អាមេរិកបារាំងអង់គ្លេសបរិហាការធ្វើប្រជាមតិយកដីរបស់ប្រទេសអ៊ុយក្រែនភ្ជាប់ចូលរុស្ស៊ី
26-February-2023 / ព័ត៌មានអន្តរជាតិ
អ៊ុយក្រែន៖ ថ្លែងនៅខាងក្រៅកិច្ចប្រជុំកំពូលរបស់អង្គការសហប្រជាជាតិ នៅថ្ងៃអង្គាររដ្ឋមន្ត្រីការបរទេសសហរដ្ឋអាម៉េរិក លោក Antony Blinken បានលើកឡើងថា សហរដ្ឋអាម៉េរិកនឹងមិនទទួលស្គាល់ផែនការធ្វើប្រជាមតិរបស់រុស្ស៊ី នៅតាមតំបន់ខ្លះរបស់អ៊ុយក្រែននោះឡើយ ។លោករដ្ឋមន្ត្រី Blinken មានប្រសាសន៍ ជាមួយនឹងរដ្ឋមន្ត្រីការបរទេសអង់គ្លេស លោក James Cleverly ថា "សូមធ្វើការពន្យល់ខ្ញុំឱ្យយល់ជាងនេះអំពីដំណើរការធ្វើប្រជាមតិ ហើយប្រសិនបើរុស្ស៊ី យកលទ្ធផលប្រជាមតិឡើងមកគឺគ្រាន់តែដើម្បីបញ្ចូលទឹកដីអ៊ុយក្រែនជាឧបសម្ព័ន្ធរបស់រុស្ស៊ីនោះទេ សហរដ្ឋអាម៉េរិកនឹងមិនទទួលស្គាល់ឡើយ" ។ លោករដ្ឋមន្ត្រី Blinken បានបន្ថែមដោយខ្លីៗថា សកម្មភាពរបស់ប្រធានាធិបតីរុស្ស៊ី បានស្តែងចេញពី "ការប្រមាថមើលងាយដល់អង្គការសហប្រជាជាតិ"។
កាលពីថ្ងៃអង្គារ ទី២០ ខែកញ្ញា ដដែលនេះដែរ រុស្ស៊ីបានចាត់តាំងមេដឹកនាំមួយចំនួនឱ្យកាន់កាប់តំបន់ចំនួន ៤ របស់អ៊ុយក្រែន ក្នុងគម្រោងកំណត់ផែនការធ្វើប្រជាមតិជុំវិញការចូលរួមជាមួយរុស្ស៊ី ហើយនេះនឹងជាបញ្ហាប្រឈមជាមួយលោកខាងលិចដែលអាចបង្កឱ្យមានសង្គ្រាមកាន់តែខ្លាំងឡើងៗ ក៏ដូចជាប្រឈមការថ្កោលទោសកាន់តែខ្លាំងពីអ៊ុយក្រែន និងសម្ព័ន្ធមិត្តរបស់រុស្ស៊ីខ្លួនឯង ។ក្រៅពីអាមេរិកនិងអង់គ្លេស សារព័ត៌មាន France 24 បានចេញផ្សាយ កាលពីថ្ងៃអង្គារ ទី២០ ខែកញ្ញាឲ្យដឹងដែរ ថា ថ្លែង នៅក្នុងបុរីញូវយ៉ក សហរដ្ឋអាមេរិក លោក អែម៉ាញ៉ែល ម៉ាក្រុង (Emmanuel Macron) ប្រធានាធិបតីបារាំង បានបញ្ជាក់ ថា សំណើធ្វើប្រជាមតិ នៅតំបន់ភាគខាងកើត ប្រទេសអ៊ុយក្រែន គឺជាការបង្កហេតុថ្មីមួយបន្ថែមទៀត ក្រោយពេល រុស្ស៊ី បានចូលលុកលុយ នៅក្នុងប្រទេសជិតខាង កាលពីថ្ងៃទី២៤ ខែកុម្ភៈ។ លោកប្រធានាធិបតី បានប្រាប់ដល់ក្រុមអ្នកសារព័ត៌មាន ថា «ប្រសិនបើគំនិតធ្វើប្រជាមតិ នៅតំបន់ដុនបាស (Donbas) មិនមានសោកនាដកម្ម វាពិតជាគួរឱ្យអស់សំណើចខ្លាំងណាស់»។
