ក្រុមហ៊ុនចំនួនពីរ នៅខេត្តមណ្ឌលគិរី ផលិតមាសបានចំនួន ១២,៥តោនក្រសួងប្រកាសចាត់វិធានាការអ្នករករ៉ែអត់ច្បាប់
07-November-2024 / សេដ្ឋកិច្ច
ភ្នំពេញ៖ គិតត្រឹមថ្ងៃទី០៣ ខែវិច្ឆិកា ឆ្នាំ២០២៤ នេះ កម្ពុជាផលិតបានមាស ចំនួន ៨១៩ដុំ ស្មើនឹងជាង ១២,៥តោន នៅក្នុងខេត្តមណ្ឌលគិរី ។ក្នុងនោះក្រុមហ៊ុន Renaissance Minerals ផលិតបាន ៨០៧ដុំ ស្មើនឹងប្រមាស ១២.៥៣៦គីឡូ និងក្រុមហ៊ុន Rong Cheng ផលិតបាន ១២ដុំ ស្មើនឹងប្រមាណ ២២គីឡូ។អគ្គនាយកដ្ឋានធនធានរ៉ែ នៃក្រសួងរ៉ែ និងថាមពលបានឲ្យដឹងថា៖គិតត្រឹមដើមឆ្នាំ ២០២៤នេះ ក្រសួងរ៉ែ និងថាមពល បានផ្តល់អាជ្ញាប័ណ្ណដល់ក្រុមហ៊ុនចំនួន ៩ សម្រាប់ធ្វើអាជីវកម្មចម្រាញ់រ៉ែមាសក្នុងខេត្តចំនួន ៦ នៅប្រទេសកម្ពុជា។
ក្រុមហ៊ុនទាំង ៩នេះ រួមមាន៖ ក្រុមហ៊ុន Renaissance Minerals (Cambodia) Ltd នៅខេត្តមណ្ឌលគិរី, ក្រុមហ៊ុន Xinshan នៅខេត្ដព្រះវិហារ, ក្រុមហ៊ុន ឌែលខម (Delcom Cambodia) នៅខេត្ដព្រះវិហារ, ក្រុមហ៊ុន Rong Cheng នៅខេត្ដមណ្ឌលគិរី, ក្រុមហ៊ុន Xing Yuan នៅខេត្តក្រចេះ, ក្រុមហ៊ុន LATE CHENG MINING DEVELOPMENT CO., LTD នៅខេត្តកំពង់ធំ, ក្រុមហ៊ុន ភូយ៉ាង នៅខេត្តបាត់ដំបង, ក្រុមហ៊ុន ខេមបូឌាន ខេ៨៨ អ៊ិនដាសស្ទ្រី ឯ.ក នៅខេត្តកំពង់ធំ និងក្រុមហ៊ុនមួយផ្សេងទៀត នៅខេត្តរតនគិរី។
នៅសន្និសីទសារពត៍មាន ស្តីអំពី អំពីយុទ្ធនាការបង្គ្រាបអាជីវកម្មរ៉ែមាសអាណាធិបតេយ្យ ក្នុងភូមិសាស្ត្រតំបន់មេសំ ឃុំចុងផ្លាស់ ស្រុកកែវសីមា ខេត្តមណ្ឌលគិរី នៅថ្ងៃទី ៦ខែវិច្ឆិកា លោក អ៊ឹង អៀង រដ្ឋលេខាធិការក្រសួងរ៉ែ និងថាមពល បានអំពាវនាវដល់ប្រជាពល រដ្ឋ ដែលកំពុងធ្វើអាជីវកម្មរ៉ែមាសយ៉ាងអាណាធិបតេយ្យ ពិសេសនៅខេត្តមណ្ឌលគិរី ឲ្យបញ្ឈប់សកម្មភាពរបស់ខ្លួន ។
លោក អ៊ឺង អៀងថ្លែងថា៖ «លើកនេះ ក្រសួងរ៉ែ និងថាមពល បានដាក់ចេញវិធានការតឹងរឹងចំពោះជនល្មើសដែលមិនរាងចាល ហើយនឹងកាត់ផ្ដាច់នូវមធ្យោបាយនានា ដែលបានប្រើប្រាស់កន្លងមក យើងសូមអំពាវនាវចំពោះប្រជាពលរដ្ឋដែលកំពុងធ្វើអាជីវកម្ម អនាធិបតេយ្យទាំងអស់សូមបញ្ឈប់នូវរាល់សកម្មភាពខុសច្បាប់ទាំងនេះ»។
