អ៊ុយក្រែន និងរុស្ស៊ីបានបន្ទោសគ្នាទៅវិញទៅមករឿងបាក់ទំនប់ទឹកដែលផ្គត់ផ្គង់ទឹកតំបន់គ្រីមៀ
10-April-2024 / ព័ត៌មានអន្តរជាតិ
អ៊ុយក្រែន៖ថ្ងៃទី ៦ ខែមិថុនា រុស្ស៊ី និងអ៊ុយក្រែនបានចោទប្រកាន់គ្នាទៅវិញទៅមកថាបានបំផ្ទុះទំនប់ផ្គត់ផ្គង់ទឹកដល់ឧបទ្វីបគ្រីមៀ និងបណ្តាលឱ្យមានទឹកជំនន់រីករាលដាលនៅភាគខាងត្បូងអ៊ុយក្រែន។ភ្នាក់ងារសារព័ត៌មាន Alarabiya បានឲ្យដឹងថាទំនប់វារីអគ្គិសនីដែលមានឈ្មោះថា Nova Kakhovka មានទីតាំងនៅតំបន់ Kherson ដែលបច្ចុប្បន្នគ្រប់គ្រងដោយប្រទេសរុស្ស៊ីនៅភាគខាងត្បូងអ៊ុយក្រែន វាត្រូវបានបំផ្លាញ ដែលបណ្តាលឱ្យតំបន់ខាងក្រោមលិចលង់។
នៅក្នុងសេចក្តីថ្លែងការណ៍មួយនៅលើទំព័រ Facebook របស់ខ្លួន បញ្ជាការភាគខាងត្បូងនៃកងកម្លាំងប្រដាប់អាវុធអ៊ុយក្រែនបាននិយាយថា ទំនប់ Nova Kakhovka ត្រូវបានបំផ្ទុះដោយភាគីរុស្ស៊ី ប៉ុន្តែមន្ត្រីទីក្រុង Nova Kakhovka ដែលត្រូវបានតែងតាំងដោយរុស្ស៊ីបានបដិសេធ។ទីភ្នាក់ងារសារព័ត៌មានរុស្ស៊ី TASS ក៏បានដកស្រង់ប្រភពផងដែរ ដោយនិយាយថា វាជាយប់ដ៏ស្ងប់ស្ងាត់មួយ ហើយមិនមានការវាយប្រហារតាមអាកាសទៅលើទំនប់នៅពេលយប់នោះទេ។ប្រធានតំបន់ Kherson ដែលតែងតាំងដោយរុស្ស៊ីបាននិយាយថា ការជម្លៀសនៅជិតទំនប់បានចាប់ផ្តើម ហើយទឹកនឹងឈានដល់កម្រិតគ្រោះថ្នាក់ក្នុងរយៈពេលប្រាំម៉ោង។
មេបញ្ជាការកងទ័ពអ៊ុយក្រែន ប្រចាំតំបន់ខាងត្បូងបាននិយាយថា កងកម្លាំងឈ្លានពានរុស្ស៊ី នៅក្នុងតំបន់Kherson ជាអ្នកដាក់គ្រាប់បំផ្ទុះ ធ្វើឲ្យទំនប់មួយផ្នែកត្រូវបំផ្លាញ និងបាក់ធ្លាយ លេចទឹក។ តាមភាគីអ៊ុយក្រែន ទាហានរុស្ស៊ីបំផ្ទុះបំផ្លាញ វារីអគ្គិសនី Kakhovka នៅពេលនេះ ដើម្បីបង្កឲ្យមានគ្រោះទឹកជំនន់បាក់ទំនប់ ព្រោះថា ចេតនាពិតប្រាកដរបស់រុស្ស៊ី គឺ បន្ទុចបង្អាក់ ការវាយប្រហារទ្រង់ទ្រាយធំរបស់អ៊ុយក្រែន នៅតំបន់ភាគខាងត្បូង។ ការលើកឡើងរបស់ភាគីអ៊ុយក្រែន អាចសមហេតុផលម្យ៉ាងដែរ ព្រោះថា កងទ័ពរុស្ស៊ីអាចខ្លាចថា កងទ័ពអ៊ុយក្រែន អាចប្រើទំនប់វារីអគ្គិសនី Kakhovka ជាផ្លូវឆ្លងទឹកទន្លេ Dnipro ចូលទៅក្នុងដែនដីដែលរុស្ស៊ីកំពុងកាន់កាប់នៅក្នុងតំបន់Kherson។
