សម្តេចតេជោផ្តាំឲ្យយន្តហោះស៊ីវិលឲ្យដឹកលោកសមរង្ស៊ីចូលស្រុកនិងប្រាប់ពីនីតិវិធីលើកលែងបំរាមនយោបាយដល់អតិតន្ត្រីគណបក្សង្គ្រោះជាតិ១១៨នាក់
ភ្នំពេញ៖សម្ដេចតេជោ ហ៊ុនសែននាយករដ្ឋមន្ដ្រីកម្ពុជានៅថ្ងៃទី២៦ ខែធ្នូ ឆ្នាំ២០១៨ផ្តាំទៅគ្រប់ក្រុមហ៊ុនអាកាសចរណ៍ស៊ីវិលទាំងអស់ ឲ្យដឹក(លោកសម រង្ស៊ី) ចូលស្រុកខ្មែរ ព្រោះខ្នោះដៃរងចាំទទួលនិងប្រាប់ពីវិធីលើកបំរាមអ្នកនយោបាយ១១៨រូប ។
ក្នុងពិធីជួបសំណេះសំណាលជាមួយកម្មករជាង១ម៉ឺននាក់ ខេត្តកណ្តាល សម្ដេចមានប្រសាសន៍ថា “ខ្ញុំបានប្រាប់ទៅអាកាសចរណ៍ កុំឲ្យហាមឃាត់ (លោក សម រង្ស៊ី)។ អាកាសចរណ៍ទាំងអស់ ដឹកអាជនហ្នឹង គឺឲ្យគេដឹកមក ខ្ញុំក៏ចង់ជម្រះបញ្ជីជាមួយអាជននេះឲ្យបានច្បាស់។ សម្ដេចបន្ដថា “សូមអញ្ជើញមក ខ្ញុំក៏បានត្រៀមខ្លួនហើយដែរ ប៉ុន្តែបើសិនអ្នកឯងមិនមកថ្ងៃទី១ ខែមីនា ដែលជាឱសានវាទនៃការភ្នាល់ គឺអ្នកឯងជាសត្វឆ្កែសុទ្ធ ខ្ញុំហៅអ្នកឯងជាឆ្កែ គ្រាន់តែព្រុស បើពូកែណាស់! ។ ពេលណាក៏រត់ដែរឲ្យតែមានរឿងគឺរត់ មិនថារឿងតូច ឬរឿងធំ គឺដឹងតែរត់ រួចហើយតាំងប្រកាសមកហើយ”។
សូមប្រាប់ទៀត ព្រលានយន្ដហោះ មាន៣ដែលសម្រាប់ចុះចត ។ ១-ទីក្រុងភ្នំពេញ , ២-សៀមរាប និង៣-ព្រះសីហនុ អាចចុះចតបានទាំង៣កន្លែង ទៅតាមបំណងរបស់អ្នកជិះ ប៉ុន្ដែខ្នោះវាទៅតាមទីកន្លែងនោះដែរ វាយតាមបែបអាមេរិកដាក់ខាងក្រោយ” ។
សម្ដេចតេជោបញ្ជាក់ថា លើកមុនសម្ដេចលើកលែងទោសឲ្យ ព្រោះចំថ្ងៃឪពុករបស់សម្ដេចទទួលមរណភាព ប៉ុន្ដែលើកនេះ សម្ដេចមិនលើកលែងទោសឲ្យទៀតទេ ។ លោក សម រង្ស៊ី ដែលបច្ចុប្បន្នឡើងជាប្រធានស្តីទី តែងតែអួតអាងនៅក្រៅប្រទេសថា នៅឆ្នាំ២០១៩ខាងមុខនេះលោក នឹងវិលត្រឡប់ចូលមកស្រុក ដើម្បីដឹកនាំអតីតគណបក្ស សង្គ្រោះជាតិ។
សម្ដេចបន្ថែមថា នៅមិននៅ ទៅយកសេរីភាពរបស់អ្នកដទៃមកភ្នាល់ បើសម្ដេចមិនភ្នាល់ទេ គឺគេថាសម្ដេច កំសាកអន់ ប៉ុន្តែ សម រង្ស៊ី ចាប់ចំណុចខុសបំផុត។ សម្ដេចថា បើមិនទាន់កាត់ទោសផង តើមានទោសមកពីណានឹងត្រូវលើកលែង ទោះបីជាសេះដុះស្នែង។
