បន្ទាប់ពីប្រទេសឥណ្ឌា អង្គការសហប្រជាជាតិ (UN) ប្រកាសថា បណ្តាញឧក្រិដ្ឋកម្មនៅអាស៊ីអាគ្នេយ៍រីកដុះដាលកាន់តែច្រើន តាមរយៈកម្មវិធី Telegram
21-September-2026 / ព័ត៌មានអន្តរជាតិ
អាមេរិក៖ អង្គការសហប្រជាជាតិបានប្រកាសក្នុងរបាយការណ៍មួយ ចេញផ្សាយនៅថ្ងៃចន្ទដើមសប្តាហ៍នេះថា បណ្តាញឧក្រិដ្ឋកម្មដ៏មានឥទ្ធិពលនៅក្នុងតំបន់អាស៊ីអាគ្នេយ៍ បានប្រើប្រាស់យ៉ាងទូលំទូលាយនូវកម្មវិធីផ្ញើសារ Telegram ជាផ្លូវអនុញ្ញាតឱ្យមានសកម្មភាពឧក្រិដ្ឋកម្ម ត្រូវបានរៀបចំឡើងដើម្បីធ្វើសកម្មភាពខុសច្បាប់ទ្រង់ទ្រាយធំ។ នេះបើតាមការចេញផ្សាយដោយសារព័ត៌មាន Reuters និងសារព័ត៌មានដ៏ល្បីរបស់សិង្ហបុរី CNA ។
របាយការណ៍ពីការិយាល័យគ្រឿងញៀន និងឧក្រិដ្ឋកម្មរបស់អង្គការសហប្រជាជាតិ (UNODC) បានបង្ហាញថា ទិន្នន័យដែលត្រូវបានគេលួចចូល រួមទាំងព័ត៌មានលម្អិតកាតឥណទាន ពាក្យសម្ងាត់ និងប្រវត្តិកម្មវិធីរុករក ត្រូវបានជួញដូរដោយបើកចំហរលើទំហំដ៏ធំនៅលើកម្មវិធីផ្ញើសារនេះ ដែលមានបណ្តាញធំទូលាយជាមួយនឹងការសម្របសម្រួលតិចតួចបំផុត។របាយការណ៍នេះបានដកស្រង់ចេញពីការផ្សាយពាណិជ្ជកម្មមួយដែលនិយាយជាភាសាចិនថា «យើងផ្លាស់ប្តូរ USDT ចំនួន៣លាន ដែលលួចពីបរទេសក្នុងមួយថ្ងៃ»។ ទន្ទឹមគ្នានេះគេបានរកឃើញថា មានភស្តុតាងដ៏រឹងមាំជាច្រើននៃទីផ្សាងងឹតលក់ទិន្នន័យ ដែលផ្លាស់ទៅប្រើកម្មវិធី Telegram ហើយអ្នកលក់កំពុងស្វែងរកយ៉ាងសកម្ម ដើម្បីកំណត់ក្រុមឧក្រិដ្ឋកម្មដែលបានរៀបចំការឆ្លងប្រទេស ដែលមានមូលដ្ឋាននៅអាស៊ីអាគ្នេយ៍។
យ៉ាងណាមិញ ជុំវិញរបាយការណ៍ខាងលើ Telegram ដែលមានអ្នកប្រើប្រាស់ជិត ១ពាន់លាននាក់ មិនបានឆ្លើយតបភ្លាមៗចំពោះសំណើសុំការអាត្ថាធិប្បាយនោះទេ។
គួរជម្រាបថា បទចោទប្រកាន់ជាច្រើនប្រឆាំងកម្មវិធី Telegram ត្រូវបានលេចឡើងបន្តកន្ទុយគ្នា បន្ទាប់ពីលោក Pavel Durov នាយកប្រតិបត្តិកម្មវិធី Telegram ដែលមានដើមកំណើតរុស្ស៊ីត្រូវបានចាប់ខ្លួននៅទីក្រុងប៉ារីស ប្រទេសបារាំង ក្នុងខែសីហា ហើយត្រូវបានចោទប្រកាន់ពីបទអនុញ្ញាតឱ្យមានសកម្មភាពឧក្រិដ្ឋកម្មនៅលើវេទិកាផ្ញើសារមួយនេះ រួមទាំងការផ្សព្វផ្សាយរូបភាពផ្លូវភេទរបស់កុមារជាដើម។ បច្ចុប្បន្ន លោក Pavel Durov កំពុងស្ថិតក្នុងក្រៅឃុំ តែមិនអនុញ្ញាតឱ្យចេញពីប្រទេសបារាំងឡើយ.។