បុគ្គលជាឥស្សរជនដែលគាំទ្ររុស្ស៊ី បានប្រកាសពីការធ្វើប្រជាមតិនៅថ្ងៃទី ២៣ ដល់ថ្ងៃទី២៧ ខែកញ្ញា សម្រាប់ខេត្តចំនួន៤ រួមមានខេត្ត Luhansk, Donetsk, Kherson និង Zaporizhzhia ហើយតំបន់ទាំងនេះស្មើ ១៥% នៃទឹកដីអ៊ុយក្រែនសរុប ឬតំបន់ទាំង៤ខាងលើ មានទំហំស្មើប្រទេសហុងគ្រី ។សម្រាប់លោក ប្រធានាធិបតីរុស្ស៊ី លោក វ្ល៉ាឌីមៀ ពុទីន វិញបានធើ្វការថ្លែងសារតាមរយៈកញ្ចក់ទូរទស្សន៍ទៅកាន់ពលរដ្ឋនៅថ្ងៃពុធនេះជុំវិញស្ថានការណ៍សង្គ្រាមនៅអ៊ុយក្រែនបានឲ្យដឹងពីផែនការជ្រើសកងទព័ ស្របពេលដែលខាងចារកម្មលោកខាងលិចបានឱ្យដឹងថា លោកពុទីនគ្រោងនឹងកំពុងតែរៀបចំកាត់យកទឹកដីភាគខាងកើតអ៊ុយក្រែនបន្ថែមទៀតជាផ្លូវការ តាមរយៈការធើ្វប្រជាមតិក្លែងក្លាយមួយដែលនឹងរៀបចំឡើងដោយក្រុមមេដឹកនាំផ្ដាច់ខ្លួននៅក្នុងតំបន់ ដុនបាស ជាសម្ព័ន្ធមិត្តរបស់ខ្លួន។
ខាងរដ្ឋាភិបាលអ៊ុយក្រែនបានចាត់ទុកផែនការខាងលើនេះថា ជារឿងមួយដែលធើ្វឡើងដើម្បីបង្វែរស្ថានការណ៍បច្ចុប្បន្នដែលទាហានរុស្ស៊ីកំពុងបរាជ័យជាបន្តបន្ទាប់នៅក្នុងសមរភូមិ ក្រោមប្រតិបត្តិការវាយបករបស់ទាហានអ៊ុយក្រែនដែលកំពុងតែមានសន្ទុះខ្លាំង។ផែនការកាត់យកទឹកដីអ៊ុយក្រែនរបស់រុស្ស៊ីនៅពេលនេះ គឺជាសញ្ញាអាក្រក់ថ្មីមួយទៀតនៃសង្គ្រាមអ៊ុយក្រែន ស្របពេលដែលមន្ត្រីវិមានក្រឹមឡាំងធ្លាប់បានព្រមានថា រុស្ស៊ីនឹងប្តេជ្ញាចិត្តការពារទឹកដីឧបសម្ព័ន្ធទាំងប៉ុន្នានរបស់ខ្លួនដោយប្រើប្រាស់ "គ្រប់មធ្យោបាយទាំងអស់" ជាសញ្ញាព្រមានត្រង់ៗទៅកាន់បណ្ដាប្រទេសលោកខាងលិច រួមនិងការព្រួយបារម្ភថារុស្ស៊ីអាចនឹងធើ្វការដាក់ពង្រាយគ្រាប់មីស៊ីលរបស់ខ្លួននៅតាមតំបន់ទាំងនោះនៅថ្ងៃអនាគត ដើម្បីជាការឆ្លើយតបទៅនឹងអង្គការណាតូនិងសហរដ្ឋអាម៉េរិកដែលផ្តល់ការគាទ្រំដល់អ៊ុយក្រែន។
ទាក់ទងតំបន់ខាងលើក្រោយពីអាជ្ញាធរក្រុងម៉ូស្គូបានកាន់កាប់មួយផ្នែកកាលពីឆ្នាំ ២០១៤ នៅតាមតំបន់ Luhansk និង Donetsk ដែលបង្រួមចូលគ្នាបង្កើតបានជាតំបន់ Donbas នោះ ត្រូវបានរុស្ស៊ី ប្រកាសទទួលស្គាល់កាលពីថដ្ងៃទី២១កុម្ភៈថាជារដ្ឋឯករាជ្យមុននឹងបញ្ជាឲ្យកងទព័ចូលលុកលុយប្រទេសអ៊ុយក្រែននៅថ្ងៃទី២៤កុម្ភៈ២០២២រហូតមកដល់បច្ចុប្បន្ន៕
