ប្ដីស្ត្រីរងគ្រោះដោយសារគ្លីនិកដើមអង្គ្រងអង្វរគ្រូពេទ្យឲ្យបញ្ជូនប្រពន្ធខ្លួនទៅព្យាបាលនៅថៃម្ដងទៀត !
16-April-2026 / ព័ត៌មានជាតិ
ភ្នំពេញ ៖ នៅរសៀលថ្ងៃទី ១០ ខែមីនា ឆ្នាំ ២០២៣ ស្វាមីស្ត្រីដែលត្រូវពេទ្យឆ្មមគ្លីនិកដើមអង្គ្រងព្រៃទទឹង រំលូតកូនចេញបែជាកាត់ដាច់ពោះវៀនតាមរយៈសារពត័មាន បានសុំអង្វរក្រុមគ្រូពេទ្យបានបញ្ជូនប្រពន្ធទៅព្យាបាលប្រទេសថៃម្ដងទៀត ដោយសារអ្នកជំងឺហាក់គ្មានសង្ឃឹម ។
លោក ផេង វឿន ត្រូវជាស្វាមី របស់អ្នកជំងឺអ្នកនាង ស្រីអូន បញ្ជាក់ថាស្ថានភាពជំងឺភរិយា កាន់តែធ្ងន់ធ្ងរហើយ រហូត ក្រុមលោកគ្រូពេទ្យនៅមន្ទីរពេទ្យកាល់ម៉ែត បញ្ជូនទៅបន្ទប់សង្គ្រោះបន្ទាន់ និងប្រាប់ឲ្យលោក និងក្រុមគ្រួសារសម្រួលចិត្តត្រៀមទទួលយកការពិត ដែលនឹងមកដល់ក្នុងពេលខាងមុខ ព្រោះក្រុមគ្រូពេទ្យអស់លទ្ធភាពក្នុងការពិនិត្យព្យាបាលហើយ។ បុរសជាភរិយាស្ត្រីមានជំងឺអស់សង្ឃឹមខ្លាំងណាស់ ក្រោយទទួលបានព័ត៌មានបែបនេះ និងសុំអង្វរដល់គ្រូពេទ្យជួយសង្គ្រោះអាយុជីវិតភរិយារបស់ខ្លួន ផង ខណៈនាងតែងតែប្រាប់លោកថា នាងមិនចង់ស្លាប់ទេ នាងចង់នៅមើលថែរក្សាកូនស្រីបន្តទៀត។ ដូច្នេះលោកសូមគោរពអង្វរដល់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកបាទក្រហមកម្ពុជា បានជួយឱ្យភរិយារបស់លោកទៅព្យាបាលនៅប្រទេសថៃជាថ្មី ដើម្បីឲ្យភរិយាអាចមានជីវិតរស់រានបន្តទៀត ទម្រាំដល់ពេលមានអ្នកបរិច្ចាគពោះវៀនឲ្យនាងបានរស់ ។
លោកសាស្ត្រាចារ្យ ឡឹម តារា អគ្គនាយករងមន្ទីរពេទ្យកាល់ម៉ែត បានបញ្ជាក់ថា ស្ថានភាពរបស់អ្នកជំងឺ កំពុងវិវត្តទៅកាន់ភាពធ្ងន់ធ្ងរ ។ បច្ចុប្បន្នកំពុងរស់នៅបន្ទប់សង្គ្រោះបន្ទាន់ ទទួលបានការយកចិត្តទុកដាក់ព្យាបាលពីក្រុមគ្រូពេទ្យ លោកថាអ្នកជំងឺមានការវិវត្តន៍ធ្លាក់ចុះ យើងបានខំប្រឹងប្រែង ដើម្បីទប់ទល់ហើយ តែមានកត្តាប្រឈមជាប់នឹងខ្លួន