វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 7522 នាក់
ម្សិលមិញ 6001 នាក់
សរុប 13880352 នាក់
អាមេរិក៖ដំណើរមាតុភូមិនិវត្តន៍របស់ថ្នាក់ដឹកនាំអតីតគណបក្សប្រឆាំងដឹកនាំដោយលោកស្រី មូរ សុខហួរស្រី និងថ្នាក់ដឹកនាំអតីតគណបក្សសង្គ្រោះជាតិប្រមាណជា៤ទៅ៥រូបទៀត បានជាប់គាំងនៅត្រឹមព្រលានយន្តហោះទីក្រុង Los Angels សហរដ្ឋអាមេរិក មិនអាចបន្តជើងយន្តហោះហើរមកកាន់ប្រទេសសិង្ហបុរីបានឡើយ។មូលហេតុ ដោយសារតែលោកស្រីមិនមានទិដ្ឋាការ ឬ វីសា ដែលផ្តល់ដោយរដ្ឋាភិបាលកម្ពុជា។
ឯលោក នុត រំដួល អតីតតំណាងរាស្ត្រនៃអតីតគណបក្សសង្គ្រោះជាតិម្នាក់ទៀត ក៏មិនត្រូវបានអនុញ្ញាតឱ្យឡើងយន្តហោះនោះដែរ ដោយសារតែលិខិតឆ្លងដែនរបស់លោកត្រូវបានរដ្ឋាភិបាលកម្ពុជា មោឃភាពរួចទៅហើយ។ លោកស្រី មូរ សុខហួរ អនុប្រធានអតីតគណបក្សសង្គ្រោះជាតិ បានចាត់ទុករឿងនេះថាជាការរំលោភសិទ្ធិរបស់លោកស្រី រួមមានសិទ្ធិក្នុងការទទួលបានលិខិតឆ្លងដែន និងសិទ្ធិក្នុងការទទួលបានយុត្តិធម៌ តាមរយៈការបង្ហាញវត្តមានក្នុងពេលជំនុំជម្រះក្ដីនៅតុលាការជាដើម។
លោកស្រី មូរ សុខហួរ ដែលកាន់លិខិតឆ្លងដែនសហរដ្ឋអាមេរិក បានធ្វើដំណើរពីទីក្រុងបូស្តុន សហរដ្ឋអាមេរិក កាលពីថ្ងៃទី ១៥ មករា មកដល់ព្រលានយន្តហោះទីក្រុង Los Angels កាលពីរសៀលថ្ងៃសៅរិ៍ ទី១៦ មករា (ម៉ោងនៅក្នុងប្រទេសកម្ពុជា) ដើម្បីត្រៀមបន្តដំណើរមកកាន់ប្រទេសកម្ពុជា តាមរយៈក្រុមហ៊ុនអាកាសចរណ៍សឹង្ហបុរី (Singapore Airline)។ តាមគម្រោងលោកស្រី មូរ សុខហួរ និងប្រតិភូអមដំណើរ នឹងមកដល់ព្រលានយន្តហោះអន្តរជាតិភ្នំពេញ នៅវេលាម៉ោង៥ល្ងាច ថ្ងៃអាទិត្យ ទី១៧ ខែមករា ឆ្នាំ២០២១។ ប៉ុន្តែគម្រោងមាតុភូមិនិវត្តន៍នេះ មិនបានសម្រេចនោះទេ។
គួរកត់សំគាល់ថា នេះគឺជាបរាជ័យជាលើកទី២ហើយនៃគម្រោងមាតុភូមិនិវត្តន៍របស់ថ្នាក់ដឹកនាំអតីតគណបក្សសង្គ្រោះជាតិ បន្ទាប់ពីគម្រោងមាតុភូមិនិវត្តន៍របស់លោក សម រង្ស៊ី កាលពីថ្ងៃទី ០៩ វិច្ឆិកា ឆ្នាំ ២០១៩ដែលបណ្តាលឲ្យសកម្មជនក្នុងស្រុកជាង១០០នាក់ត្រូវតុលការកោះហៅ៕