តុលាការធម្មនុញ្ញព្យួរការងារនាយករដ្ឋមន្ត្រីថៃ ប្រាយុទ្ធ ចាន់អូចាតែមិនទាន់ចប់ទេ!!
27-March-2024 / ព័ត៌មានអន្តរជាតិ
ប្រទេសថៃ៖តុលាការធម្មនុញ្ញប្រទេសថៃ បានសម្រេចព្យួរការងាររបស់នាយករដ្ឋមន្ត្រីប្រាយុទ្ធ ចាន់អូចា ហើយនៅថ្ងៃពុធទី២៤ខែសីហានេះ។នេះបើតាមការផ្សាយពីបណ្តាគេហទំព័រ ព័ត៌មាននៅក្នុងប្រទេសថៃ មានដូចជា Bangkok Post, The Nation Thailand ThaiPBS, Khaosod និង Workpointជាដើម។តុលាការធម្មនុញ្ញថៃ បានបោះឆ្នោត ៥ ទល់ ៤ ដើម្បីបញ្ជាឲ្យព្យួរលោកនាយករដ្ឋមន្ត្រី ប្រាយុទ្ធ ចាន់អូចា ពីតួនាទី។ក្នុងករណីយ៍នេះលោកឧបនាយករដ្ឋមន្ត្រីប្រាវិតវង់ស៊ូវ៉ាន( Prawit Wongsuwan )បានក្លាយជានាយករដ្ឋមន្ត្រីចាំផ្ទះ បន្ទាប់ពីលោក ប្រាយុទ្ធ ចាន់អូចា ត្រូវបានព្យួរពីតួនាទីដោយតុលាការធម្មនុញ្ញ ។
បញ្ជារបស់តុលាការធម្មនុញ្ញថៃបានកើតឡើង បន្ទាប់ពីខ្លួនយល់ព្រមទទួលយកញត្តិ សុំឲ្យធ្វើសេចក្តីសម្រេចលើការកាន់តំណែងជានាយករដ្ឋមន្ត្រីរយៈពេល ៨ ឆ្នាំរបស់លោក ប្រាយុទ្ធ។ ញត្តិនេះត្រូវបានបញ្ជូនពីសភាទៅតុលាការកាលពីថ្ងៃចន្ទទី២២ ខែសីហា។កន្លងមកក្រុមប្រឆាំងរដ្ឋាភិបាលបានដាក់គំនាបឱ្យនាយករដ្ឋមន្ត្រីប្រាយុទ្ធ ចាន់អូចាលាលែងចេញពីតំណែង ។ ក្រុមប្រឆាំងក៏បានផ្ញើលិខិតទៅកាន់ប្រធានរដ្ឋសភាថៃ លោក Chuan Leekpai និងតុលាការធម្មនុញ្ញ នៅថ្ងៃទី២២ខែសីហា។
តាមប្រភពព័ត៌មានពីគណបក្សភឿថៃ តុលាការរដ្ឋធម្មនុញ្ញនឹងចេញសេចក្តីសម្រេចនៅថ្ងៃទី២៤ខែសីហានេះ។ គណបក្សប្រឆាំងបញ្ជាក់ថា អាណត្តិរបស់លោកប្រាយុទ្ធ ចាន់អូចា បានបញ្ចប់ហើយ។លោកប្រាយុទ្ធ ចាន់អូចា បានឡើងកាន់អំណាចនៅឆ្នាំ២០១៤ ហើយបន្តដឹកនាំប្រទេសថៃក្រោយការបោះឆ្នោតនៅក្នុងឆ្នាំ២០១៩។ តាមមាត្រាទី១៥៨ នៃរដ្ឋធម្មនុញ្ញថៃ បានកំណត់យ៉ាងច្បាស់ថា អាណត្តិនាយករដ្ឋមន្ត្រីក្នុងប្រទេសនេះមិនអាចកាន់តំណែងលើសពី៨ឆ្នាំឡើយ។ ការកាន់តំណែងរបស់លោកប្រយុទ្ធ ចាន់អូចា គឺគិតចាប់តាំងពីឆ្នាំ២០១៤ ដល់ឆ្នាំ២០២២គឺគ្រប់ចំនួន មិនអាចបន្តកាន់តំណែងនាយករដ្ឋមន្ត្រីទៀតឡើយ។
