តៃវ៉ាន់បដិសេធសំណើអាម៉េរិក ចង់ឱ្យផ្ទេរផលិតកម្មបន្ទះឈីប ៤០ភាគរយ ទៅទឹកដីអាម៉េរិក

តៃវ៉ាន់៖ តៃវ៉ាន់ប្រកាសថា សំណើរបស់សហរដ្ឋអាម៉េរិកដែលចង់ឱ្យតៃវ៉ាន់ផ្ទេរសមត្ថភាពផលិតបន្ទះឈីបរហូតដល់ ៤០% ទៅកាន់ទឹកដីអាម៉េរិកនោះ គឺជាប្រធានបទដែល «មិនអាចទៅរួចឡើយ»។ ការបញ្ជាក់នេះ ធ្វើឡើងបន្ទាប់ពីមានសម្ពាធផ្នែកភូមិសាស្ត្រនយោបាយ កាន់តែខ្លាំងឱ្យតៃវ៉ាន់រំកិលរោងចក្រផលិតគ្រឿងបច្ចេកវិទ្យាដ៏សំខាន់របស់ខ្លួនទៅក្រៅប្រទេស ។

មន្ត្រីតៃវ៉ាន់ លោកស្រី ឆឹង លីជុន (Cheng Li-chiun) បានលើកឡើងថា ការបង្ខំឱ្យផ្ទេរផលិតកម្មក្នុងកម្រិតខ្ពស់បែបនេះ នឹងបង្កហានិភ័យធ្ងន់ធ្ងរដល់ប្រព័ន្ធអេកូឡូស៊ីបច្ចេកវិទ្យា។ លោកស្រីបញ្ជាក់ថា តៃវ៉ាន់ត្រូវតែរក្សាទ្រព្យសម្បត្តិសេដ្ឋកិច្ចដ៏សំខាន់បំផុតរបស់ខ្លួននេះ ដើម្បីការពារកុំឱ្យបាត់បង់ឧត្តមភាពក្នុងវិស័យបន្ទះឈីប ដែលមានក្រុមហ៊ុនយក្ស TSMC ជាបង្គោល ។

អ្នកជំនាញសេដ្ឋកិច្ចវិភាគថា ប្រសិនបើផ្ទេរផលិតកម្មទៅអាម៉េរិកមែននោះ ថ្លៃដើមនៃការផលិតនឹងហក់ឡើងខ្ពស់ខ្លាំង ដោយសារតែការបែងចែកច្រវាក់ផ្គត់ផ្គង់។ លើសពីនេះ អាម៉េរិកក៏អាចនឹងប្រឈមមុខនឹងបញ្ហាខ្វះខាតកម្លាំងពលកម្មជំនាញ កម្រិតមធ្យម និងកម្រិតខ្ពស់ ដើម្បីមកប្រតិបត្តិការរោងចក្រផលិតបន្ទះឈីបដ៏ទំនើប និងមានតម្លៃថ្លៃៗទាំងនោះ ។

ប្រតិកម្មរបស់តៃវ៉ាន់ ធ្វើឡើងបន្ទាប់ពីរដ្ឋមន្ត្រីក្រសួងពាណិជ្ជកម្មអាម៉េរិក លោក ហូវ៉ដ ឡាត់នីក (Howard Lutnick) បានទាមទារឱ្យមានការផ្លាស់ប្តូរផលិតកម្មទ្រង់ទ្រាយធំពីតៃវ៉ាន់ទៅអាម៉េរិកវិញ ក្រោយពេលភាគីទាំងពីរបានចុះហត្ថលេខាលើកិច្ចព្រមព្រៀងពាណិជ្ជកម្មកាលពីខែមុន ដោយអាម៉េរិកចង់បានចំណែកផ្គត់ផ្គង់ ៤០% មកគ្រប់គ្រងផ្ទាល់ ។

តាមកិច្ចព្រមព្រៀងពាណិជ្ជកម្មថ្មី ក្រុមហ៊ុនតៃវ៉ាន់ បានសន្យាវិនិយោគទឹកប្រាក់ ២៥០ ពាន់លានដុល្លារនៅអាម៉េរិក ជាថ្នូរនឹងការកាត់បន្ថយពន្ធនាំចូលមកត្រឹម ១៥% (ពីមុនអាម៉េរិកធ្លាប់គំរាមដំឡើងពន្ធដល់ ២០% ឬលើសនេះ)។ ទោះជាយ៉ាងណា ការវិនិយោគទឹកប្រាក់ដ៏ច្រើនសន្ធឹកសន្ធាប់នេះ ត្រូវការពេលជាង ១ ទសវត្សរ៍ ទើបអាចលេចចេញជារូបរាងពិតប្រាកដ ។

ជាយុទ្ធសាស្ត្រថ្មី តៃវ៉ាន់បានស្នើថា ជំនួសឱ្យការផ្ទេរផលិតកម្មដែលមានស្រាប់ ក្រុមហ៊ុនតៃវ៉ាន់នឹងបង្កើនការវិនិយោគថ្មីៗបន្ថែមទៀតនៅអាម៉េរិកវិញ។ ផែនការនេះគឺចង់ឱ្យរោងចក្រនៅអាម៉េរិកក្លាយជា «មជ្ឈមណ្ឌលគាំទ្រ» សម្រាប់ការផ្គត់ផ្គង់ជាសកល ប៉ុន្តែត្រូវរក្សាទុកការស្រាវជ្រាវ និងបច្ចេកវិទ្យាផលិតកម្រិតខ្ពស់បំផុតឱ្យនៅតៃវ៉ាន់ដដែល ។

ក្រុមហ៊ុន TSMC គ្រោងនឹងចាប់ផ្ដើមផលិតបន្ទះឈីបប្រភេទ ៣ ណានូម៉ែត្រ (3nm) នៅរដ្ឋអារីហ្សូណា សហរដ្ឋអាម៉េរិក នៅឆ្នាំ ២០២៧។ ប៉ុន្តែសម្រាប់បច្ចេកវិទ្យាដែលទំនើបជាងនេះ គឺប្រភេទ ២ ណានូម៉ែត្រ (2nm) ក្រុមហ៊ុនបានចាប់ផ្ដើមផលិតទ្រង់ទ្រាយធំរួចរាល់ហើយ នៅក្នុងទីក្រុងកៅស៊ុង (Kaohsiung) កាលពីឆ្នាំ ២០២៥ ។

ទោះបីជាមានសម្ពាធនយោបាយក៏ដោយ អាជីវកម្មរបស់ក្រុមហ៊ុន TSMC នៅតែបន្តរីកចម្រើនយ៉ាងខ្លាំង ដោយក្នុងខែមករាកន្លងទៅ រកចំណូលបានប្រហែល ១២,៧ ពាន់លានដុល្លារ ដែលជាកម្រិតខ្ពស់បំផុតមិនធ្លាប់មាន។ កំណើននេះ បានមកពីតម្រូវការខ្ពស់លើបន្ទះឈីបសម្រាប់បច្ចេកវិទ្យាបញ្ញាសិប្បនិម្មិត (AI) ដែលកំពុងល្បីល្បាញពេញពិភពលោក ៕  South China Morning Post