លោក ស៊ី ជីនពីង អបអរការបង្កើតទំនាក់ទំនង «ភាពជាដៃគូយុទ្ធសាស្ត្រចិន-ប៉ាឡេស្ទីន»ក្នុងពេលដែលលុកចូលតារាងមជ្ឈឹមបូពារ៍
02-November-2023 / ព័ត៌មានអន្តរជាតិ
ចិន៖ ប្រធានាធិបតីចិន លោក ស៊ី ជីនពីង បាននិយាយនៅថ្ងៃពុធនេះថា ប្រទេសរបស់លោកកំពុងសាងទំនាក់ទំនងជាយុទ្ធសាស្ត្រជាមួយប៉ាឡេស្ទីន មុនកិច្ចពិភាក្សាជាមួយមេដឹកនាំ Mahmoud Abbas នៅទីក្រុងប៉េកាំង។ ទីភ្នាក់ងារសារព័ត៌មាន AFP នៅថ្ងៃពុធ ទី១៤ ខែមិថុនា ឆ្នាំ២០២៣បានឲ្យដឹងថា៖ទីក្រុងប៉េកាំងបាននិយាយថា លោកអាបាស( Abbas )នឹងបំពេញទស្សនកិច្ចនៅរដ្ឋធានីរបស់ប្រទេសចិន រហូតដល់ថ្ងៃសុក្រ ដែលជាដំណើរទស្សនកិច្ចផ្លូវការលើកទីប្រាំរបស់លោកទៅកាន់ប្រទេស ដែលមានសេដ្ឋកិច្ចធំជាងគេទីពីររបស់ពិភពលោកមួយនេះ។
លោក ស៊ី បននិយាយក្នុងអំឡុងពិធីស្វាគមន៍នៅមហាសាលប្រជាជនថា «ប្រឈមមុខនឹងការផ្លាស់ប្តូរពិភពលោកមួយសតវត្ស និងការវិវត្តន៍ថ្មីនៃស្ថានភាពនៅមជ្ឈិមបូព៌ា ប្រទេសចិនមានឆន្ទៈក្នុងការពង្រឹងការសម្របសម្រួល និងកិច្ចសហប្រតិបត្តិការជាមួយភាគីប៉ាឡេស្ទីន»។លោក ស៊ី បានបន្ថែមថា «ថ្ងៃនេះ យើងនឹងប្រកាសរួមគ្នាអំពីការបង្កើតភាពជាដៃគូយុទ្ធសាស្ត្រចិន-ប៉ាឡេស្ទីន ដែលនឹងក្លាយជាព្រឹត្តិការណ៍ដ៏សំខាន់ ក្នុងប្រវត្តិសាស្ត្រនៃទំនាក់ទំនងទ្វេភាគី»។
លោកអាបាស( Abbas )ប្រមុខប៉ាឡេស្ទីនបានមកដល់ទីក្រុងប៉េកាំងកាលពីថ្ងៃចន្ទទី១២មិថុនាសប្តាហ៍ទីនេះ ដើម្បីពិភាក្សាជាមួយមេដឹកនាំជាន់ខ្ពស់របស់ចិន រួមទាំងប្រធានាធិបតី ស៊ី និងនាយករដ្ឋមន្ត្រី Li Qiang ផងដែរ។ ភាគីទាំងពីរគ្រោងនឹងប្រើប្រាស់ឱកាសនេះ ដើម្បីពិភាក្សាអំពីវិធីពង្រឹងទំនាក់ទំនង និងដោះស្រាយបញ្ហាប្រឈមរយៈពេលវែង ចំពោះទំនាក់ទំនងប៉ាឡេស្ទីន-អ៊ីស្រាអែល។កាលពីខែធ្នូឆ្នាំមុន លោកប្រធានាធិបតី ស៊ី បានទៅបំពេញទស្សនកិច្ចនៅអារ៉ាប៊ីសាអូឌីត ក្នុងអំឡុងពេលនោះលោកក៏បានជួបជាមួយលោក Abbas ហើយបានសន្យាថានឹង «ធ្វើការដើម្បីស្វែងរកដំណោះស្រាយជាជំហានដំបូង ត្រឹមត្រូវ និងយូរអង្វែងចំពោះបញ្ហាប៉ាឡេស្ទីន»។
ចាប់តាំងពីពេលនោះមក ទីក្រុងប៉េកាំងបានដាក់ខ្លួនជាអ្នកសម្រុះសម្រួលនៅមជ្ឈិមបូព៌ា ដោយជួយស្តារទំនាក់ទំនងក្នុងខែមីនារវាងអ៊ីរ៉ង់ និងអារ៉ាប៊ីសាអូឌីត ដែលជាគូប្រជែងនៅក្នុងតំបន់ដែលសហរដ្ឋអាមេរិក ជាឈ្មួញកណ្តាលអំណាចដ៏សំខាន់អស់ជាច្រើនទសវត្សរ៍មកហើយ។ប៉ុន្តែការស្វែងរកដំណោះស្រាយយូរអង្វែងចំពោះភាពតានតឹងរវាងអ៊ីស្រាអែល និងប៉ាឡេស្ទីន អាចជារឿងពិបាកជាង ខណៈដែលការចរចាសន្តិភាពរវាងភាគីទាំងពីរបានជាប់គាំងតាំងពីឆ្នាំ ២០១៤។
