ចិនថាតៃវ៉ាន់នៅតែជាចិនតែមួយតៃវ៉ាន់ថាបន្តពង្រឹងកម្លាំងនិងស្ថានភាពដដែល
15-March-2026 / ព័ត៌មានអន្តរជាតិ
ចិន៖ នៅថ្ងៃចន្ទទី២០ឧសភានេះ ទីក្រុងប៉េកាំងបាននិយាយថា នយោបាយផ្ទៃក្នុងរបស់តៃវ៉ាន់ គឺមិនអាចផ្លាស់ប្តូរការពិតដែលថា ដែនកោះនេះជាផ្នែកមួយនៃប្រទេសចិននោះឡើយ ហើយថែមទាំងព្រមានថា កិច្ចប្រឹងប្រែងដែលសំដៅរកឯករាជ្យតៃវ៉ាន់ គឺជាផ្លូវទាល់ច្រក បន្ទាប់ពីតៃវ៉ាន់ ទើបតែស្បថចូលកាន់តំណែងមេដឹកនាំថ្មី។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃចន្ទ ទី២០ ខែឧសភា ឆ្នាំ២០២៤។
នៅពេលត្រូវបានសាកសួរ អំពីការស្បថចូលកាន់តំណែងរបស់លោក Lai Ching-te នាថ្ងៃចន្ទនេះ អ្នកនាំពាក្យក្រសួងការបរទេសចិន លោក Wang Wenbin បាននិយាយថា ឯករាជ្យតៃវ៉ាន់ គឺជាផ្លូវទាល់ច្រក។ លោក Wang បានបន្ថែមថា ទោះស្ថិតនៅក្រោមរូបរាង ឬរូបភាពណាក៏ដោយ កិច្ចប្រឹងប្រែងចង់បានឯករាជ្យ និងការផ្តាច់ខ្លួនសម្រាប់តៃវ៉ាន់ គឺមុខជានឹងបរាជ័យមិនខាន។
អ្នកនាំពាក្យចិនរូបនេះ បានសង្កត់ធ្ងន់យ៉ាងដូច្នេះថា «ទោះបីស្ថានការណ៍នយោបាយផ្ទៃក្នុង នៅតៃវ៉ាន់ មានការប្រែប្រួលយ៉ាងណាក៏ដោយ វានឹងមិនអាចផ្លាស់ប្តូរ ការពិតជាក់ស្តែង ដោយផ្អែកលើប្រវត្តិសាស្ត្រនិងផ្លូវច្បាប់ ដែលថា ភាគីនៅត្រើយទាំងសងខាងនៃច្រកសមុទ្រតៃវ៉ាន់ គឺជាចិនតែមួយ នោះឡើយ។ ការបង្រួបបង្រួមគ្នាទាំងស្រុងរបស់ប្រទេសចិន នឹងមកដល់នាថ្ងៃណាមួយ ដោយចៀសមិនផុតទេ»។
គួរបញ្ជាក់ថា ចិនចាត់ទុកតៃវ៉ាន់ ជាផ្នែកមិនអាចកាត់ផ្តាច់បាន នៃទឹកដីរបស់ខ្លួន ហើយមិនដែលប្រកាសបោះបង់ចោលជម្រើស នៃការបង្រួបបង្រួមគ្នាវិញ ជាមួយតៃវ៉ាន់ ដោយប្រើប្រាស់កម្លាំងយោធាឡើយ ប្រសិនបើចាំបាច់។ មេដឹកនាំតៃវ៉ាន់ថ្មី លោក Lai Ching-te ត្រូវបានទីក្រុងប៉េកាំង ចាត់ទុកជាបុគ្គលចង់បំបែករដ្ឋ ដ៏គ្រោះថ្នាក់ម្នាក់ ដោយសារតែពាក្យសម្តីពីមុនមករបស់លោក ពាក់ព័ន្ធឯករាជ្យតៃវ៉ាន់។
សម្រាប់លោកប្រធានាធិបតីតៃវ៉ាន់ថ្មី លោក ឡៃ ឈីងទឿ ឬ វីលីយ៉ាំ ឡៃវិញបាន អះអាងប្តេជ្ញាដឹកនាំប្រទេសលើគន្លងផ្លូវប្រជាធិបតេយ្យ ហើយសន្យាពង្រឹងកម្លាំងផ្ទៃក្នុង ដើម្បីទប់ទល់នឹងឥទ្ធិពលចិន ដែលលោកថា ជាកម្លាំងគំរាមកំហែងពីខាងក្រៅ។ ប្រឈមមុខនឹងការធ្វើទុកបុកម្នេញពីយោធាចិន ហើយនិងចេតនាជ្រៀតជ្រែកជាញឹកញឹកនៅក្បែរកោះតៃវ៉ាន់ លោក ឡៃ ឈីងទឿ បញ្ជាក់ពីការប្តេជ្ញាចិត្តការពារជាតិ ហើយនិងត្រូវពង្រឹងកម្លាំងយោធានិងពង្រឹងផ្លូវច្បាប់ ដើម្បីរក្សាសន្តិសុខជាតិ។
