របបយោធាមីយ៉ាន់ម៉ា ប្រកាសធ្វើជំរឿន ដើម្បីត្រៀមការបោះឆ្នោតសកល ឆ្នាំ២០២៥ក្នុងពេលដែលទន់ដៃជាមួយពួកតស៊ូ?!
21-May-2025 / ព័ត៌មានអន្តរជាតិ
មីយ៉ានម៉ា៖ ប្រព័ន្ធផ្សព្វផ្សាយរដ្ឋនៅមីយ៉ាន់ម៉ា បានរាយការណ៍នាថ្ងៃចន្ទ័ទី២កញ្ញាថា រដ្ឋាភិបាលយោធា នៅខែក្រោយនឹងចាប់ផ្តើម ការធ្វើជំរឿនប្រជាជននិងគ្រួសារទូទាំងប្រទេស ដើម្បីបើកផ្លូវសម្រាប់ការបោះឆ្នោតសកលថ្មី ដែលត្រូវបានសន្យាថា នឹងរៀបចំឡើងនៅឆ្នាំ២០២៥ ក្នុងពេលការប្រយុទ្ធគ្នាជាមួយក្រុមឧទ្ទាមបន្តកើនឡើង នៅតាមផ្នែកជាច្រើននៃផ្ទៃប្រទេស។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី២ ខែកញ្ញា ឆ្នាំ២០២៤។
ប្រមុខរបបសឹកមីយ៉ាន់ម៉ា លោក Min Aung Hlaing ក្នុងកិច្ចប្រជុំមួយកាលពីថ្ងៃអាទិត្យកន្លងទៅនេះ បាននិយាយថា ទិន្នន័យនៃការធ្វើជំរឿននោះ ដែលនឹងប្រមូលនៅចន្លោះថ្ងៃទី១ ខែតុលា ដល់ថ្ងៃទី១៥ ខែដដែល នឹងត្រូវប្រើប្រាស់ ដើម្បីរៀបចំការបោះឆ្នោតសកលថ្មីមួយ ដែលសេរី យុត្តិធម៌ ពហុបក្ស និងតាមលទ្ធិប្រជាធិបតេយ្យ ដោយជោគជ័យ នាឆ្នាំក្រោយ។ទោះបីយ៉ាងណាការ បោះឆ្នោតដែលសន្យានោះ គឺកន្លងមក ត្រូវបានមតិភាគច្រើនសន្និដ្ឋានរួចហើយថា នឹងជាការបោះឆ្នោតក្លែងក្លាយ ហើយលទ្ធផលទំនងជា នឹងមិនមានការទទួលស្គាល់ ពីក្រុមប្រទេសលោកខាងលិចឡើយ ដ្បិតគណបក្សនយោបាយជាច្រើន ត្រូវបានរំលាយចោល និងជាប់បម្រាម ក្នុងនោះមានទាំង គណបក្សដ៏មានប្រជាប្រិយ National League for Democracy (NLD) ដែលរបបសឹកបានផ្តួលរំលំ។
ប្រទេសសមាជិកអាស៊ាន ដែលមានប្រជាជន៥៥លាននាក់មួយនេះ បានធ្លាក់ទៅក្នុងភាពចលាចល ចាប់តាំងពីខែកុម្ភៈ ឆ្នាំ២០២១ នៅពេលយោធាបានធ្វើរដ្ឋប្រហារទម្លាក់ រដ្ឋាភិបាលគណបក្ស NLD របស់លោកស្រី អោងសាន ស៊ូជី ក្រោមការចោទប្រកាន់របស់ពួកយោធាថា ការបោះឆ្នោតសកល ដែលបក្សលោកស្រីបានទទួលជ័យជម្នះយ៉ាងភ្លូកទឹកភ្លូកដី កាលពីចុងឆ្នាំ២០២០ គឺមានការក្លែងបន្លំ។
រដ្ឋប្រហារយោធា បាននាំឱ្យផ្ទុះបាតុកម្មទូទាំងប្រទេស ហើយយោធាបានធ្វើការបង្ក្រាបយ៉ាងចាស់ដៃ រហូតប្រែក្លាយចលនាបាតុកម្មនោះ ទៅជាចលនាប្រឆាំងប្រដាប់អាវុធ។ សព្វថ្ងៃ រដ្ឋាភិបាលយោធាមីយ៉ាន់ម៉ា បានបាត់បង់ការគ្រប់គ្រងលើទឹកដីមួយភាគធំ ចំពោះមុខការវាយលុករបស់ក្រុមឧទ្ទាម។
