រុស្ស៊ីប្រារព្ធខួប៧៧ឆ្នាំ ទិវាជ័យជម្នះ ៩ឧសភាប្រធានាធិបតីមិនហ៊ាននិយាយរឿងចាញ់ឈ្នះតែអ៊ុក្រែនប្តេជ្ញាយកឈ្នះ!
04-September-2023 / ព័ត៌មានអន្តរជាតិ
ប្រទេសរុស្ស៊ី៖ប្រធានាធិបតីរុស្ស៉ី លោក វ្ល៉ាឌីមៀ ពូទីន ថ្លែងថាការធ្វើអន្តរាគមន៍យោធានៅអ៊ុយក្រែន គឺជារឿងចាំបាច់ត្រូវតែធ្វើ ដោយសារតែបណ្ដាប្រទេស លោកខាងលិចបានបង្កការគំរាមកំហែងដល់តំបន់ព្រំដែន និងត្រៀមខ្លួនឈ្លានពានរុស្ស៉ី។ ទីភ្នាក់ងារសារព័ត៌មាន Reuters នៅថ្ងៃចន្ទ ទី៩ ខែឧសភា ឆ្នាំ២០២២បានផ្សាយឲ្យដឹងថានៅក្នុងសុន្ទរកថាមួយនៅឯពិធីប្រារព្ធខួបលើកទី៧៧ នៃទិវាជ័យជម្នះរបស់កងទ័ពអតីតសហភាពសូវៀត លើកងទ័ពណាហ្ស៉ីរបស់អាល្លឺម៉ង់ ក្នុងសង្គ្រាមលោកលើកទី២ នៅឯទីលានក្រហម ក្នុងទីក្រុងមូស្គូ លោក ពូទីន នៅថ្ងៃទី៩ឧសភា លោក ពូទីន បានបញ្ជាក់ដូច្នេះថា «បណ្ដាប្រទេស NATO មិនចង់ស្ដាប់ពួកយើងឡើយ ហើយនេះមានន័យថាជាការពិតណាស់ ពួកគេមានផែនការផ្សេងជាច្រើន ក្នុងនោះរួមមានទាំងការរៀបចំជាច្រើន ដែលកំពុងធ្វើឡើងក្នុងតំបន់ដុនបាស់ និងការឈ្លានពានទឹកដីជាប្រវតិ្តសាស្ត្ររបស់ពួកយើង ដូចជាគ្រីមៀ ជាដើម»។
លោកបន្តទៀតថា «នៅក្នុងទីក្រុងកៀវ, ពួកគេបានប្រកាសពីលទ្ធភាពនៃការទទួលបានអាវុធនុយក្លេអ៊ែរ រីឯប្លុក NATO បានចាប់ផ្ដើមធ្វើសកម្មភាពយោធាគ្រប់គ្រង ទឹកដីដែលនៅជិតព្រំដែនរបស់ពួកយើង...ដែលនេះជាទង្វើមិនអាចទទួលយកបាន ហើយរុស្ស៉ីចាំបាច់ត្រូវធ្វើការសម្រេចចិត្តដោយឯករាជ្យ និងទាំងបង្ខំ ដើម្បីរារាំង ពួកឈ្លានពាន»។គួរបញ្ជាក់ថា លោក ពូទីន បានហៅសង្គ្រាមរបស់លោកនៅអ៊ុយក្រែនថា ជា «ប្រតិបត្តិការយោធាពិសេស» តែលោកខាងលិចចាត់ទុកថាជា «ការឈ្លានពាន»។
