កាំជ្រួចផ្លោងដែលបានបាញ់ចូលទឹកដីប៉ូឡូញ ជាគ្រាប់បាញ់ខុសបច្ចេកទេសរបស់អ៊ុយក្រែន
02-November-2023 / ព័ត៌មានអន្តរជាតិ
ប្រទេសប៉ូឡូញ៖ អាជ្ញាធរប៉ូឡូញ និងអង្គការណាតូបាននិយាយថា មីស៊ីលដែលបានបាញ់ទៅលើប្រទេសប៉ូឡូញ ប្រហែលជាការបាញ់ខុសបច្ចេកទេស ដោយប្រព័ន្ធការពារដែនអាកាសរបស់អ៊ុយក្រែន ដោយមិនមែនជាការវាយប្រហាររបស់រុស្ស៊ីនោះទេ ។ នេះបើតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃពុធ ទី១៦ ខែវិច្ឆិកា ឆ្នាំ២០២២។ទោះជាយ៉ាងណា អគ្គលេខាធិកាអង្គការអូតង់បាននិយាយថា ទីក្រុងមូស្គូគឺមិនមែនក្រុងកៀវទេ ដែលត្រូវស្តីបន្ទោសចំពោះការចាប់ផ្តើមសង្គ្រាមតាំងពីដំបូង និងបើកការវាយប្រហារដែលបង្កឱ្យមានការ បាញ់ការពារវិញពីសំណាក់អ៊ុយក្រែន។
លោក Jens Stoltenberg អគ្គលេខាធិការអង្គការណាតូបានប្រាប់ ថា«នេះមិនមែនជាកំហុសរបស់អ៊ុយក្រែនទេ។ រុស្ស៊ីត្រូវទទួលខុសត្រូវខ្ពស់បំផុត ខណៈដែលខ្លួនបន្តសង្គ្រាមខុសច្បាប់ប្រឆាំងនឹងអ៊ុយក្រែន»។
ប៉ូឡូញ ដែលជាសមាជិកបក្សសម្ព័ន្ធយោធាណាតូ (NATO) នៅថ្ងៃពុធនេះបានអះអាងថាមីស៊ីលមួយគ្រាប់ផលិតដោយរុស្ស៉ី បានធ្លាក់ចំតំបន់ភាគខាងកើត នៃប្រទេសរបស់ខ្លួន ស្ថិតនៅក្បែរព្រំដែនជាមួយអ៊ុយក្រែនបណ្តាលឲ្យស្លាប់មនុស្ស២នាក់ ហើយបានកោះហៅអគ្គរដ្ឋទូតរុស្ស៉ីប្រចាំទីក្រុងវ៉ាសូវី មកសួរនាំ ក្រោយទីក្រុងមូស្គូបដិសេធថាខ្លួនមិនមែន ជាអ្នកបាញ់មីស៊ីលនេះឡើយ។នៅថ្ងៃពុធនេះក្រសួងការពារជាតិរុស្ស៉ី បានអះអាងថា ឧបទ្ទវហេតុធ្លាក់មីស៉ីលចំលើទឹកដីរបស់ប្រទេសប៉ូឡូញ ដែលបានផ្តាច់ជីវិតមនុស្ស២នាក់ កាលពីថ្ងៃអង្គារសប្តាហ៍នេះ គឺត្រូវបានបង្កឡើងដោយសារតែ មីស៉ីលនៃប្រព័ន្ធការពារអាកាស S-300 របស់ប្រទេសអ៊ុយក្រែន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី១៦ ខែវិច្ឆិកា ឆ្នាំ២០២២។ក្នុងសេចក្តីថ្លែងការណ៍ក្រសួងការពារជាតិរុស្ស៉ីបានលើកឡើងថា «រូបភាពនានានៃកន្លែងធ្លាក់មីស៉ីល នៅភូមិភ្សេវ៉ូដូ (Przewodow) ប្រទេសប៉ូឡូញ បានធ្វឱ្យក្រុមអ្នកជំនាញវិស័យយោធារុស្ស៉ី អាចកំណត់យ៉ាងជាក់ច្បាស់ថា វាបណ្តាលមកពីមីស៉ីល នៃប្រព័ន្ធការពារដែនអាកាស S-300 របស់កងកម្លាំងយោធាអ៊ុយក្រែន»។
