ស្ថាបនិកឌីហ្វីតកំពុងតែបន្តយុទ្ធសាស្ត្រធ្វើឲ្យសមរង្ស៊ីឯកោ
ភ្នំពេញ៖ភ្នំពេញ ៖ សម្តេចអគ្គមហាសេនាធិបតីតេជោហ៊ុនសែនត្រូវបានចាត់ទុកជាបិតាសន្តិភាពស្រុកខ្មែរដោយសារសម្តេចបានធ្វើឲ្យអង្គការចាត់នយោបាយនិងយោធាខ្មែរក្រហមរលំរលាយក្រោមនយោបាយឈ្នះ!ឈ្នះ!ដែលស្នូលរបស់វាគឺជាយុទ្ធវិធីDIFIDឌីហ្វីត(បំបែកធ្វើឲ្យឯកោបញ្ចប់ធ្វើសមាហរណកម្មនិងអភិវឌ្ឈន៍។ចាប់តាំងពីថ្ងៃទី២៨ធ្នូឆ្នាំ១៩៩៨ដែលជាថ្ងៃបញ្ចប់ការងារដំណាក់កាលទី១វាក៏ចូលដល់ដំណាក់កាលទី២គឺខែវិច្ឆិកាឆ្នាំ២០១៧ដែលគណបក្សសង្គ្រោះជាតិត្រូវបានរំលាយប្រធានគណបក្សលោកកឹមសុខាត្រូវបានចាប់កាត់ទោសពីបទក្បត់ជាតិ។ឯលោកសមរង្ស៊ីបានរត់ចោលស្រុកនិងជាប់បណ្តឹងរាប់សិប។តែវាមិនទាន់ចប់ទេបន្ទាប់ពីទទួលជោគជ័យក្នុងការរាំងខ្ទប់ផែនការវិលចូលស្រុកវិញរបស់លោកសមរង្ស៊ីនាថ្ងៃទី៩វិច្ឆិកាឆ្នាំ២០១៩សម្តេចតេជោលោកបានដាក់ផែនការធ្វើឲ្យលោកសមរង្ស៊ីឯកោតាមរយៈបរកាសស្វាគមន៍ការវិលត្រឡប់ចូលស្រុកវិញបើអ្នកណាប្រកាសផ្តាច់ខ្លួនពីសមរង្ស៊ី។
នៅយប់ថ្ងៃទី២៣ ខែមេសា ឆ្នាំ២០២៤សម្តេចតេជោ ហ៊ុន សែន ប្រធានគណបក្សប្រជាជនកម្ពុជាបានប្រកាស ទទួលយកការសុំអភ័យទោសរបស់លោក ជា ប៉ូច អតីតតំណាងរាស្ត្រមណ្ឌលព្រៃវែង និងកំពត នៃអតីតគណបក្សសង្គ្រោះជាតិ ក្នុងស្មារតីបង្រួបបង្រួមជាតិ ។សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានបង្ហោះក្នុងផេកផ្លូវការយ៉ាងដូច្នេះថា ៖ ជូនលោកជា ប៉ូចខ្ញុំបានទទួលរួចហើយនូវលិខិតរបស់លោក។ក្នុងស្មារតីបង្រួបបង្រួមជាតិខ្ញុំសូមទទួលយកការសុំអភ័យទោសរបស់លោក។ខ្ញុំនឹងឲ្យមេធាវីរបស់ខ្ញុំដកពាក្យបណ្តឹងចេញពីតុលាការដើម្បីបញ្ចប់រឿងក្តីនេះឲ្យបានឆាប់។
សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានលើកឡើងថា ៖ ខ្ញុំសូមយកឱកាសនេះបញ្ជាក់ថាយើងនឹងទទួលយកការសុំទោសពីមនុស្សផ្សេងទៀតដែលទទួលកំហុសនិងប្រកាសផ្តាច់ខ្លួនចេញពីជនក្បត់ជាតិបីជំនាន់នឹងសូមលើកលែងទោសឲ្យពួកគេតែយើងមិនអត់ឱនឲ្យជនណាឬក្រុមណាក៏ដោយដែលបន្តដើរតាមជនក្បត់ជាតិនេះជាដាច់ខាត។យើងនឹងបន្តប្រើផ្លូវច្បាប់ដើម្បីចាត់ការលើក្រុមណាឬបុគ្គលណា ដែលជេរប្រមាថមួលបង្កាច់មកលើគណបក្សឬមកលើខ្ញុំតទៅទៀតដោយគ្មានការលើកលែង។
