វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 653 នាក់
ម្សិលមិញ 10264 នាក់
សរុប 14139835 នាក់
ប្រទេសថៃ៖ លោកឧត្តមសេនីយ៍អាឌុលសាងស៊ិនកែវ( Pol Gen. Adul sangsingkeo) រដ្ឋមន្ត្រីក្រសួងការងារថៃ បានអំពាវនាវឲ្យពលករខ្មែរ ភូមា និងឡាវ មកបញ្ជាក់អត្តសញ្ញាណ និងចុះឈ្មោះ ដើម្បីធ្វើការងារស្របច្បាប់ក្នុងប្រទេស មុនពេលយុទ្ធនាការចុះឈ្មោះនេះត្រូវបញ្ចប់នៅថ្ងៃទី៣០ ខែមិថុនា។
គេហទំព័រThe Nation របស់ប្រទេសថៃកាលពីថ្ងៃទី៨ ខែមិថុនាបានឲ្យដឹងថា៖នាយកដ្ឋានផ្នែកការងាររបស់ថៃ លោក Anurak Thossarat បានបញ្ជាក់ ថា ការចុះឈ្មោះពលករបរទេសក្នុងប្រទេសថៃ នឹងមិនមានការពន្យារពេលតទៅទៀតទេ។ នាយកដ្ឋានផ្នែកការងាររបស់ថៃបញ្ជាក់ថា នៅក្រោយថ្ងៃទី៣០ ខែមិថុនា ពលករដែលធ្វើការខុសច្បាប់ ថៅកែរបស់ពួកគេនឹងប្រឈមនឹងការផាកពិន័យពីអាជ្ញាធរថៃក្រោមច្បាប់គ្រប់គ្រងពលករបរទេស ដែលបានវិសោធនកម្មកាលពីឆ្នាំ២០១៧កន្លងទៅ។
លោក អ៊ិត សំហេង រដ្ឋមន្ត្រីក្រសួងការងារបានឲ្យដឹងថា៖ កាលពីថ្ងៃទី២២ ឧសភា កម្ពុជា និងថៃបានសហការរួមគ្នាផ្តល់ភាពស្របច្បាប់ជូនពលករកម្ពុជាបានជាង៣០ម៉ឺននាក់រួចហើយ ក្នុងចំណោមពលករជាង៤០ម៉ឺននាក់ ដែលកំពុងបំរើការងារ ដោយខុសច្បាប់នៅក្នុងប្រទេសថៃ។លោក អ៊ិត សំហេង ថាពលករកម្ពុជា ដែលបំរើការងារ ដោយគ្មានឯកសារស្របច្បាប់ នៅក្នុងប្រទេសថៃ ពីមុនមកនោះ ឥឡូវនេះបានទទួលភាពស្របច្បាប់ជិតអស់ហើយ និងកំពុងបន្តធ្វើកិច្ចការនេះឱ្យបានរួចរាល់ នៅមុនដំណាច់ ខែ មិថុនា ឆ្នាំ២០១៨ខាងមុខនេះ។ គណៈកម្មការផ្តល់ភាពស្របច្បាប់ដល់ពលរដ្ឋកម្ពុជា បានអំពាវនាវឲ្យពលករខ្មែរ ដែលពុំទាន់បានមកបញ្ជាក់អត្តសញ្ញាណ ត្រូវប្រញ៉ាប់រួសរាន់មកធ្វើការបញ្ជាក់អត្តសញ្ញាណជាមួយក្រុមការងារ ដែលមានទីតាំងនៅទីក្រុងបាងកក ខេត្តផាធុមថានី ខេត្តរ៉ាក់យ៉ង និងក្រុមការងារចល័តដែលចុះទៅតាមខេត្តពលករស្នាក់នោះឲ្យបានត្រឹមថ្ងៃទី៣០ ខែមិថុនា។
សូមជម្រាបជូនថា ពលករបរទេស ដែលធ្វើការនៅក្នុងប្រទេសថៃ ដោយគ្មានការអនុញ្ញាតនឹងត្រូវផាកពិន័យពី១៥៥ដុល្លារ ដល់១,៥៦០ដុល្លារ ហើយនឹងមិនអនុញ្ញាតឲ្យដាក់ពាក្យសុំធ្វើការរយៈពេល២ឆ្នាំ។ ចំណែកឯនិយោជករូបណា ដែលទទួលយកពលករបរទេសមកធ្វើការខុសច្បាប់នឹងត្រូវផាកពិន័យពី៣១២ដុល្លារ ដល់៣,១២០ដុល្លារ ក្នុងពលករម្នាក់៕