វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5007 នាក់
ម្សិលមិញ 3141 នាក់
សរុប 14182274 នាក់
ប្រទេសថៃ៖ អាជ្ញាធរថៃបានចេញនូវការព្រមានពាក់ព័ន្ធនឹងការឡើងនូវកំដៅខ្លាំង ដែលផ្តើមចេញពីការប្រែប្រួលបរិយាកាសរបស់ភពផែនដីនិងសម្រាប់ប្រទេសថៃរលកកំដៅខ្លាំងបណ្តាលឱ្យស្លាប់មនុស្សយ៉ាងតិច៣០នាក់នៅឆ្នាំនេះ។ទីភ្នាក់ងារសារព័ត៌មានបារាំងអាអេហ្វប៉េ(AFP) បានចេញផ្សាយនៅព្រឹកថ្ងៃសុក្រនេះថា អាជ្ញាធរទីក្រុងបាងកកបានចេញប្រកាសអំពីកំរិតឡើងកំដៅឈានដល់កំរិតខ្ពស់នៅលើសន្ទទស្សន៍កំដៅប្រចាំថ្ងៃ ដែលថ្ងៃនេះមានកើនឡើងដល់ទៅ៥២អង្សាសេ បូករួមទាំងកំរិតរំភាយកំដៅផងដែរ។
តាមការព្យាករណ៍ បានឱ្យដឹងបន្ថែមទៀតថា នៅក្នុងរយៈពេលប៉ុន្មានថ្ងៃកន្លងមកនេះកំរិតកំដៅបានស្ទុះឡើងជាលំដាប់ នៅក្នុងទីក្រុងទេពមហានគរ មានកំរិតចាប់ពី៤០.១អង្សាសេកាលពីថ្ងៃពុធ និងថ្ងៃព្រហស្បតិ៍។តាមបណ្តាញផ្សព្វផ្សាយនៅក្នុងតំបន់់បានរាយការណ៍ឱ្យដឹងនៅព្រឹកថ្ងៃសុក្រនេះដែរថា រលកកំដៅបានវាយលុកខ្លាំងនៅក្នុងតំបន់អាស៊ីខាងត្បូង និងតំបន់ប្រជាជាតិភូមិភាគអាស៊ីអាគ្នេយ៍នៅសប្តាហ៍នេះ បង្កឱ្យសាលារៀនជាច្រើនកន្លែងនៅពាសពេញប្រទេសហ្វីលីពីនត្រូវបង្ខំចិត្តបិទថ្នាក់រៀនជាបណ្តោះអាសន្នសិន ខណៈនៅឯទីក្រុងដាកា ប្រទេសបង់ក្លាដេសឯណោះ ក៏បានចាប់ផ្តើមធ្វើពិធីជួបជុំបួងសួងបែបសាសនាក្នុងស្រុក និងតាមព្រហ្មញ្ញវិធីដើម្បីសុំនូវទឹកភ្លៀងឱ្យបង្អុរធ្លាក់ចុះទៀតផង។
ក្រសួងសុខភាពសាធារណៈរបស់ថៃបានឲ្យដឹងថា ចំនួនតួលេខពលរដ្ឋបានស្លាប់កើនឡើងដល់ទៅ៣០នាក់ដោយសារតែរលកកំដៅខ្លាំងចន្លោះចាប់ពីថ្ងៃទី១មករា រហូតដល់ថ្ងៃទី១៧ខែមេសា បើប្រៀបធៀបឆ្នាំមុនវិញមានចំនួនមនុស្សស្លាប់ដោយសារតែរលកកំដៅប្រមាណជា ៣៧នាក់នៅក្នុងរយៈពេលពេញមួយឆ្នាំ២០២៣។ចំណែកឯបណ្តាខេត្តជាប់នឹងព្រំប្រទល់ប្រទេសមីយ៉ាន់ម៉ាវិញ បណ្តាញផ្សព្វផ្សាយថៃបានលើកឡើងថា កំរិតសីតុណ្ហភាពបានកើនឡើងដល់ទៅ៤៥.៩អង្សាសេកាលពីថ្ងៃពុធ ហើយកំរិតកើនកំដៅខ្លាំងនេះមានការកើនឡើងដូចគ្នាដែរនៅតំបន់ភូមិភាគឦសានប្រទេសថៃកាលពីថ្ងៃព្រហស្បតិ៍ និងថ្ងៃសុក្រនេះ៕