សម្តេចតេជោថា ៖ យើងមិនអាចអត់ឱនឲ្យបានទេចំពោះជនណាឬក្រុមណាក៏ដោយមិនថាខ្មែរឬបរទេសដែលចង់ដុតផ្ទះយើងដើម្បីចំអិនពងមាន់របស់អ្នកបានឡើយ។លោកជា ប៉ូច អតីតតំណាងរាស្ត្រមណ្ឌលព្រៃវែង និងកំពត នៃអតីតគណបក្សសង្គ្រោះជាតិ នៅថ្ងៃទី២៣ ខែមេសា ឆ្នាំ២០២៤នេះ បានធ្វើលិខិតសុំទោស សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ជាថ្មីម្តងទៀត ហើយប្រកាសផ្តាច់ខ្លួនពីទណ្ឌិត សម រង្សី និងគណបក្សប្រឆាំងផងដែរ។
តាមរយៈលិខិតមួយស្នើទៅកាន់សម្តេចតេជោ ហ៊ុន សែន, លោក ជា ប៉ូច បានលើកឡើងថា៖ «ខ្ញុំបាទ ជា ប៉ូច អតីតតំណាងរាស្ត្រមណ្ឌលព្រៃវែង និងកំពត ពិតជាមានការសោកស្តាយ ដែលបានធ្វើសកម្មភាព និងប្រើប្រាស់ពាក្យពេចន៍មួយចំនួនកន្លងទៅ បានធ្វើអោយប៉ះពាល់ដល់ ដំណើរការអភិវឌ្ឍ សន្តិភាព ស្ថេរភាព និងគោលនយោបាយ នានារបស់រាជរដ្ឋាភិបាលកម្ពុជា ជាពិសេសបានធ្វើឲ្យប៉ះពាល់ដល់ សម្តេចតេជោ។ ខ្ញុំបាទសូមអភ័យទោសចំពោះរាជរដ្ឋាភិបាល នៃព្រះរាជាណាចក្រកម្ពុជា ជាពិសេសចំពោះ សម្តេចអគ្គមហាសេនាបតីតេជោ ហ៊ុន សែន» ។
លោក ជា ប៉ូច បានបន្តថា៖ «នៅក្នុងន័យនេះដែរ ខ្ញុំបាទសូមជម្រាបជូន សម្តេចតេជោ ឲ្យបានជ្រាបថា ខ្ញុំបាទបានសម្រេចចិត្ត ផ្តាច់ខ្លួនពីលោក សម រង្សី និងឈប់ធ្វើសកម្មភាពនយោបាយជាមួយក្រុមអតីតគណបក្សសង្គ្រោះជាតិ ព្រមទាំងគណបក្សភ្លើងទៀន និងគណបក្សដែលមាននិន្នាការប្រឆាំង ដោយសារអស់ជំនឿទៅលើគោលនយោបាយបរទេសនិយម ការមួលបង្កាច់ ការជេរប្រមាទ ការលាបពណ៌ ការបំបែកបំបាក់ ដែលមិនអាចឈានទៅរកការបង្រួបបង្រួម និងផ្សះផ្សារជាតិបាន»។លោកបានគោរពស្នើសុំ សម្តេចតេជោ មេត្តាអធ្យាស្រ័យ និងសុំឱ្យតុលាការ លើកលែងការចោទប្រកាន់ ដល់រូបលោក ចំពោះទង្វើដែលដែលលោក បានប្រព្រឹត្តខុសក្នុងរយៈពេល កន្លងទៅ និងសូមផ្តល់ឱកាសឲ្យរូបលោក បានធ្វើជាប្រជាពលរដ្ឋល្អ រស់នៅក្រោមដំបូលសន្តិភាព ក្រោមការដឹកនាំរបស់សម្តេចតេជោផងដែរ។
សូមបញ្ជាក់ថា នាពេលកន្លងទៅ មានការបែកធ្លាយសំឡេង លោក ជា ប៉ូច ដែលបានបង្ហាញពូប្តេជ្ញាចិត្តផ្តួលរំលំ សម្តេចតេជោ ហ៊ុន សែន។ កាលពីខែឧសភា ឆ្នាំ២០២៣ លោក ជា ប៉ូច ក៏បានផ្ញើលិខិតដើម្បីសុំទោសសម្ដេចតេជោម្តងរួចទៅហើយ តែត្រូវបានសម្ដេចបដិសេធមិនទទួលយកឡើយ។មុនករណីយ៍លោកជាប៉ូចនេះដែរសម្តេចធិបតីហ៊ុនម៉ាណែតក៏បានប្រកាសស្វាគមន៍លោកគង់សុភាអតីតតំណាងរាស្ត្រគណបក្សសង្គ្រជាតិដែលរងការវាយដំជាមួយលោកញ៉យចំរើននៅក្បែរដ្ឋសភាផងដែរដែលបានផ្ញើលិខិតសុំទោសនិងសុំចូលស្រុកផងដែរ។
