វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1109 នាក់
ម្សិលមិញ 6677 នាក់
សរុប 14148685 នាក់
ភ្នំពេញ៖នៅព្រឹកថ្ងៃទី០៦ ខែមិថុនា ឆ្នាំ២០២៣នេះ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ក្រៅពីអំពាវនាវឲ្យការកាត់ក្តីធ្វើឡើងដោយមិលំអៀងមស្តេចបានបានបន្ដលើកទឹកចិត្តដល់ប្រជាពលរដ្ឋឲ្យដោះស្រាយវិវាទផ្សេងៗ ក្រៅប្រព័ន្ធតុលាការ ប្រសើរជាងការប្ដឹងផ្ដល់គ្នារហូតឡើងដល់តុលាការ ដែលនាំឲ្យខាតទាំងពេលវេលា និងប្រាក់កាក់។
ក្នុងឱកាសអញ្ជើញសម្ពោធដាក់ឲ្យប្រើប្រាស់ជាផ្លូវការអគារបណ្ឌិត្យសភាភូមិន្ទយុត្តិធម៌កម្ពុជា និងប្រគល់សញ្ញាបត្រដល់សិស្សចៅក្រម សិស្សក្រឡាបញ្ជី សិស្សអាជ្ញាសាលា សិស្សសារការី, សម្ដេចតេជោ ហ៊ុន សែន បានអះអាងថា ក្នុងករណីមានការប្ដឹងផ្ដល់គ្នាដល់តុលាការហើយនោះ គឺមានតែអ្នកឈ្នះ និងអ្នកចាញ់ប៉ុណ្ណោះ ហើយអ្នកឈ្នះតែងថាតុលាការយុត្តិធម៌ តែអ្នកចាញ់ថាអយុត្តិធម៌។«ធ្វើម៉េចកាត់ក្តីមិនលម្អៀង ហើយស្រាវជ្រាវឲ្យបានហ្មត់ចត់។ កុំឲ្យមានពាក្យគេថា អ្នកមានឈ្នះទាំងអស់ កុំឲ្យមានភាសាហ្នឹង។ ប៉ុន្តែ នរណាក៏ដោយ មានក៏ដោយក្រក៏ដោយ ត្រូវទទួលបានយុត្តិធម៌ដូចគ្នា»។ ទោះជាយ៉ាងណាសម្ដេចតេជោ ហ៊ុន សែន បានមានប្រសាសន៍យ៉ាងដូច្នេះថា «ខ្ញុំសូមរំលឹកឡើងវិញ លើកទឹកចិត្តឲ្យមានការសម្របសម្រួលគ្នាក្រៅប្រព័ន្ធតុលាការ ដោយមានការចូលរួមពីផ្នែកយុត្តិធម៌របស់យើង ពីមេធាវីមិនរកប្រាក់កម្រៃ ហើយពីអាជ្ញាធរដែនដីគ្រប់លំដាប់ថ្នាក់ដែលមានការពាក់ព័ន្ធ ដែលជាវិធីសាស្ដ្រដោះស្រាយបញ្ហា ជៀសវាងបាននូវការប្រឈមនានាដែលនឹងកើត»។
ត្រង់ចំណុចនេះ សម្ដេចតេជោនាយករដ្ឋមន្ដ្រីនៃកម្ពុជា បានលើកឡើងថា ការជំរុញឲ្យសម្របសម្រួលវិវាទក្រៅប្រព័ន្ធតុលាការ ទំនងមេធាវីដែលរកប្រាក់កម្រៃមិនសប្បាយចិត្តនោះទេ ព្រោះមេធាវីត្រូវការឲ្យមានបណ្ដឹងច្រើនដើម្បីការពារក្ដី ហើយទទួលបានកម្រៃសេវានៃការការពារ ប៉ុន្ដែសម្ដេចបញ្ជាក់ថា ការសម្របសម្រួលក្រៅប្រព័ន្ធតុលាការខ្លះ ក៏អាចមានមេធាវីចូលរួមដែរ។គួរជម្រាបថា កន្លងទៅនេះតាមរយៈការអំពាវនាវរបស់សម្ដេចតេជោ ហ៊ុន សែន អាជ្ញាធរគ្រប់លំដាប់ថ្នាក់ តែងតែបានខិតខំដោះស្រាយវិវាទផ្សេងៗរបស់ប្រជាពលរដ្ឋនៅមូលដ្ឋានរបស់ខ្លួន ក្រៅប្រព័ន្ធតុលាការផងដែរ។
សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសបញ្ជាដាច់ណាត់ឱ្យក្រសួងបរិស្ថាន ក្រសួងកសិកម្ម ពិសេសអាជ្ញាធរដែនដីត្រូវសហការចុះបង្ក្រាបទប់ស្កាត់បទល្មើសកាប់ទន្ទ្រានព្រៃឈើ ការរំលោភយកដីរដ្ឋ ឬរំលោភយកដីអ្នកដទៃឱ្យបានម៉ឺងម៉ាត់ និងមានប្រសិទ្ធភាព ទោះបីជិតដល់ពេលបោះឆ្នោតក៏ដោយ។សម្ដេចតេជោបានសង្កត់ធ្ងន់ថា ឱ្យតែជិតដល់ពេលបោះឆ្នោត គឺតែងតែកើតមានអំពើលួចកាប់ព្រៃឈើ ទន្ទ្រានយកដីរដ្ឋ ប៉ុន្តែអាណត្តិនេះមិនត្រូវថ្នាក់ថ្នមដើម្បការពារសន្លឹកឆ្នោតនោះឡើយ ពោលគឺត្រូវការពារធនធានធម្មជាតិ ព្រៃឈើ និងការពារសណ្ដាប់ធ្នាប់សង្គមជាចាំបាច់។
សម្ដេចតេជោថ្លែងយ៉ាងដូច្នេះថា «ឥឡូវកាប់ច្រើននៅខេត្តពោធិ៍សាត់ យប់មិញចៅហ្វាយខេត្តបានបញ្ជូនរឿងនេះមកខ្ញុំ។ មានខេត្តមួយចំនួនទៀតក៏បានបញ្ជូនព័ត៌មានមកថា មានក្រុមខ្លះកាប់ព្រៃយកដី ហើយបើកាលណាយើងធ្វើសកម្មភាពចុះបង្ក្រាប គឺគេថតយកទៅបំផ្លាញយើងក្នុងពេលឃោសនាបោះឆ្នោត»។សម្ដេចតេជោបានបន្តថា អ្នកមានលុយ និងអ្នកមានអំណាចមួយចំនួន ក៏ចូលរួមប្រព្រឹត្តអំពើខុសច្បាប់ទាំងនោះដែរ ដោយពួកគេជួលមនុស្សឱ្យទៅកាប់ព្រៃយកដី រួចហើយយកឈ្មោះប្រជាជនទៅពាំង ដល់ពេលរាជរដ្ឋាភិបាលធ្វើសម្បទានដីឱ្យប្រជាជន បែរជាដីធ្លីទាំងនោះក្លាយជាកម្មសិទ្ធិរបស់ពួកអ្នកមានលុយទៅវិញ។
សម្ដេចតេជោក៏បញ្ជាក់ទៅកាន់រដ្ឋមន្ត្រីក្រសួងបរិស្ថាន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ពិសេសអាជ្ញាធរដែនដីគ្រប់ខេត្តត្រូវអនុវត្តធ្វើកិច្ចការងារនេះឱ្យបានម៉ឺងមា់ត់ ប្រសិនបើត្រូវរុះរើ គឺត្រូវរើពីមុនបោះឆ្នោតឱ្យហើយ។ តែទោះយ៉ាងណា មិនត្រូវប្រើប្រាស់អាវុធដែលនាំឱ្យមានគ្រោះថ្នាក់ដល់អ្នកណាម្នាក់នោះឡើយ គឺគ្រាន់តែទប់ស្កាត់ ហាមឃាត់ ឬអនុវត្តតាមច្បាប់។សម្ដេចតេជោ ហ៊ុន សែន ក៏បានដាក់កំហិតឱ្យអ្នកពាក់ព័ន្ធនឹងបទល្មើសទាំងនេះត្រូវបញ្ឈប់សកម្មភាពជាបន្ទាន់ អ្នកណាក៏ដោយ ទោះបីក្រ ឬមាន ឱ្យតែប៉ះពាល់ដីរបស់រដ្ឋ ឬព្រៃរបស់រដ្ឋ គឺត្រូវអនុវត្តទោសតាមច្បាប់។ មន្ត្រីរាជការនានា ឬមន្ត្រីយោធា ឬមន្ត្រីនគរបាល សូមកុំមានការពាក់ព័ន្ធនឹងការប្រព្រឹត្តបទល្មើសនេះឱ្យសោះ ព្រោះច្បាប់មិនមានការយោគយល់នោះឡើយ។
សម្ដេចតេជោ ហ៊ុន សែន បានបញ្ជាក់បន្ថែមថា រាជរដ្ឋាភិបាលមានកាតព្វកិច្ចចាំបាច់ដើម្បីការពារសណ្ដាប់ធ្នាប់ ការពារទាំងធនធានធម្មជាតិ ព្រៃឈើ ហើយក៏បានទទួចឱ្យក្រុមអ្នកការពារសិទ្ធិមនុស្ស ក្រុមអ្នកប្រជាធិបតេយ្យ សូមមើលព្រៃទាំងមូលជាសំខាន់ កុំមើលតែឈើមួយដើមៗ។កាលពីយប់ថ្ងៃទី៥ ខែមិថុនា ឆ្នាំ២០២៣ ប្រមុខរាជរដ្ឋាភិបាលក៏បានចេញសារសំឡេងពិសេសមួយ ដោយបានដាក់បទបញ្ជាដល់ក្រសួង ស្ថាប័ន អាជ្ញាធរដែនដី កម្លាំងសមត្ថកិច្ច ត្រូវសហការទប់ស្កាត់បង្ក្រាបរាល់បទល្មើសដែលពាក់ព័ន្ធនឹងការកាប់ទន្ទ្រានព្រៃឈើ បំផ្លាញធនធានធម្មជាតិ រំលោភយកដីរដ្ឋ ឬដីអ្នកដទៃ ដោយគ្មានការលើកលែងចំពោះមន្ត្រីណាម្នាក់ ឬពលរដ្ឋណាម្នាក់នោះឡើយ៕