វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4299 នាក់
ម្សិលមិញ 10264 នាក់
សរុប 14143481 នាក់
រុស្ស៊ី៖ បន្ទាប់ពីកិច្ចប្រជុំរវាងមន្ត្រីការពារជាតិជាន់ខ្ពស់ និងរបបយោធាមីយ៉ាន់ម៉ាដែលត្រូវបានថ្កោលទោសដោយប្រទេសលោកខាងលិច ចំពោះការសម្លាប់បាតុករជនស៊ីវិលរាប់រយនាក់ប្រទេសនោះប្រទេសរុស្ស៊ីចង់ពង្រឹងទំនាក់ទំនងយោធាជាមួយមីយ៉ាន់ម៉ា ។
យោងតាមការចេញផ្សាយដោយទីភ្នា់ក់ងារសារព័ត៌មាន Reuters នៅថ្ងៃសុក្រ ទី២៦ ខែមីនា ឆ្នាំ២០២១លោក Alexander Fomin អនុរដ្ឋមន្ត្រីក្រសួងការពារជាតិរុស្ស៊ីបានជួបប្រជុំគ្នានៅរដ្ឋធានីណៃពិដោនៅថ្ងៃសុក្រនេះ ជាមួយមេដឹកនាំក្រុមប្រឹក្សាយោធាមីយ៉ាន់ម៉ា គឺឧត្តមសេនីយ៍ Min Aung Hlaing ដែលប្រើយោធាដណ្តើមអំណាចនៅក្នុងរដ្ឋប្រហារមួយកាលពីថ្ងៃទី០១ ខែកុម្ភៈកន្លងទៅបណ្តាលឲ្យមានការតវ៉ាពីប្រជាពលរដ្ឋនិងថ្កោលទោសពីអន្តរជាតិ។
យោងតាមទីភ្នាក់ងាររុស្ស៊ី TASS ដែលគ្រប់គ្រងដោយរដ្ឋបានឲ្យដឹងថា ក្នុងអំឡុងពេលដំណើរទស្សនកិច្ចមួយដែលបានធ្វើឡើង មួយថ្ងៃមុនក្បួនព្យុហយាត្រាដ៏ធំបំផុតក្នុងប្រទេសមីយ៉ាន់ម៉ាដើម្បីអបអរសាទរដល់ទិវាកងកម្លាំងប្រដាប់អាវុធរបស់មីយ៉ាន់ម៉ានោះ បានរាយការណ៍ថា លោក Fomin បាននិយាយថា«ប្រទេសមីយ៉ាន់ម៉ា គឺជាសម្ព័ន្ធមិត្តដែលអាចទុកចិត្តបាន និងជាដៃគូយុទ្ធសាស្ត្ររបស់រុស្ស៊ីនៅអាស៊ី»។
ក្នុងទូរទស្សន៍ Zvezda របស់ក្រសួងការពារជាតិរុស្ស៊ី គេបានឃើញអនុរដ្ឋមន្ត្រីក្រសួងការពារជាតិរុស្ស៊ីលោក Alexander Fomin ត្រូវបានទទួលស្វាគមន៍យ៉ាងកក់ក្តៅពីសំណាក់យោធាមីយ៉ាន់ម៉ា ព្រមទាំងទទួលបានមេដាយ និងដាវមួយពីឧត្តមសេនីយ៍ Min Aung Hlaing ទៀតផង នៅក្នុងបន្ទប់ប្រជុំមួយដែលពោរពេញទៅដោយមន្ត្រីយោធាពាក់ឯកសណ្ឋានបៃតង។
គួរបញ្ជាក់ថា ដំណើរទស្សនកិច្ចនេះ ត្រូវបានគេមើលឃើញថា ជាសញ្ញាដ៏រឹងមាំបំផុតសម្រាប់ការគាំទ្ររបស់រុស្ស៊ីចំពោះរបបយោធាមីយ៉ាន់ម៉ា ខណៈពេលដែលបណ្តាប្រទេសលោកខាងលិចកំពុងផ្ទុះកំហឹង និងថ្កោលទោសចំពោះអំពើហឹង្សាដែលរបបយោធាបានប្រព្រឹត្តប្រឆាំងនឹងជនស៊ីវិល៕