វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2566 នាក់
ម្សិលមិញ 6677 នាក់
សរុប 14150142 នាក់
ជប៉ុន៖នៅក្នុងឱកាសនៃកិច្ចប្រជុំរដ្ឋរបស់មន្ត្រីការបរទេសមកពីតាមបណ្តាប្រទេសដែលមានសេដ្ឋកិច្ចជឿនលឿនទាំងប្រាំពីរ ឬហៅកាត់ថា G7 នៅថ្ងៃចន្ទទី១៧មេសា បានឯកភាពគ្នានៅលើដំណោះស្រាយសម្រាប់បញ្ហាវិបត្តិសង្គ្រាមនៅអ៊ុយក្រែន ដោយត្រូវធើ្វយ៉ាងណាទាមទារឱ្យរុស្ស៊ីដកកងទ័ពទាំងអស់របស់ខ្លួនចេញពីប្រទេសអ៊ុយក្រែនដោយគ្មានលក្ខខណ្ឌ។
រដ្ឋមន្ត្រីការបរទេសជប៉ុនលោក Hayashi ដែលជាម្ចាស់ផ្ទះរៀបចំកិច្ចប្រជុំបានបន្ដឱ្យដឹងថា រដ្ឋមន្ត្រីការបរទេសនៃសមាជិក G7 ទាំងប្រាំពីរប្រទេសក៏បានព្រមព្រៀងគ្នាថានឹងបន្ដដាក់ទណ្ឌកម្មទៅលើប្រទេសរុស្ស៊ីបន្ថែមទៀត និងបង្កើនការផ្គត់ផ្គង់ជំនួយទៅឱ្យអ៊ុយក្រែនដើម្បីជាការដាក់សម្ពាធឱ្យបានកាន់តែខ្លាំងឡើងទៅលើរដ្ឋាភិបាលទីក្រុងមូស្គូឱ្យជ្រើសរើសយកដំណោះស្រាយដោយសន្ដិវិធីដើម្បីបិទបញ្ចប់សង្គ្រាមនៅអ៊ុយក្រែន។សារព័ត៌មាន Reuters នៅថ្ងៃអង្គារ ទី១៨ ខែមេសា ឆ្នាំ២០២៣ បានផ្សាយឲ្យដឹងដែរថា ក្រុមរដ្ឋមន្ត្រីការបរទេសនៃបណ្ដាប្រទេស G7 នៅថ្ងៃអង្គារនេះបានថ្កោលទោសវោហាសាស្ត្រនុយក្លេអ៊ែររបស់រុស្ស៉ី និងការពិភាក្សាពីផែនការដាក់ពង្រាយអាវុធនុយក្លេអ៊ែរនៅលើទឹកដីបេឡារុស គឺជារឿងមិនអាចទទួលយកបាន។
នៅក្នុងសេចក្ដីថ្លែងការណ៍រួម ក្រុមរដ្ឋមន្ត្រីការបរទេសនៃបណ្ដាប្រទេស G7 បានកត់សម្គាល់ដូច្នេះថា «វោហាសាស្ត្រនុយក្លេអ៊ែរគ្មានទំនួលខុសត្រូវ និងការគំរាមដាក់ពង្រាយអាវុធនុយក្លេអ៊ែរនៅលើទឹកដីបេឡារុស គឺជារឿងមិនអាចទទួលយកបាន…ហើយរាល់ការប្រើប្រាស់អាវុធគីមី អាវុធជីវសាស្ត្រ ឬអាវុធនុយក្លេអ៊ែរដោយរុស្ស៉ី នឹងត្រូវជួបផលវិបាកយ៉ាងធ្ងន់ធ្ងរ»។ជុំវិញបញ្ហាច្រកសមុទ្រតៃវ៉ាន់ឯណោះវិញ ក៏ត្រូវបានគេដាក់បញ្ចូលទៅក្នុងរបៀបវារៈសម្រាប់ពិភាក្សានាឱកាសនៃកិច្ចប្រជុំខាងលើនេះផងដែរ ក្នុងនោះរដ្ឋជាសមាជិក G7 ទាំងអស់បានបង្ហាញក្តីព្រួយបារម្ភជាខ្លាំងចំពោះសកម្មភាពយោធារបស់ចិននៅជុំវិញដែនកោះតៃវ៉ាន់ បួករួមទាំងមហិច្ឆតាចង់ក្រសោបយកតំបន់ដែនទឹកសមុទ្រចិនខាងត្បូងទាំងមូលដោយរដ្ឋាភិបាលទីក្រុងប៉េកាំង.។
ទីភ្នាក់ងារសារព័ត៌មាន AFP នៅថ្ងៃអង្គារ ទី១៨ ខែមេសា ឆ្នាំ២០២៣ឲ្យដឹងថា៖អ្នកការទូតជាន់ខ្ពស់នៃប្រទេស G7 បាននិយាយនៅក្នុងសេចក្តីថ្លែងការណ៍មួយ ថា «យើងអំពាវនាវឱ្យមានការបដិសេធភ្លាមៗនៃការសម្រេចចិត្តដែលមិនអាចទទួលយកបាន ដែលរឹតត្បិតសិទ្ធិមនុស្ស និងសេរីភាពជាមូលដ្ឋាន រួមទាំងការហាមឃាត់ស្ត្រីអាហ្វហ្គានីស្ថាននាពេលថ្មីៗនេះ មិនឱ្យធ្វើការឱ្យអង្គការក្រៅរដ្ឋាភិបាល និងអង្គការសហប្រជាជាតិ»។ក្រុមប្រទេសអ្នកមានទាំង៧ក៏បានថ្កោលទោសអាជ្ញាធរតាលីបង់ ជុំវិញការរំលោភសិទ្ធិមនុស្សជាប្រព័ន្ធលើស្ត្រី និងកុមារី និងការរើសអើងប្រឆាំងនឹងសមាជិកសាសនា និងជនជាតិភាគតិច»។
សូមបញ្ជាក់ថា៖ក្រោមការបកស្រាយយ៉ាងតឹងរឹងរបស់ពួកគេអំពីសាសនាឥស្លាម អាជ្ញាធរតាលីបង់បានដាក់កម្រិតមួយចំនួនលើស្ត្រីអាហ្វហ្គានីស្ថាន ចាប់តាំងពីការដណ្តើមអំណាចក្នុងឆ្នាំ ២០២១ រួមទាំងការរារាំងពួកគេពីការអប់រំថ្នាក់ឧត្តម និងការងាររដ្ឋាភិបាលជាច្រើន។កាលពីខែធ្នូ ពួកគេបានហាមស្ត្រីមិនឲ្យធ្វើការឲ្យអង្គការក្រៅរដ្ឋាភិបាលក្នុងស្រុក និងបរទេស។ ហើយកាលពីថ្ងៃទី០៤ ខែមេសាកន្លងទៅនេះ ការហាមប្រាមត្រូវបានពង្រីកទៅកាន់ការិយាល័យអង្គការសហប្រជាជាតិទូទាំងប្រទេស ដែលបង្កឱ្យមានការរិះគន់ជាអន្តរជាតិ។កិច្ចប្រជុំរដ្ឋមន្ត្រីការបរទេស G7 បានប្រព្រឹត្តទៅរយៈពេល ៣ថ្ងៃនៅក្នុងទីក្រុង Karuizawa របស់ប្រទេសជប៉ុន ៕ប្រភព៖ Reuters