វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1226 នាក់
ម្សិលមិញ 10264 នាក់
សរុប 14140408 នាក់
ភ្នំពេញ៖ រដ្ឋាភិបាលជប៉ុនតាមរយៈ លោក ម៉ូតេហ្គី តូស៊ីមីត្សឹ រដ្ឋមន្ត្រីក្រសួងការបរទេសជប៉ុន បានស្នើឱ្យកម្ពុជាបើកដំណើរការឡើងវិញនូវវិស័យសេដ្ឋកិច្ច ពាណិជ្ជកម្ម និងជើងហោះហើរជាមួយគ្នា បន្ទាប់ពីស្ថានភាពកូវីដ១៩ រវាងប្រទេសទាំងពីរហាក់ធូរស្រាលមួយកម្រិត។
ការលើកឡើងបានបានធ្វើឡើងក្នុងជំនួបសម្តែងការគួរសមនាព្រឹកថ្ងៃទី២២ ខែសីហា ឆ្នាំ២០២០ជាមួយ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅវិមានសន្តិភាព។ លោក អ៊ាង សុផល្លែត ជំនួយការផ្ទាល់របស់សម្តេចតេជោ ហ៊ុន សែន បានប្រាប់ក្រុមអ្នកសារព័ត៌មាន ថា «លោក(រដ្ឋមន្ត្រីការបរទេសជប៉ុន) បានគោរពស្នើសុំសម្តេចតេជោ ដើម្បីធ្វើយ៉ាងណា បើកដំណើរការឡើងវិញរវាងប្រទេសទាំងពីរ ដោយអនុញ្ញាតឱ្យជប៉ុនធ្វើដំណើរទៅវិញទៅមកជាមួយកម្ពុជា ដើម្បីជំរុញទាំងវិស័យពាណិជ្ជកម្ម ទាំងវិស័យសេដ្ឋកិច្ច ទាំងវិស័យធុរកិច្ចផងដែរ»។សម្តេចតេជោ ហ៊ុន សែន បានប្រកាសគាំទ្រភ្លាមៗ ចំពោះការបើកឱ្យដំណើរការឡើងវិញ លើវិស័យធុរកិច្ច ពាណិជ្ជកម្ម និងអ្វីៗទាំងឡាយដែល ជាការធ្វើដំណើរទៅវិញទៅមករវាងប្រទេសកម្ពុជា-ជប៉ុន ដែលអាចនាំទៅដល់ការពង្រីកទំនាក់ទំនង កាន់តែខ្លាំងថែមទៀត និងជំរុញដំណើរការសេដ្ឋកិច្ច វិនិយោគ រវាងប្រទេសទាំងពីរផង។
សម្តេចបានបន្តថា៖ «ចំពោះការបើកដំណើរការរវាងប្រទេសទាំងពីរ សម្តេចតេជោបានស្នើឱ្យមានការហោះហើរឡើងវិញរបស់ក្រុមហ៊ុន ANA។ ការបើកឱ្យដំណើរការហោះហើរឡើងវិញរបស់ក្រុមហ៊ុន ANA អាចនាំឱ្យការធ្វើដំណើររវាងប្រទេសទាំងពីរ មានដំណើរការធម្មតាឡើងវិញ ជាពិសេសជាមួយនឹងវិធានការមួយចំនួនដែលអាចដាក់ចុះ ហើយការហោះហើរឡើងវិញនេះ អាចជំរុញឱ្យមានការកើនឡើងក្នុងទំហំពាណិជ្ជកម្ម និងការវិនិយោគ»។
លោក ម៉ូតេហ្គី តូស៊ីមីត្សឹ ធ្លាប់បានមកបំពេញទស្សនកិច្ចនៅកម្ពុជា កាលពីឆ្នាំ២០១៤ ហើយពេលនេះ លោកបានក្លាយជា រដ្ឋមន្ត្រីការបរទេសទី១ ដែលបានមកបំពេញទស្សនកិច្ចនៅកម្ពុជា ចាប់តាំងពីពិភពលោករីករាលដាលជំងឺកូវីដ១៩។ ក្នុងដំណើរទស្សនកិច្ចនេះ លោករដ្ឋមន្ត្រីការបរទេសជប៉ុន បានជម្រាបជូនសម្តេចតេជោផងដែរថា ជប៉ុនបានត្រៀមថវិកាមួយចំនួន ដើម្បីចូលរួមជួយទប់ស្កាត់ការរាតត្បាតជំងឺកូវីដ១៩ ផងដែរ។ លោកបានជម្រាបជូន សម្តេចតេជោផងដែរថា ពេលនេះមាននិស្សិតខ្មែរ១៩នាក់ ដែលទទួលបានអាហាររូបករណ៍ ដើម្បីទៅសិក្សានៅប្រទេសជប៉ុន ដែលនិស្សិតទាំងនេះ ត្រូវអនុញ្ញាតឱ្យចូលទៅសិក្សានៅប្រទេសជប៉ុនឆាប់ៗខាងមុខនេះ។