ប្រធានាធិបតីអ៊ុយក្រែន លោកហ្សេឡេនស្គីបានចេញមុខ បរិហារការវាយប្រហារបំផ្លាញ ទំនប់វារីអគ្គិសនី Kakhovka ដែលលោកចាត់ទុកថា ជាស្នាដៃរបស់ភេរវជនរុស្ស៊ី។ នៅក្រោយ ការវាយប្រហារ បំផ្លាញKakhovka នៅព្រឹកថ្ងៃអង្គារ មេដឹកនាំអ៊ុយក្រែនបានកោះប្រជុំបន្ទាន់ក្រុមប្រឹក្សាសន្តិសុខ នៅទីក្រុងកៀវ។វារីអគ្គិសនីរងការវាយប្រហារ ខូចខាត ជារឿងដែលគេធ្លាប់បារម្ភរហូតមក ព្រោះថា ទំនប់មួយនេះ ស្ថិតនៅក្នុងតំបន់សង្គ្រាមប្រយុទ្ធគ្នារវាងកងទ័ពអ៊ុយក្រែន និងរុស្ស៊ី។ ប្រធានាធិបតីអ៊ុយក្រែនផ្ទាល់ ធ្លាប់បានព្រមានជាច្រើនដងហើយថា រុស្ស៊ីនឹងអាចវាយប្រហារ បំផ្លាញទំនប់ វារីអគ្គិសនី Kakhovka ដើម្បីបង្កជាទឹកជំនន់ ជន់លិចតំបន់រស់នៅរបស់ប្រជាជនអ៊ុយក្រែន នៅតំបន់Kherson។ កន្លងមក រុស្ស៊ីបានវាយប្រហារទៅលើហេដ្ឋារចនាសម្ព័ន្ធ និងទំនប់ផ្សេងទៀតរបស់អ៊ុយក្រែន។
ទីភ្នាក់ងារសារព័ត៌មាន Reuters របស់ចក្រភពអង់គ្លេសបានឲ្យដឹងថាទំនប់វារីអគ្គិសនី Kakhovka ស្ថិតក្នុងចំណោមទំនប់វារីអគ្គិសនីសរុប ចំនួន ៦ ដែលអ៊ុយក្រែនសាងសង់ឡើងនៅលើដងទន្លេ Dnipro ប្រវែង ជាង២ពាន់គីឡូម៉ែត្រ ដែលហូរកាត់ប្រទេសអ៊ុយក្រែន ពីព្រំដែនបេឡារុស រហូតដល់សមុទ្រខ្មៅមានបររិមាណទឹកដូចគ្នាទៅនឹង Great Salt Lake ក្នុងរដ្ឋ Utah សហរដ្ឋអាមេរិក។ជាមួយកំពស់ ៣០ម៉ែត្រ និងប្រវែងបណ្តោយ ជាង ៣គីឡូម៉ែត្រ កាត់ទទឹងលើទន្លេ Dnipro វារីអគ្គិសនី Kakhovkaត្រូវបានសាងសង់ឡើងនៅឆ្នាំ ១៩៥៦ ក្នុងសម័យសហភាពសូវៀត។ ជាហេដ្ឋារចនាសម្ព័ន្ធធំមួយរបស់អ៊ុយក្រែន ទំនប់ Kakhovka ដើរតួនាទីទប់ទឹកទន្លេ បង្កើតជាអាងស្តុកទឹកដ៏ធំ សម្រាប់ទឹកស្អាតប្រើប្រាស់ និង ផលិតអគ្គិសនីសម្រាប់ប្រជាជនអ៊ុយក្រែន នៅក្នុងតំបន់Kherson។
នៅឆ្នាំ ២០២២ ទំនប់វារីអគ្គិសនីKakhovka បានធ្លាក់ទៅក្នុងដៃកងទ័ពរុស្ស៊ី ដែលបានដៅចង់ចូលគ្រប់គ្រងវារីអគ្គិសនី នៅពេលធ្វើសង្គ្រាមឈ្លានពានតំបន់Kherson ភាគខាងត្បូងអ៊ុយក្រែន។
