ចរចាណៅអារ៉ាប៊ីសាអ៊ូឌីតអ៊ុយក្រែនព្រមឈប់បាញ់៣០ថ្ងៃតាមសំណើរអាមរិកតែមិនដឹងថាថារុស្ស៊ីព្រមឬអត់?
16-April-2026 / ព័ត៌មានអន្តរជាតិ
អារ៉ាប៊ីសាអ៊ូឌីត៖សហរដ្ឋអាមេរិក កាលពីថ្ងៃអង្គារ ទី១១ ខែមីនា បានយល់ព្រមថានឹងចាប់ផ្ដើមផ្ដល់ជំនួយយោធា និងការចែករំលែកព័ត៌មានស៊ើបការណ៍សម្ងាត់ឱ្យអ៊ុយក្រែនឡើងវិញ បន្ទាប់ពីមានកិច្ចពិភាក្សាមួយដែលទីក្រុងកៀវបាននិយាយថាខ្លួននឹងទទួលយកសំណើបទឈប់បាញ់រយៈពេល៣០ថ្ងៃរបស់សហរដ្ឋអាមេរិក នៅក្នុងសង្គ្រាមជាមួយរុស្ស៉ី។ នេះបើតាម សេចក្ដីថ្លែងការណ៍រួមមួយរវាងប្រទេសទាំង២ ដកស្រង់ចេញផ្សាយដោយទីភ្នាក់ងារសារព័ត៌មាន Reutersបន្ទាប់ពីកិច្ចប្រជុំ៨ម៉ោងជាមួយភាគីអ៊ុយក្រែនក្នុងទីក្រុង Jeddah ប្រទេសអារ៉ាប៊ីសាអូឌីត ។
រដ្ឋមន្ត្រីការបរទេសអាមេរិក លោកម៉ាកូរូប៊ីអូ( Marco Rubio )បាននិយាយថាសហរដ្ឋអាមេរិកនឹងបញ្ជូនសំណើទៅកាន់រុស្ស៉ី ហើយថាការសម្រេចចិត្តយ៉ាងណាគឺអាស្រ័យលើទីក្រុងមូស្គូ។ លោក Rubio ថា «យើងសង្ឃឹមថារុស្ស៉ីនឹង ផ្ដល់ចម្លើយយល់ព្រម ឱ្យបានឆាប់តាមដែលអាចធ្វើទៅបាន ដូច្នេះទើបយើងអាចចាប់ផ្ដើមដំណាក់កាលទី២ ដែលជាកិច្ចចរចាពិតប្រាកដ»។ប្រមុខការទូតអាមេរិករូបនេះបន្ថែមថា សហរដ្ឋអាមេរិកចង់បានកិច្ចព្រមព្រៀងពេញលេញមួយទាំងជាមួយរុស្ស៉ី និងអ៊ុយក្រែន ឱ្យបានឆាប់បំផុតតាមដែលអាចធ្វើទៅបាន។
បន្ទាប់ពី អ៊ុយក្រែន បានយល់ព្រមទទួលយកសំណើបទឈប់បាញ់មួយតាមសំណើរសហរដ្ឋអាមេរិកលោកប្រធានាធិបតី ដូណាល់ ត្រាំ កាលពីថ្ងៃអង្គារ ទី១១ ខែមីនា បាននិយាយថាលោកអាចនឹងជជែកជាមួយប្រធានាធិបតីរុស្ស៉ី លោក វ្ល៉ាឌីមៀ ពូទីន នៅក្នុងសប្ដាហ៍នេះ ។ ភ្នាក់ងារសារព័ត៌មាន AFPបានឲ្យដឹងថាលោក ត្រាំ ក៏បានលើកឡើងផងដែរថាប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី នឹងត្រូវបានអញ្ជើញឱ្យត្រឡប់មកកាន់សេតវិមានសាជាថ្មី បើទោះជាមេដឹកនាំទាំង២ធ្លាប់ឈ្លោះប្រកែកគ្នា កាលពីថ្ងៃទី២៨ ខែកុម្ភៈកន្លងទៅក៏ដោយ។
