វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1357 នាក់
ម្សិលមិញ 5378 នាក់
សរុប 14080650 នាក់
ប៉ាគិស្ថាន៖ ថ្ងៃទី១១ ខែមេសា លោក Zhao Lijian អ្នកនាំពាក្យក្រសួងការបរទេសចិន បានថ្លែងក្នុងសន្និសីទសារព័ត៌មានថា ប្រទេសចិនបានចាប់អារម្មណ៍ដល់ថា ស្ថានការណ៍នៃប្រទេសប៉ាគីស្ថាន មានការផ្លាស់ប្តូរ។ ក្នុងនាមជាប្រទេសជិតខាងនិងមិត្ត ដែកថែបរបស់ប៉ាគីស្ថាន ប្រទេសចិនសង្ឃឹមយ៉ាងស្មោះថា គ្រប់បក្ខទាំងអស់របស់ប៉ាគីស្ថាន អាចរក្សាបាននូវសាមគី្គភាព រួមគ្នាគាំពារស្ថានការណ៍ស្ថិរភាព និងវឌ្ឍនភាពជាទូទៅរបស់ប្រទេសជាតិ។
លោក Zhao Lijian បានគូសបញ្ជាក់ថា មិនថាស្ថានការណ៍នយោបាយរបស់ប៉ាគីស្ថាន មានការផ្លាស់ប្តូរយ៉ាងណាក៏ដោយ ក៏ប្រទេសចិននឹងប្រកាន់ខ្ជាប់គោលនយោបាយ មេត្រីភាពជាមួយប៉ាគីស្ថានយ៉ាងមុតមាំមិនងាករេ។ ប្រទេសចិនជឿជាក់ថា ការផ្លាស់ប្តូរស្ថានការណ៍នយោបាយរបស់ប៉ាគីស្ថាន នឹងមិនប៉ះពាល់ដល់សភាពការណ៍ទូទៅ នៃទំនាក់ទំនងរវាងចិននិងប៉ាគីស្ថាននោះទេ។
សូមបញ្ជាក់ថានៅក្នុងប្រទេសប៉ាគីស្ថាននៅថ្ងៃចន្ទ ទី១១ មេសា លោកស្ហេបា ស្ហារីហ្វត្រូវបានសភាបោះឆ្នោតជ្រើសតាំងជានាយករដ្ឋមន្ត្រីថ្មី។ មានអាយុ ៧០ឆ្នាំ លោកស្ហេបា ស្ហារីហ្វចូលជំនួសកន្លែងលោកអ៊ីមរ៉ាន់ ខាន់ដែលត្រូវបានសភាបោះឆ្នោតដកសេចក្តីទុកចិត្តកាលពីថ្ងៃអាទិត្យ ទី១០ មេសា។
លោកអ៊ីមរ៉ាន់ ខាន់ដែលមាននិន្នាការនយោបាយគាំទ្រចិនបានធ្លាក់ពីនាយករដ្ឋមន្ត្រីដោយល្វីងជូតចត់ជាទីបំផុត ព្រោះទី១ លោកត្រូវបានខ្ទាតពីតំណែងមុនអាណត្តិ និងទី២ លោកត្រូវបានខ្ទាតពីអំណាចតាមរយៈការបោះឆ្នោតដកសេចក្តីទុកចិត្តនៅសភាដែលជាព្រឹត្តិការណ៍ទី១ នៅក្នុងប្រវត្តិរបស់ប៉ាគីស្ថានដែលមានប្រជាជនចំនួន ២២០លាននាក់ និងជាប្រទេសមហានុយក្លេអ៊ែរមួយក្នុងលោក។
លោកស្ហេបា ស្ហារីហ្វជាប្រធានគណបក្សសម្ព័ន្ធអ៊ីស្លាមប៉ាគីស្ថាន PML-N និងត្រូវជាប្អូនប្រុសបង្កើតរបស់អតីតនាយករដ្ឋមន្ត្រីលោកណាវ៉ា ស្ហារីហ្វដែលធ្លាប់បានកាន់តំណែងនាយករដ្ឋមន្ត្រីដល់ទៅ ៣ដង មុននឹងធ្លាក់ពីតំណែងក្នុងឆ្នាំ ២០១៧ដោយអំពើពុករលួយ និងទទួលទោសជាប់ក្នុងពន្ធនាគារ។ នៅក្នុងគុកអស់រយៈពេល ២ឆ្នាំ លោកណាវ៉ា ស្ហារីហ្វទទួលបានការដោះលែងក្រោមហេតុផលសុខភាព និងបានភៀសខ្លួនរស់នៅក្នុងប្រទេសអង់គ្លេសមកដល់សព្វថ្ងៃ។ ដូច្នេះអាចនិយាយបានថា ការឡើងកាន់តំណែងរបស់លោកស្ហេបា ស្ហារីហ្វដែលជាប្អូនប្រុសបង្កើតរបស់លោកណាវ៉ា ស្ហារីហ្វពេលនេះ គឺជាការវិលត្រឡប់វិញរបស់ត្រកូលគ្រួសារស្ហារីហ្វ។