មិនមានប្រតិកម្មពីលោកសមរង្ស៊ីទេចំពោះការលើកឡើងរបស់សម្តេចតេជោតែកាលពីថ្ងៃទី២៥ធ្នូលោក សម រង្ស៊ី បានបង្ហោះវីដេអូស្ដីពី ការគាំទ្របង្ហាញពីមន្ត្រីជាប់ឆ្នោត និងសកម្មជនមូលដ្ឋាន របស់គណបក្សសង្គ្រោះជាតិ នៅប្រទេសមួយចំនួន និងនៅខេត្តសៀមរាប កំពង់ចាម ព្រះសីហនុ កំពង់ធំ និង បាត់ដំបង គាំទ្រលោក សម រង្ស៊ី ជាប្រធានស្តីទី គណបក្សសង្គ្រោះជាតិ និងគាំទ្រពាក្យស្លោក “សម រង្ស៊ី និង កឹម សុខា ជាមនុស្សតែមួយ” ។
លោក សម រង្ស៊ី ថា ពាក្យស្លោក “សម រង្ស៊ី និង កឹម សុខា ជាមនុស្សតែមួយ” គឺជារូបមន្តទិព្វ ដើម្បីឲ្យខ្មែររួបរួមគ្នា ក្នុងគោលបំណងកម្ចាត់អំណាចផ្តាច់ការ តាមវិធីដ៏ត្រជាក់ជាទីបំផុត។ គ្មាននរណាអាច មករករឿងយើងបានទេ បើយើងគ្រាន់តែទន្ទេញពាក្យស្លោកនេះ ទាំងអស់គ្នា។ មានតែឯកភាពទេ ដែលធានាជ័យជំនះរបស់យើង” ។
សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងថា សម្ដេចមិនខ្វល់ខ្វាយ ចំពោះការបង្ហោះនេះឡើយ “ខ្ញុំគ្រាន់តែបញ្ជាក់ អត់ចង់តមាត់តកអីទេ គេប្រខាំប្រចាក់គ្នា ឥឡូវគេដើរបង្ហោះហ្វេសប៊ុក តាមឃុំតាមស្អីៗ ដើម្បីគាំទ្រប្រធានស្ដីទី អាល្លង់តា ប៉ារីសអីណា ហ្នឹងគេស្អីគេថា បក្សប្រហារ បក្សស្អីណារឿងរបស់គេទៅ តែរឿងរបស់យើងខ្ញុំ សូមបញ្ជាក់ ព្រោះមានបងប្អូនយើងខ្លះ មួយចំនួនដែលចូលមក គណបក្សប្រជាជនគាត់កុំមានការបារម្ភ” ។
ក្រៅពីផ្តាំទៅលោកសមរង្ស៊ីសម្តេចតេជោក៏បានប្រាប់ពីនីតិវិធិនៃលោកលើកលែងទោសបំរាមហាមធ្វើនយោបាយដល់អតីតមន្ត្រីជាំន់ខ្ពស់គណបក្សសង្គ្រោះជាតិទាំង១១៨នាក់ផងដែរក្រោយពីព្រឹទ្ធសភាអនុមត័ការធ្វើវិសោធនកម្មមាត្រា៤៥ច្បាប់គណបក្សនយោបាយ។«មនុស្សមួយចំនួនដែលកំពុងជាប់បម្រាមនេះ អ្នកឯងត្រូវតែធ្វើការស្នើសុំម្តងម្នាក់ៗ មិនមែនច្បាប់នេះចេញទៅរួចខ្លួនដោយស្វ័យប្រវត្តិទេ អ្នកឯងត្រូវធ្វើការសុំម្តងម្នាក់ មិនមែនធ្វើការសុំម្ត១កញ្ចប់ទេ ផ្តាំឱ្យហើយ សុំម្តងម្នាក់»។