ជាក់ស្តែងបណ្តាទីតាំងមួយចំនួននៅតាមបណ្តាខេត្តជាប់ប្រទេសចិនដែលជាច្រកជំនួញដ៏ធំត្រូវបានពួកឧទ្ទាមកាន់កាប់។ប្រការដែលគួឲ្យចាប់អារម្មណ៍ទៅទៀតគឺទីប្រឹក្សាសន្តិសុខអាមេរិកលោកចេកស៊ូលីវ៉ាន់បានធ្វើទំនាក់ទំនងជាមួយពួគឧទ្ទាមដោយត្រង់បង្កឲ្យមានការព្រួយបារម្ភពីប្រទេសចិន។ទាក់ទិនករណីយ៍នេះយោធាចិន នៅថ្ងៃចន្ទ ទី២៦ ខែសីហានេះបាននិយាយថាខ្លួនបានដឹកនាំប្រតិបត្តិការល្បាតរួមគ្នារវាងកងទ័ព និងប៉ូលិសទាំងតាមជើងគោក និងអាកាស នៅក្បែរព្រំដែនមីយ៉ាន់ម៉ា ដើម្បីថែរក្សាការពារសន្តិសុខ ក៏ដូចជាស្ថិរភាព ខណៈការវាយប្រយុទ្ធគ្នារវាងកងទ័ពនៃរបបសឹកមីយ៉ាន់ម៉ា និងក្រុមឧទ្ទាម កាន់តែពុះកញ្ជ្រោល។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
យោធាចិន បានឱ្យដឹងនៅក្នុងសេចក្ដីថ្លែងការណ៍មួយថាប្រតិបត្តិការល្បាត នឹងផ្ដោតសំខាន់លើតំបន់ Ruili និងតំបន់ Zhenkang ព្រមទាំងតំបន់មួយចំនួនទៀតរបស់ចិន ដែលសិ្ថតនៅជាប់ព្រំដែនជាមួយមីយ៉ាន់ម៉ា។ សេចក្ដីថ្លែងការណ៍ដដែលក៏បានបញ្ជាក់ផងដែរថានៅក្នុងប្រតិបត្តិការល្បាតនេះ កងទ័ព និងប៉ូលិសចិននឹងហាត់សមរួមគ្នា ពីរបៀបធ្វើការឆ្លើយតបឱ្យបានលឿនរហ័ស ការបិទខ្ទប់ ការគ្រប់គ្រង ការវាយប្រហាររួមគ្នា និងការថែរក្សាការពារសន្តិសុខ និងស្ថិរភាពនៅតាមបណ្ដោយតំបន់ ព្រំដែនចិន។សម្រាប់ចិន សង្គ្រាមនៅមីយ៉ាន់ម៉ាបានបង្ក ផលប៉ះពាល់អវិជ្ជមានដល់ស្ថិរភាព ព្រមទាំងសណ្ដាប់ធ្នាប់សង្គមនៅតាមបណ្ដោយព្រំដែនចិន និងមីយ៉ាន់ម៉ា។
បើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២៧ខែសីហាបានឲ្យដឹងថាការល្បាតរបស់យោធាចិនរួមមានការពង្រាយកងទ័ពនៅក្នុងខេត្តយូណាន ភាគនិរតីនៃប្រទេសចិនដើម្បីសាកល្បងសមត្ថភាពរបស់ពួកគេក្នុងការថែរក្សាសន្តិសុខនៅក្នុងតំបន់ព្រំដែន។ ជាមួយគ្នានេះ យោធាចិនបានធ្វើលំហាត់សមយុទ្ធយោធាបាញ់គ្រាប់ពិតពីថ្ងៃអង្គារដល់ថ្ងៃព្រហស្បតិ៍នៅក្នុងទីតាំងចំនួនបួននៅក្នុងខេត្ត យូណាន