យន្តហោះយោធារបស់កងកម្លាំងអាកាសរបស់ប៉ូឡូញ ត្រូវគេរាយការណ៍មុននេះថា បានត្រៀមរួចជាស្រេចនៅក្នុងលទ្ធភាពវាយលុកតបតទៅវិញ បើសិនជា មានសញ្ញាភ្លើងបៃតងបញ្ជាឱ្យធ្វើការតបតដាក់ទៅលើរុស្ស៊ីវិញនោះ។ ការត្រៀមវាយប្រហារនេះគឺនៅបន្ទាប់ពីមានរបាយការណ៍ដែលបញ្ជាក់ថាគ្រាប់មីស៊ីល ២គ្រាប់ដែលបានចំតំបន់កសិដ្ឋានមួយក្នុងទីក្រុងប្រឹសេវ៉ូដូវ (Przewodów) កាលពីថ្ងៃទី១៥ ខែវិច្ឆិកា គឺជាគ្រាប់មីស៊ីលរបស់រុស្ស៊ី។ មនុស្សពីរនាក់បានស្លាប់ នៅក្នុងតំបន់កសិដ្ឋាននៃប្រទេសប៉ូឡូញនោះ។ យោងតាមមាត្រា៥នៃធម្មនុញ្ញអង្គការណាតូ, ការវាយប្រហារណាមួយដាក់លើសមាជិកអង្គការណាតូ គឺជាការវាយប្រហារដាក់លើអង្គការណាតូទាំងមូល។ ការចោទប្រកាន់ដាក់មកលើរុស្ស៊ី គឺនៅទន្ទឹមសកម្មភាពរបស់ទាហានរុស្ស៊ីធ្វើការបាញ់ស្រាច គ្រាប់មីស៊ីលជាង៩០គ្រាប់ដាក់លើបណ្តាទីក្រុងអ៊ុយក្រែនជាពិសេសលើទីតាំងនៃមជ្ឈមណ្ឌលថាមពលអគ្គីសនី ដែលជាការវាយប្រហារប៉ុនប៉ងផ្តាច់ភ្លើង និងទឹក ក្នុងរដូវរងានាពេលនេះ។
អាជ្ញាធរអ៊ុយក្រែនបានឲ្យដឹងថា ក្នុងចំណោមមីស៊ីលជាង៩០គ្រាប់របស់រុស្ស៊ីនោះ, ប្រមាណជាង ៧០គ្រាប់ត្រូវបានប្រព័ន្ធការពារអាកាសបាញ់ទម្លាក់។ ការបាញ់ប្រហារដោយគ្រាប់មីស៊ីលរបស់រុស្ស៊ីនោះ បានផ្តោតលើរដ្ឋធានីគៀវផង និងលើបណ្តាទីក្រុងជាច្រើនទូទាំងប្រទេស ក្នុងនោះក្រុង Lviv ដែលស្ថិត ភាគខាងលិចប្រទេសក្បែរព្រំដែនប៉ូឡូញ ក៏ជាមុខព្រួញនៃការវាយប្រហារដោយគ្រាប់មីស៊ីលរុស្ស៊ីផងដែរ។ សេចក្តីរាយការណ៍ដំបូងដកស្រង់មន្ត្រី ស៊ើបការណ៍សម្ងាត់អាមេរិកជាន់ខ្ពស់ម្នាក់ ដែលបាននិយាយថាមីស៊ីលទាំងនោះ គឺជាមីស៊ីលដែលផលិតដោយរុស្ស៊ី។ព័ត៌មាននោះហើយបានបង្ខំឱ្យប៉ូឡូញត្រូវកោះប្រជុំគណៈកម្មាធិការគណៈរដ្ឋមន្ត្រីទទួលបន្ទុកសន្តិសុខ និងការពារជាតិ។ ប្រទេសរុស្សីនៅជាមួយគ្នានោះ បានបដិសេធផងដែរ ប៉ុន្តែមិនមានការជឿណាមួយឡើយ ដោយមានការគិតថាមីស៊ីលរុស្ស៊ីបានបាញ់តំរង់ហួសគោលដៅចូលក្នុងទឹកដីប៉ូឡូញ។ ប្រធានការិយាល័យ សន្តិសុខជាតិរបស់ប្រទេសប៉ូឡូញ លោក ចេសិក ស៊ីវីរ៉ា (Jacek Siewiera) បាននិយាយថា «គេរង់ចាំរកការពន្យល់លម្អិតអំពីស្ថានភាពនេះសិន»។