បន្ទាប់ពីមានការដាក់ញាត្តិនៅថ្ងៃអង្គារទី២៣ខែសីហា អាជ្ញាធរថៃ បានបង្កើនសន្តិសុខនៅក្នុងរាជធានី មុនការតវ៉ាទាមទារឲ្យនាយករដ្ឋមន្ត្រីលាលែងពីតំណែង។បណ្ដាញការងារសម្រាប់សិទ្ធិប្រជាពលរដ្ឋ បានធ្វើបាតុកម្ម នៅលើស្ពានចាមម៉ៃ ម៉ារូចេត (Chamai Maruchet) ហើយមេដឹកនាំរបស់ពួកគេ បានបញ្ជាក់ថា លោក ប្រាយុទ្ធ ត្រូវតែចុះចេញពីតំណែងជាបន្ទាន់។ ក្រុមបាតុករទាំងនេះ បានសង្កត់ធ្ងន់ថា សេដ្ឋកិច្ចរបស់ប្រទេសថៃ កំពុងតែធ្លាក់ចុះយ៉ាងខ្លាំង ហើយបុគ្គលិក និង កម្មករកំពុងតែស្ថិតក្នុងសភាពអស់សង្ឃឹម ដោយសារប្រាក់ឈ្នួលរបស់ពួកគេតិច មិនអាចសមាមាត្រទៅនឹងការចំណាយ សម្រាប់ជីវភាពប្រចាំថ្ងៃបាន ខណៈអត្រាចំនួនអ្នកអត់ការងារធ្វើ កំពុងតែកើនឡើង។មេដឹកនាំបាតុករ បានបញ្ចេញវោហារ តាមប្រដាប់បំពងឧគ្ឃោសនសព្ទ ថា «នេះជាពេលវេលាសមល្មម សម្រាប់លោកនាយករដ្ឋមន្ដ្រីខុសច្បាប់ ចុះចេញពីតំណែងហើយ។ នេះជាពេលដែលលោក ប្រាយុទ្ធ ត្រូវដើរចេញ ហើយជាពេលត្រូវបញ្ចប់នូវការកាន់អំណាច រយៈពេល៨ឆ្នាំ! លោកប្រាយុទ្ធ ត្រូវតែចាកចាក!»។
ក្រុមបាតុករ ក៏បានទាមទារដំឡើងប្រាក់ឈ្នួលប្រចាំថ្ងៃ ដល់កម្មករគ្មានជំនាញ ជាអប្បបរមា ចំនួន៤២៥បាត (លុយថៃ) ឬស្មើនឹងប្រហាក់ប្រហែល១២ដុល្លារ សម្រាប់កម្មករ នៅទូទាំងប្រទេស។ ក្រៅពីនេះ ក្រុមបាតករ ក៏បានទាមទារឲ្យរដ្ឋាភិបាល បញ្ចុះតម្លៃប្រេងឥន្ធនៈ និង គ្រប់គ្រងនូវតម្លៃទំនិញប្រើប្រាស់ប្រចាំថ្ងៃផងដែរ។ស្របគ្នានេះដែរ បណ្តាញនិស្សិតរាមខាំហែង (Ramkhamhaeng) ដើម្បីលទ្ធិប្រជាធិបតេយ្យ ឆ្ពោះទៅទិសខាងត្បូង និង ក្រុមសកម្មជននិស្សិត នៃសាកលវិទ្យាល័យ Ramkhamhaeng ក៏ បានប្រមូលផ្តុំគ្នា នៅមុខរដ្ឋសភា ហើយបានអំពាវនាវឲ្យនាយករដ្ឋមន្ដ្រីថៃ លោក ប្រាយុទ្ធចាន់អូចា ចុះចេញពីតំណែង។ ក្រុមបាតុករជានិស្សិត បានអះអាងថា លោក ប្រាយុទ្ធ បានកាន់តំណែង ជានាយករដ្ឋមន្ដ្រី អស់រយៈពេល៨ឆ្នាំ ស្របតាមច្បាប់រដ្ឋធម្មនុញ្ញ នៅត្រឹមថ្ងៃអង្គារ ទី២៣ ខែសីហា ។ ដូច្នេះ នៅថ្ងៃពុធ លោក ប្រាយុទ្ធ ត្រូវតែចុះចេញពីតំណែង។