ក៏បានបញ្ជូនទៅបន្ទប់សង្គ្រោះបន្ទាន់លើកទី៣។លោកសាស្ត្រាចារ្យ ឡឹម តារា បានថ្លែងបន្ដថា «អ្នកជំងឺមានការវិវឌ្ឍន៍ធ្លាក់ចុះ យើងខំប្រឹងដើម្បីទប់ទល់ហើយ តែគាត់មានកត្ដាប្រឈមជាប់នឹងខ្លួនស្រាប់ ឥលូវកត្ដាប្រឈមទាំងនោះបង្កើតជាផលវិបាកធ្ងន់ធ្ងរ និងបានបានធ្វើឱ្យស្ថានភាពសុខភាពទូទៅមានការស្រុតចុះ ដែលធ្វើឱ្យអ្នកជំងឺត្រូវបញ្ជូនទៅបន្ទប់សង្គ្រោះបន្ទាន់ជាលើកទីបី» ។
កាលពីថ្ងៃទី១៩មករាឆ្នាំ២០២៣លោកសាស្ត្រាចារ្យ ឡឹម តារា អគ្គនាយករងមន្ទីរពេទ្យកាល់ម៉ែត បានបញ្ជាក់ថា ស្ថានភាពរបស់អ្នកជំងឺ ថាគឺមានលំនឹង ឬក៏នឹងនរជាបណ្ដោះអាសន្ន។«នឹងនរជាបណ្ដោះអាសន្ននេះ បានន័យថា អ្នកជំងឺកំពុងតែមានកត្ដាបញ្ហាប្រឈមជាប់នឹងខ្លួនជាប្រចាំ ហើយកត្ដាប្រឈមនេះ កើតមានក្រោយពេលដែលគាត់មានបញ្ហាលើកទី១ (ពេលដែលស្ដ្រីរងគ្រោះខាងលើ ត្រូវពេទ្យឯកជន កាយយកសពទារកក្នុងផ្ទៃដោយទាំងពោះវៀន) ដែលយើងបានជួយសង្គ្រោះអាយុជីវិតគាត់ឱ្យរស់ផុតពីគ្រោះថ្នាក់ភ្លាមៗពេលបញ្ជូនមកកាន់មន្ទីរពេទ្យកាល់ម៉ែត។ ពេលសុខភាពប្រសើរបន្ដិច គាត់បន្ដទៅព្យាបាលនៅប្រទេសថៃ តែកត្ដាប្រឈមនោះនៅតែមានជាប់ខ្លួន ដោយពេទ្យថៃមិនអាចស្រាយបញ្ហាប្រឈមនេះបានទេ»។
លោកបន្ដថា ដូច្នេះពេលគាត់ត្រលប់មកពីថៃវិញ គឺក្រុមគ្រូពេទ្យយើង បានបន្ដថែទាំសុខភាពរបស់គាត់ឱ្យនៅនឹងនជាបណ្ដោះអាសន្ន ដោយខិតខំពីមួយថ្ងៃទៅមួយថ្ងៃ ប៉ុន្ដែបញ្ហាប្រឈមអាចធ្វើឱ្យអ្នកជំងឺជួបនឹងបញ្ហាគ្រោះថ្នាក់ជាក់ស្ដែង នៅពេលណាមួយក្នុងពេលខាងមុខនេះ ។លោកសាស្ដ្រាចារ្យបានធ្វើការប្រៀបធៀបថា អ្នកជំងឺមានភាពល្អប្រសើរជាលំដាប់នោះ គឺទាល់តែអ្នកជំងឺអាចហូបអាហារតាមមាត់បាន ហើយការហូបអាហារតាមមាត់បាន សាធារណៈជនបានយល់ច្រើនហើយថា ទាល់តែមានពោះវៀនយកមកផ្សុំាឱ្យគាត់ ហើយពេលដែលផ្សុំាទៅ ពោះវៀននេះដំណើរការ ចឹងអ្នកជំងឺអាចហូបតាមមាត់បាន ចឹងយើងសង្ឃឹមថានឹងមានភាពប្រសើរឡើងជាលំដាប់ អាចទៅរកភាពសឹងតែធម្មតាវិញបាន។
