លោកសុនឆៃថាបើអ្នកធាក់ស៊ីក្លូរិះគន់គាត់មិនប្តឹងទេតែអ្នកនាំពាក្យគជបថាលោកសុនឆៃគិតខុស?!
21-September-2026 / ផ្សេងៗ
ភ្នំពេញ៖ លោក សុន ឆ័យ អនុប្រធានគណបក្សភ្លើងទៀន បានចូលខ្លួនទៅបំភ្លឺនៅសាលាដំបូងរាជធានីភ្នំពេញ នៅព្រឹកថ្ងៃទី១២ ខែកក្កដា ឆ្នាំ២០២២ តាមពាក្យបណ្ដឹងរបស់គណៈកម្មាធិការជាតិរៀបចំការបោះឆ្នោត (គ.ជ.ប)កាលពីថ្ងៃទី១៧ ខែមិថុនា ឆ្នាំ២០២២ ដើម្បីផ្ដល់សក្ខីកម្មក្នុងសវនាការ ក្នុងសំណុំរឿងប្ដឹងរូបលោកពីបទ «បរិហារកេរ្តិ៍ជាសាធារណៈ» ក្រោយពីលោក រិះគន់រឿងភាពមិនប្រក្រតីនៃការបោះឆ្នោត នៃលទ្ធផលបោះឆ្នោតជ្រើសរើសក្រុមប្រឹក្សាឃុំ/សង្កាត់អាណត្តិទី៥។ បន្ទាប់ពីចូលបំភ្លឺជុំវិញបណ្តឹងរបស់ (គ.ជ.ប) លោក សុន ឆ័យ បានថ្លែងថា លោកស្តាយចំពោះការប្តឹងរូបលោកដែលធ្វើឡើងទាំងអាជ្ញាកណ្តាល និងដៃគូរប្រកួត គឺគណបក្សប្រជាជនកម្ពុជា។
សម្រាប់លោកស៊ុនឆៃអ្នកនយោបាយជើងចាស់រូបនេះបានលើកឡើង ប្រសិនបើគ្មានការប្តឹងរូបលោក គឺលោកនឹងប្រើវប្បធម៌ជូនពរដៃគូប្រកួតក្រោយការបោះឆ្នោត ទោះលទ្ធផលយ៉ាងណាក៏ដោយ។ឆ្លើយតបនឹងសំណួរដែលថាតើលោកមានលុយ១លានដុល្លារសងជំងឺចិត្តគណបក្សប្រជាជនកម្ពុជាដែរឬអត់?លោក សុន ឆ័យ បានថ្លែងប្រាប់អ្នកសារព័ត៌មាននៅក្រោយពេលចេញពីតុលាការថា លោកបានចោទសួរទៅព្រះរាជអាជ្ញារងវិញថាប្រសិនបើ«តាស៊ីក្លូ»ជេរគាត់ជាតំណាងរាស្ត្រថាមិនបានជួយរាស្ត្រ តើគាត់គួរប្តឹង«តាស៊ីក្លូ»ទារជំងឺចិត្ត១ម៉ឺនដុល្លារតែឬអត់?។លោក សុន ឆ័យ ថ្លែងថា លោកសម្តែងការសោកស្តាយដែល គ.ជ.ប បានលើកយកករណីរបស់លោកទៅតុលាការ។ លោកថា ករណីនេះ គ.ជ.ប គួរតែមានការពន្យល់មួយ។
អនុប្រធានគណបក្សភ្លើងទៀន រូបនេះដែលគេជឿថាគ្មានលុយ១លានដុល្លារសងជំងឺចិត្ត គណបក្សកាន់អំណាចនោះឡើយត្រូវចូលបំភ្លឺម្តងទៀតនៅថ្ងៃ១៥កក្កដា ទៅនឹងបណ្តឹងរបស់គណបក្សប្រជាជនកម្ពុជា។នៅមិនទាន់មានការសម្រេចយ៉ាងណាពីតំណាងអយ្យការនៅឡើយ ខណៈមានសកម្មជនរាប់សិបនាក់មកចូលរួមគាំទ្រ លោក សុន ឆ័យ អនុប្រធានគណបក្សភ្លើងទៀននៅមុខតុលាការក្រុងភ្នំពេញ។ក្រៅពីរងបណ្ដឹងរបស់គណៈកម្មាធិការជាតិរៀបចំការបោះឆ្នោត លោក សុន ឆ័យ ក៏បានរងនូវបណ្ដឹងមួយទៀតរបស់គណបក្សប្រជាជនកម្ពុជាដែរ។ កាលពីថ្ងៃទី១៤ ខែមិថុនា ឆ្នាំ២០២២ គណបក្សប្រជាជនកម្ពុជា តាមរយៈមេធាវី លោក គី តិច បានដាក់ពាក្យបណ្ដឹងទៅកាន់តុលាការ ប្រឆាំងនឹង លោក សុន ឆ័យ ក្នុងបណ្តឹងនោះ សម្តេច សាយ ឈុំ អនុប្រធានគណបក្សប្រជាជនកម្ពុជា និងជាប្រធានព្រឹទ្ធសភា បានទាមទារសំណងជំងឺចិត្តពីលោក សុន ឆ័យ ចំនួន ១លានដុល្លារ ដោយយោងទៅលើអង្គហេតុប្រហាក់ប្រហែលទៅនឹងបណ្តឹងរបស់ គ.ជ.ប ដែរ.។
