វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2387 នាក់
ម្សិលមិញ 3717 នាក់
សរុប 14150720 នាក់
ភ្នំពេញ៖ នៅល្ងាច ថ្ងៃទី២១ ខែមេសា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានអនុញ្ញាតឱ្យ លោក យឹម ស៊ីណន អតីតសមាជិកក្រុមប្រឆាំងដ៏សកម្មម្នាក់ ចូលជួបសម្ដែងការគួរសម ក្រោយពីលោកស្នើសុំចូលរួមជីវភាពនយោបាយជាមួយ គណបក្សប្រជាជនកម្ពុជា។
ជំនួបលោក យឹម ស៊ីណន និងក្រុមគ្រួសារនៅគេហដ្ឋានក្រុងតាខ្មៅ ខេត្តកណ្តាលដែលមានលោក លឹម ជាវុត្ថា អគ្គនាយកបណ្ដាញព័ត៌មាន Fresh News ជាអ្នកជួយសម្របសម្រួល សម្តេចតេជោ បានណែនាំ និងផ្តល់អនុសាសន៍ជាច្រើន សម្រាប់លោក យឹម ស៊ីណន ដែលជាអ្នកនយោបាយវ័យក្មេង។ជំនួបនេះ បានធ្វើឡើងបន្ទាប់ពី លោក យឹម ស៊ីណន នៅព្រឹកថ្ងៃទី២១ ខែមេសា បានបង្ហាញសំណេរនៅលើបណ្តាញសង្គម Facebook ជាមួយនឹងពាក្យពេជន៍ឈឺចាប់ជាទីបំផុតរកអ្វីប្រៀបផ្ទឹមពុំបាន ដោយសារទង្វើ និងសកម្មភាព មិនខ្វាយខ្វល់របស់ក្រុមប្រឆាំងទៅលើរូបលោក នៅពេលលោកជាប់ពន្ធនាគារដែលអាចជាមូលហេតុនាំឲ្យលោកចុះចូលជាមួយគណបក្សប្រជាជនកម្ពុជា។
លោក យឹម ស៊ីណនដែលបានសុំទោសសម្តេចតេជោពីកំហុសឆ្កងហលយត្រូវបានដោះលែងពីការប្តឹងទៅតុលការ បានប្រកាសគោរពស្នើសុំ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី ដើម្បីសូមចូលរួមជីវភាពនយោបាយជាមួយគណបក្សប្រជាជនកម្ពុជា។ទន្ទឹមនឹងលោកយឹមស៊ីណងចូលជួបសម្តេចតេជោ នៅថ្ងៃទី២២មេសាចៅក្រមស៊ើបសួរ នៃសាលាដំបូងរាជធានីភ្នំពេញ ក៏បានសម្រេចឱ្យ លោក ហ៊ុន កុសល សកម្មជនក្រុមប្រឆាំង នៅក្រៅឃុំជាបណ្តោះអាសន្ន ដោយស្ថិតនៅក្រោមការត្រួតពិនិត្យរបស់តុលាការ នៅរសៀលថ្ងៃទី២២ ខែមេសា ឆ្នាំ២០២៣ បន្ទាប់ពីឃុំខ្លួនអស់រយៈពេល១ខែ ក្នុងបទប្រមាថអង្គព្រះមហាក្សត្រ និងញុះញង់។
លោក ហ៊ុន កុសល ត្រូវបានសមត្ថកិច្ចចាប់ខ្លួន កាលពីថ្ងៃទី២១ ខែមីនា ឆ្នាំ២០២៣ ក្នងពេលជាមួយ លោក យឹម ស៊ីណន ហើយត្រូវបានតុលាការសម្រេចឃុំខ្លួនជាបណ្តោះអាសន្ន នៅពន្ធនាគារព្រៃស បន្ទាប់ពីអ្នកទាំងពីរបានបង្ហោះសារបែបញុះញង់ប្រមាថតាមបណ្តាញសង្គមពាក់ព័ន្ធនឹងព្រះឆាយាល័ក្ខណ៍ព្រះមហាក្សត្រ ព្រះរាជទានព្រះអគ្គីជ័យកីឡា សម្រាប់ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ នៅខេត្តសៀមរាប នាថ្ងៃទី២១ ខែមីនា ឆ្នាំ២០២៣។
លោក ហ៊ុន កុសល និងលោក យឹម ស៊ីណន គឺជាមនុស្សជំនិតរបស់ លោក កឹម សុខា ត្រូវបានតុលាការចោទប្រកាន់២បទល្មើស រួមមាន បទប្រមាថចំពោះអង្គព្រះមហាក្សត្រ និងបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម តាមមាត្រា៤៣៧ (ស្ទួន) នៃច្បាប់ស្តីពីវិសោធនកម្មក្រមព្រហ្មទណ្ឌ មាត្រា៤៩៤ និងមាត្រា៤៩៥ នៃក្រមព្រហ្មទណ្ឌ។ ក្រោយមក លោក ហ៊ុន កុសល ត្រូវបានតុលាការអនុញ្ញាតឱ្យនៅក្រៅឃុំ បន្ទាប់ពីលោក បានចេញវីដេអូសុំព្រះរាជទានទោសពីព្រះមហាក្សត្រ និងសុំខមាទោសពីសម្តេចតេជោ ហ៊ុន សែន។
លោក យឹម ស៊ីណន ដែលជាមិត្តភក្ដិរបស់លោក ហ៊ុន កុសល អះអាងប្រាប់វិទ្យុងបារាំងថា ការដោះលែងនេះក៏ជាចំណែកមួយ ដែលលោកបានជួយធ្វើការសម្របសម្រួលជាមួយប្រមុខរដ្ឋាភិបាល ខណៈដែលលោកនិងក្រុមគ្រួសារ បានទៅជួបលោក ហ៊ុន សែន ដល់ផ្ទះ កាលពីម្សិលមិញ។សម្រាប់ លោក សឹន ជុំជួន ជាមេធាវីការពារក្តីឲ្យ លោក ហ៊ុន កុសលវិញ បានសំដែងក្តីរីករាយ។ លោកយល់ថា ការដោះលែងនេះ អាចដោយសារតែតុលាការយល់ឃើញថា មិនមានធាតុផ្សំបទល្មើសស៊ីជម្រៅក្នុងការចោទប្រកាន់។