រដ្ឋមន្ត្រីការបរទេសចិនមកបំពេញទស្សនកិច្ចនៅ កម្ពុជាតក់ក្រហល់ បៃដឹននឹងមកវៀតណាម
06-June-2026 / ព័ត៌មានអន្តរជាតិ
ប្រទេសចិន៖អ្នកនាំពាក្យក្រសួងការបរទេសចិន លោកស្រី ម៉ៅ នីង បានប្រកាសកាលពីថ្ងៃពុធថា រដ្ឋមន្ត្រីក្រសួងការបរទេសចិន លោក វ៉ាង យី នឹងមកបំពេញទស្សនកិច្ចនៅប្រទេសសិង្ហបុរី ម៉ាឡេស៊ី និងកម្ពុជា ចាប់ពីថ្ងៃទី១០-១៣ ខែសីហា ឆ្នាំ២០២៣។អ្នកនាំពាក្យក្រសួងការបរទេសចិនលោកស្រី ម៉ៅ នីង បានបញ្ជាក់ថា ដំណើរទស្សនកិច្ចនេះនឹងជំរុញទំនាក់ទំនងយុទ្ធសាស្ត្រជាមួយប្រទេសអាស៊ីអាគ្នេយ៍ទាំងបី និងពង្រឹងកិច្ចសហប្រតិបត្តិការខ្សែក្រវាត់ និងផ្លូវប្រកបដោយគុណភាពខ្ពស់ និងនាំទំនាក់ទំនងទ្វេភាគីឡើងដល់កម្រិតខ្ពស់។
បើតាមលោកស្រី ម៉ៅ នីង ប្រទេសចិនបានត្រៀមខ្លួនរួចជាស្រេចក្នុងការធ្វើការជាមួយប្រទេសទាំងបីដើម្បីអនុវត្តគំនិតផ្តួចផ្តើមអភិវឌ្ឍន៍សកល គំនិតផ្តួចផ្តើមសន្តិសុខសកល និងគំនិតផ្តួចផ្តើមអរិយធម៌សកល ជំរុញការស្តារសេដ្ឋកិច្ច ការពារសន្តិភាព និងសន្តិភាព។លោកស្រីថា ទំនាក់ទំនងរវាងចិន និងសង្ហិបុរី ម៉ាឡេស៊ី និងកម្ពុជា រក្សាបាននូវសន្ទុះនៃកំណើនដ៏ល្អប្រសើរ។ លោកស្រីបន្តថា ប្រទេសចិននិងសិង្ហបុរីបានបង្កើតភាពជាដៃគូឆ្ពោះទៅអនាគតប្រកបដោយគុណភាពខ្ពស់គ្រប់ជ្រុងជ្រោយ។លោកស្រីបន្ថែមថា ចំពោះទំនាក់ទំនងរវាងប្រទេសចិន និងម៉ាឡេស៊ីវិញបានឈានដល់ការយោគយល់គ្នាលើការរួមគ្នាកសាងសហគមន៍មួយដែលមានអនាគតរួមគ្នា។ ចំណែកប្រទេសចិន និងកម្ពុជាក៏កំពុងធ្វើការដើម្បីឈានទៅរកយុគសម័យថ្មីនៃការកសាងសហគមន៍ចិន-កម្ពុជា ដែលមានគុណភាពខ្ពស់ កម្រិតខ្ពស់ និងស្តង់ដារខ្ពស់ ជាមួយនឹងអនាគតរួមគ្នា។
សម្រាប់ប្រទេសកម្ពុជាលោក វ៉ាង យី ដែលជាសមាជិកការិយាល័យនយោបាយ និងជាប្រធានការិយា ល័យគណៈកម្មការកិច្ចការបរទេស នៃគណៈកម្មាធិការមជ្ឈិមបក្សកុម្មុយនីស្តចិន ផងដែរ នឹងមកទស្សនៈកិច្ចពីថ្ងៃទី១២ ដល់ថ្ងៃទី១៣ ខែសីហា ឆ្នាំ២០២៣។ នេះបើយោងតាមសេចក្តីប្រកាសព័ត៌មាន របស់ក្រសួងការបរទេស ចេញផ្សាយនៅរសៀលថ្ងៃទី១០ ខែសីហានេះ។សេចក្តីប្រកាសព័ត៌មានក្រសួងការបរទេសបានឲ្យដឹងថា ក្នុងអំឡុងពេលទស្សនកិច្ចនេះ លោក វ៉ាង យី នឹងចូលក្រាបបង្គំគាល់ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅព្រះបរមរាជវាំង ព្រមទាំងអញ្ជើញចូលជួបសម្តែងការគួរសម ដាច់ដោយឡែក ចំពោះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងលោកកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីតែងតាំង នៃព្រះរាជាណាចក្រកម្ពុជា។ កិច្ចពិភាក្សា នឹងផ្តោតលើបញ្ហាមួយចំនួន ពាក់ព័ន្ធនឹងកិច្ចសហប្រតិបត្តិការទ្វេភាគី និងពហុភាគី ដែលឆ្លុះបញ្ចាំងអំពីវិស័យអាទិភាពរួម។
