វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2517 នាក់
ម្សិលមិញ 4292 នាក់
សរុប 14112216 នាក់
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី២២ ខែវិច្ឆិកា ឆ្នាំ២០២២ បានថ្លែងថា នៅក្នុងជំនួបរវាងសម្តេចជាមួយ លោក ចូ បៃដិន ប្រធានាធិបតីអាមេរិក មានការជជែករឿងបញ្ជូនពលរដ្ឋខ្មែរ ដែលប្រព្រឹត្តទោសត្រឡប់មកកម្ពុជា(អត់មាននិយាយរឿងដោះលែងកញ្ញាសេធារីនិងប្រជាធិបតេយ្យស្រុកខ្មែរអីទេជាមយយលោកគុយទែរ៉េស។
ថ្លែងក្នុងពិធីបិទសន្និបាតជាតិខួប៣០ឆ្នាំ នៃសកម្មភាពមីននៅកម្ពុជា សម្តេចតេជោ ហ៊ុន សែន បានបញ្ជាក់យ៉ាងដូច្នេះ «ខ្ញុំក៏បានលើក រឿងពលរដ្ឋខ្មែរដែលជាប់គុកនៅអាមេរិក ត្រូវបញ្ជូនមកស្រុកខ្មែរ។ ខ្ញុំថា ដើម្បីកុំឲ្យពិបាក ឥឡូវអនុវត្តអនុស្សារណៈ ឆ្នាំ២០០២ តែម្តងទៅ រួចហើយសម្ភាស គឺសម្ភាសតាមអនឡាញក៏បាន ឬសម្ភាសផ្ទាល់ក៏បានដែរ»។សម្តេចបន្តថា «អ្វីដែលខ្ញុំសុំ គឺសុំកុំបញ្ជូនទៅបរទេស។ កន្លងទៅ ពេលបញ្ជូនមកស្រាប់តែបញ្ជូនទៅឡាវ ២នាក់បាត់។ យើងមានកិច្ចព្រមព្រៀងជាមួយអាមេរិក ២០ឆ្នាំហើយ ក្នុងការទទួលយកពលរដ្ឋខ្មែរត្រឡប់មកប្រទេសវិញ ក្រោយអនុវត្តទោស»។
ជំនួបរវាងសម្តេចតេជោ ហ៊ុន សែន ជាមួយ លោក ចូ បៃដិន ប្រធានាធិបតីអាមេរិក អំឡុងកិច្ចប្រជុំកំពូលអាស៊ាននៅភ្នំពេញថ្មីៗនេះ ក៏សម្តេចតេជោ អះអាងថា មិនបានជជែកអំពីរឿង កញ្ញា សេង ធារី ឬប្រជាធិបតេយ្យកម្ពុជានោះទេ។ ជុំវិញបញ្ហានេះ សម្តេចបានស្នើឱ្យ អ្នកអត្ថាធិប្បាយមួយចំនួនដែលមានការយល់ច្រឡំពោះរឿងនេះ គោរពដល់ក្រមសីលធម៌ នៃកិច្ចពិភាក្សាគ្នារវាងមេដឹកនាំ។សម្តេចបានបកស្រាយថា រាល់ជំនួបរបស់មេដឹកនាំគឺមានកំណត់ហេតុ ហើយក្នុងកំណត់ហេតុកន្លងទៅនេះ គឺកម្ពុជាបានកត់ត្រានូវរាល់អ្វីដែល លោក ចូ បៃដិន លើកឡើងជាភាសាអង់គ្លេស ហើយពេលបកជាភាសាខ្មែរក៏ត្រូវបានកត់ត្រាជាភាសាខ្មែរផងដែរ។