បន្ទាប់ពីលោក Pavel Durov ស្ថាបនិក និងជានាយកប្រតិបត្តិ (CEO) ត្រូវបានចាប់ខ្លួននៅក្នុងប្រទេសបារាំង រដ្ឋាភិបាលនៃប្រទេសឥណ្ឌាបានបើកការស៊ើបអង្កេតលើកម្មវិធី Telegram ក្រោមបទចោទប្រកាន់ថា ជាប់ពាក់ព័ន្ធក្នុងសកម្មភាពឧក្រិដ្ឋកម្ម រួមទាំងការជំរិតទារប្រាក់, ល្បែងស៊ីសង, ការបែកធ្លាយក្រដាសប្រឡង និងការឆបោក។ ប៉ុន្តែថ្មីៗនេះ បានបន្ថែមការចោទប្រកាន់ និងការស៊ើបអង្កេត បន្ទាប់ពីរកឃើញករណីរំលោភបំពានដ៏ធ្ងន់ធ្ងរ។
លទ្ធផលនៃការស៊ើបអង្កេតនៅមិនទាន់ត្រូវបានប្រកាសបង្ហាញនោះទេ ប៉ុន្តែបើយោងតាមសារព័ត៌មានក្នុងស្រុកឥណ្ឌាជាច្រើនបានចេញផ្សាយថា អាជ្ញាធរឥណ្ឌាបានបន្ថែមការចោទប្រកាន់ និងករណីស៊ើបអង្កេតថ្មីមួយចំនួនទៀត ក្នុងនោះមានពីរករណីធ្ងន់ធ្ងរគឺ «ឧបាយកលតម្លៃភាគហ៊ុន និងជំរិតទារប្រាក់» ហើយបើសិនជារកឃើញការពិតដូចការចោទប្រកាន់មែននោះ Telegram ដែលមានអ្នកប្រើប្រាស់នៅក្នុង ប្រទេសឥណ្ឌាប្រមាណ ១០៤លាននាក់ អាចនឹងប្រឈមមុខនឹងការហាមឃាត់ ឬបិទ។
ក្រុមប្រឹក្សាមូលបត្រនៃប្រទេសឥណ្ឌា (Sebi) បានរកឃើញគ្រោងការណ៍មួយដើម្បីគ្រប់គ្រងតម្លៃភាគហ៊ុនដែលដំណើរការតាមរយៈកម្មវិធី Telegram ដោយមានតម្លៃភាគហ៊ុនរបស់ក្រុមហ៊ុនផលិតដែកមួយ បានជាប់ពាក់ព័ន្ធក្នុងគម្រោងនេះ ហើយម្ចាស់នៃ Telegram Group ដែលបានចូលរួមក្នុងគម្រោងទទួលបានប្រាក់មក្រៃជើងសារ ២លានរូពីឥណ្ឌា (ប្រហែល ២៤០០០ដុល្លារអាមេរិក)។ មានករណីឆបោកមួយទៀត ដោយបុរសពីរនាក់ត្រូវបានចាប់ខ្លួនបន្ទាប់ពីបានបន្លំខ្លួនជាមន្ត្រីប៉ូលិស និងបានប្រើកម្មវិធី Telegram ដើម្បីធ្វើការសួរចម្លើយក្លែងក្លាយ រហូតបោកគ្រូពេទ្យម្នាក់បានប្រាក់ជាង ៤៥០០០ដុល្លារអាមេរិក។
