អ្នកស្រីរ៉ូណាស្មីតអ្នករាយការណ៍ពីសេសអសបមកកម្ពុជាបំពេញបេសកម្មលើកទី៧ចង់ជួបកឹមសុខា!
ភ្នំពេញ៖ លោកស្រី រ៉ូណា ស្មីត (Rhosna Smith) អ្នករាយការណ៍ពិសេស នៃអង្គការសហប្រជាជាតិ ទទួលបន្ទុកផ្នែកសិទ្ធិមនុស្ស នៅកម្ពុជា បានមកដល់ប្រទេសកម្ពុជា ហើយនៅព្រឹកថ្ងៃទី២៩ ខែមេសា ឆ្នាំ២០១៩ ។
នៅក្នុងកម្មវិធីនៃបេសកម្មលើកទី៧រយៈពេល១១ថ្ងៃនៅស្រុកខ្មែរទី១លោកស្រី រ៉ូណា ស្មីត នៅថ្ងៃទី២៩មេសានេះបានជួបពិភាក្សាជាមួយ លោក ព្រាប កុល ប្រធានអង្គការតម្លាភាព កម្ពុជាដើម្បីពិភាក្សា ផ្តាស់ប្តូរយោបល់ និងព័ត៌មានជុំវិញបញ្ហាប្រជាធិបតេយ្យ សិទ្ធិមនុស្ស និងការអភិវឌ្ឍនៅកម្ពុជា។
តាមរយៈបណ្ដាញ ទំនាក់ទំនងសង្គមហ្វេសប៊ុកលោកព្រាបកុលសេរថា “ព្រឹកនេះ ខ្ញុំមានកិត្តិយស បានជួបជាមួយ លោកស្រី សាស្ត្រាចារ្យ រូសណា ស្មីត (Rhosna Smith) អ្នករាយការណ៍ពិសេសនៃ អង្គការសហប្រជាជាតិ ទទួលបន្ទុកផ្នែកសិទ្ធិមនុស្សនៅកម្ពុជា ដើម្បីពិភាក្សា ផ្តាស់ប្តូរយោបល់ និងព័ត៌មានជុំវិញបញ្ហាប្រជាធិបតេយ្យ សិទ្ធិមនុស្ស និងការអភិវឌ្ឍនៅកម្ពុជា។
ឯលោកនី សុខា ប្រធានផ្នែកស៊ើបអង្កេតសិទ្ធិមនុស្ស និង ដីធ្លីនៃសមាគមការពារសិទ្ធិមនុស្សអាដហុក បានអះអាងប្រាប់វិទ្យុបារាំងអន្តរជាតិថា នៅក្នុងជំនួបជាថ្មីជាមួយលោកស្រីរ៉ូណា ស្មីត ក្រុមអង្គការសង្គមស៊ីវិលប្រមាណជា១០ បានរាយការណ៍ប្រាប់លោកស្រីពីបញ្ហាចម្បងៗពាក់ព័ន្ធនឹងសិទ្ធិសេរីភាពនៅកម្ពុជា។
ទីមួយ ពួកគេបានប្រាប់លោកស្រីរ៉ូណា ស្មីតពីការព្រួយបារម្ភរបស់ពួកគេចំពោះការរឹតត្បិតសេរីភាពនៃការជួបជុំនៅតាមមូលដ្ឋាន។ បើតាមលោកនី សុខា បើទោះបីក្រសួងមហាផ្ទៃបានប្រកាសបើកទូលាយដល់ការជួបជុំរបស់អង្គការសង្គមស៊ីវិលក៏ដោយ ក៏ការជួបជុំនៅតែស្ថិតក្រោមការឃ្លាំមើលពីអាជ្ញាធរដែលខ្លះស្លៀកពាក់ជាស៊ីវិលក៏មានដែរ។
ទីពីរ ក្រុមអង្គការសង្គមស៊ីវិលបានលើកឡើងពីបញ្ហាក្រុមអតីតគណបក្សប្រឆាំង ជាពិសេស អ្នកនៅតាមមូលដ្ឋាន គឺនៅតែស្ថិតក្រោមការតាមដានពីអាជ្ញាធរ គ្មានសេរីភាពក្នុងការជួបជុំបញ្ចេញមតិ និង ខ្លះទៀតរងការធ្វើទុក្ខបុកម្នេញថែមទៀត។ ទីបី ក្រុមអង្គការសង្គមស៊ីវិលក៏បានរាយការណ៍ប្រាប់លោកស្រីរ៉ូណា ស្មីត ពីការរឹតត្បិតលំហសេរីភាពនៃការបញ្ចេញមតិ និង រិះគន់ទៅលើរដ្ឋាភិបាល។