សម្តេចបានបង្ហើបទៀតថា នៅក្នុងជំនួបនោះ សម្តេចបានសរសើរពីភាពសកម្មរបស់អាមេរិក ក្នុងការនាំវត្ថុបុរាណរបស់កម្ពុជាវិលត្រឡប់មកមាតុប្រទេសវិញ។ ដល់ចំណុចនេះ សម្តេចបានអះអាងថា លោក ចូ បៃដិន ក៏បានសន្យាជាមួយសម្តេចដែរថា វត្ថុបុរាណនោះអាចនឹងមាននៅសេសសល់ថែមទៀត ហើយលោកនឹងប្រឹងប្រែងបន្ថែម ក្នុងការនាំវត្ថុបុរាណខ្មែរត្រឡប់មកវិញ។ លោក ចូ បៃដិន បានលើកនូវចំណុចមួយចំនួន ទាក់ទងនឹងសំលៀកបំពាក់បុរាណខ្មែរ។
ទាក់ទងនឹងជំនួបជាមួយអគ្គលេខាធិការអង្គការសហប្រជាជាតិផងដែរ ដែលក្រុមអ្នកអត្ថាធិប្បាយទាំងនោះ បានលើកឡើងថា លោក អាន់តូនីញ៉ូ ហ្គូទែរ៉េស (Antonio Guterres) បានផ្តល់ដំបូន្មានដល់មេដឹកនាំកម្ពុជា អំពីដំណើរការប្រជាធិបតេយ្យជាមួយសម្តេចក៏មិនមានដែរ។សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានជួបពិភាក្សាការងារជាមួយ លោក អាន់តូនីញ៉ូ ហ្គូទែរ៉េស (Antonio Guterres) អគ្គលេខាធិការអង្គការសហប្រជាជាតិ (UN) ដែលមកចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ដែលកម្ពុជាធ្វើជាម្ចាស់ផ្ទះ កាលពីរសៀល ថ្ងៃទី១៣ ខែវិច្ឆិកា ឆ្នាំ២០២២ ក្រោយកិច្ចប្រជុំកំពូលអាស៊ានបានបិទបញ្ចប់។
សម្តេចបានបញ្ជាក់ដូច្នេះថា «ខ្ញុំពិតជាមានការភ្ញាក់ផ្អើលខ្លាំងណាស់ នៅពេលដែលបន្ទាប់ពីជំនួបរវាងខ្ញុំ ជាមួយអគ្គលេខាធិការអង្គការសហប្រជាជាតិ បែរជាមានការលើកឡើងទាក់ទិនជាមួយរឿងថា អគ្គលេខាធិការអង្គការសហប្រជាជាតិ ស្នើឱ្យខ្ញុំធ្វើនេះធ្វើនោះទាក់ទងនឹងកិច្ចការផ្ទៃក្នុងកម្ពុជា វាអត់មានទាល់តែសោះ»។សម្តេចបានលើកឡើងថា សម្តេចនិងលោក អាន់តូនីញ៉ូ ហ្គូទែរ៉េស (Antonio Guterres) អគ្គលេខាធិការអង្គការសហប្រជាជាតិ គឺជាដៃគូល្អជាមួយគ្នាតាំងពីទសវត្ស ៨០ ឯណោះ ដែលពេលនោះគាត់ជានាយករដ្ឋមន្ត្រីព័រទុយហ្គាល់ ហើយសម្តេចជានាយករដ្ឋមន្ត្រីកម្ពុជា។«អញ្ចឹង យើងស្គាល់គ្នាមិនមែនមួយថ្ងៃពីរថ្ងៃទេ គាត់ជួបខ្ញុំពេលណាក៏ដោយ គាត់មិនដែលនិយាយរឿងកិច្ចការផ្ទៃក្នុងកម្ពុជាទេ គឺអត់ទេ ប៉ុន្តែខ្ញុំអត់នឹកថា ស្រាប់តែនរណា មិនដឹងជាមន្ត្រីអង្គការសហប្រជាជាតិរូបណា ដែលប្រកាសព័ត៌មានហ្នឹងចេញ ឬក្រុមមនុស្សណាចេះតែបំផុសព័ត៌មាន»។ នេះបើតាមការបញ្ជាក់បន្ថែមរបស់សម្តេចតេជោនាយករដ្ឋមន្ត្រី។