រដ្ឋមន្ត្រីការបរទេសចាំផ្ទះថៃកោះប្រជុំរដ្ឋមន្ត្រីការបរទេសក្រៅផ្លូវការរឿងភូមាតែមិនសូវមានការចាប់អារម្មណ៍ពីប្រទេសអាស៊ានផ្សេងទៀត!
03-April-2024 / ព័ត៌មានអន្តរជាតិ
ប្រទេសថៃ៖រដ្ឋមន្ត្រីការបរទេសរបស់មីយ៉ាន់ម៉ាលោក Than Shwe នឹងចូលរួម “កិច្ចពិភាក្សាក្រៅផ្លូវការ” ដ៏ចម្រូងចម្រាសមួយនៅទីក្រុងបាងកក ស្តីពីវិបត្តិនយោបាយរបស់ប្រទេសដែលរងការវាយប្រហារដោយរដ្ឋប្រហារ ។នេះបើតាមប្រភពពីរសារពត៍មាន Reuters ។ដើម្បីស្វែងរកដំណោះស្រាយនៅប្រទេសមីយ៉ាន់ម៉ា រដ្ឋមន្ត្រីការបរទេសថៃ លោក ដន ប្រាម៉ាត់វីណៃ (Don Pramudwinai) ឧបនាយករដ្ឋមន្ត្រី និងជារដ្ឋមន្ត្រីការបរទេសថៃចាំផ្ទះ បានអញ្ជើញរដ្ឋមន្ត្រីការបរទេសអាស៊ាន រួមមានទាំងរដ្ឋមន្ត្រីរបស់របបសឹកភូមា ចូលរួមកិច្ចប្រជុំក្រៅផ្លូវការនៅក្នុងប្រទេសថៃ ដែលចាប់ផ្តើមពីថ្ងៃទី ១៨ ដល់ ១៩ ខែមិថុនា ឆ្នាំ ២០២៣។
ប្រទេសមីយ៉ាន់ម៉ាបានស្ថិតក្នុងភាពចលាចល ចាប់តាំងពីរដ្ឋប្រហារយោធាថ្ងៃទី១ខែកុម្ភៈ ឆ្នាំ ២០២១ ដោយបានបណ្តេញមេដឹកនាំស៊ីវិលដែលជាប់ឆ្នោតតាមលទ្ធិប្រជាធិបតេយ្យលោកស្រី អ៊ុងសាន ស៊ូជី ចេញពីតំណែង ។តែកិច្ច មួយថ្ងៃក្រោយការគ្រោងទុកសម្រាប់កិច្ចប្រជុំ ប្រទេសអាស៊ានសំខាន់ៗដូចជា សិង្ហបុរី ម៉ាឡេស៊ី និងហ្វីលីពីនឥណ្ឌូណេស៊ី បានប្រកាសថានឹងមិនចូលរួមឡើយ ។ក្រសួងការបរទេសឥណ្ឌូណេស៊ី ប្រាប់វីអូអេផ្សាយជាភាសាឥណ្ឌូណេស៊ីថា រដ្ឋមន្ត្រីឥណ្ឌូណេស៊ីមិនបានចូលរួមនៅក្នុងកិច្ចផ្លូវក្រៅផ្លូវការនោះទេ ក្រោមហេតុផលថា ឥណ្ឌូណេស៊ីកំពុងតែទទួលដំណើរទស្សនកិច្ចរបស់អធិរាជជប៉ុន Naruhito ហើយថា «មិនមានភាពបន្ទាន់សម្រាប់ឥណ្ឌូណេស៊ីក្នុងការចូលរួមកិច្ចប្រជុំនោះទេ»។
រដ្ឋមន្ត្រីការបរទេសរបស់ប្រទេសម៉ាឡេស៊ី ក៏មិនចូលរួមកិច្ចប្រជុំក្រៅផ្លូវការនោះ ដោយហេតុផលថាមានភារកិច្ចសំខាន់ជាងនេះដែលត្រូវធ្វើ។ នេះបើយោងការចុះផ្សាយរបស់សារព័ត៌មាន BERNAMA ដែលមានមូលដ្ឋាននៅម៉ាឡេស៊ី។សារព័ត៌មានដដែលបានស្រង់សម្តីដើមរបស់សេចក្តីប្រកាសព័ត៌មាននៃក្រសួងការបរទេសម៉ាឡេស៊ីថា៖ «វាជារឿងសំខាន់ដែលអាស៊ានប្តេជ្ញាសាមគ្គីគ្នា ដើម្បីគាំទ្រកិច្ចខិតខំប្រឹងប្រែងរបស់ប្រធានអាស៊ាន ជាពិសេសការិយាល័យប្រេសិតពិសេស»។
ក្រសួងការបរទេសកម្ពុជាបានប្រកាសថា រដ្ឋមន្ត្រីការបរទេសកម្ពុជា លោក ប្រាក់ សុខុន នឹងទៅចូលរួមកិច្ចប្រជុំក្រៅផ្លូវការនោះ ប៉ុន្តែក្រោយមកកាលពីថ្ងៃអាទិត្យ ក្រសួងក៏បានប្រកាសថាលោករដ្ឋមន្ត្រីមិនបានចូលរួមវិញ ក្រោមហេតុផលថា លោក ប្រាក់ សុខុន មាន «ភារកិច្ចសំខាន់ត្រូវបំពេញ» ដោយគ្រាន់តែបញ្ជូនមន្ត្រីខ្ពស់របស់ក្រសួងម្នាក់ គឺលោក គង់ ភោគ រដ្ឋលេខាធិការក្រសួងបរទេស ទៅចូលរួមជំនួសវិញ។