រួមទាំងទីក្រុង Ruiliផងដែរ។សូមបញ្ជាក់ថារដ្ឋ Shan ដែលស្ថិតនៅភាគខាងជើងនៃប្រទេសមីយ៉ាន់ម៉ា គឺជាកន្លែងប៉ះទង្គិចគ្នាម្តងហើយម្តងទៀត ចាប់តាំងពីចុងខែមិថុនា បន្ទាប់ពីក្រុមចលនាតស៊ូប្រដាប់អាវុធបន្តការវាយលុកប្រឆាំងយោធា។ រដ្ឋ Shan មានព្រំប្រទល់ជាប់ខេត្ត Yunnan ប្រទេសចិន ហើយជាតំបន់សំខាន់នៃគំនិតផ្តួចផ្តើម ខ្សែក្រវ៉ាត់ និងផ្លូវរបស់ទីក្រុងប៉េកាំង។
លោក Min Aung Hlaing មេដឹកនាំរដ្ឋាភិបាលយោធាមីយ៉ាន់ម៉ា បានចោទប្រកាន់ថា បរទេសមួយចំនួនកំពុងគាំទ្រក្រុមជីវពលជនជាតិភាគតិច ដែលទំនងជាសំដៅទៅលើប្រទេសចិន ខណៈចិនមានទំនាក់ទំនងជាយូរណាស់មកហើយជាមួយក្រុមទាំងនោះ។ជាការឆ្លើយតបរដ្ឋមន្ត្រីការបរទេសចិន លោក Wang Yi បាននិយាយកាលពីដើមខែនេះថា ប្រទេសរបស់លោក «ប្រឆាំងនឹងភាពចលាចល និងសង្គ្រាមនៅក្នុងប្រទេសមីយ៉ាន់ម៉ា»។ អំឡុងពេលលោក Wang បំពេញទស្សនកិច្ចនៅមីយ៉ាន់ម៉ា លោកក៏បានប្រាប់លោក Min Aung Hlaing ថាប្រទេសចិនប្រឆាំងនឹងការវាយប្រហារនៅក្នុងរដ្ឋ Shan។
អ្នកការទូតកំពូលរបស់ចិនរូបនេះក៏បានសម្តែងក្តីសង្ឃឹមថា មីយ៉ានម៉ា «នឹងការពារសុវត្ថិភាពបុគ្គលិក និងគម្រោងរបស់ចិនប្រកបដោយប្រសិទ្ធភាព» នៅក្នុងប្រទេសមីយ៉ាន់ម៉ា។ ស្ថានទូតចិនប្រចាំប្រទេសមីយ៉ាន់ម៉ាក៏បានចេញការក្រើនរំលឹកក្នុងខែនេះដល់ប្រជាពលរដ្ឋចិនក្នុងរដ្ឋ Shan ឱ្យពង្រឹងការប្រុងប្រយ័ត្នផ្នែកសន្តិសុខរបស់ពួកគេ និងនៅឱ្យឆ្ងាយពីតំបន់ជម្លោះ ឬត្រឡប់ទៅប្រទេសចិនវិញ។
សូមបញ្ជាក់ថាមេដឹកនាំរបបសឹកមីយ៉ាន់ម៉ា លោក មីន អោងឡាំង និងរដ្ឋមន្ត្រីការបរទេសចិន លោក វ៉ា យី បានពិភាក្សាគ្នាកាលពីថ្ងៃពុធទី១៤សីហា អំពីសន្តិសុខនៅតាមព្រំដែននៃប្រទេសទាំងពីរ ជាទីដែលក្រុមចលនាតស៊ូប្រដាប់អាវុធ ដណ្តើមការគ្រប់គ្រងទឹកដីពីយោធាមីយ៉ាន់ម៉ា ក្នុងរយៈពេលប៉ុន្មានសប្តាហ៍ថ្មីៗនេះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី១៥ ខែសីហា ឆ្នាំ ២០២៤។គួរបញ្ជាក់ថា នេះជាដំណើរទស្សនកិច្ចថ្មីមួយទៀតដោយមន្ត្រីកំពូលចិន នៅមីយ៉ាន់ម៉ា បន្ទាប់ពីអតីតរដ្ឋមន្ត្រីការបរទេស លោក Qin Gang កាលពីឆ្នាំមុន៕
