វិបត្តការទូតរវាងកាណាដានិងឥណ្ឌាផ្ទុះឡើងជាថ្មីបន្ទាប់ពីមានារបណ្តេញមន្ត្រីទូត
21-September-2026 / ព័ត៌មានអន្តរជាតិ
ប្រទេសកាណាដា៖វិបត្តិការទូតរវាងកាណាដានិងឥណ្ឌាកាន់តែផ្ទុះខ្លាំង។ ដើមហេតុព្រោះតែករណីសម្លាប់មេក្រុមចលនាប្រឆាំងរដ្ឋាភិបាលឥណ្ឌានៅលើទឹកដីកាណាដា កាលពីឆ្នាំទៅមិញ។ រដ្ឋាភិបាលឥណ្ឌា បានសម្រេចបណ្តេញមន្ត្រីទូតជាន់ខ្ពស់ ៦ នាក់ របស់កាណាដាប្រចាំនៅរដ្ឋធានីញូវដេលី ឲ្យចាកចេញពីទឹកដីឥណ្ឌា យ៉ាងយូរបំផុតត្រឹមថ្ងៃសៅរ៍ ទី១៩តុលា មុនម៉ោង១២យប់ ជាកំហិត។ ជាការឆ្លើយតប រដ្ឋាភិបាលទីក្រុងអូតាវ៉ា ក៏បានបណ្តេញមន្ត្រីទូតឥណ្ឌា ក្នុងចំនួនដូចគ្នាដែរ ឲ្យចេញពីទឹកដីកាណាដាផងដែរ។
វិបត្តិការទូតរវាងប្រទេសទាំងពីរបាន ផ្ទុះកើតឡើងក្រោយ ពីតម្រួតប៉ូលិសកាណាដា លាតត្រដាងរបាយការណ៍ស៊ើបអង្កេត ស្តីអំពីឃាតកម្មលើ មេដឹកនាំចលនាសាសនាសិខដ៏មានឥទ្ធិពលម្នាក់ លោក Hardeep Singh Nijjar។ លោកនេះ ត្រូវគេសម្លាប់ពីខែមិថុនាឆ្នាំ២០២៣ ក្នុងបរិវេណចំណតឡាន នៃវិហារសាសនាសិខ១កន្លែង ក្នុងក្រុង Vancouver។ ករណីយ៍នេះនគរបាលកាណាដា អះអាងជាថ្មីថា មានភស្តុតាងគ្រប់គ្រាន់ និងអាចជឿទុកចិត្តបាន ដែលបញ្ជាក់ពីសកម្មភាពរបស់ ក្រុមភ្នាក់ងារស៊ើបការណ៍សម្ងាត់ឥណ្ឌា ក្រោមការបង្គាប់បញ្ជារបស់ថ្នាក់ដឹកនាំក្រុងញូវដេលី។ អាជ្ញាធរកាណាដា ក៏ដាក់ការសង្ស័យលើមន្ត្រីទូតឥណ្ឌាប្រចាំនៅ កាណាដា ក្នុងអំពើសម្លាប់មនុស្សនេះដែរ។
លោក Hardeep Singh Nijjar ជាប្រមុខដឹកនាំចលនាសាសនាសិខដ៏មានឥទ្ធិពល និងជាសត្រូវនយោបាយរបស់រដ្ឋាភិបាលឥណ្ឌា ព្រោះតែសកម្មភាពទាមទារបំបែកទឹកដី។ លោកបានរត់ភៀសខ្លួនទៅកាណាដា ឆ្នាំ១៩៩៧។ រដ្ឋាភិបាលឥណ្ឌា ក៏ធ្លាប់ប្រកាសឲ្យរង្វាន់ទឹកប្រាក់ ១ម៉ឺន២ពាន់ដុល្លារ ប្រសិនបើនរណាអាចផ្តល់ព័ត៌មានឈានទៅចាប់ឃាត់ខ្លួនបុគ្គលនេះបាន។
