វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 3037 នាក់
ម្សិលមិញ 6501 នាក់
សរុប 13951592 នាក់
ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅរសៀលថ្ងៃទី០៧ ខែកុម្ភៈ ឆ្នាំ២០២១នេះ អញ្ជើញទទួលវ៉ាក់សាំងការពារកូវីដ១៩ ដែលជាជំនួយរបស់រដ្ឋាភិបាលចិន នៅអាកាសយានដ្ឋានអន្តរជាតិភ្នំពេញ។
វ៉ាក់សាំងបានបញ្ជូនមកដល់កម្ពុជាតាមយន្តហោះពិសេសរបស់ចិន មានចំនួន៦០ម៉ឺនដូសក្នុងជំហានដំបូង ដោយក្នុងនោះចំនួន៣០ម៉ឺនដូសសម្រាប់ក្រសួងសុខាភិបាល និង៣០ម៉ឺនដូសទៀត សម្រាប់ផ្នែកយោធា។ ក្រសួងសុខាភិបាល បានបញ្ជាក់ដែរថា អាយុដែលអាចចាក់បានគឺមានពី ១៨ឆ្នាំ ទៅ ៥៩ឆ្នាំ ហើយអ្នកដែលមានអាយុលើសពី ៦០ឆ្នាំ ត្រូវរង់ចាំលទ្ធផលនៃការសិក្សាសិន។
លោក វ៉ាង វិនធាន ឯកអគ្គរដ្ឋទូតសាធារណរដ្ឋប្រជាមានិតចិនប្រចាំនៅកម្ពុជា បានបញ្ជាក់ថា កម្ពុជា គឺជាប្រទេសដំបូងគេ ដែលទទួលបានជំនួយជាវ៉ាក់សាំងកូវីដ១៩ ពីប្រទេសចិន។ លោកឯកអគ្គរដ្ឋទូតចិន បានបញ្ជាក់ទៀតថា ការផ្តល់វ៉ាក់សាំងនេះ ជាការអនុវត្តតាមគោលនយោបាយរបស់លោកប្រធានាធិបតី ស៊ី ជិនភីង ដែលអះអាងថា វ៉ាក់សាំងកូវីដ១៩ គឺជាទំនិញរួម។ លោក ទូត អះអាងថា រដ្ឋាភិបាល ចិន នឹងបន្តកិច្ចសហប្រតិតបត្តិការជាមួយកម្ពុជា និងផ្តល់ជំនួយជាបន្តបន្ទាប់ដល់កម្ពុជា រហូតដល់ទទួលបានជោគជ័យក្នុងការទប់ស្កាត់វីរុសកូវីដ ១៩។
សម្តេចតេជោ នាយករដ្ឋមន្ត្រី ហ៊ុន សែន បានចាត់ទុកជំនួយវ៉ាក់សាំងកូវីដ១៩នេះ ជាសក្ខីភាពថ្មីសំខាន់ទៀតដែលច្លុះបញ្ចាំងពីចំណងមិត្តភាពដែកថែបរវាងព្រះរាជាណាចក្រកម្ពុជា និងប្រទេសចិន។ សម្តេចតេជោ ហ៊ុន សែន បានលើកឡើងថា រាជរដ្ឋាភិបាល និងប្រជាជនកម្ពុជា ពិតជាមានការដឹងគុណចំពោះប្រទេសចិន ដែលបានផ្តល់វ៉ាក់សាំងដល់កម្ពុជានាពេលនេះ។ សម្តេចតេជោ បានគូសបញ្ជាក់ថា វ៉ាក់សាំងដែលផ្តល់មកកម្ពុជានេះ ជាវ៉ាក់សាំងដែលត្រូវបានទទួលស្គាល់ថា មានសុវត្ថិភាព និងប្រសិទ្ធិភាព ដែលត្រូវបានបញ្ជាទិញ និងអនុម័តឱ្យប្រើប្រាស់លើប្រទេសជាច្រើនលើពិភពលោក។
សម្តេចហ៊ុន សែន អះអាងថា ទោះជាលោកមិនអាចចាក់វ៉ាក់សាំងដើម្បីបង្ហាញទំនុកចិត្តដល់ប្រជាពលរដ្ឋបាន ដោយសារតែលោកមានវ័យលើស ៦០ឆ្នាំទៅហើយ ប៉ុន្តែសម្តេចនឹងឲ្យក្រុមគ្រួសារ សាច់ញាតិ និងមន្ត្រីជាន់ខ្ពស់ រាប់ពីថ្នាក់រដ្ឋមន្ត្រី ប្រមុខដឹកនាំកងទ័ពទាំងអស់ ដែលមានសុខភាពស្របទៅតាមលក្ខខណ្ឌ ឲ្យទៅចាក់វ៉ាក់សាំងនេះគ្រប់ៗគ្នា។សម្តេចតេជោ ក៏បានអំពាវនាវដល់ប្រជាពលរដ្ឋ សូមបន្តប្រកាន់យក និងអនុវត្តតាមវិធានការសុខាភិបាល ដើម្បីសុខមាលភាពរបស់ខ្លួន ក្រុមគ្រួសារ និងសង្គមជាតិទាំងមូល។