ការបាក់ទំនប់ដ៏ធំ ដូចជាទំនប់វារីអគ្គិសនី Kakhovkaនឹងបង្កផលវិបាកធ្ងន់ធ្ងរ។ទី១ គឺទឹកជំនន់ ដែលហូរចាក់ច្រាលចេញពី អាងស្តុកទឹក នៅតំបន់ខាងលើ ទៅចាក់ជន់លិចតំបន់ប៉ែកខាងក្រោម។ ប្រជាជនដែលរស់នៅភាគខាងក្រោម មិនថា ស្ថិតនៅក្នុងតំបន់ដែលកាន់កាប់ដោយកងទ័ពរុស្ស៊ី ឬខាងអ៊ុយក្រែនគឺសុទ្ធតែរងគ្រោះ ដូចគ្នា។ជាក់ស្តែង គ្រាន់តែ បាក់ទំនប់ភ្លាម អាជ្ញាធរគ្រប់គ្រងតំបន់ Kherson ភាគខាងកើតទន្លេ Dnipro ដែលលើកបន្តុបដោយកងទ័ពរុស្ស៊ី បានបញ្ជាឲ្យប្រជាជនដែលរស់នៅតាមដងទន្លេ ជាច្រើនគ្រួសារឲ្យចាកចេញពីផ្ទះសម្បែង ព្រោះថា ទឹកទន្លេ បានឡើងក្រឺត ពី ២ទៅ៤ម៉ែត្រក្នុងរយៈពេលតែប៉ុន្មានម៉ោង។ តាមអាជ្ញាធររុស្ស៊ី ប្រជាជនជាង ២ម៉ឺននាក់ ប្រឈមនឹងគ្រោះទឹកជំនន់ ដោយសារការបាក់ទំនប់ Kakhovka។
ការបាក់ទំនប់ Kakhovkaអាចគំរាមកំហែងជន់លិចផងដែរ ទីក្រុងKherson ដែលកងទ័ពអ៊ុយក្រែនទើបវាយយកបានមកវិញ នៅឆ្នាំនេះ។ តាមអាជ្ញាធរអ៊ុយក្រែន នៅមុនទឹកជំនន់អាចទៅជន់លិចទីក្រុងKherson ប្រជាជនអ៊ុយក្រែន នៅក្បែរទំនប់ Kakhovka ប្រមាណ ១ម៉ឺន ៦ពាន់នាក់កំពុងប្រឈមនឹងគ្រោះទឹកជំនន់។ផលវិបាកទី២នៃ គ្រោះបាក់ទំនប់ Kakhovka គឺ ការផ្គត់ផ្គង់ទឹកស្អាតប្រើប្រាស់ ជាពិសេសសម្រាប់តំបន់គ្រីមេ ដែលរុស្ស៊ី កាត់យកពីអ៊ុយក្រែន នៅឆ្នាំ ២០១៤។ រហូតមក គ្រីមេរស់ពឹងអាស្រ័យលើទឹកស្អាត ដែលមានប្រភពចេញពីអាងស្តុកទឹក នៅទំនប់ Kakhovka។
ផលវិបាកទី៣ គឺគ្រោះខ្វះទឹក សម្រាប់មជ្ឈមណ្ឌលនុយក្លេអ៊ែរ ហ្សាប៉ូរីចាដែលកំពុងស្ថិតនៅក្រោមការកាន់កាប់របស់កងទ័ពរុស្ស៊ីដែរ។ រោងចក្រអគ្គិសនីដើរដោយថាមពលនុយក្លេអ៊ែរ នៅហ្សាប៉ូរីចា ត្រូវការទឹកពីអាងស្តុកទឹកនៅ Kakhovkaដើម្បីយកទៅប្រើសម្រាប់បញ្ចុះកំដៅ ម៉ាស៊ីនប្រតិករ។ បើសិនទំនប់ Kakhovkaបាក់ បញ្ចេញទឹកពីក្នុងអាងស្តុកទឹក នោះ គេនឹងលែងមានទឹកគ្រប់គ្រាន់ ដើម្បីបញ្ចុះកំដៅ ម៉ាស៊ីនប្រតិករ ដែលនឹងធ្វើឲ្យស្នូលរ៉ាក់អាក់ទ័ររលាយ បញ្ចេញសារធាតុវិទ្យុសកម្ម គំរាមកំហែងជីវិតមនុស្ស។តែបើតាមទីភ្នាក់ងារថាមពលនុយក្លេអ៊ែរអន្តរជាតិ រហូតមកដល់ម៉ោងនេះ មជ្ឈមណ្ឌលនុយក្លេអ៊ែរ នៅហ្សាប៉ូរីចា នៅមិនទាន់ប្រឈមគ្រោះថ្នាក់នៅឡើយទេ ៕
