ផែសម្រាប់កោះទន្សាយកំពុងសាងសង់តែកោះនៅមិនទាន់ដំណើរការទោះមានក្រុមហ៊ុនសថ្មីមកវិនិយោគក៏ដោយ!
26-March-2024 / សេដ្ឋកិច្ច
ខេត្តកែប៖កោះទន្សាយគឺជាទីរមណីយដ្ឋានធម្មជាតិដ៏ស្រស់ត្រកាលមួយរបស់ខេត្តកែប ប៉ុន្តែអ្នកទេសចរពិបាកនឹងស្នាក់នៅពេលយប់នៅលើកោះមួយនេះណាស់ដោយសារតែវាមិនមានការរៀបចំហេដ្ឋរចនាសម្ព័ន្ធទេសចរណ៍សមរម្យនិងមិនមានសន្តិសុខគ្រប់គ្រាន់ចាំទទួលស្វាគមន៍អ្នកទេសចរនោះឡើយ។
ទាក់ទងនិងការអភិវឌ្ឈន៍កោះទន្សាយនៅព្រឹកថ្ងៃទី២ខែកុម្ភៈនៅក្នុងសន្និសីទសារព័ត៌មានស្តីពីក្រោមប្រធានបទ«វឌ្ឍន៍ភាពមូលដ្ឋានឃុំ សង្កាត់ របស់ខេត្តកែប »ដែលរៀបចំដោយអង្គភាពអ្នកនាំពាក្យរាជរដ្ឋាភិបាលថា។លោក វ៉ៅ សុខាអភិបាលរងខេត្តកែប បានឲ្យដឹងថា៖«រាជរដ្ឋាភិបាលផ្តល់ឲ្យក្រុមហ៊ុនចំនួន២ ធ្វើការវិនិយោគតាំងពីឆ្នាំ ២០០៩គឺក្រុមហ៊ុន Paul Chan Group និងLim Sina Investment។ក្រុមហ៊ុន Paul Chan Groupទទួលបានដីទំហំ ៩៥,៥៩ ហិកតានិងក្រុមហ៊ុន Lim Sina Investment ៥១,២១ ហិកតា ។ក្រុមហ៊ុនអភិវឌ្ឍន៍ទាំងពីរគ្រោងសាងសង់រមណី យដ្ឋាននៅលើកោះនេះ ដែលមានរយៈពេលវិនិយោគ៩៩ ឆ្នាំ ។
ប៉ុន្តែមកដល់ឆ្នាំ ២០១៨ រាជរដ្ឋាភិបាលបានស្រេចដកសិទ្ធិពីក្រុមហ៊ុនទាំតងពីនោះត្រឡប់មកវិញដោយសារ តែមិនបានធ្វើអ្វីសូម្បីតែបន្តិចហើយថ្មីៗនេះមានក្រុមហ៊ុនថ្មីមួយទៀតទទួលបានសិទ្ធិវិនិយោគជាថ្មីក៏ប៉ុន្តែក៏នៅតែមិនមានសកម្មភាពដោយកំពុងដោះស្រាយជាមួយប្រជាពលរដ្ឋ៦គ្រួសារ ។
បច្ចប្បន្ននៅលើឆ្នេរកោះនេះសកម្មភាពទេសចរណ៍គឺមានលក្ខណៈធម្មតាដោយអ្នកទេសចរដេកហាលថ្ងៃនិងមុជទឹកលេង ។ ឆ្នេរដែលប្រជាពលរដ្ឋចំនួន ៦ គ្រួសារផ្តល់សេវា បាំងហ្គាឡូ និងភោជនីយដ្ឋានបែបស្រុកស្រែនៅតែជាកម្មសិទ្ធិរបស់រាជរដ្ឋាភិបាលហើយនឹងមិនរងគ្រោះពីការអភិវឌ្ឍនោះទេ ។
កោះទន្សាយទោះបីមិនទាន់មានហេដ្ឋារចនាសម្ព័ន្ឋងាយស្រួលធ្វើដំណើរក៏ដោយតែឆ្នេរកោះទន្សាយជាកន្លែងងូតទឹកកំសាន្តដ៏សប្បាយរីករាយសម្រាប់ អ្នកទេសចរណ៍ក្នុងស្រុកនិងអន្តរជាតិ។ កោះនេះមានឈ្មោះល្បីល្បាញបំផុតសម្រាប់ខេត្តតូចច្រឡឹងនេះដោយសារខេត្តនេះមានឆ្នេរខ្សាច់ដែលមានទម្រាលទឹកសមុទ្រងាយ ស្រួលងូតកំសាន្ត មានទេសភាពដើមដូងដ៏ស្រស់ស្អាត មានព្រៃធម្មជាតិស្អាតជាងគេ ក្នុងចំណោមកោះទាំង ១២ ដែលស្ថិតក្នុងដែលទឹកនៃខេត្តកែប។