មានការកត់សម្គាល់ថាប្រហែល ១០ឆ្នាំមុន សហរដ្ឋអាមេរិកបានចាប់ផ្តើមកាត់បន្ថយឥទ្ធិពលរបស់ខ្លួននៅមជ្ឈិមបូព៌ា ដើម្បីផ្លាស់ប្តូរយុទ្ធសាស្ត្ររបស់ខ្លួនទៅកាន់តំបន់អាស៊ីប៉ាស៊ីហ្វិក។ ប្រការនេះវាក៏ជាពេលដែលចិនឆ្លៀតឱកាសចូលប្រើប្រាស់តំបន់មជ្ឈិមបូព៌ា ដែលត្រូវបានចាត់ទុកថាជា “ចំណុចរារាំង” ដ៏រឹងមាំរបស់ទីក្រុងវ៉ាស៊ីនតោន ចាប់តាំងពីសង្គ្រាមលោកលើកទីពីរមក។តាមពិតទៅ ចិនមិនវិនិយោគលើសក្តានុពលយោធាដូចដែលអាមេរិកកំពុងធ្វើនោះទេ ប៉ុន្តែតាមរយៈការសម្របសម្រួលជម្លោះដើម្បីជួយបង្កើតទំនាក់ទំនងឡើងវិញរវាងប្រទេសនានាក្នុងពិភពអារ៉ាប់ ជាពិសេសការលើកកម្ពស់គំនិតផ្តួចផ្តើម “ខ្សែក្រវាត់និងផ្លូវ” ដើម្បីបន្តពង្រីកឥទ្ធិពលរបស់ខ្លួន។
ក្នុងនាមជាអ្នកវិនិយោគធំជាងគេនៅមជ្ឈិមបូព៌ា ទីក្រុងប៉េកាំងបាន “ចាក់” ចូលទៅក្នុងតំបន់ច្រើនជាង 273 ពាន់លានដុល្លារនៅចន្លោះឆ្នាំ 2005 និង 2022។ “យក្សអាស៊ី” ក៏ទិញប្រេងពីអុីរ៉ាក់ និងឧស្ម័នពីកាតារផងដែរ និងការនាំចេញអាវុធទៅកាន់ប្រទេសអាល់ហ្សេរី ម៉ារ៉ុក ទួរគី អេហ្ស៊ីប និងអារ៉ាប៊ីសាអ៊ូឌីត។ក្នុងពេលនេះ អារ៉ាប៊ីសាអ៊ូឌីតធ្វើជាម្ចាស់ផ្ទះនៃសន្និសីទធុរកិច្ចអារ៉ាប់-ចិនលើកទី១០ ដោយចាត់ទុកចិនជាដៃគូសេដ្ឋកិច្ចដ៏ធំបំផុតក្នុងតំបន់ នៅក្នុងសុន្ទរកថាបើកនៃសន្និសីទធុរកិច្ចអារ៉ាប់-ចិនលើកទី១០ នៅទីក្រុងរីយ៉ាតរបស់អារ៉ាប៊ីសាអ៊ូឌីត រដ្ឋមន្ត្រីការបរទេស ព្រះអង្គម្ចាស់ Faisal bin Farhan បានមានបន្នូលថា ប្រទេសចិនគឺជាដៃគូសេដ្ឋកិច្ចដ៏ធំបំផុតនៅក្នុងតំបន់ ជាមួយនឹងទំហំពាណិជ្ជកម្មទ្វេភាគីឈានដល់ ៤៣០ពាន់លានដុល្លារក្នុងឆ្នាំ២០២២។
នៅក្នុងសន្និសីទដែលមានការចូលរួមពីប្រទេសចំនួន២៣ ក្រោមបាវចនា «កិច្ចសហប្រតិបត្តិការដើម្បីវិបុលភាព» ព្រះអង្គម្ចាស់ Faisal បានគូសបញ្ជាក់អំពីឆន្ទៈរួមរបស់ប្រទេសអារ៉ាប់ និងប្រទេសចិន ក្នុងការអភិវឌ្ឍភាពជាដៃគូ និងកិច្ចសហប្រតិបត្តិការរបស់ពួកគេដោយផ្អែកលើលទ្ធផលនៃវេទិកានេះចាប់តាំងពីវាត្រូវបានបង្កើតឡើង។ទន្ធឹមគ្នានេះ លោក Khaled Al-Falih រដ្ឋមន្ត្រីវិនិយោគអារ៉ាប៊ីសាអ៊ូឌីតក៏បាននិយាយថា វាដល់ពេលហើយសម្រាប់ប្រទេសចិនក្នុងការក្លាយជាដៃគូយុទ្ធសាស្ត្រអភិវឌ្ឍន៍ដ៏សំខាន់នៅក្នុងតំបន់។
សន្និសីទដែលមានរយៈពេលពីរថ្ងៃដោយបានចាប់ផ្តើមពីថ្ងៃទី១១ និង១២ ខែមិថុនានេះ គឺជាការប្រមូលផ្តុំដ៏ធំបំផុតរបស់អារ៉ាប់-ចិនសម្រាប់អាជីវកម្ម និងការវិនិយោគ ដោយមានការចូលរួមពីតំណាងរដ្ឋាភិបាល នាយកប្រតិបត្តិ វិនិយោគិន និងសហគ្រិនជាង២,០០០នាក់។ព្រឹត្តិការណ៍នេះត្រូវបានប្រារព្ធឡើងក្រោមការឧបត្ថម្ភគាំទ្រដោយរជ្ជទាយាទអារ៉ាប៊ីសាអ៊ូឌីត ព្រះអង្គម្ចាស់ Mohammad bin Salman ហើយបានពិភាក្សាលើប្រធានបទជាច្រើន រួមទាំងការវិនិយោគ និងហិរញ្ញប្បទានតាមរយៈគំនិតផ្តួចផ្តើមខ្សែក្រវាត់មួយ ផ្លូវមួយរបស់ចិន ព្រមទាំងបញ្ហាបរិស្ថាន ទេសចរណ៍ និងកសិកម្មផងដែរ៕
