ពលរដ្ឋវេណេហ្ស៊ូអ៊ីឡា ហាក់អស់សង្ឃឹម នៅពេលប្រធានាធិបតី Nicolas Maduro បន្តឈ្នះឆ្នោតដឹកនាំប្រទេស
15-March-2026 / ព័ត៌មានអន្តរជាតិ
វេណេហ្ស៊ូអ៊ីឡា៖ កងនគរបាលជាតិរបស់ប្រទេសវេណេហ្ស៊ូអ៊ីឡា បានចាប់ខ្លួនក្រុមបាតុករវ័យក្មេងជាច្រើននាក់ ដែលពួកគេបានចូលរួមក្នុងការតវ៉ាប្រឆាំងនឹងលទ្ធផលបោះឆ្នោតក្លែងក្លាយកាលពីថ្ងៃទី ២៨កក្កដាកន្លងទៅ ដោយបានផ្តល់ជ័យជំនះលើមេដឹកនាំពីរអាណត្តិ គឺលោកប្រធានធីបតី នីកូឡាស ម៉ាឌូរ៉ូ នៅក្នុងរដ្ឋធានីការ៉ាកាស (Caracas) ។
រូបភាពវីដេអូដែលទទួលបានដោយភ្នាក់ងារព័ត៌មាន រ៉យទ័រ បានបង្ហាញពីទិដ្ឋភាពកម្លាំងនគរបាលជាតិវេណេហ្ស៊ូអ៊ីឡា បានចាប់បង្ខំក្រុមបាតុករវ័យក្មេងជាច្រើននាក់ដាក់តាមម៉ូតូ និងរថយន្តបញ្ចូនទៅកាន់ទីកន្លែងឃុំឃាំង ខណៈឧស្ម័នបង្ហូរទឹកភ្នែកជាច្រើនត្រូវបានគេប្រើប្រាស់ដើម្បីបំបែកហ្វូងអ្នកតវ៉ាទាំងអស់នោះ។មេដឹកនាំបក្សប្រឆាំងគឺលោកស្រី Maria Corina Machado បានអំពាវនាវឱ្យក្រុមបាតុករត្រូវមានការអត់ធ្មត់ខ្ពស់ និងមិនត្រូវធើ្វការតបតដោយសកម្មភាពហិង្សាណាមួយទៅលើក្រុមអាជ្ញាធរ ឬក៏ក្រុមអ្នកដែលគាំទ្ររដ្ឋាភិបាលនោះឡើយ ដើម្បីជៀសវាងបញ្ហាវិបត្តិនយោបាយធ្ងន់ធ្ងរទៅថ្ងៃមុខ។
គួរបញ្ជាក់ដែរថា ពលរដ្ឋវេណេហ្ស៊ូអ៊ីឡាជាច្រើននាក់បាននាំគ្នាបន្តធើ្វបាតុកម្មជាទ្រង់ទ្រាយធំនៅថ្ងៃអង្គារដើម្បីទាមទារឱ្យលោកប្រធានាធិបតី ម៉ាឌូរ៉ូ ព្រមទទួលស្គាល់ភាពបរាជ័យរបស់ខ្លួនក្នុងការបោះឆ្នោតជាតិកាលពីថ្ងៃអាទិត្យកន្លងទៅ និងក្រោយពីភាគីគណបក្សប្រឆាំងបានអះអាងពីជ័យជំនះយ៉ាងភ្លូកទឹកភ្លូកដីរបស់ខ្លួនក្នុងដំណើរការបោះឆ្នោត។ជុំវិញស្ថានការណ៍នយោបាយដ៏ចម្រូងចម្រាសនេះ មេដឹកនាំបក្សប្រឆាំងវេណេហ្ស៊ូអ៊ីឡាមួយរូបដែលកំពុងរស់នៅបែបនិរទេសខ្លួនក្រៅស្រុក គឺលោកស្រី Dinorah Figuera បានទទូចសុំឱ្យសហគមន៍អន្តរជាតិយកចិត្តទុកដាក់ចំពោះស្ថានការណ៍វិវត្តនៅក្នុងប្រទេសវេណេហ្ស៊ូអ៊ីឡា និងជម្រុញឱ្យបណ្តាអង្គការអន្តរជាតិបង្កើនការដាក់សម្ពាធមកលើរដ្ឋាភិបាលរបស់លោកប្រធានាធិបតី ម៉ាឌូរ៉ូ ខណៈលោកស្រីបានចោទប្រកាន់មេដឹកនាំវេណេហ្ស៊ូអ៊ីឡារូបនេះ ថាបានកែប្រែលទ្ធផលបោះឆ្នោតដោយពុំមានភាពអៀនខ្មាស់ ដើម្បីបន្តការដឹកនាំប្រទេសតាមបែបផ្ដាច់ការនិយមរយៈពេលជាង ១០ឆ្នាំទៅថ្ងៃមុខទៀត.។