សម្តេចតេជោ ហ៊ុន សែន បានឱ្យដឹងថា សម្តេចតេជោ ហ៊ុន សែន បានណែនាំឱ្យក្រុមការងារចរចាទិញវ៉ាក់សាំងបន្ថែមពីឥណ្ឌា ក្នុងចំនួនប្រមាណ ១លាន ទៅ ៤លានដូស ដើម្បីយកមកចាក់ជូនដល់ប្រជាពលរដ្ឋកម្ពុជា។ សម្តេច បានផ្ញើលិខិតទៅនាយករដ្ឋមន្ត្រីឥណ្ឌា ដើម្បីស្នើឱ្យជួយផ្គត់ផ្គង់វ៉ាក់សាំងមកកម្ពុជា ហើយជាការឆ្លើយតប ភាគីឥណ្ឌា បានចែករំលែកមកកម្ពុជាចំនួន ១០ម៉ឺនដូស តាមរយៈការលក់។
សម្តេចតេជោ បានលើកឡើងថា ចំនួន ១០ម៉ឺនដូសនេះ គឺតិចណាស់ ដូចនេះ សម្តេចតេជោ ណែនាំឱ្យធ្វើការចរចាជាមួយឯកអគ្គរដ្ឋទូតឥណ្ឌាប្រចាំនៅកម្ពុជា ដើម្បីទិញវ៉ាក់សាំងកូវីដ១៩ ពីឥណ្ឌាបន្ថែមទៀត។ សម្តេចតេជោ បានបញ្ជាក់ថា វ៉ាក់សាំងរបស់ឥណ្ឌា គឺប្រើប្រាស់បច្ចេកវិទ្យារួមគ្នាជាមួយនឹងប្រទេសអង់គ្លេស។
សម្តេចតេជោ ហ៊ុន សែន ក៏បានណែនាំឱ្យក្រុមការងារ ចាប់ផ្តើមចរចាជាមួយប្រទេសថៃ ដើម្បីទិញវ៉ាក់សាំងកូវីដ១៩ ដែលជាបច្ចេកវិទ្យាអង់គ្លេស (អាស់ស្ត្រា ស៊ីនីកា) ដែលប្រទេសថៃ គ្រោងនឹងចាប់ផ្តើមផលិតនៅខែឧសភាខាងមុខនេះ។ សម្តេចតេជោ បានលើកឡើងថា វ៉ាក់សាំង ដែលជាបច្ចេកវិទ្យាអង់គ្លេសនេះ គឺមានតម្លៃសមរម្យ ដែលកម្ពុជា មានលទ្ធភាពទិញដល់ ១០លានដូស ឬច្រើនជាងនេះ។ សម្តេចតេជោ ហ៊ុន សែន ក៏បានណែនាំក្រុមការងារ ដើម្បីចរចាទិញវ៉ាក់សាំងពីប្រទេសរុស្ស៊ីផងដែរ ដែលការចរចា នឹងធ្វើឡើងនាពេលខាងមុខ។
សូមបញ្ចាក់ថាបច្ចុប្បន្ន ប្រទេសចិនបានផលិតចេញនូវវ៉ាក់សាំង២ប្រភេទ ដើម្បីបង្ការជំងឺកូវីដ១៩ ក្នុងនោះមាន វ៉ាក់សាំងស៊ីណូហ្វាម ( Sinopharm) ដែលផលិតដោយរដ្ឋាភិបាល និងវ៉ាក់សាំងស៊ីណូវ៉ាក់ (Sinovac) ដែលផលិតដោយក្រុមហ៊ុន Sinovac Biotech Ltd។ មកទល់ពេលនេះ មានប្រទេសយ៉ាងហោចចំនួន១៦ហើយ ដែលបានសម្រេចអនុម័តឲ្យប្រើប្រាស់វ៉ាក់សាំង COVID-19 របស់ក្រុមហ៊ុនចិនទាំងពីរ។ ក្នុងនោះ វ៉ាក់សាំងរបស់ Sinopharm ត្រូវបានអនុញ្ញាតឲ្យប្រើនៅ អេមីរ៉ាត់អារ៉ាប់រួម បារ៉ែន ហុងគ្រី ស៊ែរប៊ី ប៉េរូ អ៉ីរ៉ាក់ ម៉ារ៉ុក អេហ្ស៉ីប ប៉ាគីស្ថាន និងកម្ពុជា។ រីឯវ៉ាក់សាំងរបស់ Sinovac ត្រូវបានអនុញ្ញាតឲ្យប្រើនៅ ប្រេស៉ីល ឥណ្ឌូណេស៉ី តួកគី ឈីលី កូឡុំប៊ី និង អាស៊ែបៃហ្សង់។