រកឃើញអ្នកជម្ងឺឆ្លងវិរុសកូរ៉ូណាម្នាក់នៅខេត្តសីហនុជាជនជាតិចិនមកពីក្រុងវូហាន
23-June-2026 / សុខភាពនិងកីឡា
ភ្នំពេញ៖ ថ្ងៃទី២៧ ខែមករា ឆ្នាំ២០២០នេះ កម្ពុជាបានរកឃើញករណីជំងឺផ្លូវដង្ហើមថ្មី បង្កឡើងដោយវីរុសកូរ៉ូណា នៅលើជនជាតិចិនម្នាក់ ដែលចាកចេញពីប្រទេសចិន ចូលមកខេត្តព្រះសីហនុ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងប្រាប់សន្និសីទកាសែតនៅព្រលប់ ថ្ងៃទី២៧ ខែមករា ឆ្នាំ២០២០នេះថា:គិតមកត្រឹមម៉ោង៣រសៀល នៃថ្ងៃទី២៧ ខែមករានេះ ក្រសួងបានស្រាវជ្រាវរកឃើញនិងមានការបញ្ជាក់ពីវិទ្យាស្ថានប៉ាស្ទ័រកម្ពុជានូវករណីយ៍ជាវិជ្ជមានវីរុសរ៉ូណាប្រភេទថ្មី (2019-nCoV) នៅលើបុគ្គលជនជាតិចិនម្នាក់ ឈ្មោះ ចា ជិនហួរ (Jia Jianhua) ភេទ ប្រុស អាយុ ៦០ឆ្នាំដែល ធ្វើដំណើរមកពីទីក្រុងវូហាន ជាមួយក្រុមគ្រួសារ ៤នាក់។សំណាកបានយកមកធ្វើវិភាគលើអ្នកទាំងបួននាក់នេះ មានវិជ្ជមានវីរុសកូរ៉ូណាតែម្នាក់គត់ គឺលោក ចា ជិនហួរ។ ជនជាតិចិនទាំងបួននាក់នេះ មានឈ្មោះ ដូចខាងក្រោម៖
១. លោក ចា ជិនហួរ (Jia Jianhua) ភេទប្រុស អាយុ ៦០ឆ្នាំ កាន់ប៉ាស្ទ័រលេខ E54319891
២. លោកស្រី វ៉ាង លីងជេន (Wang Lingzhen) ភេទស្រី អាយុ ៥៧ឆ្នាំ កាន់ប៉ាស្ទ័រលេខ E06137433
៣. លោក សៅ យ៉ាន់ (Xiao Yan) ភេទប្រុស អាយុ ៣៨ឆ្នាំ កាន់ប៉ាស្ទ័រលេខ ED0134348
៤. លោកស្រី ចា រ៉ុយស៊ន់ (Jia Ruixuan) ភេទស្រី អាយុ ៣៣ឆ្នាំ កាន់ប៉ាស្ទ័រលេខ E24490509
គ្រួសារចិននេះ គាត់បានចេញដំណើរពីទីក្រុងអ៊ូហាន មក កាន់ទីក្រុងព្រះសីហនុ នៅថ្ងៃទី២៣ ខែមករា ឆ្នាំ២០២០ ហើយមានចេញរោគសញ្ញានៅថ្ងៃទី២៥ ខែមករា ឆ្នាំ២០២០ ដោយមានអាការៈ គ្រុនក្តៅ និងហៀរសំបោរ។ អ្នកទាំង ០៤ខាងលើ មកពីទីក្រុង ហាន នៃ សាធារណរដ្ឋប្រជាមានិតចិន ហើយបានចូលមកប្រទេសកម្ពុជា តាមជើងយន្តហោះត្រង់ពីទីក្រុងរ៉ូហានមកដល់ព្រលានយន្តហោះអន្តរជាតិខេត្តព្រះសីហនុ នៅថ្ងៃទី២៣ ខែមករា ឆ្នាំ២០២០ វេលាម៉ោងប្រហែល ៧ពឹក។ ក្រោយពីបានមកដល់ក្រុងព្រះសីហនុ ពួកគាត់បានជិះតាក់ស៊ី មកស្នាក់នៅសណ្ឋាគារឯករាជ្យ ចំនួន២យប់។ បន្ទាប់មកបានចូលមកស្នាក់នៅសណ្ឋាគារអ្វីនកូ (Queenco Hotel) នៅរសៀលថ្ងៃទី២៥
មករា។ នៅរសៀលនោះដែរ លោក ចា ជិនហួរ បានលេងទឹកអាងរយៈពេល២ម៉ោង រួចក៏មានអាការៈក្តៅខ្លួន។ ល្ងាចថ្ងៃដដែលនោះភរិយាគាត់ឈ្មោះ វ៉ាង លីងជេន បានទូរស័ព្ទទៅលេងក្រុម គ្រួសារនៅប្រទេសចិន និងបានប្រាប់ថា ប្ដីគាត់មានអាការៈក្តៅខ្លួន។ បច្ចុប្បន្នអ្នកជម្ងឺបានកំពុងសម្រាកព្យាបាលនៅខេត្តព្រះសីហនុ។ឯគ្រួសារឲ្យនៅផ្សេងដើម្បីតាមដានបន្ត។អ្នកជំាញនិយាយថា៖បើតាមដំណើការស្នាក់នៅតាមទីតាំងនានាគេគួរតាមតាមដានទីតាំងខាងលើផងដែរ?។
លោកម៉ម ប៊ុនហេង បានស្នើសុំយ៉ាងទទូចជាថ្មីម្តងទៀត សូមអាជ្ញាធរមូលដ្ឋាន ក៏ដូចជាប្រព័ន្ធផ្សព្វផ្សាយជាផ្លូវការ បន្តជួយផ្សព្វផ្សាយឱ្យប្រជាពលរដ្ឋ មានការប្រុងប្រយ័ត្នចំពោះការលេចឡើងនូវមេរោគកូរ៉ូណានេះ។លោករដ្ឋមន្ត្រីបញ្ជាក់ថាលោកនឹងចុះទៅខេត្តព្រះសីហនុ ដើម្បីពិនិត្យជាក់ស្តែងដើម្បីលើកទឹកចិត្ត កុំឱ្យប្រជាពលរដ្ឋ មានការភ័យខ្លាច។
យោងតាមបណ្តាញផ្សព្វផ្សាយបានបញ្ជាកថា ប្រទេសចិនឆ្លងជំងឺនេះ ២ ៨២៥ករណី និងស្លាប់៨១នាក់, ហុងកុង៨ករណី, ប្រទេសថៃ៨ករណី, ម៉ាកាវ៦ករណី, អូស្ត្រាលី៥ករណី, តៃវ៉ាន់៥ករណី, អាមេរិក៥ករណី, ជប៉ុន៤ករណី, ម៉ាឡេស៊ី៤ករណី, សិង្ហបុរី ៤ករណី, កូរ៉េខាងត្បូង៤ករណី, បារាំង៣ករណី, វៀតណាម២ករណី និងប្រទេសនេប៉ាល១ករណី ។ សរុបទាំងអស់ឆ្លងចំនួន ២៨៨៤នាក់ និងស្លាប់អស់៨១នាក់ ៕
