ក្នុងឱកាសបុណ្យណូអែលសម្តេចប៉ាបសុំការអត់អោន គ្រិស្តសាសនិកនៅអ៊ុយក្រែនស៊ីរ៊ីអធិស្ឋានសុំ
05-September-2026 / ព័ត៌មានអន្តរជាតិ
បរទេស៖ បើទោះបីជា សំឡេងស៊ីរ៉ែនរម្លឹកពីការវាយប្រហារតាមអាកាស បានរំខានដល់បរិយាកាសស្ងប់ស្ងាត់និងសន្តិភាពនៅក្នុងព្រះវិហារបែបណាក៏ដោយ ក៏នៅថ្ងៃអង្គារ អ្នកប្រតិបត្តិសាសនាដ៏ស្មោះត្រង់នៃប្រជាជនអ៊ុយក្រែន បានចូលរួមពិធីបុណ្យណូអែល នៅឯវិហារសេនម៉ៃខល (St. Michael) ក្នុងរដ្ឋធានីគីវ (Kyiv) ដោយអធិស្ឋានស្នើសុំជ័យជម្នះ និងសន្តិភាពសម្រាប់ឆ្នាំ ២០២៥។
ប្រជាជនអ៊ុយក្រែនភាគច្រើន ជាគ្រិស្តសាសនិកនិកាយអូស្សូដក់ ហើយនៅឆ្នាំ ២០២៤ ព្រះវិហារសំខាន់ៗរបស់ប្រទេសនេះ បានសម្រេចចិត្តផ្លាស់ប្តូរកាលបរិច្ឆេទនៃការប្រារព្ធពិធីបុណ្យណូអែល ពីថ្ងៃទី ៧ ខែមករា ទៅថ្ងៃទី ២៥ ខែធ្នូវិញ តំណាងឱ្យការប្រារព្ធពិធីស្របតាមប្រទេសលោកខាងលិច និងបញ្ចប់កាលបរិច្ឆេទនៃពិធីបុណ្យឱ្យឃ្លាតឆ្ងាយពីកាលបរិច្ឆេទនៃពិធីបុណ្យតែមួយនេះនៅក្នុងប្រទេសរុស្ស៊ី ។ក្នុងពេលជាមួយគ្នា ទីក្រុងគ្រីយីរីហ៍ (Kryvyi Rih) នៅភាគកណ្តាលប្រទេសអ៊ុយក្រែន បានទទួលរងនូវការវាយប្រហារដោយកាំជ្រួចផ្លោង លើប្លុកអាផាតមិនមួយកន្លែង ដោយសម្លាប់ មនុស្សម្នាក់ និងបង្ករបួសស្នាមដល់មនុស្សចំនួន ១១នាក់ផ្សេងទៀត ។
រហូតមកដល់ថ្ងៃនេះ យោធារបស់រុស្សី បានបន្តប្រតិបត្តិការវាយលុក នៅតាមបណ្តោយខ្សែបន្ទាត់សមរភូមិជួរមុខចម្ងាយ ១,០០០ គីឡូម៉ែត្រនៅភាគខាងកើត និងភាគខាងត្បូងអ៊ុយក្រែន បន្ទាប់ពីចាប់ផ្តើមធ្វើសង្គ្រាមពេញទី ក្នុងរយៈពេលជិត ៣ឆ្នាំ ។
នៅប្រទេសស៊ីរីវិញមានគ្រិស្តសាសនិក បានចូលរួមបុណ្យណូអែលជាលើកដំបូង ចាប់តាំងពីការដួលរលំនៃរបបលោក Assad ដែលជាការធ្វើតេស្តលើពាក្យសន្យារបស់មេដឹកនាំថ្មី ជុំវិញការការពារសិទ្ធិជនជាតិភាគតិចសាសនា នៅស៉ីរី ។ ទីភ្នាក់ងារសារព័ត៌មានរ៉ឺទែ (Reuters )នៅថ្ងៃពុធ ទី២៥ ខែធ្នូ ឆ្នាំ ២០២៤បានឲ្យដឹងថា។ការជួបជុំនៃគ្រិស្តបរិស័ទ ប្រារព្ធឡើងក្រោមការរៀបចំសន្តិសុខយ៉ាងតឹងរ៉ឹង ដោយសារតែក្តីបារម្ភពីអំពើហិង្សាប្រឆាំងទីតាំងគ្រិស្តបរិស័ទ ដោយរថយន្តភីកអាប់ជាច្រើនគ្រឿងរបស់ក្រុមឧទ្ទាម Hayat Tahrir al-Sham (HTS) ចតនៅជុំវិញព្រះវិហារ។ វិហារកាតូលិក Lady of Damascus នៅក្នុងរដ្ឋធានីនៃប្រទេសស៉ីរី ពោរពេញទៅដោយគ្រិស្តបរិស័ទ ទាំងក្មេង ទាំងចាស់។