,
សម្តេចតេជោ ហ៊ុន សែន បានថ្លែងអំណរគុណចំពោះជំនួយទាំងឡាយ ដែលជប៉ុនបានជួយដល់កម្ពុជា ដើម្បីទប់ស្កាត់ជំងឺកូវីដ១៩ ហើយក៏បានថ្លែងអំណរគុណចំពោះប្រជាជនជប៉ុន រដ្ឋាភិបាលជប៉ុនផងដែរ ដែលបានជួយដល់កម្ពុជា ជាពិសេសប្រជាជនកម្ពុជា ពលករកម្ពុជា និងនិស្សិតកម្ពុជា ដែលកំពុងសិក្សា និងរស់នៅប្រទេសជប៉ុន។លោក អ៊ាង សុផល្លែតប្រាប់ថា៖ «សម្តេចតេជោបានថ្លែងអំណរគុណជប៉ុនដែលបានបន្តជួយកម្ពុជា ជាពិសេសបន្តជាមួយកម្មវិធី ODA ជំនួយក្រៅប្រទេស ដែល ODA នៅកម្ពុជាពុំមានការពន្យារ ឬបញ្ឈប់ទេ ផ្ទុយទៅវិញកំពុងដំណើរការជាប្រក្រតី»។
នៅឆ្នាំ២០១៩ កន្លងទៅនេះ ទំហំពាណិជ្ជកម្មរវាងកម្ពុជា និងជប៉ុន មានប្រមាណ២ពាន់លានដុល្លារ ក្នុងនោះកម្ពុជានាំចេញទៅជប៉ុនប្រមាណ១,២ពាន់លាន ហើយជប៉ុនបាននាំចូលមកកម្ពុជា ប្រមាណ ៨០០លាន។ ដោយឡែកនៅឆ្នាំ២០២០នេះ រយៈពេលជិត៩ខែ ដំបូងទំហំពាណិជ្ជកម្មរវាងប្រទេសទាំងពីរ មានប្រមាណ៨០០លានដុល្លារ ក្នុងនោះកម្ពុជានាំចេញទៅជប៉ុន ប្រមាណ៥០០លានដុល្លារ និងជប៉ុននាំចូលមកកម្ពុជាប្រមាណ៣០០លានដុល្លារ។ នេះបើតាម សម្តេចតេជោ ហ៊ុន សែន បញ្ជាក់ប្រាប់រដ្ឋមន្ត្រីការបរទេសជប៉ុន។
សូមបញ្ជាក់ថា រដ្ឋាភិបាលជប៉ុន កាលពីខែមិថុនា ឆ្នាំ២០២០កន្លងទៅនេះ បានបន្តផ្តល់ជំនួយឥតសំណង ដែលមានទឹកប្រាក់សរុបចំនួន ៤,៥០១លានយ៉េន (ជាង៤១លានដុល្លារអាមេរិក) ដល់រាជរដ្ឋាភិបាលកម្ពុជា សម្រាប់អនុវត្ដន៍គម្រោងចំនួន៣ ក្នុងនោះមាន៖
* ទី១៖ អាហារូបករណ៍អភិវឌ្ឍន៍ធនធានមនុស្សចំនួន ៣៤៨លានយ៉េន (ប្រមាណ ៣.២លានដុល្លារ)
* ទី២៖ ការធ្វើឱ្យប្រសើរឡើងនៃមន្ទីរពេទ្យបង្អែកខេត្តសៀមរាបចំនួន ២,១៥៣លានយ៉េន (ប្រមាណ ១៩.៨លានដុល្លារ)
* ទី៣៖ កម្មវិធីអភិវឌ្ឍន៍សេដ្ឋកិច្ច និងសង្គម តាមរយៈការផ្តល់សម្ភារវេជ្ជសាស្ត្រសម្រាប់ការការពារ និងការឆ្លើយតបការរីករាលដាលនៃជំងឺកូវីដ-១៩ ចំនួន ២,០០០លានយ៉េន (ប្រមាណ ១៨.៤០លានដុល្លារ)។
ជប៉ុន ក៏បានផ្តល់ជំនួយ សម្រាប់គម្រោងពង្រីកប្រព័ន្ធផ្គត់ផ្គង់ទឹកស្អាតនៅក្រុងតាខ្មៅ (The Project for the Expansion of Water Suppy System in Ta Khmau) ដែលមានទឹកប្រាក់ចំនួន ៣៤២១លានយ៉េនជប៉ុន (ប្រមាណជា៣២លានដុល្លារអាម៉េរិក)ផងដែរ៕