បន្ទាប់ពីមានការរិះគន់ព្រះមហាក្សត្រប្រគល់សិទ្ធិជូន សម្តេចតេជោ ហ៊ុន សែន ធ្វើទំនាក់ទំនងជាមួយ សម្តេចធិបតី ហ៊ុន ម៉ាណែត នាយករដ្ឋមន្ត្រី លើកិច្ចការកងទ័ព កិច្ចការការពារជាតិ!
ភ្នំពេញ៖ នៅថ្ងៃទី០៤ ខែសីហា ឆ្នាំ២០២៥គឺបន្ទាប់ពីកើតសង្គ្រាម៥ថ្ងៃ(២៤ដល់២៨កក្កដា)រវាងកម្ពុជាថៃ ព្រះករុណា ព្រះបាទសម្តេចព្រះនរោត្តម សីហមុនី ព្រះមហាក្សត្រនៃកម្ពុជា បានចេញព្រះរាជសារដោយ សូមប្រគល់សិទ្ធិជូន សម្តេចអគ្គមហាសេនាបតីតេជោ ហ៊ុន សែន នាយឧត្តមសេនីយ៍ផុតលេខផ្កាយមាស់៥ និងជាប្រធានក្រុមឧត្តមប្រឹក្សាផ្ទាល់ ព្រះមហាក្សត្រ ដើម្បីធ្វើទំនាក់ទំនងជាមួយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា លើកិច្ចការកងទ័ព កិច្ចការការពារជាតិ កិច្ចការការពារអធិបតេយ្យជាតិ និងកិច្ចការការពារបូរណភាពទឹកដីនៃព្រះរាជាណាចក្រកម្ពុជា។
បន្ទាប់ពីមានរាជសារប្រគល់សិទ្ធនៅល្ងាចថ្ងៃទី៤សីហា សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បានឆ្លើយតបចំពោះការចេញផ្សាយរបស់សារព័ត៌មានថៃ ពាក់ព័ន្ធនឹងមតិរបស់មនុស្សខ្លះនៅបាងកក ដែលអះអាងថា សម្តេចតេជោ បំពានរដ្ឋធម្មនុញ្ញកម្ពុជា ដោយសារចូលរួមបញ្ជាកងទ័ព។សម្តេចតេជោបានបញ្ជាក់ច្បាស់ៗថា ទោះបីជាមិនមែនជាថ្នាក់ដឹកនាំប្រទេស ក៏ជាពលរដ្ឋកម្ពុជាម្នាក់ ក៏មានសិទ្ធិការពារជាតិ និងវាយតបចំពោះអ្នកឈ្លានពានដែរ។ សម្រាប់ការចូលរួមកិច្ចការកងទ័ព គឺមានមូលដ្ឋានច្បាស់លាស់តាមព្រះរាជសាររបស់ព្រះមហាក្សត្រ ដែលផ្តល់ភារកិច្ចជូនសម្តេចតេជោក្នុងការជួយព្រះមហាក្សត្រលើកិច្ចការប្រទេសជាតិ រួមទាំងកិច្ចការកងទ័ពផងដែរ។សម្តេចតេជោបានលើកឡើងថា សម្តេចជានាយឧត្តមសេនីយ៍ផុតលេខផ្កាយមាស ៥ និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ ហើយមិនធ្លាប់បំពានលើភារកិច្ចរបស់នាយករដ្ឋមន្ត្រីឡើយ។ ជាមួយបទពិសោធន៍ជាង ៣៨ ឆ្នាំក្នុងតំណែងនាយករដ្ឋមន្ត្រី សម្តេចតេជោបញ្ជាក់ថា នៅកម្ពុជា មិនមានការប្រជែងអំណាចរវាងរដ្ឋាភិបាល និងកងទ័ពទេ។
គេនៅចាំបានថាសម្តេចតេជោ ហ៊ុន សែន ប្រធានឧត្តមក្រុមប្រឹក្សាផ្ទាល់ព្រះមហាក្សត្រ និងជាប្រធានព្រឹទ្ធសភាកាលពីថ្ងៃទី២៦មិថុនាក្នុង ឱកាសចុះសួរសុខទុក្ខកងទព័នៅព្រះវិហ៊ារ បានផ្តាំទៅសារព័ត៌មានថៃមួយ ដែលចុះផ្សាយមិនត្រឹមត្រូវថា «សម្តេចដកអគ្គបញ្ជាការកងទ័ព និងតែងតាំងខ្លួនឯងជាអគ្គបញ្ជាការជំនួសដើម្បីត្រៀមវាយថៃ»។ សម្តេចបានផ្តាំទៅសារព័ត៌មាននោះថា «បើឆ្កួតសូមឆ្កួតតែពួកអ្នកឯងចុះ»។
