មហាជនចោទសួរពីចំណាត់ការក្នុងសំណុំរឿងអ្នកបើករថយន្តស្ទូច និងព្រូឡានដែលស៊ីស្នួលត្រូវតុលាការឃុំខ្លួន

ភ្នំពេញ៖ ផេកលោក ផែង វណ្ណៈ អគ្គនាយក PhengVannakNews នៅថ្ងៃទី៦ ខែកក្កដា ឆ្នាំ២០២៦ បានផ្សព្វផ្សាយព័ត៌មានមួយបង្កឲ្យមានការចាប់អារម្មណ៍ពីមហាជន ពាក់ព័ន្ធករណីតៃកុងឡានស្ទូច និងព្រូឡាន ត្រូវបានបញ្ជូនទៅតុលាការ ក្រោមការចោទប្រកាន់ថាពាក់ព័ន្ធអំពើលួចកុងតឺន័រ។ 

តាមសេចក្តីរាយការណ៍ខាងលើ មានការលើកឡើងថា អ្នកបើកបររថយន្តស្ទូច និងព្រូឡាន បានទទួលការទាក់ទងពីបុគ្គលម្នាក់តាមទូរស័ព្ទ ដើម្បីជួលឱ្យទៅស្ទូចកុងតឺន័រ ក្នុងតម្លៃឈ្នួល ៧០ដុល្លារអាមេរិក។ ប៉ុន្តែ នៅពេលទៅដល់ទីតាំង ស្ត្រីអ្នកមើលការខុសត្រូវឃ្លាំងបានឃាត់មិនឱ្យស្ទូច និងរាយការណ៍ទៅម្ចាស់ទីតាំង។

ប្រភពដដែលបន្តថា បន្ទាប់ពីដឹងថាកុងតឺន័រមានបញ្ហា អ្នកបើកបរ និងព្រូឡាន មិនបានស្ទូចយកចេញនោះទេ ដោយបានទម្លាក់កុងតឺន័រទុកវិញ ហើយបើករថយន្តចាកចេញ ខណៈបុគ្គលដែលបានហៅជួលក៏បានជិះម៉ូតូចេញបាត់។ ក្រោយមក សមត្ថកិច្ចបានតាមឃាត់រថយន្តស្ទូចនេះ បន្ទាប់ពីធ្វើដំណើរចេញពីទីតាំងប្រមាណ ២ ទៅ ៣ គីឡូម៉ែត្រ។

ប្រភពដដែលអះអាងទៀតថា មន្ត្រីនគរបាលបានស្នើសុំគោលការណ៍ពីលោក ថេង សំណាង ព្រះរាជអាជ្ញារង អមសាលាដំបូងរាជធានីភ្នំពេញ ដោយស្នើឱ្យអនុញ្ញាតឱ្យអ្នកបើកបរ និងព្រូឡានវិលត្រឡប់ទៅផ្ទះសិន ខណៈសមត្ថកិច្ចបន្តស្រាវជ្រាវរកម្ចាស់លេខទូរស័ព្ទដែលបានហៅជួល ដើម្បីសាកសួរ។ ទោះជាយ៉ាងណា ប្រភពខាងលើអះអាងថា សំណើនោះមិនត្រូវបានទទួលយកឡើយ។

ករណីនេះ បានបង្កឱ្យមានការពិភាក្សា និងការរិះគន់យ៉ាងទូលំទូលាយនៅលើបណ្តាញសង្គម ដោយមតិមួយចំនួនបានលើកជាសំណួរថា តើការចាត់វិធានការលើអ្នកបើកបរ និងព្រូឡាន ដែលអះអាងថាគ្រាន់តែទទួលការងារតាមការជួល និងមិនបានយកកុងតឺន័រចេញពីទីតាំងនោះ ស្របតាមអង្គហេតុ និងគោលការណ៍ច្បាប់ដែរឬទេ?