លោក Ahmed al-Sharaa ដែលកាន់សាសនាឥស្លាមនិកាយស៊ុននីជាមេដឹកនាំបណ្តោះអាសន្ន បានប្រាប់គ្រិស្តសាសនិក និងក្រុមផ្សេងទៀតថា ពួកគេនឹងមានសុវត្ថិភាពនៅក្នុងប្រទេសស៉ីរី ដែលគ្រប់គ្រងដោយ HTS។ លោក Sharaa បានប្រាប់មន្ត្រីលោកខាងលិចថា HTS នឹងមិនស្វែងរកការសងសឹកប្រឆាំងអតីតរបបលោក Assad ដែលឥស្សរជនជាន់ខ្ពស់ភាគច្រើនត្រូវបានដកចេញ គឺជាជនជាតិភាគតិច Alawite ហើយក៏មិនបង្ក្រាបលើជនជាតិភាគតិចផ្សេងទៀតដែរ។
នៅប្រទេសបារាំងវិញ ព្រះវិហារណូត្រដាម (Notre-Dame) ក្នុងទីក្រុងប៉ារីស ប្រទេសបារាំង កាលពីថ្ងៃអង្គារ (ទី២៤ ខែធ្នូ) បានរៀបចំពិធីបុណ្យណូអែល ដែលជាការរៀបចំលើកទី១ បន្ទាប់ពីបើកដំណើរការឡើងវិញ និងមានរយៈពេលជាង ៥ឆ្នាំ ក្រោយទទួលរងនូវការឆាបឆេះ ដែលបំផ្លាញតំបន់តឹកតាងប្រវត្តិសាស្ត្រនេះ ស្ទើតែទាំងស្រុង ។អំឡុងប្រារព្ធពិធីបុណ្យណូអែល បូជាចារ្យ ហ៊ែនរី ដឺ វីលហ្វ្រង់ហ្សេ (Henry de Villefranche) បានពណ៌នាថា ព្រះវិហារនេះ តំណាងឱ្យនិមិត្តរូបនៃសេចក្ដីជំនឿ សាមគ្គីភាព និងក្ដីសង្ឃឹម ។
កាលពីល្ងាចថ្ងៃទី ១៥ ខែមេសា ឆ្នាំ ២០១៩ អគ្គិភ័យស្រាប់តែឆាបឆេះដំបូលព្រះវិហារ ដោយធ្វើឱ្យដំបូលភាគច្រើន បានដួលរលំ ទោះបីជាផ្នែកខ្លះស្ថិតនៅខាងមុខមិនមានបញ្ហាក៏ដោយ ប៉ុន្តែភាគច្រើនស្ទើតែខូចខាតទាំងស្រុង។ រហូតមកដល់ពេលនេះ គេនៅតែមិនដឹងច្បាស់នោះទេ ថាមូលហេតុពិតប្រាកដបណ្ដាលមកពីអ្វីឡើយ ។ ការិយាល័យរបស់ប្រធានាធិបតីបារាំង លោក អ៊ែមម៉ានូអ៊ែល ម៉ាក្រុង (Emmanuel Macron)បានឲ្យដឹងថាក្នុងរយៈពេលជាង ៥ឆ្នាំមកនេះ ព្រះវិហារទទួលបានការបរិច្ចាគពីទូទាំងពិភពលោក ក្នុងរង្វង់ទឹកប្រាក់ប្រមាណជា ៨៤០ លានអឺរ៉ូ ឬប្រហែល ៨៨៨ លានដុល្លារអាម៉េរិក ។
នៅអ៊ីតាលី សម្តេចប៉ាបហ្វ្រង់ស៊ីស (Pope Francis) បានចាប់ផ្ដើមឆ្នាំដ៏បរិសុទ្ធជាផ្លូវការនៅថ្ងៃបុណ្យណូអែល ដោយបើកទ្វាដ៏បរិសុទ្ធនៃព្រះវិហារ សេនផេតធ័រ បាស៊ីលីកា (St. Peter's Basilica) នាបុរីវ៉ាទីកង់។ទ្វារស្ពាន់លង្ហិន តំណាងឱ្យអំពើបាបរបស់មនុស្ស និងសេចក្ដីមេត្តាករុណារបស់ព្រះ ហើយជាចំណុចសំខាន់សម្រាប់ការទទួលឆ្នាំដ៏បរិសុទ្ធ ជូប៊ីលី (Jubilee)។ ព្រឹត្តិការណ៍នៅឆ្នាំនេះ នឹងផ្តោតលើក្តីសង្ឃឹម ក្នុងការប្រឈមមុខនឹងបញ្ហាសកល ដូចជា ភាពអត់ឃ្លាន ភាពក្រីក្រ និងសង្គ្រាម ។
គេរំពឹងថា អ្នកចូលរួមធ្វើធម្មយាត្រាជាង ៣២ លាននាក់ នឹងធ្វើឡើងនៅក្នុងទីក្រុងរ៉ូម ក្នុងអំឡុងពិធីបុណ្យនៃឆ្នាំដ៏បរិសុទ្ធជូប៊ីលី (Jubilee) ដែលនឹងបន្តរហូតដល់ថ្ងៃទី ៦ ខែមករា ឆ្នាំ ២០២៦។ សម្តេចប៉ាបហ្វ្រង់ស៊ីស នឹងសង្កត់ធ្ងន់លើការអភ័យទោស ការរួបរួម និងការបន្ធូរបន្ថយបំណុល ដោយបន្តបេសកកម្មរបស់សាសនាចក្រ ដើម្បីជំរុញទឹកចិត្ត និងក្តីសង្ឃឹមនៅទូទាំងពិភពលោក ៕