ក្នុងសុន្ទរកថាក្នុងនាមជាប្រធានាធិបតីតៃវ៉ាន់ថ្មី លោក ឡៃ ឈីងទឿ សន្យាមិនញោះញ៉ុងបង្កហេតុ ហើយ រក្សាស្ថានភាពនៅទ្រឹងដដែល statu quo មិនប្រកាសឯករាជ្យតៃវ៉ាន់ភ្លាមៗ និងព្យាយាមបន្តរក្សាដែនអធិបតីភាព។ លោកក៏ថ្លែងក្តីសង្ឃឹមពីការបើកផ្លូវចរចាជាមួយចិន និងទាមទារឲ្យចិនចែករំលែកការទទួលខុសត្រូវលើឆាកអន្តរជាតិ ដើម្បីរក្សាសន្តិភាពនិងស្ថិរភាពរបស់តៃវ៉ាន់។
ក្នុងពិធីស្បថឡើងកាន់តំណែងប្រធានាធិបតីតៃវ៉ាន់ថ្មីនេះ រដ្ឋបាលក្រុងតៃប៉ិ បានអញ្ជើញប្រតិភូបរទេស ចំនួន៥១ ប្រទេស មកចូលរួម ក្នុងនោះ មានសម្ព័ន្ធមិត្ត ១២ ប្រទេស។ សហរដ្ឋអាមេរិក ជាប្រទេសផ្តល់ជំនួយនិងផ្គត់ផ្គង់គ្រឿងសព្វាវុធ បានកោតសរសើរតៃវ៉ាន់ ដែលមានប្រព័ន្ធប្រជាធិបតេយ្យមាំទាំ។ នេះបើតាមសម្តីរបស់ប្រមុខការទូតអាមេរិក នៅក្នុងសេចក្តីថ្លែងការណ៍១។ លោក អង់តូនី ប្ល៊ីងកិន ក៏ប្រកាសថា រដ្ឋបាលក្រុងវ៉ាស៊ីនតោននិងក្រុងតៃប៉ិ នឹងបន្តធ្វើការរួមគ្នាដើម្បីរក្សាសន្តិភាពនិងស្ថិរភាពនៅក្នុងតំបន់។
ប្រសូត្រក្នុងវង្សត្រកូលគ្រួសារក្រីក្រ លោក ឡៃ ឈីងទឿ មានឪពុកជាកម្មករធ្យូងថ្ម ម្តាយប្រឹងធ្វើការច្រើនមុខ ដើម្បីចិញ្ចឹមកូនប្រុសស្រី ៥ នាក់។ រៀនសូត្រផ្នែកវេជ្ជសាស្ត្រនៅតៃប៉ិ លោកក៏ទទួលការបណ្តុះបណ្តាលនៅសកលវិទ្យាល័យ ដ៏ល្បី Harvard របស់សហរដ្ឋអាមេរិក។ ចូលប្រលូកក្នុងជីវិតនយោបាយ ជាមួយបក្សប្រជាធិបតេយ្យចម្រើននិយម ក្នុងរង្វង់ឆ្នាំ១៩៩០ លោកបានជាប់ឆ្នោតជាបន្តបន្ទាប់ ធ្វើជាអ្នកតំណាងរាស្ត្រ អភិបាលក្រុង នាយករដ្ឋមន្ត្រី និងជា អនុប្រធានាធិបតី នៅឆ្នាំ២០២២។
ក្រៅពីសន្យាពង្រឹងកម្លាំងយោធា, ប្រធានាធិបតីតៃវ៉ាន់ថ្មី ក៏ចង់កែទម្រង់នយោបាយសង្គមសេដ្ឋកិច្ច។ លោក ឡៃ ឈីងទឿ ចង់ដំឡើងប្រាក់ខែ កាត់បន្ថយពន្ធ ហើយនិង បង្កើតលំនៅដ្ឋាន ដោះស្រាយបញ្ហាចំណោទជុំវិញកំណើតប្រជាជន និងបញ្ហាអ្នកធ្វើការអន្តោប្រវេសន៍។ កំណែទម្រង់ទាំងនេះ មិនមែនគ្មានចំណោទទេ ដ្បិតថា បក្សប្រជាធិបតេយ្យចម្រើននិយម របស់លោក ឡៃ ឈីងទឿ គ្មានសំឡេងភាគច្រើននៅសភានោះឡើយ។ សភាតៃវ៉ាន់ ជាសភាពហុបក្សចម្រុះគ្នា។ ក្នុងចំណោមអាសនៈសភា ១១៣កៅអី បក្សកាន់អំណាចនីតិប្រតិបត្តិ មានកៅអីតែ៥១ប៉ុណ្ណោះ។ ខុសពីបក្សប្រឆាំង គួមីងតាំង ដែលមានអាសនៈភាគច្រើន ចំនួន ៥៤។ ស្ថានភាពដែលបក្សប្រឆាំងមានប្រៀបវាលំបាកបន្តិចហើយ៕
