រដ្ឋាភិបាលបារាំង ដួលរលំ ក្រោយពី រដ្ឋអាជ្ញាបារាំង ស្នើហាមឃាត់មេដឹកនាំស្តាំនិយម លោកស្រីម៉ារីឡឺប៉ែន មិនឱ្យអាចឈរឈ្មោះបោះឆ្នោត
21-September-2026 / ព័ត៌មានអន្តរជាតិ
ប្រទេសបារាំង៖ប្រទេសមហាអំណាចសេដ្ឋកិច្ចធំទី២របស់សហភាពអឺរ៉ុបមួយនេះ ធ្លាក់ចូលក្នុងវិបត្តិនយោបាយកាន់តែជ្រៅដែលអាចនឹងគំរាមកំហែងដល់សមត្ថភាពក្នុងការអនុម័តច្បាប់ផ្សេងៗ និងការដោះស្រាយឱនភាពកញ្ចប់ថវិកាសមាជិកសភាបារាំង កាលពីថ្ងៃពុធ ទី៤ ខែធ្នូ បានអនុម័តលើការបោះឆ្នោតដកសេចក្ដីទុកចិត្តប្រឆាំងរដ្ឋាភិបាល។
ទីភ្នាក់ងារសារព័ត៌មាន Reutersបានឲ្យដឹងថា៖សមាជិកសភាបារាំងមកពីគណបក្សសាំ្ដនិយមជ្រុល និងឆ្វេងនិយម បានរួមដៃគ្នាបោះឆ្នោតគាំទ្រលើសំណើដកសេចក្ដីទុកចិត្តប្រឆាំងនឹងនាយករដ្ឋមន្ត្រី លោក Michel Barnier ជាមួយសំឡេង គាំទ្រភាគច្រើន ៣៣១។ ករណីយ៍នេះ លោក Barnier ត្រូវដាក់លិខិតលាលែងចេញពីតំណែងរបស់លោកផ្ទាល់ និងរដ្ឋាភិបាលរបស់លោកទាំងមូលទៅកាន់លោកប្រធានាធិបតីអេម៉ានូអែលម៉ាក្រុន( Emmanuel Macron)។
ការបោះឆ្នោតនេះធ្វើឱ្យរដ្ឋាភិបាលសំឡេងភាគតិចរបស់លោក Barnier ដែលទើបតែដឹកនាំប្រទេសបាន៣ខែ ក្លាយជារដ្ឋាភិបាលមានអាយុខ្លីជាងគេបំផុតមួយ ចាប់តាំងពីការចាប់ផ្ដើមនៃ សាធារណរដ្ឋទី៥ របស់បារាំងក្នុងឆ្នាំ១៩៥៨មក។ បន្ថែមពីនេះ វាក៏ជាលើកដំបូងផងដែរគិតចាប់តាំងពីអាណត្តិលោក Georges Pomidou ក្នុងឆ្នាំ១៩៦២ ដែលរដ្ឋាភិបាលបារាំងបាញ់ការបោះឆ្នោតដកសេចក្ដីទុកចិត្ត។
គួរបញ្ជាក់ថា គណបក្សស្ដាំនិយមជ្រុល និងឆ្វេងនិយម បានរួមដៃគ្នាបោះឆ្នោតដកសេចក្ដីទុកចិត្តពីរដ្ឋាភិបាលរបស់លោក Barnier នៅបន្ទាប់ពីរូបលោកបានប្រើប្រាស់សិទ្ធិអំណាចពិសេសដែល មានចែងក្នុងរដ្ឋធម្មនុញ្ញ ដើម្បីអនុម័តកញ្ចប់ថវិកាមួយ ដោយមិនឆ្លងកាត់ការបោះឆ្នោតសម្រេចចិត្តចុងក្រោយពីសភា ជាទីដែលរដ្ឋាភិបាលមិនមានសំឡេងភាគច្រើនគ្រប់គ្រាន់។ការបោះឆ្នោតដកសេចក្ដីទុកចិត្ត ធ្វើឡើងបន្ទាប់ពីលោក Barnier បានប្រើប្រាស់អំណាចពិសេសនៃរដ្ឋធម្មនុញ្ញ ដើម្បីអនុម័តថវិកាដោយមិនឆ្លងកាត់ការបោះឆ្នោតចុងក្រោយនៅក្នុងសភា។ សេចក្តីព្រាងថវិការបស់លោកបានីញេ( Barnier )មានចំនួន ៦០ពាន់លានអឺរ៉ូ ឬ ៦៣,០៧ពាន់លានដុល្លារ សម្រាប់ការកាត់បន្ថយបញ្ហាឱនភាពនៅបារាំង។សូមបញ្ជាក់ថាកន្លងមកគណបក្សស្តាំនិងឆ្វេងនិយមក៏ធ្លាប់បានដឹកនាំការធ្វើបាតុកម្មប្រឆាំងការតែងតាំងលោកបានីញេជានាយករដ្ឋមន្ត្រីផងដែរ។