លោក វ៉ាង យី នឹងមានជំនួបដាច់ដោយឡែក ជាមួយលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងលោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការ នៃក្រុមប្រឹក្សាអភិវឌ្ឍន៍កម្ពុជា។ ជំនួបនឹងគ្របដណ្ដប់លើទិដ្ឋភាពចម្រុះ នៃកិច្ចសហប្រតិបត្តិការ ក្នុងក្របខ័ណ្ឌទ្វេភាគី និងពហុភាគី ដែលជាផលប្រយោជន៍ទៅវិញទៅមក នៃប្រទេសទាំងពីរ។
ដំណើរទស្សនកិច្ចនាពេលនេះ ប្រព្រឹត្តទៅស្របពេលជាមួយនឹងការប្រារព្ធខួបអនុស្សាវរីយ៍លើកទី៦៥ឆ្នាំ នៃទំនាក់ទំនងការទូត និងឆ្នាំមិត្តភាពរវាងកម្ពុជានិងចិន។ក្នុងពេលដែលមេដឹកនាំចិនមកកម្ពុជានៅប្រទេសវៀតណាមប្រធាធិបតីអាមេរិកបៃដិនបានប្រកាសថា លោកនឹងធ្វើទស្សនកិច្ចនៅប្រទេសវៀតណាម ក្នុងពេលឆាប់ៗខាងមុខឆាប់ៗនេះផងដែរ។
កាលពីចុងខែកក្កដាកន្លងទៅ នៅក្នុងកម្មវិធីរៃអង្គាសប្រាក់ដូចគ្នា នៅរដ្ឋMaine លោកចូ បៃដិនធ្លាប់បាននិយាយថា មេដឹកនាំវៀតណាមបានទូរស័ព្ទទាមទារចង់ជួបលោក នៅក្នុងជំនួបកំពូលហ្សេ ២០ ដែលត្រូវរៀបចំនៅប្រទេសឥណ្ឌានៅដើមខែកញ្ញាខាងមុខ។ តាមលោកចូ បៃដិន មេដឹកនាំវៀតណាមចង់ដំឡើងកម្រិតអាមេរិកឲ្យទៅជាប្រទេសដៃគូសំខាន់របស់វៀតណាម ដូចចិននិងរុស្ស៊ី។ប្រធានាធិបតីអាមេរិកគ្រោងធ្វើដំណើរទៅវៀតណាមក្នុងគោលដៅធ្វើឲ្យទំនាក់ទំនងប្រទេសទាំងពីរប្រសើរឡើង នៅក្នុងកាលៈទេសៈមួយដែលអាមេរិក និងវៀតណាមមានក្តីបារម្ភដូចគ្នា នៅចំពោះមុខការពង្រីកដែនឥទ្ធិពលរបស់កងទ័ពចិន នៅសមុទ្រចិនខាងត្បូង។
គម្រោងទស្សនកិច្ចរបស់ប្រធានាធិបតីអាមេរិកនៅវៀតណាមធ្វើឡើងនៅចំខួប១០ឆ្នាំនៃកិច្ចព្រមព្រៀងយោគយល់រវាងភាគីទាំងពីរ ដែលរដ្ឋបាលលោកអូបាម៉ាបានចុះហត្ថលេខានៅឆ្នាំ ២០១៣។ អាមេរិក និងវៀតណាមបានខិតចូលជិតគ្នាកាន់តែខ្លាំង នៅក្រោយការស្តារទំនាក់ទំនងគ្នាឡើងវិញ នៅឆ្នាំ ១៩៩៥។ នៅក្នុងអាណត្តិរបស់ខ្លួន លោកចូ បៃដិនបានបញ្ជូនរដ្ឋមន្ត្រីការបរទេសលោកអង់តូនីប្លីងកិន លោករដ្ឋមន្ត្រីការពារជាតិឡយ អូស្ទីន និងរដ្ឋមន្ត្រីសេដ្ឋកិច្ច ទៅជួបបញ្ចុះបញ្ចូលឲ្យភាគីវៀតណាមប្រែក្លាយអាមេរិកពីប្រទេសដែលមានទំនាក់ទំនងធម្មតាឲ្យទៅជាប្រទេសដៃគូយុទ្ធសាស្ត្ររបស់វៀតណាម។
