វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1799 នាក់
ម្សិលមិញ 3717 នាក់
សរុប 14150132 នាក់
ភ្នំពេញ៖ សម្តេចតេជោ នាយករដ្ឋមន្ត្រី ហ៊ុន សែន បានជួបពិភាក្សាការងារតាមទូរស័ព្ទ ជាមួយលោក វ៉ូឡូឌីមៀ ហ្សេឡេនស្គី (Volodymyr Zelenskyy) ប្រធានាធិបតីអ៊ុយក្រែន នៅរសៀលថ្ងៃទី១ ខែវិច្ឆិកា ឆ្នាំ២០២២ នេះ។ ប្រធានាធិបតីអ៊ុយក្រែន បានជម្រាបជូនសម្តេចតេជោ ហ៊ុន សែន ថា អ៊ុយក្រែន នឹងធានានូវសន្តិសុខស្បៀង សម្រាប់បណ្តាប្រទេសតំបន់អាស៊ាន។
បន្ទាប់ពីជួបសន្ទនាតាមទូរស័ព្ទជាមួយសម្តេចតេជោរួច លោក វ៉ូឡូឌីមៀ ហ្សេឡេនស្គី (Volodymyr Zelenskyy) បានសរសេរនៅលើ Twitter ដោយលោកប្រធានាធិបតី ក៏បានសម្តែងការអរគុណចំពោះសម្តេចតេជោ ហ៊ុន សែន នាយករដ្ឋមន្ត្រី និងជាប្រធានអាស៊ាន ឆ្នាំ២០២២ សម្រាប់ការគាំទ្រនូវអធិបតេយ្យភាព និងបូរណភាពទឹកដីអ៊ុយក្រែន ព្រមទាំងការគាំទ្រ នៅអង្គការសហប្រជាជាតិ។យ៉ាងណាក៏ដោយ ចំពោះខ្លឹមសារនៃជំនួបតាមទូរស័ព្ទនេះ មិនទាន់មានការផ្សព្វផ្សាយពីកម្ពុជានៅឡើយទេ.។
សូមបញ្ជាក់ថានាថ្ងៃទី១ ខែវិច្ឆិកាក្នុងពិធីចែកសញ្ញាបត្រ័សិស្ស សម្តេច ហ៊ុន សែន បានប្រកាសថា ជំនួបនេះ(ជាមួយលោក Zelenskyy) នឹងផ្តោតលើទំនាក់ទំនងទ្វេភាគី និងទំនាក់ទំនងរវាងអ៊ុយក្រែន និងអាស៊ាន ។ សម្តេចថានឹងអាចចោទសួរលោក Zelenskyy អំពីបញ្ហាការនាំចេញស្បៀងរបស់អ៊ុយក្រែន ទៅកាន់តំបន់ផ្សេងៗ បន្ទាប់ពីការអាក់ខានការនាំចេញស្បៀងពីកំពង់ផែអ៊ុយក្រែន។សម្តេចថា កាលពីមុននេះ ស្បៀងដែលបាននាំចេញពីអ៊ុយក្រែន ដើម្បីផ្គត់ផ្គង់ទៅកាន់តំបន់ផ្សេងៗ មានស្ថិរភាពបង្គួរ។
កាលពីដើមខែតុលា សម្តេច ហ៊ុន សែន ប្រកាសជំហរមិនគាំទ្រការធ្វើប្រជាមតិរបស់រុស្ស៊ី ដើម្បីកាត់យកទឹកដីអ៊ុយក្រែនបញ្ចូលទៅប្រទេសរុស្ស៊ី ដោយសម្តេចបញ្ជាក់ថា៖ «ខ្ញុំធ្លាប់បានប្រកាសហើយ ថាយើងអត់គាំទ្រទេ ហើយយើងប្រឆាំងជាមួយនឹងការបង្កើតរដ្ឋ ផ្តាច់រដ្ឋ ផ្តាច់ទឹកដី ហើយនិងការប្រើប្រាស់កម្លាំង ឬគំរាមប្រើប្រាស់កម្លាំង»។កាលពីខែមីនា២០២២ កម្ពុជាបានបោះឆ្នោតគាំទ្រសេចក្តីសម្រេចរបស់មហាសន្និបាតអង្គការសហប្រជាជាតិដែលទាមទារឱ្យរុស្ស៊ីបញ្ចប់ប្រតិបត្តិការយោធារបស់ខ្លួនជាបន្ទាន់ នៅប្រទេសអ៊ុយក្រែន ខណៈកម្ពុជាក៏បានសម្តែងការព្រួយបារម្ភយ៉ាងខ្លាំងចំពោះស្ថានភាពធ្ងន់ធ្ងរនៃសង្គ្រាមនៅប្រទេសនេះ៕