គណៈកម្មាធិការជាតិរៀបចំការបោះឆ្នោត ឬអាជ្ញាកណ្តាល កាលពីថ្ងៃទី១៧ ខែមិថុនា ឆ្នាំ២០២២ បានដាក់ពាក្យប្តឹង លោក សុន ឆ័យ ពីបទបរិហាកេរ្តិ៍ជាសាធារណៈ និងស្នើឲ្យធ្វើលិខិតសុំទោសជាសាធារណៈ។ នៅពេលសួរថាតើព្រមសុំទោស (គ.ជ.ប)ឬអត់ លោក សុន ឆ័យ អះអាងថា គាត់មិនមានកំហុសព្រោះ អ្វីដែលគាត់បាននិយាយគឺដូចគ្នានឹងគណបក្សនយោបាយផ្សេងទៀត និងអង្គការមួយចំនួនដែលបានធ្វើសេចក្តីថ្លែងការណ៍ជុំវិញការបោះឆ្នោតនោះដែរ។
ដោយឡែកអគ្គលេខាធិការរង និងជាអ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក សោម សូរីដា វិញបានមានប្រសាសន៍ នៅរសៀលថ្ងៃទី ១២ ខែកក្កដានេះបានប្រាប់កាសែតថា ករណីអនុប្រធានគណបក្សភ្លើងទៀនប្រមាថស្ថាប័នជាតិមួយថា ជាចោរ មិនមែនជារឿងសាមញ្ញ ហើយក៏មិនមែនជាការបញ្ចេញមតិដែរ។ ដូច្នេះ ត្រូវតែដោះស្រាយគ្នាតាមយន្តការតុលាការគឺមិនអាចសុំទោសបានឡើយ។
ការលើកឡើងលោក សោម សូរីដា បែបនេះ ជាការឆ្លើយតបចំពោះការលើកឡើងរបស់ លោក សោម សូរីដា បញ្ជាក់ថា «ការប្រមាថស្ថាប័នជាតិថា ជាចោរ គឺជាការប្រមាថមួយ ដែលមិនអាចគិតថា ជារឿងធម្មតាដែលត្រូវហៅអ្នកប្រមាថមកចរចាឬជជែកគ្នារកខុសរកត្រូវនោះទេ។ករណីលោក សុន ឆ័យ ប្រមាថ ជាសាធារណៈ និងបរិហារកេរ្តិ៍ជាសាធារណៈនេះ ខ្ញុំសូមបញ្ជាក់ថា មិនមែនជាការបញ្ចេញមតិ ដែល គ.ជ.ប ត្រូវអញ្ជើញលោក សុន ឆ័យ មករកខុសរកត្រូវជាមួយ គ.ជ.ប នោះទេ អីចឹងករណីនេះ គឺជាករណីដែលត្រូវដោះស្រាយគ្នាតាមយន្តការតុលាការ»។
លោក សោម សូរីដា បានបន្ថែមថា បើលោក សុន ឆ័យ គិតថាការប្រមាថ គ.ជ.ប ថា ជាចោរបែបនេះ ហើយថា គឺជារឿងធម្មតានោះ លោកស្មានខុសហើយ គិតខុសហើយ។ លោកបានបន្តថា ដោយឡែកការលើកឡើង របស់លោក សុន ឆ័យ ថា ការប្តឹងនោះ ជាការធ្វើឲ្យខាតពេលវេលារបស់លោកនោះ វាគ្រាន់តែជាការលើកឡើង ដើម្បីបន្ថយនូវទោសកំហុសទៅសាធារណជនប៉ុណ្ណោះ។ ប៉ុន្តែកិច្ចការនេះ មិនសាមញ្ញដូចលោក សុន ឆ័យ គិតនោះទេ លោក សុន ឆ័យ គួរពិចារណាឡើងវិញពីពាក្យសម្ដីរបស់ខ្លួន។