សម្រាប់រុស្ស៊ីវិញអ្នកនាំពាក្យវិមានក្រឹមឡាំង លោក Dmitry Peskov បានថ្លែងប្រាប់់កាសែតថា វិមានក្រឹមឡាំងកំពុងសិក្សាលទ្ធផលនៃកិច្ចប្រជុំនៅទីក្រុង Jeddah ដោយយកចិត្តទុកដាក់ ហើយនឹងរង់ចាំព័ត៌មានលម្អិតពីរដ្ឋមន្ត្រីការបរទេសអាមេរិក លោក Marco Rubio និងទីប្រឹក្សាសន្តិសុខជាតិរបស់សេតវិមាន លោក Mike Waltzសិន។ជាមួយគ្នានោះដែរសមាជិកព្រឹទ្ធសភាដែលមានឥទ្ធិពលមួយរូបរបស់រុស្ស៉ី នៅថ្ងៃពុធ ទី១២ ខែមីនា បានបញ្ចេញមតិជុំវិញសំណើបទឈប់បាញ់ ដែលព្រមព្រៀងគ្នារវាងក្រុមមន្ត្រីអាមេរិក និងអ៊ុយក្រែន ដោយនិយាយថា កិច្ចព្រមព្រៀងណាមួយស្តីពីសង្គ្រាមអ៊ុយក្រែន នឹងត្រូវតែឈរលើលក្ខខណ្ឌរបស់ទីក្រុងមូស្គូ មិនមែនរបស់ទីក្រុងវ៉ាស៉ីនតោន នោះទេ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃពុធ ទី១២ ខែមីនា ឆ្នាំ២០២៥។
លោក Konstantin Kosachev ប្រធានគណៈកម្មាធិការកិច្ចការអន្តរជាតិនៃព្រឹទ្ធសភារុស្ស៉ី បាននិយាយដូច្នេះថា «រុស្ស៉ីកំពុងតែទទួលបានភាពរីកចម្រើនលើសមរភូមិនៅអ៊ុយក្រែន ដូច្នេះវានឹងជារឿងខុសគ្នាជាមួយរុស្ស៉ី។ កិច្ចព្រមព្រៀងណាក៏ដោយ ត្រូវតែផ្អែកលើលក្ខខណ្ឌរបស់យើង មិនមែនរបស់អាមេរិកនោះឡើយ។ នេះមិនមែនជាការអួតអាងទេ ប៉ុន្តែជាការយល់ដឹងថា កិច្ចព្រមព្រៀងពិតប្រាកដ កំពុងបន្តស្ថិតក្រោមការសរសេរ នៅសមរភូមិមុខនៅឡើយ ហើយវាក៏ជាអ្វីដែលទីក្រុងវ៉ាស៉ីនតោន គួរតែយល់ផងដែរ»។
បន្ទាប់ពីកិច្ចប្រជុំដែលអ៊ុយក្រែនព្រមតាមអាមេរិកឈប់បាញ់៣០ថ្ងៃកាលពីថ្ងៃទី១១មិនាមកនៅថ្ងៃពុធ ទី១២ ខែមីនា យោធាអ៊ុយក្រែន បាននិយាយថា រុស្ស៉ីបានបាញ់មីស៉ីល៣គ្រាប់ និងយន្តហោះដ្រូន១៣៣គ្រឿង ក្នុងការវាយប្រហារកាលពីវេលាយប់កន្លងទៅ ។ ទីភ្នាក់ងារព័ត៌មាន Reutersបានឲ្យដឹងថា៖យោធាអ៊ុយក្រែន បានអះអាងថា កងទ័ពអាកាសរបស់ខ្លួន បានបាញ់ទម្លាក់ដ្រូន៩៨គ្រឿង ហើយ២០គ្រឿងទៀត ត្រូវបានរារាំងមិនឱ្យហោះទៅដល់គោលដៅ តាមរយៈប្រព័ន្ធទប់ទល់សង្គ្រាមអេឡិចត្រូនិក។ ទន្ទឹមគ្នានេះ អាជ្ញាធរអ៊ុយក្រែន បាននិយាយថា ការវាយប្រហារដោយមីស៉ីលបាលិស្ទីគរបស់រុស្ស៉ី លើទីក្រុងកំពង់ផែ Odesa ភាគខាងត្បូង បានបណ្តាលឱ្យមនុស្ស៤នាក់ស្លាប់ និងខូចខាតកប៉ាល់ដឹកជញ្ជូន១គ្រឿង។កាលពីថ្ងៃអង្គារ៍ទី១០មិនា មុនជំនួបរវាងក្រុមមន្ត្រីអ៊ុយក្រែនិងអាមេរិក នៅទីក្រុង Jeddah រុស្ស៉ីក៏បានបាញ់មីស៉ីលបាលិស្ទីគ ១គ្រាប់ រួមជាមួយដ្រូន៧៩គ្រឿង លើអ៊ុយក្រែនផងដែរ ខណៈអ៊ុយក្រែនវិញ បានបើកការវាយប្រហារតាមផ្លូវអាកាសធំបំផុតលើរុស្ស៉ី ជាមួយយន្តហោះដ្រូនរហូតដល់៣៣៧គ្រឿង ជាហេតុបណ្តាលឱ្យមានមនុស្សស្លាប់ យ៉ាងហោច៣នាក់។