«ប៉ុន្ដែលក្ខណៈនៃការផ្សុំាពោះវៀនបាន ឬបច្ចេកទេសដែលមានលក្ខខណ្ឌ យកមកដាក់ឱ្យគាត់ លុះណាតែអ្នកជំងឺ បាត់រលត់នូវកត្ដាប្រឈមទាំងនោះពីក្នុងខ្លួនគាត់សិន ហើយកត្ដាប្រឈមប្រៀបធៀបដូចជា អ្នកជំងឺកំពុងអោបគ្រាប់បែកនៅនឹងខ្លួន ចឹងការផ្សុំាពោះវៀននេះ បើមានពោះវៀនហើយ មានបច្ចេកទេសហើយ យកមកផ្សុំាឱ្យគាត់បានទាល់តែមានពេទ្យណាអាចដកគ្រាប់បែកចេញពីខ្លួនគាត់បាន ហើយគ្រាប់បែក សូម្បីតែគាត់ទៅព្យាបាលនៅថៃ ក្នុងរយៈពេល១ខែមកនេះ ពេទ្យថៃមុនដំបូងសន្យាថា គាត់នឹងធ្វើការវះកាត់អ្នកជំងឺម្ដងទៀត ដើម្បីបំបាត់កត្ដាប្រឈម បានន័យថា គាត់នឹងសាកល្បងដោះនូវគ្រាប់បែបនេះ ក៏ប៉ុន្ដែគាត់មិនបានធ្វើទេ ដូច្នេះគ្រាប់បែកដែលជាប់នៅនឹងខ្លួនគាត់ ប្រហែលជាមិនអាចដកបាននោះទេ»។
ស្ដ្រីម្នាក់ដែលរំលូតគភ៌ស្លាប់កូនក្នុងផ្ទៃ ឈ្មោះ សឿន ស្រីអូន អាយុ២២ឆ្នាំ មានអាសយដ្ឋានភូមិអន្លង់រមៀត ឃុំអន្លង់រមៀត ស្រុកកណ្ដាលស្ទឹង ខេត្តកណ្ដាល បានចូលមកសម្រាកនៅគ្លីនិកដើមអង្គ្រងនៅថ្ងៃទី១០ ខែវិច្ឆិកា ឆ្នាំ២០២២ ដោយរោគវិនិច្ឆ័យមានកូនស្លាប់ក្នុងស្បូនអាយុ១៨សប្តាហ៍។ ក្រុមគ្រូពេទ្យរបស់គ្លីនិកបានធ្វើការព្យាបាលដោយ រំលូតយកកូនដែលស្លាប់ក្នុងផ្ទៃចេញ និងបន្តសម្រាកនៅគ្លីនិក រយៈពេលមួយយប់ ហើយបានចេញពីគ្លីនិកដើមអង្គ្រងនៅថ្ងៃទី១១ ខែវិច្ឆិកា ឆ្នាំ២០២២។ លុះនៅថ្ងៃទី២២ ខែវិច្ឆិកា ឆ្នាំ២០២២ ស្ត្រីអ្នកជំងឺបានមកគ្លីនិកដដែលម្ដងទៀត ដោយរោគសញ្ញាឈឺពោះខ្លាំងនៅផ្នែកខាងក្រោម បន្ទាប់មកគ្រូពេទ្យក៏បានធ្វើការសម្អាតស្បូនឡើងវិញ តែដោយអាការៈធ្ងន់ធ្ងរ គ្លីនិកក៏បានបញ្ជូនស្ត្រីអ្នកជំងឺទៅព្យាបាលបន្តនៅរាជធានីភ្នំពេញ។បញ្ចុប្បន្នគ្លីនិកដើមអង្គ្រងនេះត្រូវបានក្រសួងសុខាភិបាលបិទហើយតែគេមិនដឹងថាតើស្ត្រីរងគ្រោះទទួលបានសំណងបែបណានោះទេ?។