លោកគង់សុភាជាកូនប្រុសលោកគង់គាំអតីតប្រធានស្តីទីគណបក្សភ្លើងទានដែលសម្រេចចិត្តចាកចេញពីឆាក់នយោបាយដោយសាររងការរឹបអូសដីផ្ទះសម្បែងដែលលោកនៅជាង៣០ឆ្នាំមកហើយ។ក្រៅពីលោកគងសុភាកាលពីថ្ងៃទី១៧មេសាលោក មុំ អស្សនីដែលរត់ចោលស្រុកនៅបរិហាកេរ្តិ៍ពីប្រទេសណូវែលហ្សឡង់ជា និងភរិយា ក៏បានចេញវីដេអូគោរពថ្លែងអំណរគុណ ចំពោះសម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា ដែលបានអភ័យទោស និងស្វាគមន៍ដល់ក្រុមគ្រួសាររបស់ខ្លួន អាចមកលេងស្រុកកំណើត ដោយក្តីរីករាយ។ជាមួយគ្នានេះ លោក មុំ អស្សនី និងភរិយា ក៏បានបញ្ជាក់ពីការប្តេជ្ញាចិត្ត ចូលរួមបម្រើជាតិមាតុភូមិជាមួយរាជរដ្ឋាភិបាលកម្ពុជា ដែលដឹកនាំដោយសម្តេចមហាបវរធិបតី ហ៊ុន ម៉ាណែត ផងដែរ។ជាមួយគ្នានេះ លោក មុំ អស្សនី សង្ឃឹមថា សម្តេចធិបតី ហ៊ុន ម៉ាណែត នឹងអភ័យទោសដល់រូបលោក ចំពោះកំហុងឆ្គងនាពេលកន្លងមក។
តាមរយៈសារនៅក្នុងតេឡេក្រាមចេញថ្ងៃទី១៧ ខែមេសានេះ សម្តេចហ៊ុន សែនបានថ្លែងថា លោកយល់ពីមូលហេតុដែលនៅពីក្រោយការវាយប្រហារលើក្រុមគ្រួសាររបស់លោកពីសំណាក់លោក មុំ អាហ្សានីនាពេលកន្លងមក។ អតីតនាយករដ្ឋមន្ត្រីកម្ពុជា៦អាណត្តិបានបញ្ជាក់ថា តាំងពីដើមមក លោក មុំ អាហ្សានីដែលជាអតីតមន្ត្រីយោធាលំហសមុទ្រមិនដែលមានទំនាស់អ្វីទាល់តែសោះជាមួយក្រុមគ្រួសាររបស់លោក និងថា លោក មុំ អាហ្សានីក៏គ្មានសាលដីកាដែលត្រូវអនុវត្តទោសដែរ។
តែសម្តេចតេជោ ហ៊ុន សែន ចោទថា រាល់ការ វាយប្រហាររបស់លោក មុំ អាហ្សានីលើត្រកូល ហ៊ុន គឺ រៀបចំដោយលោក សម រង្ស៊ីដែលលោកហ៊ុន សែនហៅជាជនក្បត់ជាតិ ៣ជំនាន់។ នៅក្នុងសារសុំទោសរបស់ លោក មុំ អាហ្សានីដែលថតចំនួន២ឃ្លីបក៏បាន ចោទលោក អេង ឆៃអ៊ាង និងលោកឡុង រីដែលជាមនុស្សស្និទនឹងលោក សម រង្ស៊ីថាជាអ្នករៀបចំឆាកឲ្យរូបលោកធ្វើជាវាគ្មិនប្រចាំនៅ ឌឺ ខាមបូឌា ដេលីដើម្បីវាយប្រហារលោក ហ៊ុន សែន។
មិនទាន់ឃើញមានប្រតិកម្មពីលោក សម រង្ស៊ី និងមន្ត្រីស្និទរបស់លោកមួយចំនួនដែលត្រូវបានលោក មុំ អាហ្សានីចោទប្រកាន់នៅឡើយទេ។សូមរំឭកថា លោក មុំ អាហ្សានីបានធ្វើឲ្យគេចាប់ អារម្មណ៍កាលពីអំឡុងឆ្នាំ២០២៣ ខណៈលោកតែងតែចូលរួមជាវាគ្មិននៅក្នុងកម្មវិធី Idea Talk របស់សារព័ត៌មានឌឺ ខាមបូឌា ដេលីរបស់លោក តាំង សារដា ដែលមានមូលដ្ឋាននៅសហរដ្ឋអាមេរិក។