ក្រោមគោលនយោបាយលើកកម្ពស់វិស័យទេសចរណ៍ខេត្តកែបបានក្លាយជាទីក្រុងអាស៊ានឈានមុខបច្ចុប្បន្ននេះ ក្រៅពីគម្រោងស្ដារនិងស្ថាបនាហេដ្ឋារចនាសម្ព័ន្ធនៅទូទាំង ខេត្ត ក្រុង ទាំងមូលរួមមានផ្លូវថ្នល់ តំបន់ឆ្នេរ និង តំបន់ទេសចរណ៍ធម្មជាតិផ្សេងៗទៀតនៅទាំង ១២ កោះ និង ថ្មប្រប្រ៉ះទឹក ។ រាជរដ្ឋាភិបាលបានសម្រេចការសាង សង់កំពង់ផែទេសចរណ៍អន្តរជាតិកោះទន្សា ដែលមានតម្លៃជាង១លានដុល្លារ ។
លោក ម៉ម ទូច ប្រធានមន្ទីរសាធារណការនិងដឹកជញ្ជូនខេត្តកែបបានឲ្យដឹងថា៖ កំពង់ផែកោះទន្សាយដែលបានកសាងនេះចាប់ផ្ដើមនៅឆ្នាំ២០២០ហើយបានពន្យាពេល (នៅចុងឆ្នាំ២០២០)រហូតមកដល់បច្ចុប្បន្ននេះដោយ សារកត្តាពីរ ទី១.ដោយសារកូវីដនិងទី២.ដោយសារលក្ខណៈបច្ចេកទេសតែទោះជាយ៉ាងណាផែននេះនឹងត្រូវបញ្ចប់ នៅចុងខែសីហា ឆ្នាំ២០២១នេះ។
ប្រធានមន្ទីរសាធារណការនិងដឹកជញ្ជូនខេត្តកែបរូបនេះបានបន្ដទៀតថាកំពង់ផែកោះទន្សាយនេះបានសាងសង់ឡើងមានផ្ទៃទំហំ៣,៤៧០ម៉ែត្រការ៉េជម្រៅទឹកពី៣ម៉ែត្រទៅ៤.៧ម៉ែត្រដែលអនុញ្ញាតឲ្យតែនាវាដឹកអ្នកដំណើរប្រភេ ទលេខ១និងប្រភេទលេខ២ប៉ុណ្ណោះដែលអាចចូលចតបានហើយនាវាធំជាងនេះមិនអាចចូលបាននោះឡើយ ។ បើ តាមលោក ម៉ម ទូច នាវាប្រភេទលេខ១ អាចចេញពីឆ្នេរបានចម្ងាយប្រមាណពី ៤៨ គីឡូម៉ែត្រទៅ ៥៦ គីឡូម៉ែត្រ ផ្ទុកអ្នកដំណើរចាប់ពី៣០នាក់ ទៅ១០០នាក់ ។ នាវា ប្រភេទលេខ២ អាចធ្វើដំណើរចេញពីឆ្នេរបានចម្ងាយពី ១៦១ គីឡូម៉ែត្រ ទៅ១៩៣ គីឡូម៉ែត្រអាចផ្ទុកអ្នកដំណើរពី ១០០នាក់ ទៅ៣០០នាក់។
កំពង់ផែនេះបានកំពុងសាង សង់នៅលើទីតាំងផែចាស់ស្ថិតក្នុងភូមិកែប សង្កាត់កែប ក្រុងកែប ខេត្តកែប ដែលមានចម្ងាយពីដីគោកចូលទៅក្នុងសមុទ្រប្រមាណ ៣០៦ម៉ែត្រ ទទឹង ៦៨ ម៉ែត្រ បច្ចុប្បន្ន សាងសង់បានប្រមាណ ៦០ ភាគរយ ។ក្រោយពីបញ្ចប់ការសាងសង់កំពង់ផែទេសចរណ៍អន្តរជាតិមួយនេះគួបផ្សំនឹងការកែលម្អនូវហេដ្ឋារចនាសម្ព័ន្ធនានាខេត្តគេជឿថាខេត្តកែបនឹងកាន់តែមានសក្ដានុពលខ្លាំងក្នុងការទាក់ទាញកំណើនទេសចរជាតិនិងអន្តរជាតិជាពិសេសក្រោយវិបត្តិនៃជំងឺ Covid-19 ។សូមបញ្ជាក់ថា ចំនួនភ្ញៀវទេសចរណ៍នៅខេត្តកែបបានធ្លាក់ចុះ ២០,១១ភាគរយពីចំនួន ១,៧៤៧,៦២២នាក់នៅឆ្នាំ២០១៩មកនៅត្រឹមចំនួន ១,៣៩៦,១២៥ នាក់នៅឆ្នាំ២០២០ ។ នេះបើយោងតាម លោក សំ សារីន ប្រធានក្រុមប្រឹក្សាខេត្តកែប ។
