វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4020 នាក់
ម្សិលមិញ 14970 នាក់
សរុប 16697955 នាក់
បាត់ដំបង ៖ ព្រឹត្តការណ៍ម៉ារ៉ាតុងសប្បុរសធម៌ ឆ្នាំ២០២២ រៀបចំដោយសហភាពសហព័ន្ធយុវជនកម្ពុជាខេត្តបាត់ដំបង សហការជាមួយរដ្ឋបាលខេត្ត បានប្រព្រឹត្តឡើងក្រោមអធិបតីភាពឯកឧត្តម ស សុខារដ្ឋលេខាធិការក្រសួងអប់រំនិងជា អនុប្រធានសហភាពសហព័ន្ធយុវជនកម្ពុជាទទួលបន្ទុក ៣ខេត្ត គឺខេត្តព្រៃវែង បាត់ដំបង និងបន្ទាយមានជ័យ តំណាងលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា នៅថ្ងៃទី១៩ ខែមករា ឆ្នាំ២០២២ នេះ។
ព្រឹត្តិការណ៍នេះមានការអញ្ជើញចូលរួមពីសំណាក់លោក អ៊ុយ រី ប្រធានក្រុមប្រឹក្សាខេត្ត, ឯកឧត្តម ធូ ភា អភិបាលរងខេត្ត តំណាងឯកឧត្តម សុខ លូ និងឯកឧត្តម ស រដ្ឋា ប្រធានសហភាពសហព័ន្ធយុវជនកម្ពុជាខេត្ត រួមទាំងសមាជិកក្រុមប្រឹក្សាខេត្ត អភិបាលរងខេត្ត អភិបាលក្រុងបាត់ដំបង មន្ទីរ វិស័យពាក់ព័ន្ធជុំវិញខេត្ត អនុប្រធាន និងសមាជិក ស.ស.យ.ក ខេត្ត ក្រុង/ស្រុកទាំង១៤ សិស្ស និស្សិត និងកីឡាករ កីឡាការនីចំនួនជាង ១ពាន់នាក់។
ការរៀបចំព្រឹត្តការណ៍បាត់ដំបងម៉ារ៉ាតុងសប្បុរសធម៌ ឆ្នាំ២០២២ មានគោលបំណងស្វែងរកមូលនិធិជួយដល់កុមារកំព្រាក្នុងខេត្តបាត់ដំបង និងដើម្បីលើកស្ទួយវិស័យកីឡាក្នុងខេត្ត ក៏ដូចជាលើកចិត្តទឹកចិត្តចំពោះយុវជន យុវនារីចូលរួមលេងកីឡា ចៀសផុតពីគ្រឿងញៀន និងល្បែងអបាយមុខ និងនាំមកនូវសុខភាព មិត្តភាព និងសាមគ្គីភាព។
ជាលទ្ធផលព្រឹត្តការណ៍បាត់ដំបងម៉ារ៉ាតុងសប្បុរសធម៌ ឆ្នាំ២០២២ គឺចំណាត់ថ្នាក់កីឡាករផ្នែកបុរស ចំណាត់ថ្នាក់លេខ១ បានទៅកីឡាករ Miroshi Ake ជនជាតិជប៉ុន ។ ចំណាត់ថ្នាក់លេខ២ Davey Calko ជនជាតិអង់គ្លេស និងចំណាត់ថ្នាក់លេខ៣ សុយ មាស សមាជិក ស.ស.យ.ក.ស្រុកភ្នំព្រឹក។
ចំណែកចំណាត់ថ្នាក់កីឡាការិនីផ្នែកនារី ចំណាត់លេខ១ បានទៅលើកីឡាការិនី កញ្ញា Agnes ជនជាតិដាណឺម៉ាក ។ ចំណាត់ថ្នាក់លេខ២ កញ្ញា ញ៉ ចំរ៉ុម មកពីអង្គការករុណាបាត់ដំបង ចំណាត់ថ្នាក់លេខ៣ កញ្ញា រ៉ ធីតា មកពីវិទ្យាល័យព្រះមុនីវង្ស។
ជ័យលាភីចំណាត់ថ្នាក់លេខ១ ទទួលបានពាន១ មេដាយមាស១ ទង់ជ័យលាភី១ និងប្រាក់ឧបត្ថម្ភ១លានរៀល។ ចំណាត់ថ្នាក់លេខ២ ទទួលបានមេដាយប្រាក់១ ទង់ជ័យលាភី១ និងប្រាក់ឧបត្ថម្ភចំនួន៨០ម៉ឺនរៀល និង ចំណាត់ថ្នាក់លេខ៣ ទទួលបានមេដាយសំរិទ្ធ១ ទង់ជ័យលាភី១ និងប្រាក់ឧបត្ថម្ភចំនួន៦០ម៉ឺនរៀល។