ប្រធានាធិបតីអាហ្កានីស្ថានប្តេជ្ញាការពារក្នុងពេលដែលប្រេសិទ្ធអាមេរិកនឹងជម្រុញឲ្យតាលីបង់ចរចារ!
02-November-2023 / ព័ត៌មានអន្តរជាតិ
អាហ្កានីស្ថាន៖ ប្រធានាធិបតីអាហ្វហ្កានីស្ថាន លោក អាសរ៉ាហ្វ ហ្កានី (Ashraf Ghani) កំពុង សម្លឹងមើលការបំពាក់អាវុធដល់ជនស៊ីវិល និងធ្វើកិច្ចសហប្រតិបត្តិការជាមួយមេដឹកនាំកងកម្លាំងស្វយ័តមួយចំនួននៅក្នុងប្រទេស ដើម្បីតស៊ូប្រឆាំងកុំឱ្យក្រុមតាលីបង់ផ្ដួលរំលំ រដ្ឋាភិបាលរបស់លោកបន្ទាប់ពីមើលឃើញថាពួកតាលិបង់គ្មានឆន្ទះចរចារ។ នេះបើតាមការចេញផ្សាយដោយសារព័ត៌មាន Bloomberg នៅថ្ងៃអង្គារ ទី១០ ខែសីហា ឆ្នាំ២០២១។
អ្នកនាំពាក្យវិមានប្រធានាធិបតីអាហ្វហ្កានីស្ថាន លោក មហាំម៉ាត់ អាមីរី (Mohammad Amiri) បាននិយាយថាលោក Ashraf Ghani កំពុងមានអារម្មណ៍ឯកោដោយសារ ការចាកចេញរបស់សហរដ្ឋអាមេរិកក្នុងបរិបទដែលក្រុមតាលីបង់ទទួលបានការគាំទ្រផ្នែកការទូតពីបណ្ដាប្រទេសសំខាន់ៗដូចជាប៉ាគីស្ថាន, រុស្ស៊ី និងចិន។ អ្នកនាំពាក្យរូបនេះបានគូសបញ្ជាក់ដូច្នេះថា៖ «ខណៈរដ្ឋាភិបាលនៅតែបើកទ្វារចំហរដើម្បីចរចា ក្រុមតាលីបង់បែរជាមិនចង់ចរចាទៅវិញ។ ពួកគេមិនជឿជាក់លើកិច្ចចរចាសន្តិភាពទេ។ ពួកគេ កំពុងព្យាយាមដណ្ដើមអំណាចដោយកម្លាំងបាយ ហើយមានសកម្មភាពខ្លះជាទង្វើមិនអាចទទួលយកបានឡើយចំពោះប្រជាជន និងរដ្ឋាភិបាលអាហ្វហ្កានីស្ថាន។ យើងចង់ បានសន្តិភាព ប៉ុន្តែពួកគេចង់ឱ្យយើងចុះចាញ់»។
ប្រធានាធិបតីអាហ្វហ្កានីស្ថាន លោក Ashraf Ghani បានសម្រេចចិត្តប្រមូលផ្ដុំកម្លាំង និងបំពាក់អាវុធដល់ប្រជាជនក្នុងតំបន់ឱ្យងើបឡើងតស៊ូ ប្រឆាំងជាមួយក្រុមតាលីបង់ បន្ទាប់ពីលោកបានជួបប្រជុំជាមួយមេបញ្ជាការកងកម្លាំងស្វយ័តមួយចំនួនក្នុងប្រទេស និងថ្នាក់ដឹកនាំនយោបាយកាលពីប៉ុន្មានថ្ងៃមុននេះ។ នៅក្នុង កិច្ចចរចាសន្តិភាពជុំចុងក្រោយនៅឯទីក្រុងដូហា ប្រទេសកាតាកាលពីថ្ងៃទី១៧ ខែកក្កដាកន្លងទៅ ក្រុមតាលីបង់ និងរដ្ឋាភិបាលអាហ្វហ្កានីស្ថានបានឯកភាពថានឹងបន្តជួបចរចា តទៅទៀត។ ប៉ុន្តែតាំងពីពេលនោះមក គ្មានឡើយកិច្ចចរចា ហើយក្រុមតាលីបង់កាលពីចុងសប្ដាហ៍កន្លងទៅ កាន់តែបង្កើនការវាយលុកទៅមុខដោយដណ្ដើមបានទីក្រុង យុទ្ធសាស្ត្រសំខាន់ៗចំនួន៥។
ក្រុមអ្នកជំនាញ និងក្រុមឧត្ដមសេនីយ៍អាមេរិកធ្លាប់បានព្រមានលោក ចូ បៃដិនថារដ្ឋាភិបាលអាហ្វហ្កានីស្ថានអាចនឹងត្រូវដួលរលំក្នុងរយៈពេល៦ខែ ឬអាចលឿនជាងនេះ នៅក្រោយពេលកងទ័ពអាមេរិកត្រូវបានដកចេញទាំងស្រុង។ ឆ្លើយតបទៅនឹងការព្រួយបារម្ភនេះ រដ្ឋបាលលោក ចូ បៃដិននឹងបញ្ជូនបេសកជនពិសេសរបស់ខ្លួនទៅកាន់ ប្រទេសកាតានៅក្នុងសប្ដាហ៍នេះ ដើម្បីដាក់សម្ពាធឱ្យក្រុមតាលីបង់បញ្ឈប់ការវាយលុករបស់ពួកគេ។