នៅពេលចូលរួមកម្មវិធី Idea Talk ដំបូងៗ អតីតមន្ត្រីយោធាលំហសមុទ្ររូបនេះបានអះអាងថា លោកជាជនរងគ្រោះម្នាក់ដែលបានគេចផុតពីប៉ុនប៉ងសម្លាប់បំបិទមាត់ពីសំណាក់អ្នកមានអំណាចនៅកម្ពុជា។ បន្ទាប់មកលោក និងក្រុមគ្រួសារទទួលបានសិទ្ធិជ្រកកោននៅប្រទេសញ៉ូវហ្សឺលែន។ ក៏ប៉ុន្តែ នៅពេលដែលលោក មុំ អាហ្សានី បង្កើនការវាយប្រហារមិនសំចៃមាត់ទៅលើក្រុមគ្រួសារត្រកូលហ៊ុន ស្រាប់តែសារព័ត៌មាន Fresh News បានផ្សាយវីដេអូមួយដែលថា មុំ អាហ្សានី គឺជាជនឆបោកប្រាក់ និងត្រូវបានសមត្ថកិច្ចចាប់ខ្លួនកន្លងមក។ចំណែកវីដេអូមួយទៀតរបស់ Fresh News ផ្សាយនៅថ្ងៃទី០៨ ខែមិថុនា ឆ្នាំ២០២៣ បានបង្ហាញលោក មុំ អស្សនីដែលបាននិយាយសុំការលើកលែងទោសពីលោកហ៊ុន ម៉ាណែត និង លោក ហ៊ុន សែន ហើយស្នើសុំធ្វើជាបណ្តាញរបស់លោក ហ៊ុន ម៉ាណែតដើម្បីបង្កប់ខ្លួននៅក្នុងគណបក្សប្រឆាំង។
ដូចគ្នានេះដែរលោក ញឹម គឹមញ៉ុល អតីតមន្ត្រីជាន់ខ្ពស់គណបក្សសង្គ្រោះជាតិកាលពីពេលថ្មីៗនេះ បានដាក់លិខិតមួយស្នើសុំសម្តេចតេជោ ហ៊ុន សែន ប្រធានគណបក្សប្រជាជនកម្ពុជា ដើម្បីចូលរួមជីវភាពនយោបាយ ជាមួយគណកប្សប្រជាជនកម្ពុជា។លោក ញឹម គឹមញ៉ុល បានមានប្រសាសន៍ថា លោក បានមើលឃើញយ៉ាងច្បាស់អំពីគោលនយោបាយ និងការដឹកនាំប្រទេសដ៏ត្រឹមត្រូវរបស់សម្តេចតេជោកន្លងមក ដែលធ្វើឱ្យប្រទេសជាតិ ទទួលបាននូវសុខសន្តិភាព ប្រជាជនមានជីវភាពរស់នៅក្នុងភាព សុខដុមរមនា និងប្រទេសជាតិ ទទួលបាននូវការអភិវឌ្ឍន៍លើគ្រប់វិស័យ ដូចជា៖ ហេត្ថារចនាសម្ព័ន្ធនានាបាន គ្រប់ដណ្តប់លើផ្ទៃប្រទេស។ ជាងនេះទៅទៀត ក្រោមការដឹកនាំរបស់សម្តេចតេជោ ហ៊ុន សែន ប្រទេសកម្ពុជាបានកែប្រែ មុខមាត់ថ្មី មានកេរ្តិ៍ឈ្មោះល្បីសាយរន្ទឺនៅក្នុងតំបន់ និងនៅលើពិភពលោក តាមរយៈការប្រកួតកីឡាស៊ីហ្គេម និង អាស៊ានប៉ារ៉ា ហ្គេម ឆ្នាំ២០២៣ ដែលប្រទេសកម្ពុជាយើង ធ្វើជាម្ចាស់ផ្ទះ។ លោកញឺមគឹមញុលមុនរត់ចូលគណបក្សសមរង្ស៊ីក្រោយមកគណបក្សសង្គ្រោះជាតិគឺជាឧត្តមសេនីយ៍នគរបាលជាតិមានឋានៈជាអនុប្រធានគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ។