សូមបញ្ជាក់ថានៅដើមសប្តាហ៍នេះ ពលរដ្ឋវេណេហ្ស៊ូអ៊ីឡា បានបង្ហាញអារម្មណ៍ខកចិត្ត បន្ទាប់ពីលទ្ធផលនៃការបោះឆ្នោតប្រធានាធិបតី បានផ្តល់ជ័យជម្នះទៅឱ្យលោក នីកូឡាស ម៉ាឌូរ៉ូ (Nicolas Maduro) ដែលកំពុងតែកាន់អំណាច ជាមួយនឹងលទ្ធផលគាំទ្រចំនួន ៥១% ដោយតួលេខនេះ ហាក់ផ្ទុយពីចំនួនម្ចាស់ឆ្នោតដ៏មានសក្តានុពលពិតប្រាកដ ដែលគាំទ្រសម្រាប់ជ័យជម្នះរបស់គណបក្សប្រឆាំង ។អំឡុងថ្លែងទៅកាន់អ្នកយកព័ត៌មានរបស់ទីភ្នាក់ងាររ៉យទ័រ ពលរដ្ឋវេណេហ្ស៊ូអ៊ីឡាមួយរូបឈ្មោះ អ៊ីវ៉ា ម៉ាទីន (Eva Martinez) ជាអ្នកលក់ដូរនៅតាមដងផ្លូវ បានបង្ហាញក្តីព្រួយបារម្ភអំពីសមាជិកគ្រួសារ ដែលកំពុងពិចារណាក្នុងការចាកចេញពីប្រទេសដោយសារតែលទ្ធផលបោះឆ្នោត។ពលរដ្ឋវេណេហ្ស៊ូអ៊ីឡាផ្សេងទៀត ហាក់ខកចិត្តជាខ្លាំងចំពោះលទ្ធផលបោះឆ្នោត ដោយធ្វើឱ្យមនុស្សមួយចំនួនបាត់បង់ក្តីសង្ឃឹមសម្រាប់អនាគតប្រជាជាតិរបស់ពួកគេ ។ព្រោះក្នុងរបបលោកម៉ាដូរ៉ូដឹកនាប្រទេសវេណេហ្សុយអេឡារងការដាក់ទណ្ឌកម្មនិងហ៊ុំពទ្ធ័សេដ្ឋកិច្ចបឲពីបរទេសដោយសារតែអំពើផ្តាច់ការ។សេដ្ឋកិច្ចប្រទេសធ្លាក់ប្រជាពលរដ្ឋក្រីក្រ។
គួររំឮកថា អាជ្ញាធរវេណេហ្ស៊ូអ៊ីឡា បាននិយាយថា បេក្ខជនប្រធានាធិបតីរបស់បក្សប្រឆាំង អ៊ែដមុនដូ ហ្គនហ្សាឡេស (Edmundo Gonzalez) ទទួលបានសំឡេងគាំទ្រ ៤៤% បើទោះបីជាមុននេះ គណបក្សប្រឆាំង បញ្ជាក់ថា ខ្លួនមានការគាំទ្រគ្រប់គ្រាន់ដើម្បីទទួលបានជ័យជម្នះក៏ដោយ ហើយបានស្នើសុំឱ្យអ្នកគាំទ្របន្តតាមដានការរាប់សន្លឹកឆ្នោត ។
កាលពីថ្ងៃចន្ទ ប្រទេសអាឡឺម៉ង់ បានអំពាវនាវដល់អាជ្ញាធរវេណេហ្ស៊ូអ៊ីឡា ឱ្យផ្សព្វផ្សាយលទ្ធផលនៃការបោះឆ្នោតប្រធានាធិបតីរបស់ប្រទេស "ក្នុងលក្ខខណ្ឌលម្អិតនិងតម្លាភាព" សម្រាប់បេក្ខជនបក្សប្រឆាំង លោក ហ្គនហ្សាឡេស (Gonzalez) និងមេដឹកនាំបក្សប្រឆាំង ម៉ារៀ ខូរីណា ម៉ាឆាដូ (Maria Corina Machado) ៕ប្រភព៖ Reuters Connect