លោក ប្រាយុទ្ធ អាយុ ៦៨ឆ្នាំ ជាមេទ័ព នៅពេលគាត់ធ្វើរដ្ឋប្រហារក្នុងឆ្នាំ២០១៤ ដើម្បីផ្ដួលរំលំរដ្ឋាភិបាលជាប់ឆ្នោត។ គាត់បានក្លាយជានាយករដ្ឋមន្ត្រីស៊ីវិលក្នុងឆ្នាំ២០១៩ បន្ទាប់ពីការបោះឆ្នោតដែលបានធ្វើឡើងក្រោមរដ្ឋធម្មនុញ្ញ ព្រាងដោយយោធា។ទោះបីយ៉ាងណាក្រុមអ្នកឃ្លាំមើលស្ថានការណ៍នយោបាយនៅក្នុងប្រទេសថៃ យល់ថា តុលាការធម្មនុញ្ញថៃ តែងតែធ្វើសេចក្ដីសម្រេចដែលបម្រើផលប្រយោជន៍ដល់លោក ប្រាយុទ្ធ។ ម្លោះហើយ ទើបគេជឿថា ការសម្រេចចិត្តព្យួរតំណែងជានាយករដ្ឋមន្ត្រីនៅពេលនេះ គេមិនទាន់អាចនិយាយបានភ្លាមៗថា ជាទីបញ្ចប់របស់លោក ប្រាយុទ្ធនោះទេ ព្រោះគេត្រូវរង់ចាំមើលការសម្រេចចិត្តចុងក្រោយរបស់តុលាការធម្មនុញ្ញថៃចេញជាផ្លូវការនៅក្នុងខែកញ្ញាសិន។
នៅក្នុងសេណារីយ៉ូមួយ អ្វីដែលលោក ប្រាយុទ្ធ រំពឹងទុកន នោះគឺតុលាការធម្មនុញ្ញថៃនឹងសម្រេចថា អាណត្តិជានាយករដ្ឋមន្ត្រីរបស់លោក ចាប់ផ្ដើមរាប់ពីឆ្នាំ២០១៧ ឬឆ្នាំ២០១៩ មិនមែនចាប់ផ្ដើមរាប់នៅឆ្នាំ២០១៤ ដូចដែលគណបក្សប្រឆាំងអះអាងនោះទេ។ ប្រសិនបើមានការសម្រេចចិត្តបែបនេះ នឹងបង្កឱ្យមានបាតុកម្មតវ៉ា ជាពិសេសពីសំណាក់ក្រុមអ្នកតវ៉ាប្រឆាំងនឹងលោក ប្រាយុទ្ធ ដែលចាត់ទុករូបលោកជានាយករដ្ឋមន្ត្រីខុសច្បាប់រួចទៅហើយនោះ។ផ្តុយទៅវិញបើតុលាការធម្មនុញ្ញសម្រេចថា អាណត្តិជានាយករដ្ឋមន្ត្រីថៃរយៈពេល៨ឆ្នាំរបស់លោក ប្រាយុទ្ធ បានអស់សុពលភាព ដោយចាប់ផ្ដើមរាប់ពីឆ្នាំ២០១៤ តាមការអះអាងរបស់គណបក្សប្រឆាំងវិញលោកប្រាយុទ្ធក៏មិនទាន់អស់ផ្លូវដែរ។
លោក ប្រាយុទ្ធអាចនៅ នៅសល់តំណែងដ៏មានឥទ្ធិពលមួយទៀត បន្ទាប់ពី តំណែងជានាយករដ្ឋមន្ត្រី គឺរដ្ឋមន្ត្រីការពារជាតិដែលជាកៅអីលោកប្រាវីត ដែលនេះមានន័យថា លោកនឹងនៅតែមានឥទ្ធិពលនៅលើឆាកនយោបាយថៃ។នៅក្នុងសេណារីយ៉ូនេះដែរ សភាជាតិទាំង២ របស់ថៃ(ក្នុងព្រឹទ្ធសភាសុទ្ធតែជាមនុស្សរបស់លោកប្រាយុទ្ធ) នឹងចាប់ផ្ដើមនីតិវិធីជ្រើសរើសនាយករដ្ឋមន្ត្រីថ្មី នៅក្នុងចំណោមបេក្ខជនដែលស្នើឡើងដោយគណបក្ស ធំៗនៅក្នុងការបោះឆ្នោតសកលកាលពីឆ្នាំ២០១៩។ នាយរដ្ឋមន្ត្រី និងគណៈរដ្ឋមន្ត្រីថ្មីនឹងត្រូវបន្តកាន់តំណែងនៃអាណត្តិសេសល់រហូតដល់ដំណាច់ខែមីនា ឆ្នាំ២០២៣ ពេលដែលការបោះឆ្នោតសកលត្រូវបានគេរំពឹងថានឹងរៀបចំឡើង៕
