មនុស្សជាង១សែននាក់គាំទ្រញត្តិទាមទារដោះលែងសកម្មជនការពារបរិស្ថាន០៥រូបនៃចលនាមាតាធម្មជាតិ

មនុស្សជាង១០ម៉ឺនបានចូលរួមគាំទ្រញាត្តិទាមទារឱ្យរដ្ឋាភិបាលកម្ពុជាដោះលែងសកម្មជនការពារបរិស្ថាននៃចលនាមាតាធម្មជាតិចំនួន៥រូបដែលត្រូវបានតុលាការសម្រេចផ្តន្ទាទោសឱ្យជាប់ពន្ធនាគារកាលពីថ្ងៃទី០២ ខែសីហា ឆ្នាំ២០២៤។ នេះបើផ្អែកតាមតួលេខពីអង្គការជួយសង្គ្រោះព្រៃឈើ Rainforest Rescue និងដោយបន្ថែមថា ក្នុងចំណោមមនុស្សទាំងជាង ១០ម៉ឺននាក់ដែលចូលរួមគាំទ្រញាត្តិដោះលែងសកម្មជនមាតាធម្មជាតិ មានភាគច្រើនជាពលរដ្ឋខ្មែរដែលរស់នៅក្នុងប្រទេស និងក្រៅប្រទេស។ 

គិតមកត្រឹមថ្ងៃទី២២ ខែកញ្ញា ឆ្នាំ២០២៤ មានមនុស្សចំនួន១០៣ ២៤០ នាក់បានចូលរួមគាំទ្រញាត្តិទាមទារឱ្យរដ្ឋាភិបាលកម្ពុជារបស់លោកនាយករដ្ឋមន្ត្រីហ៊ុន ម៉ាណែតទម្លាក់ចោលរាល់ការចោទប្រកាន់ ពិសេសដោះលែងសកម្មជនការពារបរិស្ថាននៃចលនាមាតាធម្មជាតិជាបន្ទាន់ និងដោយឥតលក្ខខណ្ឌ។

កញ្ញា ស៊ុន រដ្ឋា សកម្មជនចលនាមាតាធម្មជាតិបានឲ្យដឹងថា ក្រុមសកម្មជនត្រូវការសំឡេងគាំទ្រញាត្តិយ៉ាងហោចណាស់ចំនួន១៥ម៉ឺននាក់ដើម្បីដាក់ទៅអង្គការសហប្រជាជាតិ អង្គការអន្តរជាតិនានានៅលើពិភពលោក រួមទាំងបណ្តាប្រទេសដែលមានកិច្ចសហប្រតិបត្តិការជាមួយកម្ពុជាដើម្បីទាមទារឱ្យមានការដោះលែងសកម្មជនបរិស្ថានដែលកំពុងជាប់ឃុំក្នុងពន្ធនាគារ។

តាមកញ្ញា ស៊ុន រដ្ឋា ប្រសិនបើរដ្ឋាភិបាលមិនព្រមដោះលែងសកម្មជនការពារបរិស្ថានតបតាមការទទូចរបស់អង្គការអន្តរជាតិ និងសហគមន៍អន្តរជាតិទេ នោះកម្ពុជានឹងខាតបង់ផលប្រយោជន៍ច្រើនដោយរាប់ចាប់ពីការវិនិយោគពីបរទេស ពិសេសខូចមុខមាត់កម្ពុជានៅលើឆាកអន្តរជាតិ។

លោកប៉ែន បូណា ប្រធានអង្គភាពអ្នកនាំពាក្យរាជរដ្ឋាភិបាលបានបញ្ជាក់មកវិទ្យុបារាំងអន្តរជាតិ RFI នៅព្រឹកថ្ងៃទី២២ ខែកញ្ញានេះថា គ្មានស្ថាប័ន ឬញាត្តិណាមួយមានឥទ្ធិពលលើការអនុវត្តច្បាប់របស់ស្ថាប័នតុលាការនៅកម្ពុជាឡើយ។ ត្រង់ចំណុចនេះត្រូវបានលោកប៉ែន បូណាពន្យល់ថា តុលាការខ្មែរមានឆន្ទានុសិទ្ធិ និងសិទ្ធិសម្រេចពេញលេញដោយគ្មានបរទេសណាមួយមកបង្គាប់បញ្ជាបានជាដាច់ខាត។ សម្រាប់លោកប៉ែន បូណា តុលាការខ្មែរអនុវត្តច្បាប់ចំពោះតែបុគ្គលណាដែលប្រព្រឹត្តិសកម្មភាពល្មើសនឹងច្បាប់តែប៉ុណ្ណោះ។

សូមជម្រាបថា កាលពីថ្ងៃទី០២ ខែកក្កដា ឆ្នាំ២០២៤ សាលាដំបូងរាជធានីភ្នំពេញបានប្រកាសសាលក្រមផ្ទន្ទាទោសដាក់ពន្ធនាគារសកម្មជនការពារបរិស្ថាននៃចលនាមាតាធម្មជាតិចំនួន១០នាក់ ចន្លោះពី៦ឆ្នាំដល់៨ឆ្នាំ ក្រោមបទចោទរួមគំនិតក្បត់ និងប្រមាថអង្គព្រះមហាក្សត្រ។ ក្នុងចំណោមអ្នកទាំង១០ខាងលើ មានសកម្មជនការពារបរិស្ថាន៥នាក់ត្រូវបានសមត្ថកិច្ចចាប់ខ្លួនភ្លាមៗ និងបញ្ចូនទៅឃុំខ្លួននៅពន្ធនាគារតាមបណ្តាខេត្តផ្សេងៗគ្នា ក្រោយតុលាការប្រកាសសាលក្រម។ 

អ្នកទាំង៥នោះ រួមមានលោក ថុន រដ្ឋា កញ្ញា ភួន កែវ រស្មី កញ្ញា ឡុង គន្ធា លោក យឹម លាវហ៊ី និងលោក លី ចាន់ដារ៉ាវុត ខណៈមនុស្ស០៥នាក់ផ្សេងទៀតកំពុងរស់នៅក្រៅប្រទេស៕(អត្ថបទវីទ្យុបារាំងអន្តរជាតិ)