មេសាសនាប្រឆាំងឥណ្ឌារូបនេះ បានទទួលសញ្ជាតិកាណាដា តាំងពីឆ្នាំ២០១៥។ ម្លោះហើយទើប នាយករដ្ឋមន្ត្រី កាណាដាលោក ទ្រូដូ ចាំបាច់ត្រូវតែការពារពលរដ្ឋរបស់ខ្លួន។ ករណីបណ្តេញមន្ត្រីទូតនេះថ្នាក់ដឹកនាំកាណាដាសម្តែងក្តីសោកស្តាយ និងចាត់ទុកថា រដ្ឋបាលក្រុងញូវដេលី ប្រតិកម្មខុសឆ្គងខ្លាំង ដោយជ្រើសរើសផ្លូវការទូតប្រឆាំងនឹងកា ណាដា។ ចំពោះកាណាដា, រាល់សកម្មភាពហិង្សានិងសម្លាប់មនុស្សលើទឹកដីកាណាដា ជារឿងមិនអាចទទួលយកបានទាល់តែសោះ។ លោក ទ្រុយដូ ថ្លែងថាមិនអត់ឱនឲ្យរដ្ឋាភិបាលបរទេសដែលគំរាមសុវត្ថិភាពនិងសម្លាប់ពលរដ្ឋកាណាដានៅលើទឹកដីកាណាដានោះឡើយ។ នេះជាការបំពានអធិបតេយ្យភាពយ៉ាងធ្ងន់ធ្ងរ ហើយ និងរំលោភច្បាប់អន្តរជាតិ។
ផ្ទុយទៅវិញ ក្រសួងការបរទេសឥណ្ឌា បានបដិសេធការចោទប្រកាន់របស់រដ្ឋបាលក្រុងអូតាវ៉ា និងថា ការភ្ជាប់រដ្ឋាភិបាលក្រុងញូវដេលី ទៅនឹងសំណុំរឿងឃាតកម្មប្រមុខដឹកនាំនិកាយសិខ ជាយុទ្ធសាស្ត្របរិហារកេរ្តិ៍ឥណ្ឌា ដើម្បីផលចំណេញប្រយោជន៍នយោបាយតែប៉ុណ្ណោះ។នៅប្រទេសកាណាដា មានពលរដ្ឋដើមកំណើតឥណ្ឌា ប្រកាន់និកាយសាសនាសិខ មានចំនួនប្រមាណ ៧៧ម៉ឺន នាក់ ស្មើនឹង ២% នៃពលរដ្ឋកាណាដា។ ពួកគេទាំងនោះបង្ហាញការគាំទ្រនិងធ្វើសកម្មភាពដើម្បីទាមទារឯករាជ្យបង្កើតរដ្ឋសិខ១ នៅប៉ែកខាងជើងប្រទេសឥណ្ឌា ដោយឲ្យឈ្មោះថា រដ្ឋខាលីស្ថាន។ ក៏ប៉ុន្តែ ក្រុមដឹកនាំចលនាទាមទារបំបែកទឹកដឹកឥណ្ឌានេះ ត្រូវរដ្ឋាភិបាលក្រោមអំណាចរបស់នាយករដ្ឋមន្ត្រី ណារិនដ្រា ម៉ូឌី បង្ក្រាប។ ចរដ្ឋាភិបាលឥណ្ឌាចាត់ទុក, ក្រុមចលនាសាសនានេះ ជាក្រុមភេរវជន និងត្រូវជាប់ចោទក្នុងបទល្មើសច្បាស់ជាច្រើនករណី។នៅសហរដ្ឋអាមេរិក ករណីប៉ុនប៉ងសម្លាប់អ្នកដឹកនាំចលនាសិខ ក៏កើតមានឡើងដែរ នៅទីក្រុងញូវយ៉ក ខែវិច្ឆិកាឆ្នាំទៅមិញ។ ដោយចាប់មេស៊ីឈ្នួលធ្វើឃាតមនុស្ស ម្នាក់ផង នគរបាលអាមេរិក អះអាងថាសកម្មភាពល្មើសនេះជាប់ពាក់ព័ន្ធជាមួយនឹងរដ្ឋាភិបាលឥណ្ឌា។