ក្នុងសេចក្តីថ្លែងការណ៍មួយកាលពីថ្ងៃចន្ទទី៩សីហាក្រសួងការបរទេសបានប្រកាស ថា៖ «ប្រេសិតពិសេសអាមេរិកទទួលបន្ទុកកិច្ចការអាហ្វហ្គានីស្ថាន លោក Zalmay Khalilzad នឹងជំរុញឱ្យក្រុមតាលីបង់បញ្ឈប់ការវាយប្រហារដោយយោធានៅឯការចរចាក្នុងរដ្ឋធានីនៃប្រទេសកាតា នៅសប្តាហ៍នេះ។ជំនួបជាច្រើនជុំត្រូវបានគ្រោងធ្វើរយៈពេល ៣ ថ្ងៃ ដើម្បីពិភាក្សាពីស្ថានភាពនៅអាហ្វហ្គានីស្ថាន។
អ្នកតំណាងមកពីប្រទេសនានានៅក្នុងតំបន់រួមទាំងមកពីអង្គការពហុជាតិផ្សេងទៀត នឹងជំរុញឱ្យកាត់បន្ថយអំពើហិង្សា និងមានបទឈប់បាញ់មួយ និងការប្តេជ្ញាមិនទទួលស្គាល់រដ្ឋាភិបាលដែលត្រូវរំលោភបំពានដោយកម្លាំង។«កិច្ចចរចាសន្តិភាព គឺជាផ្លូវឈានទៅរកការបញ្ចប់សង្គ្រាមហើយអាមេរិក នឹងបន្តធ្វើការជាមួយភាគីទាំងអស់ និងជាមួយអ្នកគាំទ្រក្នុងតំបន់ និងអន្តរជាតិ ដើម្បីសម្រេចបានកិច្ចព្រមព្រៀងជាឯកច្ឆន្ទមួយស្តីអំពីដំណោះស្រាយនយោបាយមួយ។
កាលពីថ្ងៃចន្ទទី៩សីហា ក្រុមតាលីបង់បានប្រកាសថា ខ្លួនបានកាន់កាប់រដ្ឋធានីខេត្តទី៦ នៅក្នុងប្រទេសអាហ្វហ្គានីស្ថាន ក្នុងរយៈពេល ៤ ថ្ងៃ។អ្នកនាំពាក្យក្រុមប្រដាប់អាវុធបានអះអាងថា ខ្លួនបានកាន់កាប់រដ្ឋធានី Aybak ជារដ្ឋធានីនៃខេត្ត Samangan ភាគខាងជើង។ស្របពេលការរុលចូលទៅមុខរបស់ក្រុមតាលីបង់ អាមេរិកកំពុងបង្ហាញថា មិនមានសញ្ញានៃការបង្កើនការវាយប្រហារផ្លូវអាកាសទេ ដោយអ្នកនាំពាក្យមន្ទីរបញ្ចកោណម្នាក់និយាយថា ទីក្រុងវ៉ាស៊ីនតោនបច្ចុប្បន្នសម្លឹងមើលថា តើផ្លូវអាកាសជាមធ្យោបាយ ១ សម្រាប់ក្រុមមេដឹកនាំនយោបាយ និងយោធាអាហ្វហ្គានីស្ថានឈ្នះ ឬក៏ចាញ់?
អ្នកនាំពាក្យមន្ទីរបញ្ចកោណលោក ចន ឃើប៊ី បាននិយាយនៅសន្និសីទកាសែតមួយថា៖ « «វា គឺជាប្រទេសរបស់ពួកគេដែលត្រូវការពារនៅពេលបច្ចុប្បន្ននេះ។ វាគឺជាការតស៊ូរបស់ពួកគេ»។
មន្ត្រីអាមេរិកបាននិយាយថា មេបញ្ជាការយោធាបានបង្ហាញពីការវាយតម្លៃរបស់ពួកគេថា ស្ថានភាពនៅក្នុងប្រទេសអាហ្វហ្គានីស្ថាន កាន់តែអាក្រក់ឡើងៗ។
មន្ត្រីទាំងនោះបាននិយាយថា កងកម្លាំងប្រតិបត្តិការពិសេសអាហ្វហ្គានីស្ថានអាចយកឈ្នះក្រុមតាលីបង់នៅកន្លែងសំខាន់ៗក្នុងនោះមានខេត្ត Kandahar និង Lashkar Gah។ លោកឧត្តមសេនីយ៍ Mark Milley ប្រធានសេនាធិបតីចម្រុះបាននិយាយជាមួយមេបញ្ជាការប្រចាំនៅតំបន់មជ្ឈិមបូព៌ាលោកឧត្តមសេនីយ៍ Frank McKenzie កាលពីថ្ងៃចន្ទ។ប្រធានាធិបតីអាមេរិក លោក ចូ បៃដិនបានប្រកាសដកកងទ័ពអាមេរិកទាំងអស់ចេញពីប្រទេសអាហ្វហ្កានីស្ថានឱ្យបានមុនថ្ងៃទី៣១ ខែសីហាខាងមុខនេះពោលគឺ ឱ្យបានមុនថ្ងៃខួបវាយប្រហារភេរវកម្មថ្ងៃទី១១ ខែកញ្ញា ឆ្នាំ២០០១ ហើយទោះជាមានការរិះគន់ក៏ដោយ ក៏លោកនៅតែការពារការសម្រេចចិត្តរបស់លោកដដែល៕