ដូចគ្នាដែរលោក អ៊ឹង ឌីប៉ូឡា អគ្គនាយក នៃអគ្គនាយកដ្ឋានធនធានរ៉ែ ថ្លែងថាក្រសួងរ៉ែ និងថាមពលនឹងចាត់វិធានការតាមផ្លូវច្បាប់ បញ្ចប់ជីករ៉ែអនាធិបតេយ្យនៅតំបន់ចុងផ្លាស់។សូមបញ្ជាក់ថា ទីតាំងបង្ក្រាបបាននៅតំបន់ចុងផ្លាស់ ខេត្តមណ្ឌលគិរី មាន១៨ទីតាំង ដោយទីតាំងមានរោង និងអណ្តូងរ៉ែ១០ទីតាំង ហើយបានបញ្ជូន ទៅសាលាដំបូងខេត្ត ដើម្បីអនុវត្តនីតិវិធីតាមច្បាប់, ទីតាំងកិនរ៉ែតូចតាច៥ទីតាំង ដោយអប់រំឲ្យបញ្ឈប់ និង៣ទីតាំងទៀត ត្រូវបានស្តារឡើងវិញ ក្រោយទុករណ្តៅរ៉ែចោលជាច្រើនឆ្នាំ។
កាលពីថ្ងៃទី ០១ ខែវិច្ឆិកា រដ្ឋបាលខេត្តមណ្ឌលគិរី ការសហការជាមួយក្រសួងរ៉ែ និងថាមពល អង្គភាពប្រឆាំងអំពើពុករលួយ ក្រុមការងារចម្រុះ ចុះអនុវត្ត វិធានការច្បាប់ជាធរមានដោយគ្មានការលើកលែង ចំពោះបងប្អូនប្រជាពលរដ្ឋ ដែលបាន និងកំពុងពាក់ព័ន្ធនឹងការប្រកបរបរធ្វើរ៉ែមាសតាមរូបភាពផ្សេងៗដូចជា កកាយ ចោះ កាត់បំផ្លាញបេតុងគំរបរណ្តៅរ៉ែ ជីក កិន វែង ប្រមូលកាកសំណល់ និងរ៉ែ គ្រប់ប្រភេទ គ្រប់រូបភាព។
រដ្ឋបាលខេត្តមណ្ឌលគិរីបញ្ជាក់ថា៖ «សូមបងប្អូនបញ្ឈប់គ្រប់ សកម្មភាពជាស្ថាពរ ចាប់ពីថ្ងៃជូនដំណឹងនេះតទៅ និងសូមបងប្អូនដែលមានទីតាំងពាក់ព័ន្ធជាមួយករណី ខាងលើនេះ មេត្តារុះរើប្រមូលសម្ភារៈទាំងឡាយណាដែលមិនបម្រើឱ្យបទល្មើរ៉ែមាស ដោយខ្លួនឯងផ្ទាល់ តាមដែលអាចធ្វើទៅបាន ក្នុងករណីមិនព្រមអនុវត្ត ក្រុមការងារនឹងយកឧបករណ៍ កម្លាំងចុះរុះរើ សំអាត ដើម្បីលុបបំបាត់សកម្មភាពអនាធិបតេយ្យរ៉ែមាស ដែលបានប្រើប្រាស់សារធាតុគីមី គ្រឿងសារធាតុផ្ទុះ បង្កគ្រោះថ្នាក់ដល់សុខភាព មនុស្ស សត្វ និងបរិស្ថានយ៉ាងធ្ងន់ធ្ងរ នៅក្នុងទីតាំងទាំងនេះ»។
ក្រុមការងារមិនអនុគ្រោះ មិនលើកលែង ចំពោះបុគ្គលបានប្រព្រឹត្តប៉ះពាល់លើទីតាំងរណ្តៅ ដែលបានចាក់បេតុងបិទគំរប និងទីតាំងហាមឃាត់ផ្សេងៗទៀត ព្រោះវាបានរំលោភបំពានគោលការណ៍វិធាន និងច្បាប់ ក៏ដូចជាការណែនាំរបស់រដ្ឋបាលខេត្តកន្លងមក ដើម្បីកែប្រែតំបន់នេះឱ្យមានបរិស្ថាន ប្រសើរឡើងវិញ។
ទោះបីជាក្រសួងរ៉ែមិនបានប្រកាសឲ្យដឹងថាក្នុងចំណោមមាសជាង១២តោននេះរដ្ឋបានចំណូលប៉ុន្មានក៏ដៅយតែ មានការកត់សម្គា់ល់ថាសកម្មភាពតឹងរ៉ឺងរបសរាជរដ្ឋាភិបាលលើកនេះគឺធ្វើក្នុងពេលដែលមាសកំពុងឡើងថ្លៃក្នុងទីផ្សារអន្តរជាតិ។