សម្រាប់លោកប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy) វិញបានថ្លែងនៅថ្ងៃចន្ទនេះថា ប្រទេសរបស់លោកនឹងឈ្នះ ក្នុងសង្គ្រាមជាមួយរុស្ស៉ី ហើយនឹងមិនបោះបង់ ទឹកដីមួយផ្នែកណារបស់ខ្លួនឡើយ។ ទីភ្នាក់ងារសារព័ត៌មាន Reuters ផ្សាយថាក្នុងថ្ងៃប្រារព្ធទិវាជ័យជម្នះលើក្រុមណាហ្ស៉ីអាល្លឺម៉ង់ (Nazi Germany) នៃសង្គ្រាមលោកលើកទី២ លោក ហ្សេលេនស្គី បានថ្លែងយ៉ាងដូច្នេះថា «យើងកំពុងតស៊ូ ដើម្បីយកជ័យជម្នះថ្មីទៀត, ផ្លូវទៅកាន់ជ័យជម្នះវាពិបាក ប៉ុន្តែយើងមិនបាត់បង់ជំនឿចិត្ត ក្នុងការយកឈ្នះទេ»។ លោកបន្ថែមថា «ប្រជាជនអ៊ុយក្រែន គឺមានសិទ្ធិ និងធ្លាប់ប្រយុទ្ធការពារទឹកដីរបស់ពួកគេជាច្រើនដង ក្នុងប្រវត្តិសាស្ត្រ ដូច្នេះពួកគេមានការសម្រេចចិត្តផ្ទាល់ខ្លួន»។
នៅក្នុងសុន្ទរកថាលោក ពូទីនវិញ មិនបានប្រកាសពីការសម្រេចចិត្តធំដុំណាមួយនោះទេ ពាក់ព័ន្ធនឹងសង្គ្រាមអ៊ុយក្រែន ដោយមិនបាន ប្រកាសពីជោគជ័យ ឬក៏ការកែនកងទ័ពទ្រង់ទ្រាយធំដូចការគិតរបស់លោកខាងលិចនោះឡើយ។នៅថ្ងៃទី៩ខែឧសភា គឺជាទិវាជ័យជម្នះរបស់សហភាពសូវៀតលើពួកអាល្លឺម៉ង់អ៊ីត្លែរត្រូវបានរៀបចំឡើង ដោយមានការដង្ហែក្បួនព្យុហយាត្រា និងបាញ់កាំជ្រួចភ្ញីភ្លើងអបអរសាទរផងដែរនៅឯទីលាន Red Square នៃទីក្រុងមូស្គូ។ ពិធីដង្ហែក្បួនព្យុហយាត្រា ត្រូវបានធ្វើឡើងក្រោយរយៈពេល ២ឆ្នាំ ផ្អាកដោយសារកូវីដ-១៩ ។នៅក្នុងទីក្រុងចំនួន២៨ក្នុងប្រទេសរុស្ស៊ី បានប្រារព្ធពិធីដង្ហែក្បួនព្យុហយាត្រាគម្រប់ខួប៧៧ឆ្នាំទិវាជ័យជម្នះដ៏អស្ចារ្យ។
នៅក្នុងទីក្រុងមូស្គូវិញ ក្នុងទីលានក្រហម មានពលរដ្ឋជាង ៦៥ពាន់នាក់ចូលរួម និងកម្លាំងទាហានមកពី២៤០០កងពល និងអាវុធទំនើបៗ ដង្ហែនៅលើដងផ្លូវក្នុងទីលានក្រហម។ទិវាជ័យជម្នះ គឺជាថ្ងៃបុណ្យដ៏សំខាន់បំផុតនៅរុស្សី ត្រូវបានប្រធានាធិបតីពូទីនធ្វើឱ្យរស់ឡើងវិញ ដោយមានពិធីដង្ហែក្បួនយ៉ាងអធឹកអធម និងមានទ្រង់ទ្រាយធំចាប់តាំងពីឆ្នាំ២០១៤មក ។ មានជនជាតិសូវៀតប្រមាណ២៧លាននាក់ស្លាប់នៅក្នុងសង្គ្រាមលោកលើកទីពីរ គឺច្រើនជាងប្រទេសផ្សេងទៀត ។ ពលរដ្ឋរុស្ស៊ីវៀតដែលតំណាងឲ្យរហភាពសូនៅតែចងចាំថ្ងៃនោះមិនភ្លេចឡើយ៕
