កម្ពុជា និងថៃ បានឯកភាពគ្នាដំឡើងកម្រិតទំនាក់ទំនងទ្វេភាគី ពី «ភាពជាដៃគូដើម្បីសន្ដិភាព និងវិបុលភាព» ទៅជា «ភាពជាដៃគូយុទ្ធសាស្ត្រ»
16-November-2025 / ផ្សេងៗ
ប្រទេសថៃ៖ ក្នុងជំនួបពិភាក្សាការងារទ្វេភាគីរវាងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងសេដ្ឋា ថាវីស៊ីន នាយករដ្ឋមន្ត្រីក្នុងដំណើរទស្សនកិច្ចជាផ្លូវការនៅព្រឹកថ្ងៃទី៧ ខែកុម្ភៈ ឆ្នាំ២០២៤នេះមេដឹកនាំទាំងពីរបានបានឯកភាពគ្នាដំឡើងកម្រិតទំនាក់ទំនងទំនងនយោបាយ និងការទូតទ្វេភាគីទ្វេភាគី ពី «ភាពជាដៃគូដើម្បីសន្ដិភាព និងវិបុលភាព» ទៅជា «ភាពជាដៃគូយុទ្ធសាស្ត្រ»។
លោក សេដ្ឋា ថាវីស៊ីននាយករដ្ឋមន្ត្រីថៃ បានស្វាគមន៍និង បញ្ជាក់ថា តាមរយៈដំណើរទស្សនកិច្ចរបស់សម្តេចធិបតីនាឱកាសនេះ នឹងធ្វើឱ្យទំនាក់ កម្ពុជា-ថៃ កាន់តែរីកចម្រើន និងរឹងមាំ។សម្តេចធិបតី និងលោកនាយករដ្ឋមន្ត្រីថៃ បានវាយតម្លៃខ្ពស់លើលទ្ធផលនៃកិច្ចសហប្រតិបត្តិការទ្វេភាគីកន្លងមក និងបានផ្លាស់ប្ដូរយោបល់ពីការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរលើវិស័យជាច្រើន ដែលរួមមាន៖ វិស័យនយោបាយ សេដ្ឋកិច្ច ការពារជាតិ សន្ដិសុខ ពាណិជ្ជកម្ម វិនិយោគ ទេសចរណ៍ ការងារ និងវិស័យថាមពល។ប្រមុខរាជរដ្ឋាភិបាលទាំងពីរ ក៏បានពិភាក្សាអំពីកិច្ចការក្នុងតំបន់ និងសកល ដោយបានបង្ហាញការពេញចិត្តចំពោះការគាំទ្រគ្នាទៅវិញទៅមកនៅលើវេទិកាអន្តរជាតិ និងការជំរុញកិច្ចសហប្រតិបត្តិការក្នុងការប្រយុទ្ធប្រឆាំងឧក្រិដ្ឋកម្មឆ្លងដែន ការបោកប្រាស់តាមប្រព័ន្ធអនឡាញ និងការកសាងព្រំដែនប្រទេសទាំងពីរទៅជាព្រំដែនសន្ដិភាព និងវិបុលភាព។
បន្ទាប់ពីកិច្ចប្រជុំសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា និងឯកឧត្តមបណ្ឌិត សេដ្ឋា ថាវីស៊ីន នាយករដ្ឋមន្ត្រីថៃបានធ្វើជាសហធិបតីក្នុងពិធីចុះហត្ថលេខាឯកសារអនុស្សរណៈ នៃការយោគយល់គ្នាចំនួន ០៥ ។ឯកសារចំនួន ០៥ មាន ទី១- អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យ កាត់បន្ថយហានិភ័យគ្រោះ មហន្តរាយ និងការឆ្លើយតបគ្រោះអាសន្ន កម្ពុជា និងក្រសួងមហាផ្ទៃថៃ រវាងគណៈកម្មាធិការជាតិគ្រប់គ្រងគ្រោះមហន្តរាយ។ ទី២- អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យសិក្សាធិការ វិទ្យាសាស្ត្រ និងបច្ចេកវិទ្យា រវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍កម្ពុជា និង ក្រសួងឧត្តមសិក្សា វិទ្យាសាស្ត្រ ស្រាវជ្រាវ និងនវានុវត្តន៍ថៃ។