តាមបណ្តាញសង្គម សម្តេចតេជោ បានរៀបរាប់ទាំងស្រុងថា៖«ខ្ញុំកំពុងមកសួរសុខទុក្ខកងទ័ព មន្ត្រីរាជការ និងប្រជាជនភៀសសឹកនៅខេត្តឧត្តរមានជ័យ និងខេត្តព្រះវិហារ។ វត្តមានរបស់ខ្ញុំមិនមកចេញបញ្ជាជំនួសឲ្យនាយករដ្ឋមន្ត្រី ឬរដ្ឋមន្ត្រី ក្រសួងការពារជាតិ ឬអគ្គបញ្ជាការកងទ័ពនោះឡើយតែជាការមកសួរសុខទុកលើកទឹកចិត្ត និងផ្តល់ជំនួយសម្រាប់កងកម្លាំងប្រដាប់អាវុធដែលកំពុងការពារជាតិការទឹកដី។បងប្អូនមេបញ្ជាការកងទ័ព បានហៅខ្ញុំថា (អគ្គភស្តុភារជាន់ខ្ពស់)។ ខ្ញុំពេញចិត្តនឹងធ្វើកិច្ចការជួយលើការផ្តល់ភស្តុភារបន្ថែមលើភស្តុភារដែលរាជរដ្ឋាភិបាលផ្តល់ជូន។ មុខនាទីនេះមិនតម្រូវឲ្យមានការតែងតាំងនោះទេ ព្រោះជាពាក្យនិយាយលេង។សារព័ត៌មានថៃមួយបានចុះផ្សាយថា ខ្ញុំដកអគ្គបញ្ជាការកងទ័ព និងតែងតាំងខ្លួនឯងជាអគ្គបញ្ជាការកងទ័ពដើម្បីត្រៀមវាយថៃ។ ខ្ញុំសូមផ្តាំទៅវិញថាបើឆ្កួតសូមឆ្កួតតែពួកអ្នកឯងចុះ។ខ្ញុំជាមនុស្សទី២ បន្ទាប់ពីព្រះមហាក្សត្រ តើមានការចាំបាច់ទេ ដើម្បីទៅធ្វើជាអគ្គបញ្ជាការកងទ័ពដោយខ្លួនឯងនោះ ដែលសូម្បីតែតួនាទីជា នាយករដ្ឋមន្ត្រីក៏ខ្ញុំមិនបន្តធ្វើដែរនោះ? ឈប់បានឈប់ទៅ និងសូមកុំចូលមកឈ្លានពាន Facebook ខ្ញុំទៀត»។
សូមបញ្ជាក់ថាតាមរដ្ឋធម្មនុញ្ញតាមមាត្រាទី៧ព្រះមហាក្សត្រកម្ពុជាទ្រង់គ្រងរាជសម្បត្តិ ប៉ុន្តែទ្រង់មិនកាន់អំណាចឡើយ។ ព្រះមហាក្សត្រទ្រង់ជាព្រះប្រមុខរដ្ឋមួយជីវិត។ អង្គព្រះមហាក្សត្រ មិនអាចនរណារំលោភបំពានបានឡើយ។
ព្រះមហាក្សត្រទ្រង់តែងតាំងនាយករដ្ឋមន្ត្រី និងទ្រង់តែងតាំងគណៈ រដ្ឋមន្ត្រី តាមបែបបទដែលមានចែងក្នុងមាត្រា១១៩ ថ្មី(ពីរ)។ព្រះមហាក្សត្រទ្រង់ជាមេបញ្ជាការកំពូលនៃកងយោធពលខេមរភូមិន្ទ ។ អគ្គមេបញ្ជាការកងយោធពលខេមរភូមិន្ទត្រូវបានតែងតាំងឡើងដើម្បីបញ្ជាកងយោធពលខេមរភូមិន្ទនេះ។ទោះបីយ៉ាងណាទាក់ទងនិងជាមេបញ្ជាការកំពូលនៃកងយោធពលខេមរភូមិន្ទត្រូវមានច្បាប់ដោយឡែកទៀត។
សូមបញ្ជាក់ថាច្បាប់ស្តីពីការប្រព្រិត្តទៅនៃ«ឧត្តមក្រុមប្រឹក្សាការពារជាតិ» ដែលមាន ៦ជំពូក និង ១១ មាត្រាត្រូវបានព្រះមហាក្សត្រចេញព្រះរាជក្រមដាក់ឲ្យប្រើប្រាសកាលពីខែមករាឆ្នាំ២០១៣។ ឧត្តមក្រុមប្រឹក្សាការពារជាតិមានព្រះមហាក្សត្រជាប្រធាន នាយករដ្ឋមន្ត្រីជាអនុប្រធាន និងឥស្សរជនក្នុងរដ្ឋាភិបាលមួយចំនួនទៀតជាសមាជិកតែមិនបានចែងពីតួនាទីប្រធានព្រឹទ្ធសភាទេ។ការបង្កើតឲ្យមានឧត្តមក្រុមប្រឹក្សាការពារជាតិគឺជាការតម្រូវរបស់រដ្ឋធម្មនុញ្ញ ប៉ុន្តែច្បាប់នេះទើបតែត្រូវបានអនុម័តរយៈពេល១៩ ឆ្នាំ ក្រោយការប្រកាសឲ្យប្រើច្បាប់កំពូលរបស់ប្រទេសគឺរដ្ឋធម្មនុញ្ញ។ឡូវនេះលែងមានបញ្ហាអ្នកណារិះគន់ទៀតហើយដោយសារព្រះមហាក្សត្រចេញព្រះរាជសារប្រគល់ភារកិច្ចឲ្យសហការជាមួយនាយករដ្ឋមន្ត្រីដឹកនាំបញ្ជាកងទព័ហើយ!៕