លោកស្ហេបា ស្ហារីហ្វធ្លាប់បានអង្គុយកៅអីចៅហ្វាយខេត្តភេនយ៉ាបអស់រយៈពេលជាច្រើនឆ្នាំ។ តែមិនខុសពីបងប្រុសខ្លួនឯងទេ លោកស្ហេបា ស្ហារីហ្វក៏មានជំពាក់វាក់វិននឹងរឿងអាស្រូវពុករលួយដែរ។ ក្នុងខែធ្នូ ឆ្នាំ ២០១៩ អង្គភាពប្រឆាំងអំពើពុករលួយបានរឹបអូសទ្រព្យសម្បត្តិប្រមាណជា ២០កន្លែងរបស់លោកស្ហេបា ស្ហារីហ្វ និងកូនប្រុសដោយចោទពីបទលាងលុយកខ្វក់។ លោកស្ហេបា ស្ហារីហ្វត្រូវបានចាប់ខ្លួន និងដាក់គុកក្នុងខែកញ្ញា ឆ្នាំ ២០២០។ តែនៅ ២ខែក្រោយមក លោកទទួលបានការដោះលែងបណ្តោះអាសន្នដោយតម្កល់ប្រាក់ធានា។
គួរបញ្ជាក់ថានៅប៉ាគីស្ថាន កងទ័ពជាស្ថាប័នដ៏មានឥទ្ធិពល និងជាគន្លឹះនយោបាយផ្ទៃក្នុង។ តាំងពីទទួលបានឯករាជ្យក្នុងឆ្នាំ ១៩៤៧ ប៉ាគីស្ថានធ្លាប់បានស្ថិតក្រោមការកាន់កាប់របស់កងទ័ពអស់រយៈពេលជាង ៣ទសវត្សរ៍។សម្រាប់រដ្ឋាភិបាលថ្មីនេះ អំណាចត្រូវបានចែកគ្នាកាន់រវាងគណបក្សប្រពៃណីចំនួនពីរ គឺគណបក្សសម្ព័ន្ធអ៊ីស្លាមប៉ាគីស្ថាន PML-N របស់លោកស្ហេបា ស្ហារីហ្វ និងគណបក្សប្រជាជនប៉ាគីស្ថាន PPP របស់លោកប៊ីឡាវ៉ាល់ ប៊ុយតូ ហ្សារដារីដែលជាកូនប្រុសរបស់សពអតីតនាយករដ្ឋមន្ត្រីលោកស្រីបេណាហ្ស៊ៀរ ប៊ុយតូ។ គឺជាមួយគណបក្ស PPP និងគណបក្សផ្សេងដែលលោកស្ហេបា ស្ហារីហ្វបានចាប់ដៃដើម្បីទម្លាក់លោកអ៊ីមរ៉ាន់ ខាន់។ ឥឡូវនេះ យុទ្ធសាស្ត្រនយោបាយរបស់លោកស្ហេបា ស្ហារីហ្វទទួលបានជោគជ័យដូចក្តីបំណង។
គេត្រូវរង់ចាំមើលថា តើគណបក្សសម្ព័ន្ធអ៊ីស្លាមប៉ាគីស្ថានរបស់លោកស្ហេបា ស្ហារីហ្វ និងគណបក្សប្រជាជនប៉ាគីស្ថានរបស់លោកប៊ីឡាវ៉ាល់ ប៊ុយតូ ហ្សារដារីដែលធ្លាប់ស្ថិតក្នុងក្រុមប្រឆាំងដូចគ្នា និងធ្លាប់ជាគូប្រជែងដណ្តើមអំណាចគ្នានឹងអាចចូលរួមធ្វើការ និងដឹកនាំប្រទេសជាមួយគ្នាបានដែរ ឬទេ?។ ចំណែកបញ្ហាប្រឈមដែលកំពុងរង់ចាំលោកស្ហេបា ស្ហារីហ្វមាននៅក្នុងវិស័យសំខាន់ចំនួន ៣ គឺសេដ្ឋកិច្ច សន្តិសុខ និងទំនាក់ទំនងអន្តរជាតិ។ ទាក់ទងនឹងសេដ្ឋកិច្ច លោកស្ហេបា ស្ហារីហ្វត្រូវកាត់បន្ថយកម្រិតអតិផរណាដែលកំពុងមានក្នុងរង្វង់ ១២% ដោះស្រាយរឿងបំណុលដែលមានដល់ទៅ ១៣០ ០០០លានដុល្លារ និងស្រោចស្រង់តម្លៃប្រាក់រូពីដែលកំពុងធ្លាក់ថ្លៃខ្លាំងធៀបនឹងប្រាក់ដុល្លារអាមេរិក។
លើផ្នែកសន្តិសុខ លោកស្ហេបា ស្ហារីហ្វត្រូវពន្លឿនការចរចាសន្តិភាពជាមួយពួកតាលីបង់ បន្ទាប់ពីការឡើងកាន់អំណាចនៅអាហ្វហ្កានីស្ថាន។ នៅក្នុងទំនាក់ទំនងអន្តរជាតិ លោកស្ហេបា ស្ហារីហ្វត្រូវព្យាយាមស្រោចស្រង់ និងផ្សះផ្សាទំនាក់ទំនងជាមួយបស្ចិមលោក និយាយជារួម និងជាមួយអាមេរិក និយាយដោយឡែក។ លោកស្ហេបា ស្ហារីហ្វក៏មិនត្រូវភ្លេចខ្លួនពីគំនុំសងសឹកបកវិញរបស់លោកអ៊ីមរ៉ាន់ ខាន់ទេ។ មានអាយុ ៦៩ឆ្នាំ នាយករដ្ឋមន្ត្រីដែលទើបធ្លាក់ពីអំណាចក្តៅៗរូបនេះច្បាស់ជាមិនទុកឲ្យលោកស្ហេបា ស្ហារីហ្វសោយសុខឡើយ។ លោកអ៊ីមរ៉ាន់ ខាន់ចាត់ទុក ការទម្លាក់លោកពេលនេះជាល្បិចកលរៀបចំដោយក្រុមប្រឆាំង និងមានការជួយជ្រោមជ្រែងពីបរទេស៕