ទី៣- អនុស្សរណៈនៃការយោគយល់គ្នាស្តីពីទំនិញឆ្លងកាត់ រវាងអគ្គនាយកដ្ឋានគយ និងរដ្ឋាករកម្ពុជា និងនាយកដ្ឋានគយថៃ។ ទី៤- អនុស្សរណៈនៃការយោគយល់គ្នារវាងសភាពាណិជ្ជកម្មកម្ពុជា និងធនាគារនាំចេញ-នាំចូលថៃ ៥-អនុស្សរណៈនៃការយោគយល់គ្នារវាងសភាពាណិជ្ជកម្មកម្ពុជានិងគណៈកម្មាធិការពាណិជ្ជកម្មថៃ។
ក្រៅពីការងារការទូតសម្តេចធិបតី ហ៊ុន ម៉ាណែត បានថ្លែងក្នុងវេទិការធុរកិច្ចកម្ពុជា ថៃ ដែលសហការរៀបចំដោយសភាពាណិជ្ជកម្មកម្ពុជា សភាពាណិជ្ជកម្មថៃ និងគណៈកម្មាធិការពាណិជ្ជកម្មថៃ នារសៀលថ្ងៃទី០៧ ខែកុម្ភៈ ឆ្នាំ២០២៤ ដោយជំរុញលើកទឹកចិត្តវិនិយោគិនថៃ បណ្តាវិស័យឯកជនថៃ ស្វែងរកកាលានុវត្តភាពវិនិយោគនៅកម្ពុជាលើវិស័យនានាដេលមានសក្តានុពល។ សម្តេចធិបតី ហ៊ុន ម៉ាណែត បានថ្លែងថា កម្ពុជាមានសក្តានុពលច្រើន រាជរដ្ឋាភិបាលបានរៀបចំហេដ្ឋារចនាសម្ព័ន្ធផ្លូវល្បឿនលឿន ព្រលានយន្តហោះកំពង់ផែ តំបន់សេដ្ឋកិច្ចពិសេស និងបានបង្ករលក្ខណៈងាយស្រួលសំរាប់អ្នកវិនិយោគ។
សម្តេចធិបតី បានលើកឡើងពីការយកចិត្តទុកដាក់ដល់វិស័យឯកជន ដែលរាជរដ្ឋាភិបាលបានចាត់ទុកវិស័យឯកជនជាដៃគូរជាមួយនឹងរាជរដ្ឋាភិបាល។ សម្តេចធិបតីបានថ្លែងថា រាជរដ្ឋាភិបាលបានពង្រឹងកិច្ចសន្ទនាជាមួយវិស័យឯកជនឱ្យកាន់តែខ្លាំងឡើងតាមរយៈការរៀបចំវេទិការាជរដ្ឋាភិបាល និងវិស័យឯកជនឱ្យបានទៀងទាត់ ដោយសម្តេចអញ្ជើញធ្វើជាអធបិតីដោយផ្ទាល់តែម្តង។ សម្តេចធិបតី ហ៊ុន ម៉ាណែត បានបញ្ជាក់ថា «រាជរដ្ឋាភិបាលកម្ពុជានឹងផ្តល់ការគាំទ្រ និងកិច្ចសម្របសម្រួលគ្រប់រូបភាព ដើម្បីឱ្យធុរជន និងអ្នកវិនិយោគបរទេស អាចធ្វើធុរកិច្ច និងវិនិយោគនៅកម្ពុជាប្រកបដោយផ្លែផ្កា និងរីកចម្រើន»។
ក្នុងឱកាស នៃការអញ្ជើញដល់របស់សម្តេចមហាបវរធិបតី ហ៊ុន ម៉ាណែត ប្រមុខរាជរដ្ឋាភិបាលកម្ពុជា និងលោកជំទាវបណ្ឌិត ពេជ ច័ន្ទមុន្នី ហ៊ុនម៉ាណែត ត្រូវបានការធ្វើគារវកិច្ចស្វាគមន៍យ៉ាងកក់ក្តៅបំផុត ពីសមភាគថៃ ឯកឧត្តមបណ្ឌិត សេដ្ឋា ថាវីស៊ីន នាយករដ្ឋមន្ត្រី នៃព្រះរាជាណាចក្រថៃ និងលោកជំទាវនៅវិមានរាជរដ្ឋាភិបាលថៃ ក្នុងរាជធានីបាងកក។ សូមបញ្ជាក់ថា ព្រះរាជាណាចក្រថៃ គឺជាប្រទេសទី២ក្នុងតំបន់អាស៊ាន ដែលសម្តេចធិបតីនាយករដ្ឋមន្ត្រី បានជ្រើសរើសសម្រាប់ដំណើរបំពេញទស្សនកិច្ចផ្លូវការ បន្ទាប់ពីដំណើរបំពេញទស្សនកិច្ចផ្លូវការទៅកាន់ សាធារណរដ្ឋសង្គមនិយមវៀតណាម កាលពីខែធ្នូ ឆ្នាំ២០២៣កន្លងទៅ។ កម្ពុជា-ថៃ បានបង្កើតទំនាក់ទំនងការទូតជាផ្លូវការនៅថ្ងៃទី១៩ ខែធ្នូ ឆ្នាំ១៩៥០។ ប្រទេស ទាំងពីរបានផ្អាកទំនាក់ទំនងការទូតជាមួយគ្នានៅឆ្នាំ១៩៦២ និងភ្ជាប់ទំនាក់ទំនងការទូតឡើងវិញ នៅឆ្នាំ១៩៩១។