ប៉ុន្តែកាលពីល្ងាចថ្ងៃអាទិត្យ ក្រសួងការបរទេសថៃ បានចេញសេចក្តីថ្លែងការណ៍មួយថា “កិច្ចសន្ទនាក្រៅផ្លូវការ” នឹងចាប់ផ្តើមនៅថ្ងៃចន្ទវិញ។ ក្រសួងអះអាងថា វានឹងមិនដូចកិច្ចប្រជុំអាស៊ានផ្លូវការនោះទេ ប៉ុន្តែនឹងជួយគាំទ្រដល់កិច្ចខិតខំប្រឹងប្រែងរបស់អាស៊ាន ដើម្បីបញ្ចប់អំពើហិង្សានៅមីយ៉ាន់ម៉ា។
ក្រុមឧត្តមសេនីយ៍នៃរដ្ឋបាលមីយ៉ាន់ម៉ា ត្រូវបានរារាំងពីកិច្ចប្រជុំអាស៊ានកម្រិតខ្ពស់អស់រយៈពេលជិត ២ ឆ្នាំមកហើយ ដោយសារតែខកខានមិនបានគោរពតាមកិច្ចព្រមព្រៀងសន្តិភាព៥ ចំណុចដែលបានព្រមព្រៀងគ្នាកាលពី ២ ឆ្នាំមុន ។កាលពីព្រឹកថ្ងៃទី ១៩ ខែមិថុនា ឆ្នាំ ២០២៣នៅក្នុងពិធីសម្ពោធដាក់ឱ្យប្រើប្រាស់ជាផ្លូវការរោងចក្រប្រព្រឹត្តកម្មទឹកស្អាតបាក់ខែង សម្តេចនាយករដ្ឋមន្ត្រី ហ៊ុន សែន ដែលធ្លាប់ទៅជួបមេដឹកនាំយោធាភូមា ម្តងកាលពីដើមឆ្នាំ ២០២២ នៅពេលកម្ពុជាធ្វើជាប្រធានអាស៊ានប្តូរវេន បានលើកឡើងថា វិបត្តិនៅប្រទេសមីយ៉ាន់ម៉ាកាន់តែយ៉ាប់យឺនពីមួយថ្ងៃទៅមួយថ្ងៃ។
សម្តេច ហ៊ុន សែនលើកឡើងថា ៖ «ពីមុនកុងសង់ស៊ីស ៥ ចំណុច គ្រាន់តែទប់ស្កាត់ហិង្សាទេ ប៉ុន្តែឥឡូវខ្ញុំបានលើកនិយាយនៅក្នុងអាស៊ានថា បញ្ហាទប់ស្កាត់ឥឡូវនេះគឺទប់ស្កាត់កុំឱ្យសង្គ្រាមស៊ីវិលរីករាលដាល។ នេះជាបញ្ហាមិនតូចតាចទេ»។យោងតាមក្រុមឃ្លាំមើលក្នុងតំបន់បានឲ្យដឹងថា ជនស៊ីវិលជាង ៣,៦០០ នាក់ត្រូវបានសម្លាប់នៅក្នុងការបង្ក្រាបរបស់យោធា ចាប់តាំងពីការដួលរលំនេះ ខណៈអង្គការសហប្រជាជាតិនិយាយថា មនុស្សជាង ១ លាននាក់ត្រូវបានផ្លាស់ទីលំនៅ ដោយសារអំពើហិង្សានេះ ។
ពាក់ព័ន្ធនឹងបញ្ហានេះ សមាគមប្រជាជាតិអាស៊ីអាគ្នេយ៍ (អាស៊ាន) ដែលក៏មានមីយ៉ាន់ម៉ាជាសមាជិកផងដែរនោះ បានដឹកនាំកិច្ចខិតខំប្រឹងប្រែងការទូតតែមិនទទួលបានផ្លែផ្កាអ្វីឡើយក្នុងការទប់ស្កាត់ការបង្ហូរឈាមមួយនេះ ចំពេលមានការប៉ះទង្គិចគ្នាដោយហិង្សារវាងយោធា និងក្រុមអ្នកប្រឆាំងរដ្ឋប្រហារ ។នៅក្នុងកិច្ចប្រជុំកំពូលអាស៊ានកាលពីខែមុន នៅទីក្រុងហ្សាការតានៃប្រទេសឥណ្ឌូណេស៊ី មេដឹកនាំអាស៊ានបានអំពាវនាវឱ្យបញ្ចប់ជាបន្ទាន់ចំពោះអំពើហិង្សានៅក្នុងប្រទេសមីយ៉ាន់ម៉ា ដែលបានចាប់ផ្តើមបន្ទាប់ពីយោធាបានទម្លាក់រដ្ឋាភិបាលស៊ីវិលជាប់ឆ្នោតរបស់អ្នកស្រី អ៊ុងសាន ស៊ូជី នៅក្នុងរដ្ឋប្រហារកាលពីថ្ងៃទី១ខែកុម្ភៈ ឆ្នាំ ២០២១។គួរបញ្ជាក់ថា កិច្ចប្រជុំចុងក្រោយរបស់មេដឹកនាំអាស៊ាន ដែលធ្វើឡើងក្នុងខែឧសភា នៅប្រទេសឥណ្ឌូណេស៊ីបានបញ្ចប់ទៅដោយមិនមានវឌ្ឍនភាពសំខាន់ណាមួយលើផែនការសន្តិភាពឡើយ ខណៈប្រធានាធិបតីឥណ្ឌូណេស៊ីលោក Joko Widodo បានព្រមានថា ប្លុកនេះកំពុងក្លាយជាហានិភ័យ ៕