សម្តេចតេជោ បានបន្តទៀតថា សំណើអាចធ្វើឡើង៣ជម្រើស គឺទី១៖ អាចស្នើទៅរដ្ឋមន្ត្រីក្រសួងមហាផ្ទៃផ្ទាល់ ហើយរដ្ឋមន្ត្រីមហាផ្ទៃលើកសំណើមកនាយករដ្ឋមន្ត្រី នាយករដ្ឋមន្ត្រីលើកសំណើថ្វាយព្រះមហាក្សត្រ ព្រះមហាក្សត្របានចេញព្រះរាជក្រឹត្យលើកលែងបម្រាមនោះ។ ចំណែកជម្រើសទី២ គឺជាសំណើរទៅកាន់នាយករដ្ឋមន្ត្រី ហើយនាយករដ្ឋមន្ត្រីនឹងបញ្ជូនទៅរដ្ឋមន្ត្រីមហាផ្ទៃ ដើម្បីពិនិត្យលក្ខណៈសម្បត្តិ បន្ទាប់មករដ្ឋមន្ត្រីក្រសួងមហាផ្ទៃស្នើត្រឡប់មកវិញ ទើបនាយករដ្ឋមន្ត្រីនឹងស្នើថ្វាយព្រះមហាក្សត្រ។ ដោយឡែកជម្រើសទី៣ គឺជាសំណើលិខិតត្រង់ថ្វាយព្រះមហាក្សត្រ តាមទម្លាប់ធម្មតា ព្រះមហាក្សត្រឹនឹងបញ្ជូនលិខិតនោះមកឱ្យនាយករដ្ឋមន្ត្រីមានយោបល់ នាយករដ្ឋមន្ត្រីនឹងផ្តល់នូវសំណើនោះ ទៅឱ្យរដ្ឋមន្ត្រីក្រសួងមហាផ្ទៃពិនិត្យលក្ខណៈសម្បត្តិ ពេលរដ្ឋមន្ត្រីមហាផ្ទៃពិនិត្យរួចហើយ ក៏បញ្ចូនត្រឡប់មកនាយករដ្ឋមន្ត្រីវិញ នាយករដ្ឋមន្ត្រីក៏នឹងស្នើថ្វាយព្រះមហាក្សត្រតែម្តង។
សម្តេចតេជោ បញ្ជាក់ថា «សូមកុំភាន់ច្រឡំថា លើក១កញ្ចប់តែម្តង គឺអត់ទៅរួចទេ ម្នាក់ម្តងតាមលក្ខណៈសម្បត្តិមនុស្សម្នាក់ៗប៉ុណ្ណោះ ពិតហើយខ្ញុំបានលឺគេថា "ខ្ញុំមិនសុំ" អ្នកមិនសុំខ្ញុំសូមអរគុណ អ្នកក៏នឹងមិនបានចូលរួមការបោះឆ្នោត ឃុំសង្កាត់នៅឆ្នាំ២០២២ដែរ អ្នកជ្រើសរើសទៅ រវាងម្ខាងអ្នកសុំ អ្នកនឹងបានសិទ្ធិធ្វើនយោបាយពីឥឡូវ រៀបចំកម្លាំង រហូតដល់ឆ្នាំ២០២២ ប៉ុន្តែប្រសិនបើអ្នកជាប់បម្រាម អ្នកហ៊ានធ្វើនយោបាយ អ្នកនឹងទទួលទោសបន្ថែមទៀត អ្នកគិតមើលទៅ ចំណេញខាតនៅកន្លែងណា អ្នកគិតមើលទៅ ខ្ញុំអត់បង្ខំអ្នកទេ តែច្បាប់បានបើកហើយ ពីមុននេះបានស្នើសុំ ប៉ុន្តែសាលដីកាតុលាការកំពូលដែលចេញហើយ បិទផ្លូវតវ៉ា ឥឡូវយើងបើកច្រកហើយ អ្នកចង់ចេញក៏ចេញចង់ចូលក៏ចូល ខ្ញុំអត់បង្ខំអ្នកទេ ផ្ទុយទៅវិញខ្ញុំអរគុណអ្នកទៅវិញបើអ្នកមិនសុំ ព្រោះចៀសវាងភាពរញ៉េរញ៉ៃ ព្រោះបើគ្មានពួកអ្នកទេ ក៏មាន២០គណបក្ស ឬលើកពីនេះ គេកំពុងធ្វើសកម្មភាពនយោបាយនៅក្នុងប្រទេសនោះដែរ អត់ពួកអ្នកអត់ខ្មែរអត់ងាប់ដែរ»៕
