបានអភ័យឯកសិទ្ធពីសភាបែបណានោះទេបើទាំងប្រធានសភានិងសមាជិកសភាទាំងអស់មិនទាន់ស្របច្បាប់នៅឡើយ៕