លោកនី សុខា បានគូសបញ្ជាក់ថា អ្នករិះគន់មួយចំនួនត្រូវបានចាប់ខ្លួនដោយសារតែការបញ្ចេញមតិ និងរិះគន់ប្រមុខរដ្ឋាភិបាលកម្ពុជា។ សម្រាប់សកម្មជនការពារសិទ្ធិមនុស្សរូបនេះ ទាំងអស់នេះ ធ្វើឱ្យមានភាពភ័យខ្លាចក្នុងការបញ្ចេញមតិ និងរិះគន់លើបញ្ហាអ្វីមួយ។
ដោយឡែកយោងតាមសេចក្តីប្រកាសព័ត៌មាន របស់គណៈកម្មាធិការសិទ្ធិមនុស្សកម្ពុជា បានឲ្យដឹងថា ជំនួបរវាងអ្នករាយការណ៍ពិសេសអង្គការសហប្រជាជាតិ ជាមួយប្រធានគណៈកម្មាធិការសិទ្ធិមនុស្សកម្ពុជា នឹងប្រព្រឹត្តទៅនាព្រឹកថ្ងៃទី៣០ ខែមេសា ឆ្នាំ២០១៩ វេលាម៉ោង៩ព្រឹក នៅស្នាក់ការគណៈកម្មាធិការសិទ្ធិមនុស្ស។
អ្នករាយការណ៍ពិសេស អង្គការសហប្រជាជាតិ ទទួលបន្ទុកសិទ្ធិមនុស្ស ប្រចាំកម្ពុជា លោកស្រី រ៉ូណា ស្មីត មកបំពេញទស្សនកិច្ច នៅប្រទេសកម្ពុជា ចាប់ពីថ្ងៃទី ២៩ ខែមេសា ដល់ថ្ងៃទី ៩ ខែឧសភា ឆ្នាំ ២០១៩ តាមការអញ្ជើញរបស់រាជរដ្ឋាភិបាល។ យោងតាមសេចក្ដីប្រកាសព័ត៌មាន របស់ការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា ការទស្សនៈកិច្ចរបស់លោកស្រីស្មីត ផ្តោតទៅលើស្ថានភាពសិទ្ធិមនុស្សនាពេលបច្ចុប្បន្ន និងតាមដានពីដំណើរវិវត្តន៍នានា ចាប់តាំងពីបេសក កម្មរបស់លោកស្រី កាលពីខែវិច្ឆិកាកន្លងមក។
អ្នកស្រីស្មីតបានបញ្ជាក់ថា “ខ្ញុំមានបំណងបន្តការពិនិត្យផងដែរទៅលើវិស័យសិទិ្ធមនុស្ស ទាក់ទងនឹងគោលដៅអភិវឌ្ឍន៍ ប្រកបដោយចីរភាព ដោយពិនិត្យជាពិសេសទៅលើការមិនរើសអើង និងសមភាព ព្រមទាំងការចូលរួម និងគណនេយ្យភាព”។
ក្នុងអំឡុងពេលដំណើរទស្សនកិច្ចរយៈពេល១១ថ្ងៃ អ្នកជំនាញរូបនេះ គ្រោងជួបប្រជុំជាមួយមន្ត្រីជាន់ខ្ពស់របស់រដ្ឋាភិបាល តំណាងសង្គមស៊ីវិល និងសមាជិកសហគមន៍ការទូតនានា។ អ្នកស្រី ស្មីត នឹងបំពេញទស្សនកិច្ចផងដែរ ទៅតាមតំបន់ផ្សេងៗ ដើម្បីប្រមូលព័ត៌ មានដោយផ្ទាល់ដែលក្នុងនោះលោកស្រីមានបំណងសុំជួបលោកកឹមសុខាដែលកំពុងជាប់ឃុំក្នុងផ្ទះផងដែរដែលកាលពីជើងមុនបរាជ័យមិនបានជួប។
វត្តមានលោកស្រី រ៉ូណា ស្មីតលើកនេះគឺជាព្រឹត្តការណ៍ដែលទទួយលបានការយកចិត្តទុកដាក់តាមដានដោយសារជិតរយៈពេលដែលសហគមន៍អឺរ៉ុបត្រូវអនុវត្តន៍ការដកប្រពន្ធអនុគ្រោះពន្ធពីកម្ពុជាប្រសិនបើលទ្ធិប្រជាធិបតេយ្យនិងបញ្ញាសិទ្ធមនុស្សមិនត្រូវបានស្តារឡើងវិញទេ!៕