ដោយសារតែឥណ្ឌាជាប្រទេសមួយដែលមានអ្នកប្រើប្រាស់ Telegram ច្រើនជាងគេ ហើយក៏ជាប្រទេសដែលប្រើ Telegram ក្នុងការចែករំលែកនូវព័ត៌មាន និងចំណេះដឹងផ្នែកសិក្សា រហូតនាំឱ្យមានការបែកធ្លាយវិញ្ញាសារប្រឡងក្នុងទ្រង់ទ្រាយធំ ដែលជំរុញឱ្យមានការស៊ើបអង្កេតលើកម្មវិធី Telegram។ក្រុមបោកប្រាស់បានបញ្ចូលសមាជិកថ្មីៗចូលទៅក្នុង Telegram Group និងបានស្នើឱ្យជនស្លូតត្រង់ទាំងនោះដាក់ប្រាក់វិនិយោគទៅ លើភាគហ៊ុននៅលើ App ក្លែងក្លាយ ដែលមើលទៅដូចជាកម្មវិធីពិត និងស្របច្បាប់។ ការបោកប្រាស់នេះគឺជាកន្លែងដែលមនុស្សភាគច្រើន បាត់បង់ប្រាក់របស់ពួកគេនៅលើ Telegram ។
មន្ត្រីរូបនេះបានពន្យល់បន្ថែមអំពីសកម្មភាពខុសច្បាប់ផ្សេងទៀត ដោយរួមមានការអាចទិញស៊ីមកាតក្លែងក្លាយ ដោយតម្រូវឱ្យបញ្ចូលព័ត៌មាន ព័ត៌មានលម្អិតរបស់គណនីធនាគារ ដែលវាជាការក្លែងបន្លំដើម្បីទទួលបានព័ត៌មានគណនីធនាគារ បន្ទាប់មកពួកគេបានប្រើព័ត៌មាននោះដើម្បីលួចប្រាក់។ការស៊ើបអង្កេតអាចនឹងបន្លាយពេលយូរ ព្រោះបើតាមការបញ្ជាក់ពីមន្ត្រីខាងលើបានឱ្យដឹងថា ក្រុមហ៊ុន Telegram បានចូលរួមសហការ ជាមូយនឹងអាជ្ញាធរត្រឹមតែ ២០% ប៉ុណ្ណោះ ដែលជាហេតុធ្វើឱ្យអាជ្ញាធរពិបាកក្នុងការកំណត់មុខសញ្ញានៃក្រុមឆបោក។
លោក Rakesh Maheshwari អតីតមន្ត្រីគ្រប់គ្រងផ្នែកច្បាប់អ៉ិនធឺណិតរបស់ក្រសួងអេឡិចត្រូនិក និងបច្ចេកវិទ្យាឥណ្ឌា ដែលបានបម្រើការងារលើផ្នែកនេះជាង ៣៥ឆ្នាំ និងទើបចូលនិវត្តន៍ បានលើកឡើងថា កម្មវិធី Telegram កង្វះសមត្ថភាពច្រើនណាស់ ហើយបច្ចុប្បន្ននេះវាបានក្លាយជាកន្លែងចែកចាយរូបភាព និងវីដេអូអាសអាភាសដ៏ពេញនិយម ព្រោះអី Telegram កង្វះការត្រួតពិនិត្យទៅលើចំណុចនេះ។ តម្លាភាពក៏ជាបញ្ហាសំខាន់ផងដែរសម្រាប់បណ្ដាញសង្គម ប៉ុន្តែសម្រាប់ Telegram គឺមិនមាននោះទេ។
លោក Anand Venkatanarayanan សហស្ថាបនិក និង CTO នៃក្រុមហ៊ុនបច្ចេកវិទ្យា DeepStrat បានផ្តល់ការវាយតម្លៃដ៏គួរឱ្យភ័យខ្លាចនៃកម្មវិធី Telegram ។ ដោយលោកបានលើកឡើងថា «Telegram គឺជាប្រព័ន្ធផ្សព្វផ្សាយសង្គម សម្រាប់ឧក្រិដ្ឋជនតាមអ៉ិនធឺណិត» ដោយឧក្រិដ្ឋកម្មភាគច្រើន បានប្រើប្រាស់មុខងារ bot និង API របស់ Telegram ក្នុងការធ្វើសកម្មភាព៕