ទាក់ទងរឿងនេះដែរកាលពីអំឡុងខែវិច្ឆិកា ក្រុមរដ្ឋអាជ្ញានៅប្រទេសបារាំង បានស្នើឱ្យមេដឹកនាំស្តាំនិយម លោកស្រីម៉ារីឡឺប៉ែន( Marine Le Pen )ត្រូវរកឃើញថា ពិតជាមានទោសពី បទលួចបន្លំមូលនិធិរបស់សភាអឺរ៉ុប ហើយត្រូវផ្តន្ទាទោសជាប់ពន្ធនាគារ ព្រមទាំងជាប់បម្រាមមិនអាចឈរឈ្មោះបោះឆ្នោត សម្រាប់រយៈពេល៥ឆ្នាំខាងមុខ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃព្រហស្បតិ៍ ទី១៤ ខែវិច្ឆិកា ឆ្នាំ២០២៤។
លោកស្រី Le Pen រួមទាំងគណបក្សស្តាំនិយមរបស់លោកស្រីគឺ National Rally និងបុគ្គល២៤នាក់ទៀត រួមមានសមាជិកបច្ចុប្បន្ន ក៏ដូចជាអតីតសមាជិកនៃសភាបារាំង និងសភាសហភាពអឺរ៉ុប រងការចោទប្រកាន់ថា បានប្រើប្រាស់មូលនិធិសភាអឺរ៉ុបដោយខុសច្បាប់ តាមរយៈការយកថវិកាទាំងនោះ ទៅប្រើសម្រាប់កិច្ចការរបស់បក្សលោកស្រីផ្ទាល់ ជាជាងកិច្ចការសហភាពអឺរ៉ុប ចាប់ពីឆ្នាំ២០០៤ រហូតដល់ឆ្នាំ២០១៦។ លោកស្រី Le Pen និងសហចុងចោទដទៃទៀត សុទ្ធតែបានបដិសេធការចោទប្រកាន់។
ក្រុមរដ្ឋអាជ្ញាបារាំង បានស្នើថា លោកស្រីឡឺប៉ែន( Le Pen )គួរទទួលរងការដាក់ទោសទណ្ឌធ្ងន់ជាងគេ ដ្បិតលោកស្រីគឺជាសមាជិកសភាអឺរ៉ុបផង និងជាប្រធានគណបក្សផង អំឡុងពេលដែលបទល្មើសទាំងនោះមួយចំនួន ត្រូវបានប្រព្រឹត្ត។ ពួកគេបានស្នើឱ្យចៅក្រមផ្តន្ទាទោសដាក់ពន្ធនាគារលោកស្រី រយៈពេល៥ឆ្នាំ ក្នុងនោះ៣ឆ្នាំអាចត្រូវព្យួរបាន ហើយពិន័យជាប្រាក់៣០០,០០០អឺរ៉ូ។ សម្រាប់បម្រាមហាមឃាត់ឈរឈ្មោះបោះឆ្នោត ដែលមានរយៈពេល៥ឆ្នាំ នឹងមានសុពលភាពហួសឆ្នាំ២០២៧ ជាពេលដែលការបោះឆ្នោតប្រធានាធិបតីបារាំង ត្រូវបានកំណត់ថា នឹងរៀបចំឡើង។អ្វីដែលសំខាន់ គឺក្រុមរដ្ឋអាជ្ញាបារាំង បានស្នើឱ្យការផ្តន្ទាទោស ត្រូវអនុវត្តភ្លាមៗតែម្តង ក្រោយពេលតុលាការប្រកាសសាលក្រម ទោះបីជាលោកស្រី Le Pen សម្រេចប្តឹងឧទ្ធរណ៍ក៏ដោយ។ ការប្រកាសសាលក្រមសំណុំរឿងនេះ ត្រូវបានរំពឹងថា នឹងប្រព្រឹត្តទៅនាអំឡុងដើមឆ្នាំ២០២៥។
គួរបញ្ជាក់ថា លោកស្រី Marine Le Pen ធ្លាប់ឈរឈ្មោះប្រកួតប្រជែងតំណែងប្រធានាធិបតីបារាំង សរុបចំនួន៣លើក។ ក្នុងការបោះឆ្នោតប្រធានាធិបតីលើកចុងក្រោយ កាលពីឆ្នាំ២០២២ លោកស្រី បានទទួលបរាជ័យ ក្រោមដៃលោក Emmanuel Macron ក្នុងសំឡេង៥៨.៥៥ភាគរយ ទល់នឹង៤១.៤៥ភាគរយ។ យ៉ាងណាមិញ ក្រោយការបោះឆ្នោតសភាឆ្នាំ២០២៤នេះ គណបក្សរបស់លោកស្រី Le Pen ឥឡូវគឺជាបក្សធំជាងគេ ក្នុងចំណោមគណបក្សជាច្រើននៅក្នុងសភាបារាំង ហើយលោកស្រី ត្រូវមនុស្សជាច្រើនជឿថា ទំនងជាអាចនឹងឈ្នះ ក្នុងការបោះឆ្នោតប្រធានាធិបតីឆ្នាំ២០២៧៕