ដោយឡែកទាក់ទងនិងកិច្ចព្រមព្រាងសន្តីភាពដែលដាក់ចេញដោយអាមេរិកនេះដែររដ្ឋមន្ត្រីការពារជាតិបារាំងលោក Sébastien Lecornu បានបញ្ជាក់យ៉ាងម៉ឺងម៉ាត់ថា បារាំងនឹងប្រឆាំងរាល់ «ការរំលាយកងទ័ពអ៊ុយក្រែន» ក្រោយបទឈប់បាញ់ ដោយសង្កត់ធ្ងន់ថា យោធាអ៊ុយក្រែនដ៏រឹងមាំគឺចាំបាច់សម្រាប់សន្តិសុខរបស់ប្រទេស។ការប្រកាសនេះ ត្រូវបានធ្វើឡើងក្នុងអំឡុងការជួបជុំដ៏កម្រមួយក្នុងទីក្រុងប៉ារីសកាលពីថ្ងៃទី១១ខែមីនា ដែលជាកន្លែងមេបញ្ជាការការពារជាតិជាង ៣០រូបមកពីអង្គការណាតូ រដ្ឋសមាជិកសហភាពអឺរ៉ុប ជប៉ុន និងអូស្ត្រាលី បានជួបប្រជុំគ្នាដើម្បីពិភាក្សាអំពីជម្លោះដែលកំពុងកើតឡើងនៅអ៊ុយក្រែនដោយគ្មានភាគីអាមេរិក។
រដ្ឋមន្ត្រីការពារជាតិបារាំង បាននិយាយថា៖ «ខ្ញុំសូមបញ្ជាក់ម្តងទៀតនៅទីនេះនៅចំពោះមុខសារព័ត៌មាន។ សន្តិសុខរបស់អ៊ុយក្រែនត្រូវតែមកមុន។ យើងបដិសេធនូវរាល់ការរំលាយកងកម្លាំងអ៊ុយក្រែន»។ លោក Lecornu បានបន្ថែមថា កងទ័ពអ៊ុយក្រែន គឺជាការធានាសន្តិសុខដ៏សំខាន់។ដូចគ្នាដែរប្រធានាធិបតីបារាំងលោក Emmanuel Macron ក៏បានគាំទ្រគំនិតនេះផងដែរ ដោយចាត់ទុកការទាមទាររបស់រុស្ស៊ីចំពោះការរំលាយវត្តមានយោធារបស់អ៊ុយក្រែនថាជារឿងដែលមិនអាចទទួលយកបាន។ លោកបានគូសបញ្ជាក់ថា លក្ខខណ្ឌបែបនេះនឹងធ្វើឲ្យប៉ះពាល់ដល់អធិបតេយ្យភាពរបស់អ៊ុយក្រែន និងមិនអាចអត់ឱនបានសម្រាប់ទាំងអ៊ុយក្រែន និងសម្ព័ន្ធមិត្តរបស់ពួកគេ។
គួរបញ្ជាក់ថា នៅគ្រាដំបូងនៃការឈ្លានពានពេញលេញរបស់ខ្លួន រុស្ស៊ីបានទាមទារឲ្យអ៊ុយក្រែនកាត់បន្ថយកងទ័ពឲ្យនៅសល់ត្រឹម ៥០ ០០០នាក់។ ទន្ទឹមនោះ ទីក្រុងមូស្គូ ក៏បានឲ្យទីក្រុងកៀវ «មិនត្រូវអភិវឌ្ឍ ផលិត ទិញ ឬដាក់ពង្រាយអាវុធមីស៊ីលគ្រប់ប្រភេទ ដែលមានរយៈចម្ងាយឆ្ងាយជាង ២៥០គីឡូម៉ែត្រនៅលើទឹកដីរបស់ខ្លួន»។
អ៊ុយក្រែន បានបញ្ជាក់ម្តងហើយម្តងទៀតពីតម្រូវការធានាសន្តិសុខក្នុងព្រឹត្តិការណ៍បទឈប់បាញ់ក្នុងសង្គ្រាមជាមួយរុស្ស៊ី។ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ពីមុនបានសង្កត់ធ្ងន់ពីតម្រូវការសម្រាប់កងទ័ពចំនួន ១,៥លាននាក់ ប្រសិនបើអ៊ុយក្រែនមិនត្រូវបានអនុញ្ញាតឲ្យចូលទៅក្នុងអង្គការណាតូ។ យោងតាមលោក ហ្សេលេនស្គី កងទ័ពអ៊ុយក្រែនបច្ចុប្បន្នមានចំនួន ៨៨០ ០០០នាក់ ច្រើនជាងគេបំផុតនៅអឺរ៉ុប៕