លោកបានចោទថាការបាញ់មីស៊ីល «នេះគឺជាឧប្បត្តិហេតុមួយ…ជាកំហុសមួយដែលបណ្តាលមកពីរុស្ស៊ីប្រើប្រភេទមីស៊ីលចាស់ហួសសម័យដែលមិនសូវ មានភាពច្បាស់លាស់ដាក់លើគោលដៅនៃការវាយប្រហារ»។ បើទោះបីជាក្រសួងការពារជាតិរុស្ស៊ីបានអះអាងតបថាមិនមានការវាយប្រហារណាមួយ ដោយគ្រាប់មីស៊ីលរបស់រុស្ស៊ី ធ្វើឡើងប្រឆាំងនឹងគោលដៅនៅជិតព្រំដែនរដ្ឋអ៊ុយក្រែន- ប៉ូឡូញនោះឡើយ។
សេចក្តីរាយការណ៍មុននេះ ឲ្យដឹង ថាមានការជម្រុញឱ្យប្រទេសណាតូ ត្រូវអនុវត្តបទប្បញ្ញត្តិមាត្រា៥ នៃធម្មនុញ្ញរបស់អង្គការសន្ធិសញ្ញា អង្គការអត្លង់ទិកខាងជើង ដែលមាត្រាបានចែងថាការវាយប្រហារប្រឆាំងដាក់លើប្រទេសសម្ព័ន្ធមិត្តណាតូណាមួយនឹងត្រូវបានចាត់ទុកថាជាការវាយប្រហារ ប្រឆាំងដាក់លើប្រទេសនៃសម្ព័ន្ធមិត្តទាំងអស់។
លោក ហ្សេលេនស្គី បានថ្លែងថា ការបាញ់មីស៊ីលដាក់លើទឹកដីនៃអង្គការណាតូដោយគ្រាប់មីស៊ីលរបស់រុស្ស៊ី គឺជាការបង្កើនឡើងនូវភាពតានតឹង ហើយដែលគេ ត្រូវតែចាត់វិធានការ។ ទោះជាយ៉ាងណាក៏ដោយ ស្ថានភាពបានស្ងប់បន្តិចទៅវិញ ក្រោយសេចក្តីរាយការណ៍បង្ហាញថាមីស៊ីលនោះ មិនមែនជារបស់រុស្ស៊ីនោះទេ។ ក្រុមប្រឹក្សាសន្តិសុខជាតិប៉ូឡូញ បានថ្លែងនៅថ្ងៃពុធនេះថា គេនឹងជួបប្រជុំគ្នាម្តងទៀតក្នុងរង្វង់នៃការព្រួយបារម្ភសង្គ្រាមអ៊ុយក្រែនដែលអាចនឹងរាលដាលចូល មកក្នុងប្រទេសដែលស្ថិតនៅក្បែរ។គួរបញ្ជាក់ថា មេដឹកនាំណាតូ និងមេដឹកនាំប្រទេសជាដៃគូ បានកោះប្រជុំគ្នានៅថ្ងៃពុធនេះ ដើម្បីពិភាក្សាជុំវិញគ្រាប់មីស៊ីលធ្លាក់ចូលទឹកដីប៉ូឡូញ ខណៈប្រធានាធិបតីអាមេរិក លោក ចូ បៃដិន បានប្រាប់សមភាគីប៉ូឡូញរបស់លោកថាទីក្រុងវ៉ាស៊ីនតោនមានការប្ដេជ្ញាចិត្តឥតងាករេចំពោះណាតូ ហើយនឹងគាំទ្រ ការស៊ើបអង្កេតរបស់ប៉ូឡូញ៕
