វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2733 នាក់
ម្សិលមិញ 3717 នាក់
សរុប 14151066 នាក់
ភ្នំពេញ៖ លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានមើលឃើញថា ប្រទេសវៀតណាមកំពុងតែមានចិត្តច្រណែន និងបារម្ភ ដែលរដ្ឋាភិបាលកម្ពុជា មានភាពស្និទ្ធស្នាលជាមួយរដ្ឋាភិបាលថៃ តាំងពីសម្តេចតេជោ ហ៊ុន សែន កាន់តំណែងនាយករដ្ឋមន្ត្រីម្ល៉េះ។ «អ្នកឯកឃើញសម្តេចអតីតនាយករដ្ឋមន្ត្រី មានទំនាក់ទំនងល្អជាមួយប្រទេសថៃ ជាមួយពួកអាវក្រហម អ្នកឯងបារម្ភភ្លាម អីចឹងកញ្ជ្រោកដើម្បីឱ្យកម្ពុជាទៅរកអ្នកឯងវិញ កម្ពុជាមានសិទ្ធិសម្រេច កម្ពុជាមានអធិបតេយ្យរបស់ខ្លួន កម្ពុជាប្រើប្រាស់ផ្កាចម្រុះពណ៌ នរណាក៏កម្ពុជាត្រូវដែរ ឱ្យតែមានគោលនយោបាយ និងទិសដៅរួមគ្នា»។
លោកបណ្ឌិត សុខ ទូច បានលើកឡើងបែបនេះ ក្នុងសន្និសីទសារព័ត៌មាន នាល្ងាចថ្ងៃទី១០ ខែមេសា ឆ្នាំ២០២៤ ដើម្បីឆ្លើយតបទៅនឹង អត្ថបទស្រាវជ្រាវមួយសរសេរ ដោយវិទ្យាស្ថានអភិវឌ្ឍន៍ការស្រាវជ្រាវបូព៌ា (Oriental Research Development Institute) ប្រទេសវៀតណាម វាយប្រហារថា ព្រែកជីកហ្វូណនតេជោ មិនត្រឹមតែជាគម្រោងមួយដែលបម្រើឱ្យសេដ្ឋកិច្ច-សង្គមកម្ពុជា ប៉ុណ្ណោះទេ ក៏ប៉ុន្តែព្រែកជីកនេះក៏មានតម្លៃចម្បងបម្រើឱ្យវិស័យយោធារបស់ចិនផងដែរ។
ទាក់ទឹងនឹងសកម្មភាពរបស់វៀតណាម មកលើប្រទេសកម្ពុជានេះ លោកបណ្ឌិតក៏បានមើលឃើញទៀតថា នយោបាយមួយទៀត គឺវៀតណាមខិតខំធ្វើឱ្យសេដ្ឋកិច្ចកម្ពុជាចុះស្រុត ដើម្បីទាញយកវិនិយោគិនពីកម្ពុជា ហើយរឿងនេះវៀតណាមក៏ធ្លាប់ធ្វើហើយដែរ កាលពីឆ្នាំ១៩៩៧។លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងជាអ្នកសិក្សាស្រាវរបស់កម្ពុជា បានលើកឡើងដែរថា បើនិយាយអំពីរឿងបរិស្ថានវិញ វៀតណាមបានធ្វើឱ្យប៉ះពាល់បរិស្ថានធ្ងន់ធ្ងរណាស់ តែបែរជាមករិះគន់កម្ពុជារឿងព្រែកជីកហ្វូណនតេជោ ថាប៉ះពាល់បរិស្ថានទៅវិញ។លោកបណ្ឌិត បានប្រៀបប្រដូចករណីនេះថា រឿងបរិស្ថាន វៀតណាមកំពុងចង្អុលមកកម្ពុជា តែកុំភ្លេចថា ម្រាមដៃ៣ទៀត កំពុងចង្អុលមកខ្លួនឯង។
ទាក់ទងនឹងព្រែកជីកហ្វូណនតេជោ លោកបណ្ឌិតសភាចារ្យ បានបង្ហាញហេតុផល ៥ចំណុច ដែលអាមេរិក និងវៀតណាម មានប្រវត្តិធ្វើឱ្យប៉ះពាល់ដល់បរិស្ថានកម្ពុជា តំបន់ និងពិភពលោក។
លោកបានបញ្ជាក់ថា៖ «មានប្រទេសច្រើនណាស់នៅខាងលើទន្លេមេគង្គដែលធ្វើវារីអគ្គិសនី តើអ្នកបានគិតទេ កម្ពុជាជីកព្រែកហ្វូណនតេជោមួយ មិនស្មើនឹងវារីអគ្គិសនីនៅខាងលើមួយទេ»។ លោកបន្តថា វៀតណាមក៏ត្រូវដឹងដែរថា វៀតណាមដឹកស្រូវនឹងទូក នៅវៀតណាមខាងត្បូង ដែលផ្លូវទឹកទាំងនោះបានមកពីការជីកព្រែក ដែលវៀតណាមបានធ្វើកន្លងទៅ តើវៀតណាមបានគិតទេ បើគិតលើចំណុចបរិស្ថាន?
