ច្បាប់ការពារកោះតៃវ៉ាន់ដែលតម្រូវឲ្យអាមេរិកចាយ២ពាន់លានដុល្លារ១ឆ្នាំចូលដល់ព្រិទ្ធសភាអាមេរិកហើយ!
21-September-2026 / ព័ត៌មានអន្តរជាតិ
អាមេរិក៖ច្បាប់ស្តីពីការការពារកោះតៃវ៉ាន់ត្រូវបានណែនាំនៅក្នុងព្រឹទ្ធសភាកាលពីថ្ងៃព្រហស្បតិ៍ទី៤វិច្ឆិកាដោយព្រឹទ្ធសមាជិក ជីម រីសជាសមាជិកបក្សសាធារណរដ្ឋជាន់ខ្ពស់បំផុតនៅក្នុងគណៈកម្មាធិការទំនាក់ទំនងបរទេសនៃព្រឹទ្ធសភា និងគាំទ្រដោយព្រឹទ្ធសមាជិកដទៃទៀតដូចជាលោក ម៉ៃ ក្រាប៉ូ លោកប៊ីល ហាហ្គឺធី លោក មីត រ៉ុមនី លោក ចន ខ័រនីន និង លោក ម៉ាកូ រូប៊ីអូ។
នៅក្នុងសេចក្តីប្រកាសព័ត៌មានមួយលោកក្រាប៉ូបាននិយាយថា”ការបង្កើនកិច្ចខិតខំប្រឹងប្រែងរបស់ចិនក្នុងការគ្របដណ្តប់ផ្នែកយោធាលើកោះតៃវ៉ាន់គឺជាការគំរាមកំហែងដល់ការទូតអន្តរជាតិនិងសន្តិសុខក្នុងតំបន់ ។ វាចាំបាច់ណាស់ក្នុងការទទួលបានសមត្ថភាពស៊ីមេទ្រី ការបណ្តុះបណ្តាល និងការត្រៀមធនធានសម្រាប់តៃវ៉ាន់ឱ្យបានឆាប់រហ័សដូច្នេះទើបកោះនេះអាចការពារខ្លួនពីការឈ្លានពានរបស់ចិននៅក្នុងតំបន់ឥណ្ឌូប៉ាស៊ីហ្វិក”។
ច្បាប់នេះនឹងតម្រូវឱ្យក្រសួងការបរទេសអាម៉េរិករៀបចំកម្មវិធីជំនួយហិរញ្ញប្បទានយោធាបរទេសចំនួន២ ពាន់លានដុល្លារជារៀងរាល់ឆ្នាំចាប់ពីឆ្នាំ ២០២៣ ដល់ឆ្នាំ ២០៣២។ច្បាប់នេះលើកឡើងថា ការផ្តល់ជូនរបស់សហរដ្ឋអាម៉េរិកសម្រាប់ជួយពង្រឹងសមត្ថភាពតៃវ៉ាន់ គឺមានសារៈសំខាន់ក្នុងការរក្សាតុល្យភាពយោធានៅក្នុងតំបន់ រួមទាំងមីស៊ីលចម្ងាយឆ្ងាយ ប្រព័ន្ធមីស៊ីលការពារអាកាស មីស៊ីលបញ្ជាទិសប្រឆាំងនឹងនាវា មីស៊ីលបញ្ជាទិសបាញ់លើដីគោក ប្រព័ន្ធមីស៊ីលធម្មតាលឿនជាងសំឡេង ប្រព័ន្ធស៊ើបការណ៍ សមត្ថភាពឃ្លាំមើលនិងឈ្លបយកការណ៍និងប្រព័ន្ធបញ្ជានិងត្រួតពិនិត្យ។
ច្បាប់នេះក៏និយាយដែរថា “ក្រសួងការបរទេសគួរតែជំរុញរដ្ឋាភិបាលនៅតៃវ៉ាន់ឱ្យវិនិយោគក្នុងការផលិតគ្រាប់ឱ្យបានគ្រប់គ្រាន់ដើម្បីបំពេញតម្រូវការក្នុងគ្រាអាសន្ននិងចៀសវាងតម្រូវការនាំចូលគ្រាប់ពីសហរដ្ឋអាម៉េរិកក្នុងសម័យសង្គ្រាម និង សហការជាមួយតៃវ៉ាន់ដើម្បីចែកចាយគ្រាប់បែបនោះឬនៅពេលចាំបាច់ ដើម្បីបង្កើនសមត្ថភាពរបស់តៃវ៉ាន់ក្នុងការផលិតគ្រាប់បែបនោះ”។
មូលហេតុនៃការចេញច្បាប់នេះ គឺដើម្បីប្រាកដថា សមាជិកព្រឹទ្ធសភាមើលឃើញថា ការការពារកោះតៃវ៉ាន់មិនមែនគ្រាន់តែដើម្បីប្រយោជន៍ដល់ប្រជាជនតៃវ៉ាន់ទេ ប៉ុន្តែដើម្បីជំរុញផលប្រយោជន៍ជាយុទ្ធសាស្ត្ររបស់អាម៉េរិកជាចម្បងនៅក្នុងតំបន់ ដែលសំខាន់បំផុតនោះគឺការគ្រប់គ្រងនិងរឹតត្បិតនូវការពង្រីកអំណាចនយោបាយ យោធា និងសេដ្ឋកិច្ចរបស់ចិន.។សូមបញ្ជាកដែរថាមន្ត្រីជាន់ខ្ពស់នៃមន្ទីរបញ្ចកោណ លោក ម៉ាក មីលី (Mark Milley) នៅថ្ងៃពុធ ទី៣ វិច្ឆិកា បាននិយាយថា៖ អាមេរិកនឹងចូលជួយតៃវ៉ាន់ប្រសិនបើមានការស្នើសុំឲ្យធ្វើដូច្នោះ។
លោកអគ្គមេបញ្ជាការកងទ័ពអាមេរិក ម៉ាក មីលី គូសបញ្ជាក់ថារូបលោកមិនគិតថានោះទេថាចិននឹងបើកការវាយប្រហារយោធាប្រឆាំងនឹងកោះតៃវ៉ាន់ក្នុងរយៈពេល ២៤ ខែខាងមុខ។ ប៉ុន្តែនៅពេលសួរថាតើមន្ទីរបញ្ចកោណអាចការពារតៃវ៉ាន់បានឬអត់នោះ?លោកបានឆ្លើយវិញភ្លាមថាគ្មានចម្ងល់ឡើយទាក់ទងរឿងនេះ។ ក្នុងករណីដែលហេតុការណ៍បែបនេះកើតឡើង នោះមន្ទីរបញ្ចកោណអាមេរិកប្រាកដណាស់នឹងការពារតៃវ៉ាន់បានព្រោះអាមេរិកមានសមត្ថភាពធ្វើអ្វីៗគ្រប់បែបយ៉ាងនៅជុំវិញពិភពលោកប្រសិនបើចាំបាច់។
នៅឯវេទិកាសន្តិសុខ Aspen មន្ត្រីជាន់ខ្ពស់នៃមន្ទីរបញ្ចកោណរូបនេះបានឲ្យដឹងដែរថាគឺប្រធានាធិបតីអាមេរិកដែលជាអ្នកមានសិទ្ធិសម្រេចថាតើត្រូវឈានជើងចូលជួយតៃវ៉ាន់ឬមិនជួយ ប្រសិនបើចិនចូលឈ្លានពានដើម្បីកាន់កាប់តៃប៉ិមែននោះ។កាលពីថ្ងៃព្រហស្បតិ៍ ទី២១ តុលា លោកចូ បៃដិន បានអះអាងថាសហរដ្ឋអាមេរិកនឹងលើកទ័ពទៅជួយតៃវ៉ាន់ក្នុងករណីមានការវាយប្រហារពីចិន។ទោះជាយ៉ាងណាក្តី ទីក្រុងវ៉ាស៊ីនតោនយល់ឃើញថាជម្លោះរវាងប៉េកាំង និងតៃប៉ិ គួរតែត្រូវបានដោះស្រាយដោយសន្តិវិធី និងដោយផ្អែកលើឆន្ទៈរបស់ប្រជាជនទាំងសងខាង។ ក្នុងអំឡុងពេលមានភាពតានតឹងខ្លាំងរវាងតៃវ៉ាន់និងចិននេះដែរ គណៈប្រតិភូសភាអឺរ៉ុបមួយក្រុមបានធ្វើទស្សនកិច្ចទៅកាន់តៃវ៉ាន់នៅថ្ងៃពុធនេះ។ ទស្សនកិច្ចនេះគឺជាផ្នែកមួយនៃកិច្ចខិតខំប្រឹងប្រែងរបស់អឺរ៉ុប ដើម្បីកសាងទំនាក់ទំនងកាន់តែជិតស្និទ្ធជាមួយទីក្រុងតៃប៉ិ បើទោះបីជាមានការព្រមានពីប្រទេសចិនយ៉ាងណាក៏ដោយ៕