លោកបន្តទៀតថា៖ «វៀតណាមមុននឹងសម្លឹងគេ គួរតែសម្លឹងខ្លួនឯង អ្នកឯងចង្អុលគេ(ម្រាមដៃ)មួយ តែអ្នកឯងចង្អុល៣មកខ្លួនឯង»។ លោកបញ្ជាក់បន្ថែមថា កម្ពុជាជាប្រទេសមួយដែលមិនបានបំផ្លាញបរិស្ថានច្រើនទេ សូម្បីតែអ្នកទិញឈើពីកម្ពុជា ហើយបើគិតពីបរិស្ថាន មិនគួរគាស់ពីកម្ពុជាទៅដាំនៅវៀតណាមទេ។លោកបណ្ឌិត បានបន្តថា៖ «អ្នកឯងកាប់ឈើមកដាំកាហ្វេ ពីបង្គោលលេខ០ មកដល់បង្គោល៣០ អ្នកឯងដាំកាហ្វេទាំងអស់ តើអ្នកឯងមានគិតបរិស្ថានទេ កន្លែងនេះយើងត្រូវមើលរឿងបរិស្ថានដែលវៀតណាមវាយបកមកកម្ពុជា».។
កាលពីថ្ងៃទី៩មេសា សម្តេចតេជោ ហ៊ុន សែនប្រធានព្រិទ្ធសភា ក៏បានចេញច្រានចោលទាំងស្រុងទៅនឹងការចោទប្រកាន់នេះដែរ។ សម្តេចបញ្ជាក់ថា ព្រែកជីហ្វូននេះ ធ្វើឡើងដើម្បីផលប្រយោជន៍សេដ្ឋកិច្ចសង្គមសុទ្ធសាធ ហើយគ្មានការចាំបាច់ណាដែលត្រូវការកងទ័ពចិននោះទេ។ សម្តេចចោទសួរថា កម្ពុជាឆោតល្ងង់ រហូតដល់យកកងទ័ពចិន មកនៅក្នុងប្រទេសរបស់ខ្លួន ដែលវាផ្ទុយជាមួយរដ្ឋធម្មនុញ្ញរបស់ខ្លួនឬ? និង តើចិនឆោតល្ងង់រហូតយកកងទ័ពខ្លួនមកនៅកម្ពុជា ដែលវាផ្ទុយជាមួយគោលការគោរពឯករាជ្យភាពកម្ពុជា ពីសំណាក់ចិនឬ?
សម្តេចបានអំពាវនាវកុំឱ្យមានការមួលបង្កាច់កម្ពុជា ក្នុងគោលបំណងប្រឆាំងចិនតទៅទៀត ដោយលើកឡើងថា៖ «យើងសូមអំពាវនាវ សូមកុំមួលបង្កាច់យើង ក្នុងគោលបំណងប្រឆាំងចិន តាមយុទ្ធសាស្ត្រនៃភូមិសាស្ត្រនយោបាយអី ឈប់បានឈប់ទៅ។ យើងក៏ចេះគិតពីប្រយោជន៍ជាតិរបស់យើងដូចពួកអ្នកឯងដែរ ហើយខួរក្បាលរបស់ពួកអ្នកឯងក៏មិនប្រាកដថា ពូកែជាងពួកខ្ញុំនោះទេ សំណាងត្រង់ពួកអ្នកឯងកើតក្នុងប្រទេសអ្នកមាន ឯពួកខ្ញុំកើតក្នុងប្រទេសក្រីក្រ ទើបពួកឯងមើលងាយពួកខ្ញុំ»៕